उत्पत्ती 14
14
अब्राममी लोत कली प्रोंइशो
1मिनु शिनार ङा पिप अम्राफेल, एल्लासार ङा पिप अरयोक, एलाम ङा पिप केदोर-लाओमेर नु गोयीम रागी ङा पिप तिदालम सासन पामे ना, यहोसु १२:२३ 2सोदोम ङा पिप बेरा, गोमोररा ङा पिप बिरशा, अदमाह ङा पिप शिनाब नु सेबोयीम ङा पिप शेमेबेर, बेला सहर ङा पिप नु लडाइ पामे बाक्त। बेला सहर कली सोआर यो देंनीम। उत्पत्ती १९:२४ 3मेको नेल्ल सिददीम दिंममी लडाइ पथ खुम्सीशो बाक्मा बाक्त। 4मारदे हना मेकोपुकीमी लडाइ का ब्रुशा नोले, १२ बर्स सम्म श्येत जशा, पिप केदोर-लाओमेर कली मार मार गेचा माल्मा बाक्त। मोपतीके मेकोपुकीम १३ बर्समी “मगेय, लडाइ पय” दे सल्ला पामे बाक्त। 5मिनु १४ बर्समी पिप केदोर-लाओमेर नु मेको आ वारच पिपपुकी अश्तारोथ-कारनाइमम बाक्ब रेफाइमपुकी, हामम बाक्ब जूजीमपुकी, शावेह-किरयथ-थाइम बाक्ब एमीमपुकी, उत्पत्ती ३६:२०-३० 6सेइर पहाडम बाक्ब होरी आ मुर नेल्ल आन कली एल-पारान मुर बाक्तीक आ नेक्था सम्म फ्रूमे बाक्त। 7मेको ग्राब पिप आन लां लेश्शा, एन-मिश्पात जाक्शा, हासासोन-तामारम बाक्ब अमालेकी नु एमोरी आन कली फ्रूमे बाक्त। एन-मिश्पात कली कादेश यो देंनीम।
8मेना सोदोम ङा पिप, गोमोररा ङा पिप, अदमाह ङा पिप, सेबोयीम ङा पिप नु बेला ङा पिप सल्ला पशा, बेला सहर कली सोआर यो देंनीम 9सिददीम दिंममी एलाम ङा पिप केदोर-लाओमेर गोयीम रागी ङा पिप तिदाल, शिनार ङा पिप अम्राफेल नु एल्लासार ङा पिप अरयोक नु लडाइ पथ जाक्मा बाक्त। ४ जना पिपपुकीम ५ जना पिप नु लडाइ पशो बाक्मा बाक्त। 10मिनु सिददीम ङा दिंममी अल्कत्रा खाल्टा शुश बाक्मा बाक्त। मिनु सोदोम नु गोमोररा ङा पिप प्रोक्शा, खाल्टा आगा दोक्सा बाक्त। लीशो मुरपुकी चहिं पहाड गे प्रोक्मा बाक्त। 11मिनु केदोर-लाओमेर नु आ हुलमी सोदोम नु गोमोररा सहर ङा मुर नु आन मार मार नेल्ल रोइश्शा लदमे बाक्त। 12मिनु मेकोपुकीमी सोदोम सहरम बाक्शो अब्राम आ लोक्ब आ तौ लोत नु आ मारेइ मारेइ नेल्ल यो लाइश्शा लमा बाक्त। उत्पत्ती १३:१०-१२
13मिनु पहाडम प्रोक्शो मुर कामी हिब्रू अब्राम कली मेको लोव़ शेंदा बाक्त। अब्राम चहिं एमोरी माम्रे आ ब्वाकीम बाक्शो बाक्माक्त। माम्रे एश्कोल नु आनेर वोबु बाक्सा बाक्त। मेको अब्राम कली वारच पाइब बाक्मा बाक्त। 14मिनु अब्राममी आ लोक्ब आ तौ ग्याइश्शो नेंशा, आ खिंमी जरमेशो सहे सां १८ जना लडाइ पचा कली शेंसीशो मुर कली या गेशा, ठीक पवा बाक्त। मिनु मेकोपुकीमी रोइक्ब आन कली दान सहर सम्म खेदा पामे बाक्त। यहोसु १९:४७; न्यायाधीस १८:२९ 15नाक्दोमी अब्राममी आ मुर आन कली हुल निक्शी पशा, रोइक्बपुकी नु लडाइ पशा ग्राशा, होबाह सम्म खेदा पामे बाक्त। होबाह दमस्कस सहर आ उत्तर गे बाक्ब। 16मोदेंशो पा अब्राममी सोदोम नु गोमोररा रे रोइश्शा मारेइ मारेइ नु आ लोक्ब आ तौ लोत आ मारेइ मारेइ नेल्ल, मीश मुर नेल्ल नु मेको निक्शी सहर ङा मुर नेल्ल लेप्पदा बाक्त।
मेल्कीसेदेक नु अब्राम
17मोपा अब्राम केदोर-लाओमेर नु आ वारच पिपपुकी नु लडाइ पशा ग्राशा, लेश्शा नोले सोदोम ङा पिप शावेह माइश्शो दिंमम जाक्शा, अब्राम कली ग्रुम्थ जाक्माक्त। शावेह माइश्शो दिंम कली पिप आन दिंम यो देंनीम। हिब्रू ७:१-४ 18मिनु सालेम ङा पिप मेल्कीसेदेकम अब्राम नु आ मुर आन कली शोब्ले नु अङगुर शांबु चाक्गा बाक्त। मेको नेल्ल क्येङा ठेयब परमप्रभु कली चढ़ेब बाक्माक्त। भजन संग्रह ११०:४; भजन संग्रह ७६:३ 19मिनु मेकोमी अब्राम कली आसीक गेशा “सरीङ नु रागी सेल्ब नेल्ल क्येङा ठेयब परमप्रभु आ आसीक इ कली रल। 20मिनु नेल्ल क्येङा ठेयब परमप्रभु मान ताइब बाक्ब। मारदे हना इ जोरी सत्रु इ गुइमी गेशा, इ कली ग्रापाइक्तु” दे ठेयब सेला बाक्त। मिनु अब्राममी नेल्ल थोव़क १० भाग ङा भाग का मेल्कीसेदेक कली गेवा बाक्त। उत्पत्ती २८:२२; लेवी २७:३०-३२ 21मिनु सोदोम ङा पिपमी अब्राम कली “मुर ला गेयी। अरु मार मार इन कली दुम्ल” देंमाक्त। 22मिनु अब्राममी सोदोम ङा पिप कली “गो आं गुइ परमप्रभु यावे, नेल्ल क्येङा ठेयब सरीङ नु रागी सेल्ब परमप्रभु गे पोक्शा कसम जाता। 23गो इन के मारेइ मलाइक्नुङ। श्येले का, जुत्ता आ डोरी का यो मलाइक्नुङ। मिनु गेमी ‘गो अब्राम कली शुश शोंप पाइश्शो सेल्ता’ दे गेनायो देंने मचाप्नीनी। 24आं गेय पाइब आन जशो चहिं लाइक्नुङ। गो नु गाक्ब आनेर, एश्कोल नु माम्रे आन भाग चहिं लाइक्चा गेन” देंमाक्त।
Currently Selected:
उत्पत्ती 14: susz
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
