Dagiti Salmo 119
119
Ti Linteg ni Yahweh
1Nagasat dagiti awan mulit ti panagbiagna,
nga agbibiag kas mayannurot iti linteg ti Apo!
2Nagasat dagiti mangtungpal kadagiti bilinna,
wen, nagasat dagiti agtulnog kenkuana iti amin a pusoda.
3Pulos nga awan dakes nga aramidenda;
magnada kadagiti dalan ti Apo.
4Intedmo kadakami, O Apo, dagiti linlintegmo,
ket imbilinmo a tungpalenmi ida a siiinget.
5Sapay koma ta agtalinaedak a napudno
a mangannurot kadagiti ipaalagadmo!
6Pulos nga awanto ti pannakaibabainko,
no tungpalek dagiti amin a bilinmo.
7Agdaydayawakto kenka iti nadalus a puso,
no masursurok dagiti nalinteg a pangngeddengmo.
8Tungpalek dagiti linlintegmo;
dinak koma baybay-an uray inton kaano.
Panagtungpal iti Linteg ni Yahweh
9Kasano a pagtalinaeden ti agtutubo
ti nadalus a panagbiagna?
Babaen iti panagtungpalna
kadagiti bilinmo.
10Iti amin a pusok, ikagumaak ti agserbi kenka;
dinak koma baybay-an a mayaw-awan
iti panangtungpalko kadagiti bilinmo.
11Idulinko dagiti lintegmo iti pusok
tapno saanak nga agbasol kenka.
12Idaydayawka, O Apo;
isurom kaniak dagiti daldalanmo.
13Ulitek nga iwaragawag iti napigsa
dagiti amin a linteg nga inka inted.
14Naragsakak a mangtungpal kadagiti bilinmo,
a kas iti panangikutko iti sanikua nga adu.
15Adalek dagiti pannursurom,
ket imutektekak dagiti pammagbagam.
16Maragsakanak kadagiti lintegmo;
saankonto a lipaten dagiti bilinmo.
Ragsak a Masarakan iti Linteg ni Yahweh
17Paraburannak kadi, siak nga adipenmo,
tapno agbiagak ket tungpalek dagiti pannursurom.
18Luktam dagiti matak tapno maimatangak
dagiti nakaskasdaaw a kinapudno iti lintegmo.
19Ganggannaetak laeng ditoy rabaw ti daga;
dimo kad ilinged kaniak dagiti bilinmo.
20Iti amin a tiempo, mailiw unay toy kararuak
kadagiti pangngeddengmo.
21Tubngarem dagiti natangsit a tattao;
mailunod dagiti mangsalungasing kadagiti bilinmo.
22Yadayonak iti panangibabain ken panangumsida,
gapu ta tinungpalko dagiti lintegmo.
23Uray no agtutulag dagiti pangulo a mangisikat kaniak,
dagiti pannursurom adalen toy adipenmo.
24Paragsakendak a kanayon dagiti pammagbagam;
isuda dagiti mangbalbalakad kaniak.
Nasged a Panagtungpal iti Linteg ni Yahweh
25Toy kararuak naidasag iti tapok;
batakennak ngarud kas mayannurot iti saom.
26Impudnok amin nga inaramidko ket impangagnak;
isurom ngarud kaniak dagiti ipaalagadmo.
27Isuronak tapno maawatak dagiti linlintegmo,
ket adalek dagiti nakaskasdaaw nga aramidmo.
28Nalapunosak iti liday ket maidasayak;
papigsaennak kadi kas inkarim.
29Yadayom kadi kaniak dagiti killo a wagas
ket paraburannak nga agbiag iti lintegmo.
30Inkeddengko ti agtulnog;
inannurotko dagiti pangngeddengmo.
31Sinursurotko dagiti pannursurom, O Apo;
saanmo koma nga ipalubos a maibabainak.
32Tungpalek a sigagagar dagiti bilinmo
gapu ta nayonam ti pannakaawatko.
Kararag a Pagdawat iti Pannakaawat
33Isurom kaniak, O Apo,
ti kaipapanan dagiti linlintegmo,
ket tungpalek ida iti amin a tiempo.
34Ilawlawagmo kaniak ti lintegmo, ket tungpalek;
iti amin a pusok, annurotek.
35Pagtalinaedennak nga agtungpal kadagiti bilinmo,
ta isuda ti pakasarakak iti ragsak.
36Ikkannak iti tarigagay nga agtungpal kadagiti bilinmo
a saan ket nga iti ibabaknangko.
37Dimo ipalubos a mingmingak dagiti ubbaw a bambanag
kas mayannurot iti inkarim, ikkannak iti biag.
38Tungpalem ti karim kaniak nga adipenmo;
wen, ti karim kadagiti agbuteng kenka.
39Isalakannak kadagiti pakapabainan a kabutengko,
nakaskasdaaw unay dagiti pangngeddengmo.
40Mailiwak unay kadagiti bilbilinmo,
biagennak kadi babaen iti kinalintegmo.
Panagtalek iti Linteg ni Yahweh
41Ipakitam, O Apo, no kasano ti panagayatmo kaniak;
kas mayannurot iti inkarim, isalakannak.
42Iti kasta, masungbatak dagiti mangpabain kaniak,
agsipud ta agtalekak iti saom.
43Tulongannak a kanayon nga agsao iti pudno
agsipud ta ti namnamak adda kadagiti pangngeddengmo.
44Kanayonto a tungpalek ti lintegmo;
wen, tungpalek nga agnanayon awan inggana.
45Agbiagakto a siwawaya,
ta inannurotko dagiti ipaalagadmo.
46Ipakaammokto dagiti bilinmo kadagiti ari,
ket pulos nga awanto ti pannakaibabainko.
47Maragsakanak nga agtungpal kadagiti bilinmo,
agsipud ta ayatek ida iti amin a pusok.
48Raemek ken ayatek dagiti bilinmo,
ket utobekto dagiti pannursurom.
Panagtalged iti Linteg ni Yahweh
49Lagipem ti karim kaniak nga adipenmo,
isut' nangted kaniak iti namnama.
50Uray iti panagsagabak, naliwliwaak,
agsipud ta ti saom inikkannak iti biag.
51Inumsidak dagiti natangsit a tattao,
ngem saanak a simmina iti lintegmo.
52Malagipko dagiti pannursurom idi un-unana,
ket mabang-aranak, O Apo.
53No makitak dagiti managdakdakes a mangsalungasing iti linteg
toy pungtotko kadakuada sumged.
54Bayat ti ababa a panagbiagko ditoy daga
ikankantak dagiti bilbilinmo.
55Iti rabii, O Apo, sika ti malaglagipko,
ket tungpalek ti lintegmo.
56Naipaay kaniak daytoy a bendision
gapu iti panagtungpalko kadagiti bilinmo.
Panangipateg iti Linteg ni Yahweh
57Sika laeng, O Apo, ti masapulko;
ikarik a tungpalen dagiti lintegmo.
58Iti amin a pusok, agpakpakaasiak kenka;
kas inkarim, kaasiannak koma.
59Usiseg dagiti wagasmo
ket sumurotak iti panangidalanmo.
60Saanak nga agtaktak,
dagdagusek a tungpalen dagiti bilinmo.
61Impakat dagiti managdakdakes ti pakatnagak,
ngem diak latta malipatan ti lintegmo.
62Iti tengnga ti rabii agriingak nga agdaydayaw kenka,
gapu kadagiti nalinteg a pangngeddengmo.
63Gayyemnak dagiti amin nga agtulnog kenka,
wen, kaduadak dagiti agtungpal iti lintegmo.
64Napno ti daga, O Apo,
iti di agbalbaliw nga ayatmo,
isurom kadi kaniak dagiti bilinmo.
Ti Kinapateg ti Linteg ni Yahweh
65Ti karim, O Apo, tinungpalmo,
ket naimbagka unay kaniak nga adipenmo.
66Ikkannak kadi iti sirib ken pannakaammo,
gapu ta agtalekak kadagiti bilinmo.
67Sakbay a dinusanak, nayaw-awanak
ngem ita, tungpalekon ti saom.
68Naimbag ken nadungngoka;
isurom kaniak dagiti bilinmo.
69Padpadaksendak dagiti natangsit a tattao,
ngem iti amin a pusok, tungpalek dagiti ipaalagadmo.
70Saan a makaaw-awat dagitoy a tattao,
ngem masarakak ti rag-o iti lintegmo.
71Nagimbagak ti panangdusam kaniak,
gapu ta nasursurok dagiti bilinmo.
72Napatpateg kaniak dagiti linteg nga intuyangmo,
ngem iti balitok ken pirak a rinibribu.
Awan Idumduma ti Linteg ni Yahweh
73Pinarsuanak ket ay-aywanannak;
ikkannak iti pannakaawat tapno masursurok dagiti lintegmo.
74Maragsakan a kumita kaniak
dagiti agbuteng kenka,
gapu ta mangnamnamaak a matungpal ti karim.
75Ammok, O Apo,
a nalinteg dagiti pangngeddengmo,
ket dinusanak ta napudnoka kaniak.
76Liwliwaennak kadi ti napudno nga ayatmo,
kas iti inkarim kaniak nga adipenmo.
77Kaasiannak kadi tapno agbiagak
gapu ta ti lintegmo ti pagragsakak.
78Maibabain koma dagiti natangsit
a mamadpadakes kaniak nga awan gapgapuna,
ngem no siak, ammirisek dagiti pammagbagam.
79Umay koma kaniak dagiti agraem kenka—
Amin a makaammo kadagiti bilinmo.
80Aramidek ti amin a kabaelak
nga agtungpal kadagiti bilbilinmo
tapno saanak a maibabain.
Kararag a Pagdawat iti Pannakaisalakan
81Mautoyanak nga agur-uray iti panangisalakanmo,
ngem ti saom ti kakaisuna a namnamak.
82Nasakiten dagiti matak nga agur-uray iti inkarim,
ket kunak, “Kaanonto nga umayka tumulong kaniak?”
83Awan dumak iti naibelleng a pagikabilan iti arak,
awan serserbik ngem diak malipatan dagiti bilinmo.
84Kasano pay kabayag nga agur-urayak?
Kaanonto ti panangdusam kadagiti mangidadanes kaniak?
85Dagiti natangsit a tattao,
isuda a di agtulnog iti lintegmo,
nangkalida kadagiti abut a pakaipalab-ogak.
86Mapagtalkan dagiti amin a bilbilinmo;
tulongannak no idadanesdak dagiti naulbod.
87Dandanida kinettel ti biagko,
ngem diak binaybay-an dagiti bilinmo.
88Ispalennak kadi ken patay gapu iti di agbalbaliw nga ayatmo
tapno annurotek dagiti lintegmo.
Pammati iti Linteg ni Yahweh
89Agpaut iti agnanayon ti saom, O Apo,
naipasdek a mataginayon sadi langit.
90Agpaut ti kinapudnom iti awan inggana,
kas iti pannakataginayon ti impasdekmo a daga.
91Agingga ita, agtalinaed ti amin gapu iti bilinmo,
agsipud ta agserbida amin kenka.
92No saan a ti lintegmo ti paggapuan ti ragsakko,
natayak koman gapu iti panagsagabak.
93Saankonto a baybay-an dagiti ipaalagadmo,
ta gapu kadakuada, tinaginayonmo toy biagko.
94Kukuanak, isalakannak kadi,
ta inkagumaak a tinungpal dagiti bilinmo.
95Agur-uray dagiti managdakdakes a mangpapatay kaniak,
ngem pampanunotek a naimbag dagiti lintegmo.
96Naadalko a ti amin adda paggibusanda,
ngem ti bilinmo agnanayon, awan patinggana.
Panagayat iti Linteg ni Yahweh
97Anian a panagayatko iti lintegmo!
Agmalmalem nga ut-utobek.
98Kanayon nga adda kaniak dagiti bilinmo;
pagbalinendak a nasirsirib ngem dagiti kabusorko.
99Addaanak iti nasaysayaat
a pannakaawat ngem dagiti mamaestrok,
gapu ta ammirisek dagiti pannursurom.
100Nasirsiribak ngem dagiti lallakay,
agsipud ta tungtungpalek dagiti bilinmo.
101Diak kayat a masursuro ti dakes a wagas
gapu ta kayatko a tungpalen ti saom.
102Diak binaybay-an dagiti pannursurom,
ta sika met laeng ti nangisuro kaniak.
103Nagsam-iten dagiti ipaalagadmo,
wen, nasamsam-itda ngem ti diro.
104Simmiribak gapu kadagiti lintegmo,
ket kagurak ti dalan ti kinakillo.
Lawag nga Aggapu iti Linteg ni Yahweh
105Ti saom ti silaw a mangidalan kaniak,
maysa a lawag iti dana a pagnaak.
106Tungpalek ti sinapataak a karik
a mangsurot kadagiti nalinteg a pannursurom.
107Nadagsen unay dagiti sagabaek, O Apo;
kas mayannurot iti karim, papigsaem ti biagko.
108Awatem kadi, O Apo, ti kararagko a pagyaman,
ket isuronak kadagiti bilinmo.
109Sisasaganaak a kanayon a mangipusta iti biagko,
saanko a malipatan ti lintegmo.
110Nangipakat dagiti managdakdakes iti silo,
ngem diak sinalungasing dagiti bilbilinmo.
111Agnanayon a sanikuak dagiti bilinmo,
isuda ti ragsak toy puso.
112Inkeddengkon a tungpalen dagiti lintegmo;
annurotek ida aginggat' maudi nga angesko.
Kinatalged iti Linteg ni Yahweh
113Kagurak dagiti saan a napudno kenka,
ngem ipatpategko ti lintegmo.
114Sika ti salinged ken kalasagko,
mangnamnamaak iti karim.
115Adaywandak, dakay a managdakdakes,
tapno matungpalko dagiti bilin ti Diosko.
116Papigsaennak kas inkarim tapno agbiagak;
saanmo koma nga upayen ti namnamak.
117Kibinennak tapno diak maan-ano,
ket surotek a kanayon dagiti bilinmo.
118Laksidem dagiti di agtungpal kadagiti lintegmo,
ta awan serserbi dagiti panggepda.
119Ibilangmo a basura ti amin a managdakdakes,
isut' gapuna nga ipatpategko dagiti pannursurom.
120Agtigtigergerak gapu iti amakko kenka,
ket kabutengko dagiti pangngeddengmo.
Panagtulnog iti Linteg ni Yahweh
121Inaramidko ti tumutop ken naimbag;
dinak baybay-an iti ima dagiti mangidadanes kaniak.
122Ikarim a tulongam toy adipenmo,
dimo kad ipalubos a dagiti natangsit idadanesdak.
123Nasakiten dagiti matak iti panagur-urayko,
iti inkarim kaniak a panangisalakanmo.
124Kitaennak kadi kas mayannurot iti di agbalbaliw nga ayatmo,
ket isurom kaniak dagiti bilinmo.
125Siak ti adipenmo; ikkannak iti pannakaawat
tapno ammok dagiti pannursurom.
126Tiempon nga agtignayka, O Apo,
ta salsalungasingen dagiti tattao ti lintegmo.
127Ipatpategko dagiti bilbilinmo;
ipangpangrunak ngem ti puro a balitok.
128Iti kasta, surotek amin a pannursurom,
kagurak amin nga aramid nga ulbod.
Tarigagay nga Agtungpal iti Linteg ni Yahweh
129Nakaskasdaaw dagiti pannursurom;
ngarud, tungpalek ida iti amin a pusok.
130Ti pannakailawlawag dagiti pannursurom, mangted iti lawag,
ket pasiribenna dagiti nanumo.
131Agal-alak iti pannakautoyko
a manegsegga kadagiti bilbilinmo.
132Taliawennak kadi ket kaasiannak,
kas iti ar-aramidem kadagiti agayat kenka.
133Kas inkarim, dimo ipalubos a matnagak;
dimo ipalubos a ti dakes iturayannak.
134Subbotennak kadagiti mangidadanes kaniak tapno matungpalko dagiti bilinmo.
135Agraniag koma ti rupam iti biagko,
ket isuronak kadagiti lintegmo.
136Kas karayan nga agayus dagiti luak,
gapu kadagiti tattao a mangsukir iti lintegmo.
Awan Idumduma ti Linteg ni Yahweh
137Nalintegka, O Apo,
ket nalinteg met dagiti pangngeddengmo.
138Nalinteg unay dagiti ipaalagadmo,
natalgedda ken napudno.
139Sumged ti pungtotko a kas apuy iti unegko,
gapu ta binaybay-an dagiti
kabusorko dagiti bilinmo.
140Naan-anay ti pannakasuot ti karim,
ket ay-ayaten unay toy adipenmo.
141Uray no mauy-uyawak ken nanumo
diak lipaten dagiti ipaalagadmo.
142Agnanayon nga awan inggana ti kinalintegmo,
ket pudno dagiti pannursurom.
143Riribuk ken sennaay ti manglapunos kaniak,
ngem dagiti bilinmo ti pagragsakak.
144Umno amin a pannursurom ken awan inggana;
ikkannak iti pannakaawat tapno agbiagak.
Kararag a Pagdawat iti Pannakaispal
145Umawagak kenka, O Apo, iti amin a pusok.
Ipangagnak kadi, ket tungpalekto dagiti bilinmo.
146Umawagak kenka; isalakannak kadi,
ket taginayonek dagiti lintegmo.
147Sakbay a bumigat dumawatak kenka iti tulong;
mangnamnamaak iti pannakatungpal ti saom.
148Saanak a maturog, agpatpatnagak a siririing
a mangam-amiris, mangut-utob iti karim.
149Ipangagnak kadi, O Apo,
kas mayallubog iti di agbalbaliw nga ayatmo.
Ipakitam ti asim ket taginayonem ti biagko.
150Umasidegen dagiti naranggas a mangidadanes kaniak;
adtoyen dagiti di agtungpal iti lintegmo.
151Ngem asidegka kaniak, O Apo,
ket agnanayon awan inggana ti amin a bilinmo.
152Idi un-unana, naammoak
a dagiti pannursurom inrantam ida nga agtalinaed iti agnanayon.
Panagdawat iti Pannakaisalakan
153Kitaem kadi ti panagsagabak ket isalakannak,
gapu ta diak binaybay-an ti lintegmo.
154Ikalintegannak kadi ket wayawayaannak;
kas mayannurot iti karim, isalakannak.
155Saan a maisalakan dagiti managdakdakes,
gapu ta dida tungpalen dagiti lintegmo.
156Ngem naindaklan ti panangngaasim, O Apo;
ikkannak iti biag a mayallubog iti hustisiam.
157Adu dagiti kabusorko ken mangidadanes kaniak,
ngem diak baybay-an dagiti lintegmo.
158Marurodak a makakita kadagiti mangliliput,
agsipud ta dida tungpalen dagiti bilinmo.
159Kitaem kadi, O Apo,
ti ayatko kadagiti pannursurom.
Taginayonem ti biagko
kas mayannurot iti di agbalbaliw nga ayatmo.
160Naibatay ti lintegmo iti kinapudno,
ket mataginayon ti amin a nalinteg a pangngeddengmo.
Panangipateg iti Linteg ni Yahweh
161Awan panggapuan dagiti agtuturay a mangidadanes kaniak
ngem iti amin a pusok, pagraemak dagiti saom.
162Maragsakanak gapu kadagiti karim,
kaslaak la iti makasarak iti napateg a gameng.
163Guraek ken laisek ti amin a kinaulbod,
ngem ay-ayatek ti lintegmo.
164Mamimpito iti inaldaw nga agdaydayawak kenka,
gapu kadagiti nalinteg a pangngeddengmo.
165Naan-anay ti talged dagiti agayat iti lintegmo.
Awan ti makabalin a mangitibkol kadakuada.
166Ur-urayek, O Apo, ti panangisalakanmo,
ket tungpalek dagiti bilinmo.
167Tungpalek dagiti ipaalagadmo;
ay-ayatek ida iti amin a pusok.
168Tungpalek dagiti bilbilin ken pannursurom;
makitam dagiti amin nga aramidko.
Kararag a Pagdawat iti Tulong
169Dumanon koma kenka ti asugko, O Apo!
Ikkannak kadi iti pannakaawat kas inkarim.
170Ipangagmo koma ti kararagko;
isalakannak kadi kas inkarim.
171Kanayon a yebkasko ti pagdaydayawko kenka,
gapu ta isursurom kaniak dagiti bilinmo.
172Agkantaak iti maipapan iti lintegmo,
gapu ta nalinteg dagiti bilinmo.
173Madadaanka kadi a tumulong kaniak,
ta tungtungpalek dagiti bilinmo.
174Segseggaak, O Apo, ti panangisalakanmo!
Pagragsakak ti lintegmo.
175Ikkannak kadi iti biag tapno idaydayawka;
masarakak koma ti tulong kadagiti pannursurom.
176Nayaw-awanak a kasla napukaw a karnero,
umaynak koma ngarud biroken nga adipenmo,
ta diak nalipatan dagiti lintegmo.
Currently Selected:
Dagiti Salmo 119: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society