2 Samuel 7

Ti Mensahe ni Natan ken ni David

(1 Cron. 17:1-15)

1Natalgeden ti panangituray ni Ari David iti pagarianna. Babaen iti tulong ni Yahweh saanen a siningsinga dagiti amin a kabusorna. 2Kalpasanna, kinuna ti ari ken ni Natan a profeta, “Kitaem, agnaedak iti balay a naaramid iti sedro ngem tolda laeng ti pagtaengan ti Lakasa ti Tulag ti Dios.”

3“Aramidem ngarud ti panggepmo nga aramiden, gapu ta adda kenka ti Apo,” insungbat ni Natan.

4Ngem iti dayta a rabii, kinuna ni Yahweh ken ni Natan, 5“Inka ibaga daytoy ken ni David nga adipenko: ‘Saan a sika ti mangbangon iti templo a pagnaedak. 6Manipud inispalko dagiti Israelita idiay Egipto agingga ita, pulos a diak nagnaed iti templo. Nagdaldaliasatak nga agnaed iti tolda. 7Iti amin a panagdaliasatko a kaduak dagiti Israelita, diak nagsaludsod iti siasinoman kadagiti pangulo#7 pangulo; Iti Hebreo, tribu. a dinutokak no apay a didak imbangonan iti templo a naaramid iti sedro.’

8“Ngarud, ibagam ken ni David nga adipenko a kastoy ti kunak kenkuana, siak, ni Yahweh, a Mannakabalin-amin, ‘Innalaka iti pagpastoran iti karnero ket tinudinganka a mangituray kadagiti Israelita. 9Kinuykuyogka iti sadinoman a napanam ket pinarmekko dagiti amin a kabusormo iti idadarupmo. Pagbalinenka a nalatak a kas kadagiti katan-okan nga agtuturay ditoy lubong. 10-11Nangpiliak iti lugar nga agpaay kadagiti Israelita ket pinagnaedko ida sadiay nga awanen ti mangidadanes kadakuada. Saanton a singsingaen ida dagiti naranggas a tattao a kas idi un-unana. Inkarik a salaknibanka kadagiti amin a kabusormo ken ikkanka iti kaputotan. 12Inton#Sal. 89:3-4; 132:11; Jn. 7:42; Ara. 2:30. matayka ket maitiponka kadagiti kapuonam, isaadkonto ti maysa kadagiti annakmo a kas ari, ket pabilgekto ti pagarianna. 13Isunto ti mangbangon iti templok, ket itultuloyto dagiti kaputotanna ti agturay a kas ari. 14Siakto#Sal. 89:26-27; 2 Cor. 6:18; Heb. 1:5. ti agbalin nga amana, ket isunto ti anakko. No agaramid iti dakes, dusaekto a kas iti panangdusa ti ama iti anakna. 15Ngem diakto ibabawi ti tulongko kenkuana a kas iti panangibabawik iti panangtulongko ken ni Saul nga inikkatko tapno sika ti maisaad nga ari. 16Maaddaankanto#Sal. 89:36-37. latta iti kaputotam. Pagpautekto ti pagariam. Dinto agpatingga ti panagari kadagiti kaputotam.’”

17Imbaga ni Natan ken ni David dagiti amin nga impaltiing ti Dios kenkuana.

Ti Kararag a Pagyaman ni David

(1 Cron. 17:16-27)

18Napan ni Ari David iti nasagradoan a tolda, nagtugaw ket inkararagna: “Saanak a maikari wenno ti familiak, O Apo Dios, iti impaaymo kaniak. 19Nupay kasta, ad-adu pay ti ar-aramidem, O Apo Dios. Nagkarika maipapan kadagiti kaputotak kadagiti tawen a mapasungad. Impalubosmo, O Apo Dios, a makita daytoy ti maysa a tao.#19 makita…tao; Iti Hebreo, agpaay daytoy a linteg kadagiti tattao. 20Awanen ti mabalinko a sawen, ta ammonak nga adipenmo. 21Nagayatam ken panggepmo nga aramiden daytoy. Impakaammom kaniak amin dagitoy naindaklan a banag.#21 Impakaammom…banag; Iti Hebreo, Inaramidmo amin dagitoy naindaklan a banag tapno ipakaammom kaniak. 22Natan-okka, O Apo Dios. Awan ti kas kenka. Awan pay ti sabali a Dios a nadamagmi no di laeng sika. 23Awanen#Deut. 4:34. ti sabali a nasion ditoy rabaw ti daga a kas iti Israel nga inispalmo iti pannakaadipen tapno pagbalinem ida a tattaom. Nagsaknap ti kinalatakmo iti entero a lubong gapu kadagiti naindaklan ken nakaskasdaaw a banag nga inaramidmo kadakuada.#23 kadakuada; Iti Hebreo, kadakayo. Pinagtalawmo#23 Pinagtalawmo; Iti Hebreo, Gapu iti dagam. dagiti sabali a nasion ken dagiti didiosenda idi sumangpet dagiti tattaom, isuda a winayawayaam idiay Egipto tapno agbalinda a kukuam. 24Pinagbalinmo dagiti Israelita a tattaom iti agnanayon, ket sika, O Apo, ti nagbalin a Diosda.

25“Ita, O Apo Dios, tungpalem iti amin a tiempo ti inkarim kaniak ken kadagiti kaputotak, ket aramidem a kanayon ti imbagam nga aramidem. 26Maidaydayawkanto iti kasta unay, ket kunanto dagiti tattao iti agnanayon, ‘Ti Apo a Mannakabalin-amin ti Dios ti Israel.’ Taginayonemto ti panagari ti kaputotak iti amin a tiempo. 27O Apo a Mannakabalin-amin, Dios ti Israel! Naturedak a mangikararag kenka iti daytoy, agsipud ta imparangarangmo amin dagitoy kaniak nga adipenmo, ket imbagam a pagbalinem nga ari dagiti kaputotak.

28“Ita, O Apo Dios, sika ti Dios. Kanayon a tungpalem dagiti karim, ket nakaskasdaaw daytoy nga inkarim kaniak. 29Dawatek a bendisionam dagiti kaputotak tapno agtultuloy a sagrapenda ti paraburmo. Sika, O Apo Dios, ti nangikari iti daytoy, ket sapay koma ta agtalinaed iti agnanayon dagiti bendisionmo kadagiti kaputotak.”

Currently Selected:

2 Samuel 7: RIPV

Highlight

Copy