ROMANOS 7

Cua nscua sca cha' nu ndaca'a ji'i̱ ñati̱ nu ntsu'u clyo'o

1Cu'ma̱ ngu' tya'a na, ntsu'u ngu' tya'a ma̱ nu tso'o tsa jlo ti' lcaa cña nu ngulo ycui' Ndyosi ji'na; cua jlo ti' ma̱ cha' ndatsaa cha' bi' ji'na tyucui tyempo lo'o tya lu'ú ti na. 2Ñi'ya̱ laca sca nu cuna'a̱ nu ntsu'u clyo'o ni, cuentya ji'i̱ cña nu ngulo Ni ji'i̱ jyo'o cusu' ji'na bi', nga'a̱ cha' tyi'i̱ nu cuna'a̱ bi' lo'o clyo'o tyucui tyempo lo'o tya lu'ú ti yu; sca ti nu lo'o cua ngujuii yu, li' nga'aa cua'a cha' bi' ji'i̱ nu cuna'a̱ bi', nga'aa ntsu'u nu cuentya ji'i̱ li'. 3Ndi'ya̱ laca cha': si tyu'u cha' ji'i̱ nu cuna'a̱ bi' lo'o chaca nu qui'yu lo'o tya lu'ú ti clyo'o, cña cuxi laca nu cua'ni nu cuna'a̱ bi' li'. Pana si cua ngujuii clyo'o nu cuna'a̱ bi', nga'aa ndatsaa cha' bi' ji'i̱; taca caja clyo'o nu cuna'a̱ bi' lo'o xa' nu qui'yu, cha' si'i sca cña cuxi laca nu cua'ni li', nu lo'o nga'aa lu'ú clyo'o nu cuna'a̱ bi'.

4Ndi'ya̱ laca na juani cuentya ji'i̱ cha' cusu' nu ndaquiya' tsa na ji'i̱ tya sa'ni la: ñi'ya̱ laca sca nu cuna'a̱ nu nga'aa ntsu'u clyo'o, jua'a̱ laca lcaa tya'a na nu ntsu'u cha' ji'na lo'o Cristo. Na cua ngujuii Cristo lo crusi, bi' cha' juani nga'aa ntsu'u cha' ji'na lo'o nu cha' cusu' bi'. Cua ngua stu'ba cha' ji'na lo'o Cristo nu lo'o ndyu'ú yu chaca quiya' lo'o cua ngujuii yu, bi' cha' taca ji'na cua'ni na cña ji'i̱ ycui' Ndyosi laja lo'o tya ndi'i̱ ti na nde chalyuu. 5Nu ngua cua tsubi' la, cuxi ti ndi'i̱ na, cha' ñati̱ chalyuu laca na; ngua ti' na cua'ni na lcaa lo cha' cuxi nu ndiya ti' na ji'i̱, masi cua ndyuna na cha' cusu' nu nti' cua'a ji'na. Bi' cha' la cui' cha' cuxi bi' ngua'ni lo'o na cha' chcuna' lyiji chalyuu ji'na. 6Pana juani cua ndi'i̱ laja ti na cuentya ji'i̱ nu cha' cusu' bi', nga'aa caca ji'i̱ cha' bi' culo cña ji'na. Cua ngua laja ji'na juani cha' cua'ni na cña nu nti' ycui' Ndyosi, xqui'ya cha' cua ngujui chaca chalyuu cucui nu nda Xtyi'i ycui' Ndyosi ji'na.

Loo laca nu cha' cuxi nu ntsu'u ne' cresiya ji'i̱ ngu'

7Ndi'ya̱ ñacui̱ na lacua: Si'i la cui' cha' cusu' nu ndu'ni cha' caca cuxi. Nu lo'o bilya cuna na' cha' bi', bilya ca cuayá' ti' na' na ca laca sca cha' cuxi; ná ngua cuayá' ti' na' nquicha', masi cuxi tsa laca cha' tyacui ti' na' ji'i̱ sca na nu ntsu'u ji'i̱ tya'a na'. Pana lo'o cua ndyuna na' ni cña ngulo ycui' Ndyosi ji'na, cha' ná tyacui ti' na ji'i̱ cha' bi' tsiya' ti, li' ngua cuayá' ti' na' cha' ná tso'o laca cha' ndacui ti' na' ji'i̱ sca na jua'a̱. 8Pana ngua'ni nu cuxi ngana 'na li'. Masi jlo ti' na' cha' cuxi tsa cha' bi', ña'a̱ ti ndiya ti' na' cua'ni na' lcaa lo cha' cuxi; si ná lo'o nscua sca cha' nu cua'a 'na, ná ta na' cuentya cha' cuxi laca sca cña nu ndyu'ni na'. 9Ngua ti' na' cha' tso'o tsa nguti'i̱ na', nu lo'o tya lyiji ca cuayá' ti' na' ni cha' nda cha' cusu' bi'; pana nu lo'o ngua cuayá' ti' na', li' ngua tii na' cha' ntsu'u tsa qui'ya jna'. Na cua chcuna' ti chalyuu 'na ngua li'. 10Ngua ti' ycui' Ndyosi cha' caja chalyuu ji'na nquicha', nu lo'o taquiya' na ji'i̱ lcaa cña nu ngulo Ni nu ngua sa'ni. Pana si'i jua'a̱ ngua lo'o na'; cua chcuna' ti chalyuu 'na li', cha' ngua tii na' cha' ntsu'u tsa qui'ya 'na li'. 11Cha' cuxi laca nu ngua'ni ngana 'na; bi' cha' tya ngua'ni la na' cha' cuxi, masi cua nchcui' cha' cusu' bi' lo'o na' cha' ná cua'ni na' jua'a̱. Na nchcube' tsa cha' cuxi bi' 'na, cua laca cha' 'na ñi'ya̱ laca si cua ngujuii na'.

12Chañi cha' sca cha' tso'o ji'i̱ ycui' Ndyosi laca cha' cusu' bi'; lcaa cña nu ngulo Ni ji'na, ca slo ycui' Ni ngutu'u cha' bi'. Liñi tsa ndu'ni ycui' Ndyosi, tso'o tsa ndyu'u cha' nu nda Ni lo'o na; 13bi' cha' ná taca ñacui̱ na' cha' cua chcuna' ti chalyuu 'na xqui'ya cha' bi'. Cha' cuxi nu ndyu'ni na', bi' laca nu ndu'ni ñu'u̱ ji'i̱ chalyuu 'na. Lo'o juani nchca cuayá' ti' na' ñi'ya̱ laca sca cha' cuxi; laja lo'o ndyuna na' cha' tso'o tsa ndyu'u cha' cusu' bi', la cui' hora li' ndu'ni nu cha' cuxi bi' ngana 'na. Bi' cha' tso'o la nchca cuayá' ti' na' cha' lye tsa laca nu cha' cuxi nu ndu'ni na'.

14Jlo ti' na cha' cña nu ngulo ycui' Ndyosi laca nu cha' cusu' bi'; sca ti si lo'o Xtyi'i ycui' Ndyosi cua'ni cña ne' cresiya ji'na, li' taca ji'na taquiya' na ji'i̱ cña bi'. Pana nu na' ni, ñati̱ chalyuu ti laca na', loo la laca nu cha' cuxi bi' ne' cresiya jna'. 15Ná nchca ca cuayá' ti' na' ni cha' laca ndu'ni na' xcui' cha' cuxi. Nti' na' cua'ni na' sca cña tso'o nquicha', pana ná nchca 'na tsiya' ti; cha' cuxi nu ná ndiya ti' na' ji'i̱, bi' laca nu ndu'ni na'. 16Cha' ná tso'o nti' na' lo'o ndu'ni na' cha' cuxi bi', bi' cha' jlo ti' na' cha' stu'ba ntsu'u cha' jna' lo'o nu cha' cusu' bi', masi ná ndaquiya' na' ji'i̱. 17Bi' cha' lacua, si'i ycui' na' laca̱ nu ndu'ni cha' cuxi bi'; masi nu cha' cuxi nu laca loo ne' cresiya jna', bi' laca nu ndatsaa 'na cha' cua'ni na' ji'i̱ li'. 18Cua jlo ti' na' cha' ná tso'o laca cha' nu ntsu'u ne' cresiya jna', cha' ñati̱ chalyuu ti laca na'; masi nti' tsa na' cua'ni na' xcui' cha' tso'o nquicha', pana ná nchca jna' tsiya' ti. 19Ná nchca jna' cua'ni na' cha' tso'o nu nti' na' cua'ni; ña'a̱ ti ndu'ni na' cha' cuxi, masi nga'aa nti' na' cua'ni na' jua'a̱. 20Ndi'ya̱ ndyu'u cha' lacua: lo'o ndyu'ni na' sca cha' nu ná tso'o nti' na', si'i ycui' na' nu ndu'ni cha' cuxi bi' li'; masi nu cha' cuxi nu laca loo ne' cresiya jna', bi' laca nu ndatsaa 'na cha' ndyu'ni na' ji'i̱.

21Lo'o li' ndi'ya̱ ndyaca cha' 'na lacua: Masi nti' tsa na' cua'ni na' sca cha' tso'o nquicha', nchca cuayá' ti' na' cha' xcui' cha' cuxi ntsu'u ne' cresiya jna'. 22Tyucui tyiquee na' ndiya tsa ti' na' cua'ni na' lcaa cña nu ngulo ycui' Ndyosi ji'na nu ngua sa'ni; 23pana nchca cuayá' ti' na' cha' ndi'i̱ chaca nu laca loo ji'i̱ tyucui ña'a̱ na'. Nxu̱u̱ tya'a bi' lo'o lcaa cha' tso'o nu ntsu'u tyiquee na' ji'i̱; bi' laca cha' cuxi nu ntsu'u ne' cresiya jna', nu ndu'ni lo'o na' cha' cua'ni na' cña ji'i̱, ñi'ya̱ nti' si cua laca na' sca preso.

24Xñi'i̱ tsa ti' na' lacua. ¿Tilaca caca ji'i̱ cua'ni lyaá ji'i̱ tyucui ña'a̱ na', cha' nga'aa cua'ni na' cha' cuxi jua'a̱? Cua chcuna' ti chalyuu 'na xqui'ya cha' cuxi nu ntsu'u ne' cresiya 'na. 25Sca ti ycui' Ndyosi Sti na taca ji'i̱ Ni cua'ni lyaá Ni 'na, xqui'ya cña nu ngua'ni Jesucristo nu Xu'na na. ¡Bi' cha' quiña'a̱ tsa xlya'be tya na' ji'i̱ ycui' Ndyosi lacua! Pana tsa bi' ti cha' jlo ti' na', cha' nga'a̱ cha' taquiya' na' ji'i̱ cña nu ngulo ycui' Ndyosi; ná nchca jna' cua'ni lyaá na' ji'i̱ ycui' ca na' cha' ñati̱ chalyuu ti laca na', lo'o jua'a̱ ña'a̱ ti tya ndyu'ni ñati̱ chalyuu cha' cuxi.

Currently Selected:

ROMANOS 7: cta

Highlight

Copy