ROMANOS 6

Xqui'ya Cristo, bi' cha' taca caja chalyuu cucui ji'i̱ ñati̱

1Ndi'ya̱ ñacui̱ na lacua: Ná tso'o si ña'a̱ ti tya cua'ni na cha' cuxi, cha' li' tya quiña'a̱ la cha' tso'o cua'ni ycui' Ndyosi lo'o na, nti' na. 2Ná tso'o tsiya' ti cua'ni na ñi'ya̱ nu ngua'ni na sa'ni la. Juani laca na ñi'ya̱ laca si cua ngujuii na lo'o Cristo, cha' xa' tyucui̱i̱ tsaa na juani; ná tso'o si ña'a̱ ti tya cua'ni na cha' cuxi lacua. 3Nu lo'o ntyucuatya ngu' ji'na lo'o nguxana ca ti cha' tyu'u cha' ji'na lo'o Jesucristo, li' ñi'ya̱ si na cua ngujuii na stu'ba ti lo'o Jesús, jua'a̱ ngua. 4Lo'o ntyucuatya ngu' ji'na, ndyaa na ne' hitya li', ñi'ya̱ laca si cua ndyaa na nguatsi' na stu'ba ti lo'o Cristo ne' cuaá. Ca bi' ntsiya jyo'o na, cha' taca tyu'ú na chaca quiya', ñi'ya̱ lo'o ngutu'u na nde lo hitya, cha' jua'a̱ tlyu tsa cha' nu ngua'ni ycui' Ndyosi Sti yu nu lo'o ndyu'ú Cristo chaca quiya'. Lo'o jua'a̱ caja sca chalyuu cucui ji'na xqui'ya Cristo.

5Jua'a̱ ndyaca cha' cua laca ntsu'u cha' ji'na lo'o nu Cristo bi'. Ngujuii yu nu lo'o ngüityi̱ yu qui'ya nu ntsu'u ji'na. Lo'o na ni, ñi'ya̱ laca si na cua ngujuii na, jua'a̱ laca na; pana lo'o tyu'ú na chaca quiya', li' caja chaca chalyuu cucui ji'na, ñi'ya̱ lo'o ndyu'ú Jesús chaca quiya'. 6Cuxi tsa ñati̱ ngua na; pana juani laca na ñi'ya̱ laca si lo'o na ngujuii na lo sca crusi lo'o ngujuii ycui' Jesús, cha' ngüityi̱ yu tsiya' ti cha' cuxi nu ntsu'u ne' cresiya ji'na li'. Bi' cha' juani nga'aa caca ji'i̱ cha' cuxi bi' caca loo ji'na chaca quiya'. 7Lo'o cua ngujuii sca ñati̱ ni, cua ndye cha' ji'i̱ lo'o qui'ya nu ntsu'u ji'i̱ nde chalyuu li'. 8Lo'o na laca na jua'a̱, nu lo'o ntsu'u cha' ji'na lo'o Cristo, cha' laca na ñi'ya̱ si cua ngujuii na lo'o Cristo; lo'o li' caca na ñi'ya̱ laca si cua ndyu'ú na lo'o Cristo chaca quiya'. 9Jlo ti' na cha' cua ngulo Ni ji'i̱ Cristo ca su ntsiya nguatsi' yu; nga'aa cajaa yu chaca quiya', nga'aa caca tyatsi' yu chaca quiya'. 10Cua ngujuii Cristo, cha' sca ti quiya' cua'ni tye Ni ji'i̱ lcaa qui'ya nu ntsu'u ji'i̱ ñati̱ chalyuu na; lo'o li' cua ndyu'ú yu chaca quiya', cha' tyucui tyempo tyi'i̱ yu cuentya ji'i̱ ycui' Ndyosi Sti yu. 11Lo'o jua'a̱ cu'ma̱ ni, ñi'ya̱ si cua ngua'ni tye ma̱ tsiya' ti ji'i̱ cha' cuxi nu ntsu'u ne' cresiya ji'i̱ ma̱, jua'a̱ culacua ti' ma̱; ñi'ya̱ si cua ndyu'ú ma̱ chaca quiya' cha' xcui' cua'ni ma̱ cña ji'i̱ ycui' Ndyosi stu'ba ti lo'o Jesucristo nu Xu'na na, jua'a̱ culacua ti' ma̱.

12Bi' cha' juani nga'aa ta ma̱ chacuayá' cha' caca loo cha' cuxi bi' ji'i̱ ma̱ lo'o ndi'i̱ ma̱ nde chalyuu. Ná tso'o cha' taquiya' na ji'i̱ lcaa lo cha' cuxi nu jña ti' na cha' cua'ni na ji'i̱, cha' laca na ñati̱ chalyuu ti. 13Ni sca ti tsu' ya' ma̱, ni sca ti tsu' quiya' ma̱, ná ta ma̱ ji'i̱ cha' jña nu xña'a̱, cha' ná caca ma̱ msu ji'i̱ nu bi', cha' ná cua'ni ma̱ cha' cuxi lo'o. Xa' ña'a̱ culacua ti' ma̱ juani; ta ma̱ tyucui ña'a̱ ma̱ cha' caca ma̱ cuentya ji'i̱ ycui' Ndyosi, ñi'ya̱ laca si ngujuii ma̱ tsaca quiya', lo'o li' xa' ndyu'ú ma̱ chaca quiya'. Bi' cha' juani nga'a̱ cha' ta ma̱ tyucui ña'a̱ ma̱ cha' cua'ni ma̱ cña ji'i̱ ycui' Ndyosi, laja lo'o ndu'ni ma̱ cha' tso'o ca su ndi'i̱ ma̱. 14Nga'aa si'i nu cuxi nu ntsu'u chalyuu nu caca loo ji'i̱ ma̱ juani. Si'i xcui' cha' ntsi̱i̱ ti ti' ma̱ tyi'i̱ ma̱ chalyuu, ñi'ya̱ si lo'o nchcube' tsa cha' cusu' bi' ji'i̱ ma̱; taca tyi'i̱ tso'o ti ma̱ chalyuu juani, cha' xcui' tlyu tsa cha' tso'o nu ndyu'ni Ni lo'o ma̱.

Nga'a̱ cha' cui'ya ngu' cuentya tilaca laca nu laca loo ji'i̱ ngu'

15Ná tso'o ñacui̱ na cha' juani nga'aa ntsu'u cha' taquiya' na ji'i̱ cha' cusu' bi', cha' ndaquiya' na ji'i̱ cha' nu nchcui' ycui' Ndyosi nu xcui' cha' xlya'be ti ndu'ni lo'o na. Ná tso'o laca si tya cua'ni la na cha' cuxi li', cha' nga'aa ntsu'u chacuayá' ji'na cha' cua'ni na jua'a̱. 16Nu lo'o ndya'a̱ na ne' xña ji'i̱ sca ñati̱ ni, taquiya' na sca cña nu culo ñati̱ bi' ji'na li'; jlo ti' na cha' nu ñati̱ bi' laca xu'na na, lo'o jua'a̱ nga'a̱ cha' taquiya' na ji'i̱ cha' nu nchcui' nu xu'na bi'. Lo'o nu cuxi nu ndyu'ni cha' caca na cuxi ni, si ndyu'ni cha' cuxi bi' cha' laca bi' loo ji'na, li' ntsu'u cha' cajaa na tsiya' ti; pana si ycui' Ndyosi laca loo ji'na, taquiya' na ji'i̱ cha' nu nchcui' Ni li', caca tso'o cresiya ji'na li'. 17-18Tso'o tsa nti' na' cha' tyucui tyiquee ma̱ ndyu'ni ma̱ cña ji'i̱ ycui' Ndyosi, tsa ña'a̱ cha' nu ngulu'u ngu' ji'i̱ ma̱. Nu cha' cuxi, bi' laca nu ngua loo ji'i̱ ma̱; pana lo'o cua ngulaá ma̱ ji'i̱ nu cuxi bi', li' nguxana ma̱ ndu'ni ma̱ cña cha' caja chaca chalyuu su caca lubii cresiya ji'i̱ ma̱, cha' ycui' Ndyosi laca loo ji'i̱ ma̱ juani. 19Jua'a̱ laca cha' nu nda na' lo'o cu'ma̱, cha' caca cuayá' la ti' ma̱ tilaca laca nu laca loo ji'i̱ ma̱. Tya tsubi' la cua nda ma̱ tyucui ña'a̱ ma̱ cha' cua'ni ma̱ cha' suba', cha' cua'ni ma̱ cha' cuxi, lo'o jua'a̱ lye la ndyacua cha' cuxi ji'i̱ ma̱ li'; bi' cha' juani ta ma̱ tyucui ña'a̱ ma̱ cha' xcui' cña tso'o cua'ni ma̱, cha' xcui' cuentya ji'i̱ ycui' Ndyosi tyi'i̱ ma̱ chalyuu.

20Cua tsubi' la lo'o tya ndu'ni ma̱ xcui' cha' cuxi, ná ngua ji'i̱ ma̱ cua'ni ma̱ cña tso'o ñi'ya̱ nu nti' ycui' Ndyosi cha' cua'ni na; 21ni sca quiya' ná ngua tso'o cha' ji'i̱ ma̱ lo'o ngua'ni ma̱ cha' cuxi nu ngua li'. Lo'o juani ntyuju'u tsa ti' ma̱ xqui'ya cha' cuxi nu ngua'ni ma̱. Tsa bi' ti cña ndu'ni nu cha' cuxi bi', cha' cua'ni tye bi' ji'i̱ ñati̱ si taquiya' ngu' ji'i̱; nga'aa caca tyu'u cha' ji'i̱ ngu' lo'o ycui' Ndyosi si jua'a̱ ndu'ni ngu'. 22Pana juani ni, nga'aa caca ji'i̱ nu cuxi bi' culo cña ji'i̱ ma̱, cha' cua ndyatí̱ ma̱ lo cña ji'i̱ ycui' Ndyosi. Chaa ti' ma̱ ndyu'ni ma̱ cña ji'i̱ Ni juani, cha' xcui' na ndi'i̱ ma̱ chalyuu cuentya ji'i̱ ycui' Ni; li' ná nga'a̱ cha' tye chalyuu nu ta Ni ji'i̱ ma̱ lo'o cua ndye lcaa cha'. 23Tsa bi' ti caya' caja ji'na lo'o ndu'ni na cha' cuxi, cha' chcuna' lyiji cresiya ji'na lo'o; pana si stu'ba ntsu'u cha' ji'na lo'o Jesús nu Xu'na na, li' ta ycui' Ndyosi sca chalyuu nu ná nga'a̱ cha' tye ji'na. Sca cha' xlya'be nu nda ti Ni ji'na laca.

Currently Selected:

ROMANOS 6: cta

Highlight

Copy