ROMANOS 5

Ñi'ya̱ caca lo'o caca stu'ba cha' ji'i̱ ngu' lo'o ycui' Ndyosi

1Jua'a̱ laca lacua; xqui'ya cha' ngusñi ti na cha' ji'i̱ Jesús, bi' cha' cua ngua tso'o cresiya ji'na cuentya ji'i̱ ycui' Ndyosi. Lo'o li' ti̱ ti ndi'i̱ tyiquee na, stu'ba ti ntsu'u cha' ji'na lo'o ycui' Ndyosi xqui'ya Jesucristo nu Xu'na na. 2Tso'o tsa ndyu'ni ycui' Ndyosi lo'o na chacuayá' ji'i̱ Cristo, nu lo'o ngusñi na cha' ji'i̱ nu Cristo bi'. Ngua'ni Ni cha' ntsu'u cha' ji'na lo'o ycui' Ni, bi' cha' nga'aa ntsu'u cha' tya'a̱chu̱' na ji'i̱ Ni; tso'o tsa ntsu'u tyiquee na, cha' jlo ti' na cha' ca tiya' la caja sca se'i̱ nu tso'o tsa su tyi'i̱ na ca su ntucua ycui' Ndyosi, cha' jua'a̱ tso'o ti ndu'ni Ni lo'o na. 3Masi juani tso'o ntsu'u tyiquee na laja lo'o ndi'i̱ na chalyuu; masi lya' tsa ti' ngu' ji'na, jlo ti' na cha' taca talo na lo'o nchcube' na jua'a̱. 4Lo'o ngualoo cha' ti'í bi', cua jlo ti' na cha' cua ngua'ni cuayá' ti Ni ji'na. Lo'o li' si ña'a̱ ti tya tso'o cresiya ji'na cuentya ji'i̱ ycui' Ndyosi, li' cua ndu̱ ti' na cha' caca tso'o ji'na nde loo la. 5Lo'o jua'a̱ si'i sca cha' nu nda ti ti' na laca cha' bi', sca cha' chañi laca bi'; cua'ni Ni ji'i̱. Cua ngua'ni Ni cha' ca tii cresiya ji'na, cha' ntsu'u tsa tyiquee ycui' Ndyosi ña'a̱ Ni ji'na; ngua'ni Ni jua'a̱ nu lo'o nda Ni Xtyi'i ycui' Ni ji'na.

6Jlo ti' na cha' ná caca cua'ni lyaá na ji'i̱ ycui' ca ti na ji'i̱ qui'ya nu ntsu'u ji'na; pana lo'o ndyalaa la cui' hora nu ngusta ycui' Ndyosi, li' ngujuii Jesús xqui'ya na, ñati̱ cuxi na. 7Tlyu tsa cha' cua'ni na si tyaja'a̱ na cajaa na cha' caja ñi'ya̱ nu cua'ni lyaá na ji'i̱ chaca ñati̱; masi sca ñati̱ nu xcui' cha' tso'o ndu'ni, ná nti' na cajaa na cuentya ji'i̱ yu. Sca ti si sca ñati̱ nu tso'o tsa ndu'ni laca bi', tso'o tsa nchcui' lo'o tya'a, ná tyiquee' tyaja'a̱ sca ngu' cajaa cuentya ji'i̱ ñati̱ bi', si caca cua'ni lyaá ngu' ji'i̱ nu ñati̱ bi' li'. 8Pana jua'a̱ ngua'ni ycui' Ndyosi lo'o na, cha' culu'u Ni ji'na cha' ntsu'u tsa tyiquee Ni ña'a̱ Ni ji'na; nda Ni ji'i̱ Cristo cha' cajaa cuentya ji'na, masi tya ntsu'u tsa qui'ya ji'na. 9Tso'o lacua. Cua laca ngua tso'o cresiya ji'na cuentya ji'i̱ ycui' Ndyosi, xqui'ya cha' ndyalú tañi ycui' Cristo lo'o ngujuii yu lo crusi. La cui' jua'a̱ cua lijya̱ nclyaá na juani; xqui'ya Cristo nga'aa xcube' Ni ji'na lo'o tye chalyuu. 10Tya'a cusu̱u̱ ycui' Ndyosi ngua na; pana juani ngua stu'ba cha' ji'na lo'o Ni, nu lo'o ngujuii Sñi' ycui' Ni lo crusi. Bi' cha' juani ngua ti̱ cha' ji'na lo'o ycui' Ndyosi, lo'o jua'a̱ cua'ni lyaá Ni ji'na xqui'ya cha' cua ndyu'ú nu Jesús bi' chaca quiya'. 11Ni si'i tsa lo cua ti cha', masi lo'o cha' tso'o tsa ntsu'u tyiquee na ña'a̱ na ji'i̱ ycui' Ndyosi xqui'ya Jesucristo nu Xu'na na, cha' bi' laca nu ngua'ni cha' caca ca stu'ba cha' ji'na lo'o Ni.

Xqui'ya sca ti ñati̱ ngua cuxi chalyuu

12Cua ngua cha', xqui'ya cha' cuxi nu ngua'ni sca ti jyo'o cusu' nu naa Adán, bi' cha' nguxana cha' ntsu'u qui'ya ji'i̱ ñati̱ chalyuu; bi' cha' ntsu'u cha' ndyijii ñati̱. Lo'o jua'a̱ tiya' la ntsu'u cha' cajaa lcaa na, cha' ntsu'u qui'ya ji'i̱ lcaa na. 13Jua'a̱ ntsu'u qui'ya ji'i̱ ñati̱ chalyuu nu ngua tya clyo, masi bilya culo ycui' Ndyosi cña cha' ná cua'ni ngu' cha' cuxi tyempo bi'. Tsa bi' ti cha', ná nacui̱ ngu' cha' qui'ya ngua, cha' ná jlo ti' ngu' cha' ná ndiya ti' Ni cña cuxi nu ndyu'ni ngu'. 14Tya lo'o ngutu'ú nu Adán bi' chalyuu, hasta ca lo'o nda ycui' Ndyosi cha' lo'o jyo'o Moisés, xcui' ngujuii ñati̱ xqui'ya cha' ntsu'u tsa qui'ya ji'i̱ ngu', masi ná stu'ba cha' cuxi nu ngua'ni ngu' bi' ñi'ya̱ nu ngua'ni jyo'o Adán tya clyo, nu lo'o ná ndaquiya' yu sca cña nu ngulo ycui' Ndyosi ji'i̱ yu. Sca lo ti cña ngua'ni jyo'o Adán, sca ti cha' cuxi ngua'ni yu; pana nu Jesucristo nu ñaa chalyuu tiya' la ni, chaca lo cña ngua'ni yu, cña tso'o ngua'ni.

15Nu jyo'o Adán ni, nguxtyanu yu yabe' hichu̱' na xqui'ya cha' cuxi nu ngua'ni ycui' ca yu; xqui'ya sca ti nu qui'yu bi' ngua cuxi chalyuu tya li', bi' cha' quiña'a̱ tsa ñati̱ ndyijii. Pana juani ni, xqui'ya sca ti ñati̱ nu naa Jesucristo, chaca lo cha' nda ycui' Ndyosi lo'o na, sca cha' tso'o tsa laca bi'; tlyu tsa cha' tso'o nu ngua'ni ycui' Ndyosi cuentya ji'na li'. Nacui̱ Ni cha' laja ti taca cua'ni lyaá Ni ji'na ji'i̱ lcaa cha' cuxi nu ntsu'u ji'na. Lo'o jua'a̱ quiña'a̱ tsa ñati̱ laca nu ndyu'ni Ni cha' ndyaca lubii cresiya ji'i̱ ngu'. 16Ná stu'ba ndyu'u cha' ji'i̱ cña nu ngua'ni jyo'o Adán lo'o cña nu ndyu'ni ycui' Ndyosi. Nu Adán bi' ni, sca ti cha' cuxi ngua'ni yu su clyo, lo'o li' ndyanu yabe' hichu̱' yu; lo'o jua'a̱ ndyanu yabe' hichu̱' lcaa na lo'o tya'a na juani xqui'ya cha' cuxi bi'. Lo'o juani quiña'a̱ tsa cha' cuxi ndu'ni na lacua. Pana Jesús ni, sca cña laja ti ngua'ni cuentya ji'na nu lo'o ngua'ni lyaá ji'na ji'i̱ nu cuxi; ngua'ni Ni cha' caca tso'o cresiya ji'na cuentya ji'i̱ ycui' Ndyosi li'. 17Ntsu'u cha' cajaa na xqui'ya qui'ya nu ntsu'u ji'i̱ nu sca ti Adán bi', masi sca ti cha' cuxi ngua'ni yu; pana tlyu la cña ndyu'ni ycui' Ndyosi cuentya ji'na juani, nu lo'o ndyu'ni lubii Ni cresiya ji'na. Quiña'a̱ tsa cha' xlya'be ngua'ni Ni lo'o na; jua'a̱ caja chalyuu cucui ji'na juani xqui'ya Jesucristo, masi sca ti ñati̱ laca bi'.

18Ndi'ya̱ ngua li': lo'o ngua'ni jyo'o Adán cha' cuxi bi', la cui' jua'a̱ ndyanu yabe' hichu̱' na, lo'o hichu̱' lcaa tya'a ñati̱ na. Pana ndi'ya̱ ndyu'u cha' lo'o ngua'ni Jesucristo sca cha' tso'o: li' laja ti ngua'ni Ni cha' cuityi̱ Ni yabe' nu ntsu'u hichu̱' na, cha' caja chalyuu nu ná nga'a̱ cha' tye ji'na. 19Tya clyo cua ntsu'u sca ñati̱ nu ná ndaquiya' ji'i̱ cña nu ngulo ycui' Ndyosi ji'i̱ yu, bi' cha' ndyanu qui'ya ji'i̱ lcaa na lo'o tya'a na juani. Lo'o tiya' la li', ya̱a̱ chaca ñati̱ nu ndaquiya' ji'i̱ cña nu ngulo Ni ji'i̱; xqui'ya nu bi' ndyaca tso'o cresiya ji'i̱ lcaa na cuentya ji'i̱ ycui' Ndyosi juani.

20Nu lo'o cuna na ni cña laca nu nclyo ycui' Ndyosi ji'na, li' nchca cuayá' la ti' na ñi'ya̱ laca qui'ya nu sta Ni ji'na. Masi ndube tsa ti' na cha' ntsu'u tsa cha' cuxi ji'na, la cui' jua'a̱ jlo ti' na cha' ntaja'a̱ Ni cua'ni lyaá Ni ji'na; jlo ti' na cha' nchca ji'i̱ Ni, cha' tso'o tsa ndu'ni Ni lo'o na. 21Nu cuxi laca loo ji'na, bi' cha' ndyijii na; pana juani nti' ycui' Ndyosi caca Ni loo ji'na, cha' tya'na tsa ti' Ni ji'na. Lo'o caca tso'o cresiya ji'na cuentya ji'i̱ Ni, li' ta Ni sca chalyuu nu ná nga'a̱ cha' tye ji'na xqui'ya Jesús nu Xu'na na.

Currently Selected:

ROMANOS 5: cta

Highlight

Copy