ROMANOS 4

Ñi'ya̱ ngua ji'i̱ Abraham

1Juani ta na' sca cha' lo'o ma̱ ñi'ya̱ ngua ji'i̱ Abraham, nu jyo'o cusu' ji'na nu ngua tya sa'ni. 2Ycui' ca Abraham ni, ná ngua cua'ni yu cha' ca tso'o cresiya ji'i̱ ycui' ca yu cuentya ji'i̱ ycui' Ndyosi, ni ná ngua ji'i̱ yu xacui̱ yu cha' ji'i̱ ycui' Ndyosi cha' ngua ji'i̱ ycui' yu. 3Nde laca cha' nu nscua lo quityi ji'i̱ ycui' Ndyosi: “Ngusñi Abraham cha' nu nda ycui' Ndyosi lo'o yu; bi' cha' ngüiñi cha' ji'i̱ Ni lo'o yu cha' caca tso'o cresiya ji'i̱ yu, xqui'ya cha' jlya ti ti' yu ji'i̱ Ni”. Jua'a̱ nscua lo quityi bi'. 4Lo'o ndya'a̱ na ne' xña ji'i̱ ñati̱ ni, nda ngu' xcaya' na li'; si'i na nda laja ti ngu' cñi ji'na, cñi nu ndacui ngu' ji'na laca, cha' ngua'ni na cña. 5Pana nu lo'o jlya ti ti' na ji'i̱ Jesús cha' ngulotsu' yu yabe' nu ntsu'u ji'na, li' taca xquiñi Ni cha' ji'i̱ Ni lo'o na cha' caca tso'o cresiya ji'na, masi ná sca na ndacui Ni ji'na. 6Tya sa'ni la nacui̱ jyo'o David cha' tso'o tsa ntsu'u tyiquee ñati̱ nu cua laca ngua'ni lubii ycui' Ndyosi cresiya ji'i̱. Cua nacui̱ Ni cha' lubii cresiya ji'i̱ ngu', masi ná sca cña ngua'ni ngu' cuentya ji'i̱ Ni cha' caca lubii ycui' ngu'. 7Li' nacui̱ David ndi'ya̱:

Tso'o ntsu'u tyiquee na lo'o cua'ni clyu ti' Ni ji'na ji'i̱ qui'ya nu ntsu'u ji'na, lo'o culotsu' Ni yabe' nu ntsu'u ji'na, nacui̱.

8Tso'o ntsu'u tyiquee na si nga'aa cua'ni Ni cuentya ji'i̱ lcaa cha' cuxi nu cua ngua'ni na.

9Si'i xcui' ngu' judío ti nu tso'o ntsu'u tyiquee ngu' jua'a̱, taca ñacui̱ na cha' lo'o ngu' xa' tsu' caca tso'o tyiquee ngu' jua'a̱. Cua nchcui' ca ti na cha' ngusñi Abraham cha' nu nda ycui' Ndyosi lo'o yu, bi' cha' cua nacui̱ Ni ji'i̱ yu cha' ca tso'o cresiya ji'i̱ yu cuentya ji'i̱ ycui' Ndyosi, xqui'ya cha' jlya ti ti' yu ji'i̱ Ni. 10¿Ni jacua' ngua cha' bi'? ¿Ha cua laca cha' cua nsi'yu lo quiji̱ yu ñi'ya̱ nu ndu'ni ngu' judío cha' clyacua̱ ngu'? Si'i. Tya lyiji xi'yu ngu' quiji̱ yu tyempo bi'; 11ca tiya' la, li' ngulacua̱ yu jua'a̱. Sca cuayá' ti ngua bi', cha' caca cuayá' ti' ngu' cha' ngua tso'o cresiya ji'i̱ yu cuentya ji'i̱ ycui' Ndyosi, nu lo'o jlya ti ti' yu ji'i̱ Ni. Yala la ngua cha' ngusñi yu cha' ji'i̱ ycui' Ndyosi, tiya' la ngulacua̱ yu. Bi' cha' lcaa ma̱ nu ntsu'u ma̱ xa' tsu' nu ngusñi ma̱ cha' ji'i̱ Jesús, laca ma̱ ñi'ya̱ laca si Abraham laca jyo'o cusu' ji'i̱ ma̱ nu ya̱a̱ chalyuu tya clyo la. Lo'o xñi cua ña'a̱ ca na cha' ji'i̱ Jesús, li' quiñi cha' ji'i̱ ycui' Ndyosi lo'o na cha' caca lubii cresiya ji'na. 12La cui' jua'a̱ laca tyiquee ngu' judío tya'a na nu stu'ba ti ngusñi cha' ji'i̱ Jesucristo lo'o na. Chañi cha' Abraham ngua jyo'o cusu' ji'i̱ ngu'; pana tso'o la cha' jlya ti ti' ngu' ji'i̱ ycui' Ndyosi, ñi'ya̱ jlya ti' nu jyo'o Abraham bi', masi tya lyiji clyacua̱ yu.

Ngüiñi cha' ji'i̱ Ni lo'o ñati̱ xqui'ya cha' jlya ti' ngu' ji'i̱ cña nu ngua'ni Jesús

13Lo'o jua'a̱ ngua cha' ngüiñi cha' ji'i̱ ycui' Ndyosi lo'o jyo'o Abraham, lo'o ñati̱ ji'i̱ Abraham nu ñaa chalyuu ca tiya' la; nacui̱ Ni cha' tyucui ña'a̱ chalyuu caca ji'i̱ ngu' bi' ca tiya' la. Pana bilya ta Ni cha' lo'o jyo'o Moisés nu ngua li', cha' bilya cala nu Moisés bi'; bi' cha' ná ndaquiya' jyo'o Abraham ji'i̱ cña nu ngulo Moisés, cha' tya lyiji caja cha' bi' ji'i̱ ngu'. Ngua tso'o cresiya ji'i̱ ngu' bi' cuentya ji'i̱ ycui' Ndyosi xqui'ya cha' jlya ti' ngu' ji'i̱ cha' nu nchcui' Ni, bi' cha' ngüiñi cha' ji'i̱ Ni lo'o ngu'. 14Ná nti' ycui' Ndyosi cha' tsa lo cua ti ngu' caja chalyuu cucui ji'i̱ ngu', ngu' nu taquiya' ji'i̱ lcaa cha' nu nda jyo'o cusu' lo'o ngu'; tya nti' Ni cha' xñi cua ña'a̱ ca ñati̱ cha' ji'i̱ Jesús, cha' jua'a̱ ti taca quiñi cha' ji'i̱ ycui' Ndyosi lo'o ngu' li'. 15Xcui' na xcube' ti Ni ji'na, nu lo'o caca cuayá' ji'na slo ycui' Ndyosi cuentya ji'i̱ cha' cusu' bi'; pana ná caja ñi'ya̱ nu sta Ni qui'ya ji'na si ná nscua sca cha' nu ndaca'a ji'na jua'a̱.

16Ngüiñi cha' ji'i̱ Ni lo'o jyo'o Abraham lo'o ngusñi ti yu cha' ji'i̱ Ni, cha' caca cuayá' ti' lcaa na cha' xcui' cha' tso'o ntsu'u tyiquee Ni; bi' cha' nda Ni cha' bi' lo'o na. Ndyanu cha' bi' ji'i̱ lcaa ñati̱ ji'i̱ Abraham nu cala chalyuu ca nde loo la. Ni si'i tsa lo cua ti ñati̱ nu taquiya' ji'i̱ cha' cusu' ti laca nu tyanu cha' tso'o bi' ji'i̱, la cui' jua'a̱ tyanu cha' bi' ji'i̱ lcaa ñati̱ tya'a na nu xñi na cha' ji'i̱ ycui' Ndyosi ñi'ya̱ ngusñi ycui' Abraham cha' ji'i̱ Ni; jua'a̱ nti' na lo'o nacui̱ na cha' sti lcaa na ngua jyo'o Abraham bi' cuentya ji'i̱ ycui' Ndyosi. 17Ndi'ya̱ nchcui' cha' nu nda Ni lo'o Abraham, nu nscua lo quityi: “Cua nda na' chacuayá' cha' caca nu'u̱ sti tyu̱u̱ lo tya'a ñati̱ nu catu̱ chalyuu nde loo la”, nacui̱ Ni ji'i̱ Abraham. Cua ngüiñi cha' ji'i̱ ycui' Ndyosi lo'o jyo'o Abraham sa'ni, cha' ngusñi yu cha' nu cua nchcui' ycui' Ndyosi lo'o yu, la cui' Ni nu ndyu'ni cha' tyu'ú jyo'o chaca quiya'. Lo'o jua'a̱ ngulo Ni cña cha' tyu'u tucua lcaa cha' nde loo la, cha' nu cua nacui̱ Ni ji'i̱ yu lo'o nchcui' Ni ñi'ya̱ si cua laca ndi'i̱ cha' bi' ji'i̱ yu nu ngua li'.

18Masi ngua ti' jyo'o Abraham cha' ná caja sñi', ná ndube ti' yu; jlya ti' yu ji'i̱ ycui' Ndyosi, ntajatya yu ni jacua' caja sñi' yu. Bi' cha' ngua jyo'o Abraham sti tyu̱u̱ tya'a ñati̱ nu ndyatu̱ lo yuu ca nde loo la, ñi'ya̱ nu cua nchcui' Ni lo'o yu: “Quiña'a̱ tsa ñati̱ tyu'u jinu'u̱ tyempo nde loo la”, nacui̱ Ni ji'i̱ yu. 19Ná ngujlyaa ti' Abraham cha' bi'; ña'a̱ ti jlya ti' yu cha' nu cua nda ycui' Ndyosi lo'o yu, masi ndube ti' yu cha' ngusu' tsa yu, cha' cua tyalaa ti sca siyento yija̱ ntsu'u yu. Jlo ti' yu cha' cua ngulala ti cajaa tyucuaa ngu', lo'o ycui', lo'o ma' Sara clyo'o yu; nga'aa ntsu'u tyempo cha' caja sñi' Sara, ngua ti' yu. 20Pana ná nguta'a̱chu̱' yu, ná ngujlyaa ti' yu cha' nu cua nchcui' Ni lo'o yu; jlya tso'o ti' yu cha' bi'. Ngua'ni tlyu yu ji'i̱ ycui' Ndyosi, 21cha' jlo ti' yu cha' taca ji'i̱ Ni cua'ni lyiji Ni ji'i̱ cha' nu ngüiñi ji'i̱ Ni lo'o yu. 22Bi' cha' nda Ni chacuayá' cha' caca tso'o cresiya ji'i̱ yu, xqui'ya cha' jlya tsa ti' yu ji'i̱ Ni.

23Jua'a̱ nscua lcaa cha' bi' lo quityi nu nchcui' cha' ngüiñi cha' ji'i̱ Ni lo'o nu Abraham bi', cha' ngua tso'o cresiya ji'i̱ yu lo'o ngusñi ti yu cha' ji'i̱ ycui' Ni. Si'i cuentya ji'i̱ jyo'o Abraham ti nscua cha' bi', 24masi lo'o cuentya ji'na nscua cha' caca jua'a̱; lo'o ji'na cua nchcui' ycui' Ndyosi cha' caca tso'o cresiya ji'na cuentya ji'i̱ ycui' Ni si xñi na cha' ji'i̱ Ni, la cui' Ni nu ngua'ni cha' ndyu'ú Jesús nu Xu'na na chaca quiya' lo'o ngujuii yu. 25Nda Ni chacuayá' cujuii ngu' ji'i̱ Jesús, cha' cuityi̱ qui'ya nu ntsu'u ji'na; lo'o li' ndyu'ú Jesús chaca quiya', cha' caca tso'o cresiya ji'na cuentya ji'i̱ ycui' Ndyosi.

Currently Selected:

ROMANOS 4: cta

Highlight

Copy