ROMANOS 3

1Tso'o ti xi na cha' laca na ngu' judío lacua, tso'o xi cha' nsi'yu quiji̱ na, cha' jua'a̱ ngulacua̱ na. 2Ndi'ya̱ laca sca cha' tso'o nu ntsu'u ji'na cha' laca na ngu' judío: Sca ti lo'o ngu' judío tya'a na cua nda ycui' Ndyosi cha' ji'i̱ Ni tya clyo. 3Masi ntsu'u xi ngu' judío nu nga'aa jlya ti' ji'i̱ ycui' Ndyosi, ná culaya' Ni ji'i̱ cua ña'a̱ ca ngu' judío xqui'ya nu xti ti ñati̱ bi'. 4Ná nti' Ni cua'ni Ni jua'a̱. Xcui' cha' liñi ndu'ni ycui' Ndyosi lo'o ñati̱ ji'i̱ Ni, masi cha' cuiñi laca nu ndu'ni lcua ti lo ñati̱ chalyuu. Cua nscua sca cha' ji'i̱ ycui' Ndyosi lo quityi nu nchcui' ndi'ya̱:

Lo'o chcui' nu'u̱, li' caca cuayá' ti' ngu' cha' liñi tsa ndu'ni nu'u̱;

lo'o caca cuayá' jinu'u̱ slo ñati̱, taca cua'ni lyaá nu'u̱ ji'i̱ ycui' ca li'.

5Cha' nu na ni, ntsu'u tsa cha' cuxi nu ndyu'ni na; lo'o nu cha' cuxi bi' ni, ndu'ni cha' taca ca cuayá' la ti' na cha' liñi tsa laca ycui' Ndyosi. ¿Ñi'ya̱ ta ñacui̱ na li'? ¿Ha ná liñi ndu'ni Ni lo'o na? ¿Ha ná tso'o si xcube' Ni ji'na lo'o ndyu'ni na cha' cuxi? Ntsu'u ñati̱ nu nchcui' jua'a̱. 6Pana liñi tsa ndu'ni Ni. Ná caca xcube' Ni ji'i̱ ñati̱ chalyuu xqui'ya qui'ya nu ntsu'u ji'i̱ ngu', si ná liñi ndu'ni cuayá' Ni ji'i̱ lcaa ñati̱.

7Ná tyiquee' ñacui̱ ngu' cha' na cuiñi na'. Tso'o, cha' cuiñi nda na' lacua. Pana xqui'ya na', bi' cha' nchca cuayá' la ti' xa' ñati̱ cha' liñi nu nda ycui' Ndyosi lo'o na; jua'a̱ ndyu'ni tlyu la ngu' ji'i̱ Ni xqui'ya na'. Ná ntsu'u cha' sta Ni qui'ya 'na lacua. 8La cui' ti ná tso'o laca cha' cua'ni la na cha' cuxi cha' caca tso'o la cha' ji'na nde loo la; pana ntsu'u ngu' nu ñilo'o ji'i̱ tya'a ngu' lo'o nchcui' ngu' cha' jua'a̱ laca cha' cuxi nu nchcui' ya. Liñi tsa cua'ni ycui' Ndyosi lo'o xcube' Ni ji'i̱ ngu' nu nchcui' cha' cuiñi ji'na jua'a̱.

Lcaa ñati̱ ntsu'u qui'ya ji'i̱ ngu' cuentya ji'i̱ ycui' Ndyosi

9Ndi'ya̱ ñacui̱ na lacua: Ná caca chcui' na cha' tso'o la na cha' laca na ngu' judío, cha' si'i cha' bi' tsiya' ti; cua ngua cuayá' ca ti' na cha' stu'ba ti ntsu'u cha' cuxi ji'i̱ ngu' judío lo'o ji'i̱ ngu' xa' tsu', cha' ntsu'u tsa cha' cuxi nu laca loo ji'i̱ lcaa ñati̱ chalyuu. 10La cui' cha' nscua lo quityi ji'i̱ ycui' Ndyosi nu nchcui' ndi'ya̱:

Ni tsaca ngu' ná ntsu'u nu xcui' cha' tso'o ndu'ni;

11ná ntsu'u ñati̱ nu nchca cuayá' ti' cha' ji'i̱ ycui' Ndyosi,

ná tucui nclyana ji'i̱ ycui' Ni.

12Cua ndyu'utsu' lcaa ngu' ji'i̱ tyucui̱i̱ liñi, stu'ba ti ngua cuxi cresiya ji'i̱ lcaa ngu';

ná ntsu'u ni sca ñati̱ nu xcui' cha' tso'o ndu'ni.

13Ñi'ya̱ nti' xtyi'i tyucu̱ nu ntsu'u to' cuaá nu tya lyiji tyacu̱' lo, jua'a̱ laca ngu' bi',

cha' xcui' cha' cuxi ndyu'u tu'ba ngu'.

Lye tsa ñilo'o ngu' ji'i̱ tya'a ngu' laja lo'o nchcui' ti ngu'.

Ñi'ya̱ laca hitya tyaala nu ntsu'u tu'ba cuaña, jua'a̱ laca ngu',

cha' tyaala tsa nchcui' ngu'.

14Ná nxutacui ngu' cha' nda ngu' qui'ya ji'i̱ tya'a ngu';

15cujuii clya ngu' bi' ji'i̱ tya'a ngu', nti' ngu'.

16Xcui' na cua ndu'ni ñu'u̱ ngu' ji'i̱ tya'a ngu', ndu'ni ngu' cha' ca xñi'i̱ ti' xa' ñati̱ macala su ndya'a̱ ngu' bi'.

17Ná nslo ngu' ji'i̱ tyucui̱i̱ liñi nu cua'ni cha' ti̱ ti tyi'i̱ tyiquee ngu'.

18Pana ná ntsi̱i̱ ngu' tsiya' ti ña'a̱ ngu' ji'i̱ ycui' Ndyosi, nacui̱ ngu'.

Jua'a̱ cha' nscua lo quityi bi'.

19Cua jlo ti' na cha' cua nscua lcaa cha' cusu' bi', cha' cube ti' ngu' judío nu ntsu'u cha' ji'i̱ lo'o cha' bi'; jua'a̱ nguscua jyo'o cusu', cha' cua nti' ycui' Ndyosi cha' caca cuayá' ti' lcaa ñati̱ tyucui ña'a̱ chalyuu cha' ná caja ñi'ya̱ nu cua'ni lyaá ngu' ji'i̱ ycui' ca ngu' lo'o Ni, cha' nga'a̱ cha' cua'ni cuayá' Ni ji'i̱ ngu'. 20Masi cua'ni na lcaa ca cha' nu nguscua ngu' lo quityi cusu' bi', ná caca ca tso'o tyiquee na cuentya ji'i̱ ycui' Ndyosi lo'o ndyu'ni ti na jua'a̱; tsa bi' ti cña ndu'ni quityi bi', cha' caca cuayá' ti' na cha' ntsu'u tsa qui'ya ji'na cuentya ji'i̱ ycui' Ndyosi.

Cua'ni lyaá ycui' Ndyosi ji'i̱ ñati̱ lo'o xñi ngu' cha' ji'i̱ Jesucristo

21Lo'o juani cua ngutu'u tucua sca cha' cucui nde chalyuu, ná stu'ba tsiya' ti cha' bi' lo'o cha' cusu' bi'. Lo'o nclyu'u ycui' Ndyosi cha' bi' ji'na, li' caca cuayá' ti' na ñi'ya̱ caca ca tso'o cresiya ji'na cuentya ji'i̱ ycui' Ni. Cua nscua xi cha' nu nchcui' ji'i̱ cha' bi' lo quityi cusu' bi', masi lo quityi nu nguscua jyo'o cusu' nu ngua tu'ba ji'i̱ ycui' Ndyosi nchcui' Ni lo'o ñati̱ sa'ni. 22Nchcui' quityi cha' cua'ni ycui' Ndyosi cha' caca tso'o cresiya ji'na cuentya ji'i̱ ycui' Ni, si xñi na cha' ji'i̱ Jesucristo. Stu'ba ti cua'ni Ni lo'o ca ta'a na nu laca na ngu' judío; jua'a̱ lo'o lcaa ñati̱ nu cua ngusñi cha' ji'i̱ ycui' Ndyosi ca chaca tsu' chalyuu, stu'ba ti cua'ni Ni lo'o lcaa ñati̱. 23Lcaa na ntsu'u qui'ya ji'na cuentya ji'i̱ ycui' Ndyosi, cha' ná ngua'ni na tsiya' ti cña nu nti' Ni cha' cua'ni na. 24Pana cua'ni Ni cha' caca tso'o cresiya ji'na, cha' tso'o ti ntsu'u tyiquee Ni ña'a̱ Ni ji'na; sca cha' tso'o nu ngua'ni ti Ni cuentya ji'na laca, cha' tlyu tsa cña nu ngua'ni ycui' Jesucristo cha' cati̱ qui'ya nu ntsu'u ji'na, nu lo'o ngujuii yu lo crusi cha' cua'ni lyaá yu ji'na. 25Nda ycui' Ndyosi ji'i̱ Jesús ñaa chalyuu cha' tyaja'a̱ yu cajaa yu; masi ycui' yu chcube' yu cña loo lcaa ñati̱ chalyuu, cha' qui'ya ycui' yu yabe' nu ntsu'u ji'na. Caca cha' bi' ji'na si tyaja'a̱ na xñi na cha' ji'i̱ Jesús. Lo'o jua'a̱ nti' Ni culu'u Ni ji'na cha' xcui' cha' liñi ndu'ni Ni lo'o na, masi ná ngua'ni cuentya Ni ji'i̱ qui'ya nu ntsu'u ji'i̱ jyo'o cusu' ji'na; pana ndalo tsa tyiquee Ni ji'i̱ ngu' bi' li'. 26Nu juani ngulu'u Ni ji'na cha' liñi tsa ndu'ni ycui' Ni; jua'a̱ taca ji'i̱ Ni cua'ni lubii cresiya ji'i̱ scaa na, si tyaja'a̱ na xñi na cha' ji'i̱ Jesús.

27Cha' cuiñi nchcui' na si ñacui̱ na cha' nchca tsa ji'i̱ ycui' ca na ñati̱ chalyuu, cua'ni na cha' caca tso'o cresiya ji'na cuentya ji'i̱ ycui' Ndyosi. Ná taca. Lye tsa ndyu'ni tyucuaa ti' na lo'o Ni si jua'a̱ nti' na. ¿Ñi'ya̱ jua'a̱? Ná nchca ji'na cua'ni na cha' caca tso'o cresiya ji'na cuentya ji'i̱ ycui' Ndyosi lo'o taquiya' ti na lcaa cha' cusu', sca ti nu lo'o xñi na cha' ji'i̱ Jesús caca tso'o cresiya ji'na. Pana nga'aa tso'o chcui' na cha' tyixi li', cha' si'i ycui' na laca nu ndu'ni cha' ca tso'o cresiya ji'i̱ ycui' ca na. 28Bi' cha' ni na' ji'i̱ ma̱ cha' ntsu'u sca ti ña'a̱, ñi'ya̱ nu caca ca tso'o cresiya ji'na cuentya ji'i̱ ycui' Ndyosi; ntsu'u cha' xñi na cha' ji'i̱ Jesús, masi ná nchca ji'na cua'ni na lcaa lo cha' cusu' nu nguscua ngu' sa'ni.

29Si'i sca ti ji'i̱ ngu' judío ti laca ycui' Ndyosi loo, lo'o ji'i̱ ngu' xa' tsu' laca Ni loo. 30Chañi tsa laca cha' bi', cha' sca ti ycui' Ndyosi laca loo tyucui ña'a̱ chalyuu; ná ntsu'u chaca nu laca loo la. Cua'ni Ni cha' caca tso'o cresiya ji'i̱ ngu' judío lo'o xñi ngu' cha' ji'i̱ Ni; la cui' jua'a̱ cua'ni Ni cha' caca tso'o cresiya ji'i̱ ngu' xa' tsu', nu lo'o xñi ngu' bi' cha' ji'i̱ Ni. 31Tso'o lacua. Na jlya ti ti' na ji'i̱ cña nu ngua'ni Jesús, tsa bi' ti cha' cua'ni na cha' clyaá na ji'i̱ lcaa qui'ya nu ntsu'u ji'na. ¿Ha nga'aa ntsu'u cha' taquiya' na lcaa cha' nu nguscua jyo'o cusu' cha' cua'ni na lacua? Si'i cha' bi', masi tso'o la taquiya' na cha' cusu' bi' juani, nu lo'o ngusñi na cha' ji'i̱ Jesús.

Currently Selected:

ROMANOS 3: cta

Highlight

Copy