Popular Bible Verses from ROMANOS 5

Share

Pana jua'a̱ ngua'ni ycui' Ndyosi lo'o na, cha' culu'u Ni ji'na cha' ntsu'u tsa tyiquee Ni ña'a̱ Ni ji'na; nda Ni ji'i̱ Cristo cha' cajaa cuentya ji'na, masi tya ntsu'u tsa qui'ya ji'na.

Lo'o jua'a̱ si'i sca cha' nu nda ti ti' na laca cha' bi', sca cha' chañi laca bi'; cua'ni Ni ji'i̱. Cua ngua'ni Ni cha' ca tii cresiya ji'na, cha' ntsu'u tsa tyiquee ycui' Ndyosi ña'a̱ Ni ji'na; ngua'ni Ni jua'a̱ nu lo'o nda Ni Xtyi'i ycui' Ni ji'na.

Masi juani tso'o ntsu'u tyiquee na laja lo'o ndi'i̱ na chalyuu; masi lya' tsa ti' ngu' ji'na, jlo ti' na cha' taca talo na lo'o nchcube' na jua'a̱. Lo'o ngualoo cha' ti'í bi', cua jlo ti' na cha' cua ngua'ni cuayá' ti Ni ji'na. Lo'o li' si ña'a̱ ti tya tso'o cresiya ji'na cuentya ji'i̱ ycui' Ndyosi, li' cua ndu̱ ti' na cha' caca tso'o ji'na nde loo la.

Jua'a̱ laca lacua; xqui'ya cha' ngusñi ti na cha' ji'i̱ Jesús, bi' cha' cua ngua tso'o cresiya ji'na cuentya ji'i̱ ycui' Ndyosi. Lo'o li' ti̱ ti ndi'i̱ tyiquee na, stu'ba ti ntsu'u cha' ji'na lo'o ycui' Ndyosi xqui'ya Jesucristo nu Xu'na na. Tso'o tsa ndyu'ni ycui' Ndyosi lo'o na chacuayá' ji'i̱ Cristo, nu lo'o ngusñi na cha' ji'i̱ nu Cristo bi'. Ngua'ni Ni cha' ntsu'u cha' ji'na lo'o ycui' Ni, bi' cha' nga'aa ntsu'u cha' tya'a̱chu̱' na ji'i̱ Ni; tso'o tsa ntsu'u tyiquee na, cha' jlo ti' na cha' ca tiya' la caja sca se'i̱ nu tso'o tsa su tyi'i̱ na ca su ntucua ycui' Ndyosi, cha' jua'a̱ tso'o ti ndu'ni Ni lo'o na.

Jlo ti' na cha' ná caca cua'ni lyaá na ji'i̱ ycui' ca ti na ji'i̱ qui'ya nu ntsu'u ji'na; pana lo'o ndyalaa la cui' hora nu ngusta ycui' Ndyosi, li' ngujuii Jesús xqui'ya na, ñati̱ cuxi na.

Tso'o lacua. Cua laca ngua tso'o cresiya ji'na cuentya ji'i̱ ycui' Ndyosi, xqui'ya cha' ndyalú tañi ycui' Cristo lo'o ngujuii yu lo crusi. La cui' jua'a̱ cua lijya̱ nclyaá na juani; xqui'ya Cristo nga'aa xcube' Ni ji'na lo'o tye chalyuu.

Tya clyo cua ntsu'u sca ñati̱ nu ná ndaquiya' ji'i̱ cña nu ngulo ycui' Ndyosi ji'i̱ yu, bi' cha' ndyanu qui'ya ji'i̱ lcaa na lo'o tya'a na juani. Lo'o tiya' la li', ya̱a̱ chaca ñati̱ nu ndaquiya' ji'i̱ cña nu ngulo Ni ji'i̱; xqui'ya nu bi' ndyaca tso'o cresiya ji'i̱ lcaa na cuentya ji'i̱ ycui' Ndyosi juani.

Ni si'i tsa lo cua ti cha', masi lo'o cha' tso'o tsa ntsu'u tyiquee na ña'a̱ na ji'i̱ ycui' Ndyosi xqui'ya Jesucristo nu Xu'na na, cha' bi' laca nu ngua'ni cha' caca ca stu'ba cha' ji'na lo'o Ni.