SAN MATEO 25

Cui̱i̱ ji'i̱ tii tya'a nu cuna'a̱ cuañi'

1’Ta na' chaca cha' lo'o ma̱ cha' ca cuayá' ti' ma̱ ñi'ya̱ caca lo'o laca ycui' Ni loo ne' cresiya ji'i̱ ñati̱: Ndyaa tii tya'a nu cuna'a̱ cuañi' ca to' tyi sca nu cuna'a̱ nu laca cuxi̱i̱ ji'i̱ ngu'; ntsu'u candil ji'i̱ ca ta'a tii tya'a ngu', cha' jatya ngu' ji'i̱ cutsii. 2Tonto xi nclacua ti' ca'yu tya'a nu cuna'a̱ bi', masi tso'o la nclacua ti' nu chaca ca'yu tya'a ngu' cuna'a̱ bi'. 3Nu cuna'a̱ tonto bi' ni, lo'o candil ji'i̱ ngu' ndya'a̱ ngu', pana ná lo'o setye cha' tyu'u ne' candil bi', cha' tyu'u xee ji'i̱. 4Lo'o nu chaca ca'yu tya'a ngu' cuna'a̱ nu tso'o ti nclacua ti', lo'o candil ndya'a̱ ngu', cuati lo'o caatya̱ setye ndya'a̱ ngu'. 5Lo'o li' tyiquee' tsa ntajatya ngu' ji'i̱ nu cutsii bi'; ngua'ya tsa xcalá ngu', ngujua' ngu' li'. 6Cla'be talya tsiya' ti nguañi ngusi'ya sca ñati̱: “Cua lijya̱ cutsii juani”, nacui̱. “Tyu'u clya ma̱ nde liya' cha' tsaa ma̱ tyacua tya'a ma̱ lo'o yu, cha' tya̱a̱ lo'o ma̱ ji'i̱ nde ni'i̱.” 7Hora ti ngue ti' lcaa ngu' cuna'a̱ bi' li', ngusi'yu ngu' nchcubi' ntucua lo mecha ji'i̱ candil ji'i̱ ngu', lo'o cua su'ba ti ngu' xa' setye ne' candil bi'. 8Li' ndyi'u ti' ngu' cuna'a̱ tonto bi' ji'i̱ setye. ¿Ma caja bi'? Li' ngüijña ngu' bi' ji'i̱ tya'a ngu': “Ta ma̱ xi setye ji'i̱ cuare, cha' cua tyubi' ti candil ji'i̱ cua”, nacui̱ ngu' tonto bi'. 9“Setye nu ntsu'u ne' caatya̱ ji'i̱ cua, ná tyu'u scua ji'i̱ ca ta'a na cha' tyu'u ne' candil ji'i̱ lcaa na”, nacui̱ ngu' cuna'a̱ bi'. “Tso'o la yaa clya ma̱ ca tienda cha' cui'ya ma̱ la xi.” 10Laja lo'o ndyaa ngu' cuna'a̱ tonto bi', cha' cui'ya ngu' la xi setye, li' ndyalaa cutsii. Nu ngu' cuna'a̱ nu cua laca ngua'ni cho'o candil ji'i̱ ngu' ni, ndyaa ngu' nde ni'i̱ ji'i̱ cuxi̱i̱ lo'o cutsii bi', cha' cacu ngu' slo; hora ti ndyacu̱' toni'i̱ li'. 11Ca tiya' la xi ndyalaa ngu' cuna'a̱ tonto bi'. “Cua ndyalaa cuare juani”, nacui̱ ngu'. “Xaala clya toni'i̱ cha' tya̱a̱ ya nde ni'i̱ su ndi'i̱ ma̱ cua”, nacui̱ ngu' ji'i̱ cutsii. 12Li' nguxacui̱ cutsii cha' ji'i̱ ngu' cuna'a̱ tonto bi': “Ná nslo na' ji'i̱ ma̱ tsiya' ti, ná jlo ti' na' ti ñati̱ laca cu'ma̱”, nacui̱ nu cutsii bi' ji'i̱ ngu' li'.

13Tya nchcui' la xi Jesús lo'o ngu' li':

―Bi' cha' tii ti ti' tyi'i̱ ma̱ lcaa hora, cha' ná jlo ti' ma̱ ni tsa̱ ni hora ca̱a̱ na' chaca quiya', na' nu cua nda Ni 'na lijya̱a̱ cha' caca na' ñati̱.

Cui̱i̱ ji'i̱ sna tya'a msu lo'o cñi

14’Lo'o jua'a̱, ta na' chaca cha' lo'o ma̱, cha' ca cuayá' ti' ma̱ ñi'ya̱ caca lo'o laca ycui' Ni loo ne' cresiya ji'i̱ ñati̱: Cua tsaa ti sca nu culiya' tyijyu', bi' cha' ngusi'ya yu ji'i̱ ca ta'a msu ji'i̱, cha' ca̱a̱ ngu' slo. Li' nguxtyanu xu'na ngu' xi cñi ji'i̱ scaa msu bi', cha' cua'ni ngu' cña lo'o cñi bi' cuentya ji'i̱ ycui' nu culiya' bi'.

15’Nda nu cusu' ca'yu mil cñi plata ji'i̱ msu nu ya̱a̱ tya clyo, lo'o jua'a̱ nda yu tucua mil ji'i̱ chaca msu, lo'o jua'a̱ nda yu sca mil ji'i̱ chaca msu, cha' jlo ti' xu'na ngu' ñi'ya̱ caca ji'i̱ scaa msu bi' cua'ni cña lo'o cñi bi'. Li' ndu'u xu'na ngu', ndyaa tyijyu'. 16Hora ti ndyaa msu nu ntsu'u ca'yu mil cñi plata ji'i̱, ngüi'ya yu yu'ba lo'o cñi bi'. Li' ndyujui' yu yu'ba bi', ngua'ni yu ngana ña'a̱ cuayá' nu ngujui chaca ca'yu mil cñi plata ji'i̱. 17Lo'o jua'a̱ ngua'ni chaca msu nu ntsu'u tucua mil cñi plata ji'i̱, ngua'ni yu ngana ña'a̱ cuayá' nu ngujui chaca tyucuaa mil cñi plata ji'i̱ yu. 18Pana nu msu nu ntsu'u sca mil ti cñi plata ji'i̱ ni, ngulu yu sca tyuu ne' yuu, ngusu'ba cuatsi' yu cñi ji'i̱ xu'na yu ne' yuu bi' li'.

19’Tyiquee' ndyaa xu'na msu bi', lo'o li' ndyalaa yu to' tyi yu chaca quiya'. Li' ngusi'ya yu ji'i̱ ca ta'a msu bi', cha' ca̱a̱ ngu' slo, cha' ca cuayá' ti' ycui' ni cña ngua'ni ngu' lo'o cñi ji'i̱. 20Clyo ndyalaa msu nu nda xu'na ca'yu mil cñi plata ji'i̱. “Xu'na”, nacui̱ msu bi', “nda nu'u̱ ca'yu mil cñi 'na, lo'o nu juani cua ngujui la chaca ca'yu mil cñi 'na, nu lo'o cua ngua'ni na' cña lo'o cñi bi' jinu'u̱”. 21“Tso'o tsa cña nu ngua'ni nu'u̱”, nacui̱ xu'na msu bi' ji'i̱. “Sca msu tso'o laca nu'u̱, cha' tso'o tsa ndaquiya' nu'u̱ ji'i̱ cha' 'na. Sca cña sube ti nda na' jinu'u̱ tsubi', pana ta na' cña nu cua tlyu la jinu'u̱, cha' cua'ni nu'u̱ nde loo la. Stu'ba ti tyi'i̱ nu'u̱ slo na', cha' stu'ba ti ca tso'o tyiquee nu'u̱ lo'o na'”, nacui̱ xu'na bi' li'. 22Lo'o li' ndyalaa chaca msu nu nda xu'na tucua mil cñi plata ji'i̱. “Xu'na”, nacui̱ msu bi', “nda nu'u̱ tucua mil cñi plata 'na, lo'o nu juani cua ngujui la tya tyucuaa mil cñi 'na cha' ngua'ni na' cña lo'o cñi bi' jinu'u̱”. 23“Tso'o tsa cña nu ngua'ni nu'u̱”, nacui̱ xu'na msu bi' ji'i̱ yu. “Sca cña sube ti nda na' jinu'u̱ tsubi', pana ta na' chaca cña nu cua tlyu la jinu'u̱, cha' cua'ni nu'u̱ nde loo la. Stu'ba ti tyi'i̱ nu'u̱ slo na', cha' stu'ba ti ca tso'o tyiquee nu'u̱ lo'o na'”, nacui̱ xu'na yu li'. 24Lo'o li' ndyalaa chaca msu nu nda xu'na sca mil cñi ji'i̱ yu. “Xu'na”, nacui̱ msu bi', “jlo ti' na' cha' ñati̱ tiji tsa laca nu'u̱, cha' ndu'ni nu'u̱ clacua masi xa' ñati̱ ngua'ni cña bi'; jua'a̱ nscua' nu nchcuá' xa' ñati̱, bi' laca nu caja jinu'u̱. 25Bi' cha' ndyutsi̱i̱ na', lo'o li' ndyaa na' nguxatsi' na' cñi jinu'u̱ ne' yuu. Nde laca cñi jinu'u̱ lacua.” 26Ngua ñasi̱' xu'na lo'o msu bi' li'. “Sca msu xña'a̱ laca nu'u̱”, nacui̱ xu'na ji'i̱ msu bi'. “Taja tsa nu'u̱”, nacui̱. “Nacui̱ nu'u̱ cha' jlo ti' nu'u̱ ñi'ya̱ nu ndu'ni na', cha' nxuti'i̱ na' ltya masi ná ndyataa na' nscua'; lo'o jua'a̱ tyaa lo'o na' ji'i̱ nscua' masi ná ngua'ni na' cña ji'i̱”, nacui̱ nu'u̱. 27¿Ni cha' ná nda nu'u̱ cñi 'na ji'i̱ xa' ñati̱ lacua, cha' cua'ni ngu' cña lo'o? Li' chca'a̱ sñi' cñi bi' jna', cha' tya nu'u̱ jna' lo'o ndyalaa na' chaca quiya'. 28Tso'o la xñi ma̱ nu sca ti mil nu ntsu'u ya' yu re, ta ma̱ ji'i̱ msu nu ntsu'u tii mil ji'i̱ juani. 29Jua'a̱ laca lo'o ñati̱ nu ntsu'u xi cha' ji'i̱, tya ta na' quiña'a̱ la cha' ji'i̱ ñati̱ bi', cha' quiña'a̱ la cha' tso'o tyu'u ji'i̱ ngu' bi'; pana ñati̱ nu xixi ca cha' ntsu'u ji'i̱, si ná nti' ngu' cua'ni ngu' cña lo'o, hasta xlyaá na' nu xti ti cha' nu ntsu'u ji'i̱ ngu' li'. 30Nu juani tsaa lo'o ma̱ ji'i̱ msu xña'a̱ re, cha' xcua̱a̱ ma̱ ji'i̱ yu ca bilyaa, su nxi'ya tsa ngu', lo'o jua'a̱ lye tsa ndacu la'ya ngu' cha' ñasi̱' ngu', cha' lye tsa nchcube' ngu' cajua.”

Cua'ni cuayá' Ni ji'i̱ lcaa lo ñati̱ chalyuu

31’Nu lo'o tya̱a̱ na' nu cua nda Ni 'na lijya̱a̱ cha' caca na' ñati̱, ca̱a̱ na' cha' caca na' loo tsiya' ti ji'i̱ ñati̱. Stu'ba ti ca̱a̱ na' lo'o lcaa ngu' xca̱ 'na, lo'o li' tyaca'a̱ na' su tlyu su cua cua̱ la xi, sca se'i̱ su ndubi tsa ña'a̱ laca bi'. Ca bi' cua'ni cuayá' na' ji'i̱ lcaa ñati̱ li'. 32Ntsu'u cha' tyu'u ti'i̱ se'i̱ ti lcaa ñati̱ tsiya' ti tyucui ña'a̱ chalyuu; ca slo ycui' na' tyu'u ti'i̱ ngu', cha' cua'ni cuayá' na' ji'i̱ ngu'. Li' sa'be tya'a na' ji'i̱ ngu'. La cui' ñi'ya̱ nu ndu'ni ñati̱ nu ña'a̱si̱i̱ ji'i̱ xlya', jua'a̱ cua'ni na'; sca tsu' tyi'i̱ ña'a̱ latya xlya' ji'i̱ ngu', chaca tsu' tyi'i̱ ña'a̱ latya chivo ji'i̱ ngu'. 33Jua'a̱ cua'ni na', cha' la'a tsu' cui̱ 'na tyi'i̱ ña'a̱ tsaca taju ñati̱ 'na, ñi'ya̱ ndi'i̱ xlya' bi'; la'a tsu' coca su tyucua na', ca bi' tyi'i̱ lcaa ñati̱ cuxi, ñi'ya̱ ndi'i̱ chivo bi'. 34Ca li' lo'o caca na' loo tsiya' ti, chcui' na' lo'o taju ñati̱ nu ndi'i̱ la'a tsu' cui̱ 'na: “Tya̱a̱ ma̱ ca su ntucua ycui' Ni nu laca loo, lcaa cu'ma̱ nu tso'o tsa nti' ycui' Ndyosi Sti na' ña'a̱ Ni ji'i̱ ma̱, cha' cua ngua'ni cho'o ycui' Ni su tyi'i̱ ma̱ slo Ni, tya lo'o ngüiñá Ni chalyuu. 35Cu'ma̱ ni, cua nguxacu ma̱ 'na lo'o ntyute' na' nguti'i̱ na' nde chalyuu; nu lo'o nguityi na' hitya, cua nda ma̱ hitya ndyi'o na' li'; masi ná ndyuloo ma̱ 'na, pana cua nda ma̱ to' tyi ma̱ cha' nguti'i̱ na' li'; 36lo'o quichi' ti na' su nguta'a̱ na' chalyuu, cua nda ma̱ late' ndyacu' na' li'; lo'o ngua quicha na' nde chalyuu, cua ya̱a̱ na'a̱ ma̱ 'na li', nguxtyucua ma̱ 'na; lo'o nga'a̱ na' ne' chcua̱, ná ndyutsi̱i̱ ma̱ ndyaa ma̱ slo na' li'.” Jua'a̱ ñacui̱ na' lo'o caca na' loo. 37Li' xacui̱ ngu' nu lubii tyiquee cha' jna': “Xu'na, ¿ni jacua' na'a̱ ya jinu'u̱ cha' ntyute' nu'u̱? ¿Ni jacua' nguxacu ya jinu'u̱? ¿Ni jacua' nda ya hitya ndyi'o nu'u̱ cha' ngüityi nu'u̱ hitya? 38¿Ni jacua' nda ya su nguti'i̱ nu'u̱ masi ná ndyuloo ya jinu'u̱? ¿Ni jacua' nda ya late' ndyacu' nu'u̱ lo'o nguta'a̱ quichi' ti nu'u̱? 39¿Ni jacua' ndyaa na'a̱ ya jinu'u̱ lo'o ngua quicha nu'u̱? ¿Ni jacua' ndyaa na'a̱ ya jinu'u̱ lo'o nga'a̱ nu'u̱ ne' chcua̱? Ná jlo ti' ya, Xu'na.” 40Lo'o li' na' nu laca na' loo tsiya' ti, chcui' na' chaca quiya' lo'o ngu' bi': “Cha' liñi nchcui' na' lo'o ma̱ juani, cha' lo'o nguxtyucua ma̱ ji'i̱ sca ngu' tya'a na' nu ntsu'u cha' ji'i̱ lo'o na', masi nguxtyucua ma̱ ji'i̱ sca ngu' ti'i ti, bi' tyempo ngua lo'o nguxtyucua ma̱ 'na”.

41’Lo'o li' chcui' na' lo'o taju ñati̱ nu ndi'i̱ la'a tsu' coca 'na: “Tyu'u ma̱ liya', cu'ma̱ nu ná ntsu'u su tyi'i̱ ma̱ slo ycui' Ndyosi. Yaa clya ma̱ ca su ná tye tsiya' ti cha' ndyaqui̱ quii', cha' stu'ba ti tyi'i̱ ma̱ lo'o nu laca xu'na cuiñaja lo'o lcaa xca̱ ji'i̱, lcaa cui'i̱ cuxi; cuentya ji'i̱ nu cuiñaja bi' nguxtyu'u ycui' Ni quii' bi'. 42Cu'ma̱ ni, ná nda ma̱ na cacu na' tsiya' ti lo'o ntyute' tsa na' nguti'i̱ na' nde chalyuu; ná nda ma̱ hitya co'o na' lo'o ngüityi na' hitya li'; 43ná nda ma̱ su tyi'i̱ na' slo ma̱ li', cha' ná ndyuloo ma̱ 'na; ni ná nda ma̱ late' cacu' na' lo'o quichi' ti na' nguta'a̱ na' li'; ná ndyaa na'a̱ ma̱ 'na lo'o ngua quicha na', ni ná ndyaa ma̱ slo na' lo'o nga'a̱ na' ne' chcua̱.” 44Li' xacui̱ ngu' nu cuxi tyiquee cha' jna' cha' laca na' loo: “Xu'na”, ñacui̱ ngu' bi', “¿ni jacua' na'a̱ ya jinu'u̱ cha' ntyute' nu'u̱? Nu lo'o ngüityi nu'u̱ hitya, nu lo'o quichi' ti nu'u̱ nguta'a̱, nu lo'o quicha nu'u̱, nu lo'o nga'a̱ nu'u̱ ne' chcua̱, ¿ni jacua' ná nguxtyucua ya jinu'u̱? Ná jlo ti' ya cha' bi'.” 45Lo'o na' cha' laca na' loo, li' chcui' na' chaca quiya' lo'o ngu' cuxi bi': “Cha' liñi nchcui' na' lo'o ma̱ juani, cha' ná nguxtyucua ma̱ ji'i̱ ni sca ngu' ti'i nu ntsu'u cha' ji'i̱ lo'o na', bi' cha' nacui̱ na' cha' ná nguxtyucua ma̱ 'na tsiya' ti”. 46Lo'o li' tyaa ngu' bi' ca bilyaa su ná tye cha' chcube' ngu'; pana ngu' nu lubii tyiquee ni, caja chalyuu nu ná nga'a̱ cha' tye tsiya' ti ji'i̱ ngu' bi'.

Currently Selected:

SAN MATEO 25: cta

Highlight

Copy