SAN LUCAS 18

Cui̱i̱ ji'i̱ nu cuna'a̱ ti'i nu cua ndatsaa ji'i̱ bese

1Ngulu'u Jesús ji'i̱ ngu' cha' lu'ba ti chcui' ngu' lo'o ycui' Ndyosi, cha' ná ca taja ti' ngu' tsiya' ti lo'o chcui' ngu' lo'o Ni. Ndi'ya̱ ndyu'u cui̱i̱ nu nda Jesús lo'o ngu' li':

2―Sca quichi̱ ntsu'u sca bese nu ná ndu'ni chi̱ loo ycui' Ndyosi, lo'o jua'a̱ ná sca cha' ndube ti' yu. 3La cui' quichi̱ bi' ntsu'u sca nu cuna'a̱ ti'i. Li' ndyaa ma' bi' ndyaa na'a̱ ma' ji'i̱ bese bi', cha' ntsu'u cha' cuxi nu ndyu'ni xa' ñati̱ lo'o ma'; ngua ti' ma' cha' quiñi tso'o cha' ji'i̱ ma' lo'o tya'a cusu̱u̱ ma' slo bese. 4Tyu̱u̱ quiya' ndyaa ma' bi' slo bese, lo'o ná ndaquiya' bese bi' ji'i̱ cha' nu nda ma' bi' lo'o. Ca tiya' la li' ngulacua ti' nu bese bi': “Masi ná ndaquiya' na' ji'i̱ cha' nu nchcui' ycui' Ndyosi, ni ji'i̱ cha' nu nchcui' sca ñati̱ chalyuu ná ndube ti' na'; 5pana cua'ni na' tisiya ji'i̱ cha' nu nchcui' nu cuna'a̱ ti'i re, cha' ña'a̱ ti ndya'a̱ nu cuna'a̱ re nchcui' cua ña'a̱ ti lo'o na'. Bi' cha' cua'a na' xi ji'i̱”, nacui̱ bese bi', “cua'ni na' tisiya ji'i̱ cha' nu nchcui' ma' re, cha' nga'aa ca̱a̱ la ma' su'ba ñasi̱' ma' 'na.”

6Tya nchcui' la Jesús lo'o ngu' li':

―Jua'a̱ nchcui' nu bese xña'a̱ bi', li' nguxtyucua yu ji'i̱ ma' bi', masi ná tso'o tyiquee yu ―nacui̱ Jesús ji'i̱ ngu'―. 7Pana tso'o tsa tyiquee ycui' Ndyosi, yala ti xtyucua Ni ji'i̱ ñati̱ nu cua ngusubi Ni ji'i̱, nu tya'na tsa nxi'ya ji'i̱ Ni tsa̱ lo'o talya. ¿Ha tiya' tsa xtyucua Ni ji'i̱ ngu' nti' ma̱? 8Ñacui̱ na' ji'i̱ ma̱ cha' hora ti xtyucua Ni ji'i̱ ngu' bi', cua'ni Ni cha' ti̱ ti tyi'i̱ ngu'. Pana nu lo'o chaca quiya' tya̱a̱ na' nu cua nda Ni 'na lijya̱a̱ cha' caca na' ñati̱, ¿ha ña'a̱ ti tya quije 'na ñati̱ nu jlya ti' ji'i̱ ycui' Ndyosi Sti na'?

Sca cui̱i̱ ji'i̱ tucua lo ñati̱ nu ndyaa ne' laa

9Nde chaca cui̱i̱ nu nda Jesús lo'o ngu'; sca cui̱i̱ cuentya ji'i̱ ngu' nu tyixi tsa ndu'ni ji'i̱ ycui' ca ti ngu', cha' xcui' cha' liñi ndu'ni ngu' bi' nti' ngu', cha' xcui' nxtyí lo'o ti ngu' bi' ji'i̱ xa' ñati̱. Ndi'ya̱ nchcui' Jesús li':

10―Tucua tya'a ñati̱ ndyaa ne' laa tlyu cha' chcui' ngu' lo'o ycui' Ndyosi. Tsaca ngu' bi' laca ngu' fariseo nu tacati tsa ndu'ni ycui' ngu', nti' ngu'; chaca ngu' laca sca ngu' cuxi nu nclyo cñi cña loo ngu' cuentya ji'i̱ ngu' xa' tsu'. 11Nu yu fariseo bi' ni, na ndu̱ ti yu, ndi'ya̱ nchcui' yu lo'o ycui' Ndyosi li': “Ndyosi”, nacui̱, “tsa xlya'be jinu'u̱ cha' ná ndu'ni na' ñi'ya̱ nu ndu'ni xa' ñati̱; xña'a̱ tsa ndu'ni ngu', cuaana tsa ngu', suba' tsa ndu'ni ngu' lo'o clyo'o xa' ñati̱. Pana na' ni, ná ndu'ni na' jua'a̱, ni ná ndu'ni na' ñi'ya̱ ndu'ni yu cuxi cua nu cuiñi ti nxñi quiña'a̱ tsa cñi cña loo ngu'”, nacui̱ nu yu fariseo bi' ji'i̱ ycui' Ndyosi. 12“Tucua quiya' sca semana ná ndacu na' tyaja cha' ndu'ni tlyu na' jinu'u̱. Lo'o jua'a̱ nda na' sa yu'be lcaa na nu ngua'ni na' ngana scaa semana jinu'u̱”, nacui̱ yu fariseo bi'. 13Pana nu qui'yu nu nclyo cñi cña loo ngu' ni, tyijyu' ti ndyatu̱ yu; ná ntsu'u tyiquee yu cha' sicua̱a̱ yu xi cloo yu nde cua̱, cha' xñi'i̱ tsa ti' yu ndu̱ yu ndyu'u̱ ti yu tyiquee yu laja lo'o nchcui' yu lo'o ycui' Ndyosi: “Cua'ni tya'na ti' nu'u̱ jna', Ndyosi Sti na', cha' ntsu'u tsa qui'ya jna'”, nacui̱ nu qui'yu bi'. Tsa bi' ti cha' nchcui' yu.

14’Ndi'ya̱ laca cha' nu nti' na' chcui' na' lo'o ma̱, cha' nu qui'yu nu nclyo cñi cña loo ngu' bi' ni, cua ngüityi̱ ycui' Ndyosi qui'ya nu ntsu'u ji'i̱ yu bi'; tso'o ti tyiquee yu lo'o nguxtyu̱u̱ yu ndyaa yu to' tyi yu. Pana ná ngua ji'i̱ yu fariseo bi' jua'a̱, cha' nu ñati̱ nu tlyu tsa ndu'ni ji'i̱ ycui' ca ti, ntsu'u cha' caca tyuju'u ti' ñati̱ bi' ca tiya' la; pana ñati̱ nu tyuju'u tsa ti' ji'i̱ cha' cuxi nu ntsu'u ji'i̱ juani, ca tiya' la caca tso'o la cresiya ji'i̱ cuentya ji'i̱ ycui' Ndyosi.

Ngulacua̱ Jesús ji'i̱ nu sube

15Lo'o li' ñaa lo'o ngu' ji'i̱ nu sube cuañi' cha' sta ya' ycui' Jesús hique ngu' sube bi'. Pana nu lo'o na'a̱ nu ngu' nu ndyaca tsa'a̱ bi' ji'i̱ ñati̱ nu lijya̱ lo'o nu sube bi', lo'o ti nguxana ngu' bi' ngua'ni tyaala ngu' ji'i̱ ñati̱ nu lijya̱ bi'. 16Li' ngusi'ya Jesús ji'i̱ nu sube cha' ca̱a̱ ngu' slo yu. Li' nchcui' yu lo'o nu ngu' nu ndyaca tsa'a̱ ji'i̱ bi':

―Ta ma̱ chacuayá' cha' ca̱a̱ nu sube ca slo na' ―nacui̱―, cha' sca nu sube ni, tso'o tsa nxñi cha' tso'o ji'i̱ ycui' Ndyosi tyucui tyiquee bi' tsiya' ti. Lo'o jua'a̱ taca culo Ni cña ji'i̱ ñati̱ nu jua'a̱ jlya ti' ji'i̱ Ni, ñi'ya̱ lo'o jlya ti' nu sube ji'i̱ Ni. 17Cha' liñi nda na' re lo'o ma̱: Ñati̱ nu ná xñi cha' tso'o ji'i̱ ycui' Ndyosi ñi'ya̱ nu nxñi sca nu sube cha' bi', ná ntsu'u chacuayá' tyatí̱ ñati̱ bi' ca su laca ycui' Ni loo.

Nchcui' sca nu culiya' lo'o Jesús

18Ndacua ndu̱ sca ñati̱ tlyu nu laca loo ji'i̱ ngu' judío. Li' nchcuane yu bi' ji'i̱ Jesús:

―Mstru, tso'o tsa ndu'ni nu'u̱ ―nacui̱―. ¿Ñi'ya̱ cua'ni na' cha' caja chalyuu nu ná nga'a̱ cha' tye 'na? ―nacui̱ nu qui'yu bi'.

19Li' nguxacui̱ Jesús cha' ji'i̱ yu:

―¿Ni cha' laca nacui̱ nu'u̱ cha' tso'o tsa na'? ―nacui̱ Jesús ji'i̱ yu bi'―. Sca ti ycui' Ndyosi laca nu chañi cha' tso'o laca Ni. 20Cua jlo ti' nu'u̱ lcaa cña nu ngulo ycui' Ndyosi ji'i̱ ñati̱ tya sa'ni la, cha' nu nchcui' quityi ndi'ya̱: “Ná cua'ni ma̱ cha' suba' lo'o clyo'o xa' ñati̱”, nacui̱ quityi bi'. “Ná cujuii ma̱ ji'i̱ tya'a ñati̱ ma̱; ná cuaana ma̱; ná chcui' ma̱ cuentyu ji'i̱ tya'a ñati̱ ma̱; cua'ni tlyu ma̱ ji'i̱ sti xtya'a̱ ma̱, jua'a̱ tucuá ma̱ cha' nu nchcui' ngu' cusu' ji'i̱ ma̱ lo'o ma̱.” Jua'a̱ cha' nu nguxtyanu ycui' Ndyosi ji'na tya sa'ni la.

21―Tya lo'o cuañi' na' cua ndaquiya' na' lcaa cha' bi' ―nacui̱ nu qui'yu bi' ji'i̱ Jesús.

22Nu lo'o ndyuna Jesús cha' bi', li' nacui̱:

―Chaca tya cha' tya lyiji cua'ni nu'u̱: yaa cujui' lcaa cha' tso'o nu ntsu'u jinu'u̱, cha' tyu'u cñi nu ta ji'i̱ ngu' ti'i; tyacua xi cha' tso'o jinu'u̱ nde loo la ca su ntucua ycui' Ndyosi li'. Lo'o cua ngua'ni nu'u̱ cña bi', li' taca tya'a̱ nu'u̱ lo'o na'.

23Nu lo'o ndyuna nu qui'yu bi' cha' nu nchcui' Jesús, hora ti ngua xñi'i̱ ti' yu, cha' culiya' tsa yu. 24Lo'o na'a̱ Jesús cha' xñi'i̱ tsa ti' yu, li' nacui̱ ji'i̱ ngu' nu ndi'i̱ slo:

―Tucui tsa laca cha' ji'i̱ ngu' culiya' cha' tyatí̱ ngu' lo cha' ji'i̱ ycui' Ndyosi, cha' caca Ni loo ne' cresiya ji'i̱ ngu'. 25Lasa la cña laca cha' tyeje tacui sca na'ni quiya' cuxa, masi sca na'ni tonu, ñi'ya̱ laca sca camello. Lasa la cha' bi'; tucui la cña laca cha' tyatí̱ sca ngu' culiya' ca su laca ycui' Ndyosi loo ―nacui̱ Jesús.

26Lo'o ndyuna ngu' cha' bi', ndube tsa ti' ngu'.

―¿Tilaca taca ji'i̱ clyaá ji'i̱ nu cuxi lacua, cha' tyalaa ca slo ycui' Ndyosi? ―nacui̱ ngu'.

27―Bi' laca sca cha' nu ná nchca cua'ni ni sca ñati̱ chalyuu; pana ycui' Ndyosi ni, nchca ji'i̱ Ni cua'ni Ni cha' tyalaa ngu' slo Ni ―nacui̱ Jesús ji'i̱ ngu' bi'.

28―Cusu' ―nacui̱ Pedro ji'i̱―, cua nguxtyanu ya lcaa cha' nu ntsu'u ji'i̱ ya cha' tya'a̱ ya lo'o nu'u̱, ñi'ya̱ nu nacui̱ nu'u̱ cha' cua'ni ya ―nacui̱.

29Li' nguxacui̱ Jesús cha' ji'i̱ yu:

―Cha' liñi nda na' lo'o ma̱ juani, cha' ná ntsu'u ni sca ñati̱ nu ndyaa tyijyu' cha' cua'ni cña cuentya ji'i̱ ycui' Ndyosi, lo'o li' nguxtyanu na' ji'i̱ ngu' bi' jua'a̱ ti. Ntsu'u quiya' ndyanu lcaa cha' tso'o nu ntsu'u ji'i̱ ngu' bi', nu lo'o ndyaa ngu' cuentya ji'i̱ ycui' Ni; masi tyi ngu', masi clyo'o ngu', masi sti ngu', masi xtya'a̱ ngu', masi sñi' ngu', nguxtyanu ngu' lcaa bi'. 30Pana quiña'a̱ la cha' tso'o caja ji'i̱ ngu' bi' chalyuu juani, tsa ña'a̱ cha' nu nguna' ji'i̱ ngu' bi', ngua ti' ngu'; jua'a̱ nde loo la, li' caja chalyuu nu ná nga'a̱ cha' tye ji'i̱ ngu' bi'.

Xa' nchcui' Jesús lo'o ngu' cha' cua cajaa ti ycui'

31Sca se'i̱ ti ngusi'ya Jesús ji'i̱ nu tii tyucuaa tya'a ngu' nu ndyaca tsa'a̱ ji'i̱, cha' tyu'u ti'i̱ ngu' slo yu cha' chcui' yu lo'o ngu':

―Tsaa na nde Jerusalén juani ―nacui̱ yu―, su caca lcaa cña nu nguscua jyo'o cusu' nu ngua tu'ba ji'i̱ ycui' Ndyosi cua sa'ni la, nu nguscua ngu' ji'i̱ cua ña'a̱ ca cha' nu caca 'na, na' nu lijya̱a̱ cha' caca na' ñati̱. 32Cua ta ti ngu' 'na ji'i̱ ngu' xa' tsu' cha' xtyí lo'o ngu' 'na, cha' chcui' ngu' cha' ti'í 'na, lo'o jua'a̱ tu'u ngu' hitya sañi' ngu' 'na. 33Clyo quiji'i̱ ngu' 'na lo'o reta, cuati cujuii ngu' 'na. Pana tsa̱ nchca tyuna ni, li' tyu'ú na' chaca quiya'; ná tyanu na' lo'o ngu' jyo'o.

34Lcaa ngu' nu ndyaca tsa'a̱ ji'i̱ Jesús bi', ná ngua cuayá' ti' ngu' cha' bi', ni ná jlo ti' ngu' ni cha' laca nchcui' yu jua'a̱. Sca cha' tucui ngua, ná nda ngu' cuentya ñi'ya̱ ndyu'u cha' bi'.

Ngua'ni Jesús cha' ndyaca tso'o sca nu cuityi̱' ngu' Jericó

35Cua tyalaa ti Jesús to' quichi̱ Jericó li'. Ca bi' nga'a̱ sca nu cuityi̱' to' tyucui̱i̱, ndijña yu msta̱. 36Cha' quiña'a̱ tsa ñati̱ ndañi lijya̱ tyucui̱i̱, bi' cha' nchcuane nu cuityi̱' bi' ji'i̱ xa' ñati̱:

―¿Na ca ndyaca re? ―nacui̱ yu.

37Li' nacui̱ ngu' ji'i̱ yu cha' Jesús Nazaret bi' lijya̱ tyucui̱i̱ juani. 38Li' cui̱i̱ tsa ngusi'ya nu cuityi̱' bi':

―Jesús, cha' David ngua jyo'o cusu' jinu'u̱ ―nacui̱ yu―, cua'ni tya'na ti' nu'u̱ jna' ―nacui̱.

39Ngu' nu ndyaa nde loo bi' ngusi'ya lo'o ngu' ji'i̱ yu cha' ca ti̱ yu cha' nxi'ya yu; pana ná ndyuna yu, cui̱i̱ la nxi'ya yu li':

―Nu'u̱ ni, nu tya'a ñati̱ ji'i̱ jyo'o David ―nacui̱ yu―, cua'ni tya'na ti' nu'u̱ jna'.

40Li' ndatu̱ Jesús cha' chcui' lo'o ngu' cha' ca̱a̱ lo'o ngu' ji'i̱ yu quicha bi' slo. Nu lo'o cua ndu̱ yu cacua ti slo, li' nchcuane Jesús ji'i̱ yu cuityi̱' bi':

41―¿Na laca nu nti' nu'u̱ cha' cua'ni na' lo'o nu'u̱? ―nacui̱ Jesús ji'i̱.

―Cusu' ―nacui̱ yu―, nti' na' cha' cua'ni nu'u̱ jo'o ji'i̱ si'yu cloo na' ―nacui̱ nu cuityi̱' bi'.

42―Caca tso'o cloo nu'u̱ lacua ―nacui̱ Jesús ji'i̱―. Xqui'ya cha' jlya ti' nu'u̱ cha' 'na, bi' cha' tyaca tso'o nu'u̱ juani ―nacui̱ Jesús.

43Hora ti ndyaca tso'o loo nu cuityi̱' bi', ngua ji'i̱ yu na'a̱ yu. Lo'o li' ndu'u yu ndya'a̱ yu lo'o Jesús, ndyu'ni tlyu yu ji'i̱ ycui' Ndyosi. Lo'o jua'a̱ lcaa ñati̱ nu na'a̱ cha' bi', lo'o ngu' bi' ngua'ni tlyu ngu' ji'i̱ ycui' Ndyosi li'.

Currently Selected:

SAN LUCAS 18: cta

Highlight

Copy