SAN LUCAS 17
17
Cuxi tsa caca si ntsu'u sca qui'ya nu ndulo la ji'na
1Chaca quiya' nchcui' Jesús lo'o nu ngu' nu ndyaca tsa'a̱ ji'i̱:
―Ntsu'u tsa ngu' nu nchcui' lo'o na cha' cua'ni na sca cha' cuxi, pana tya'na tsa sca ñati̱ nu ndatsaa ji'i̱ tya'a cha' cua'ni cha' cuxi lo'o. 2Tso'o la si tsaa ngu' xcua̱a̱ ngu' ji'i̱ yu lo tyujo'o lo'o sca quee quichi tyaaca̱' yane yu, cha' nga'aa caja ñi'ya̱ nu tatsaa yu ji'i̱ ni sca ñati̱ ñi'ya̱ nti' nu sube re, cha' cua'ni ngu' cha' cuxi lo'o yu.
3’Cui'ya ma̱ cuentya si cua'ni sca ngu' tya'a ndya'a̱ ma̱ sca cha' cuxi lo'o ma̱. Li' chcui' ma̱ lo'o yu cha' nga'aa cua'ni yu cha' cuxi bi' lo'o ma̱. Lo'o si tya'a̱chu̱' yu ji'i̱ cha' cuxi bi', cua'ni ma̱ cha' clyu ti' ji'i̱ yu li'; 4masi cati quiya' ta yu cha' ñasi̱' ti' ji'i̱ ma̱ sca tsa̱, lo'o cati quiya' ca̱a̱ yu cha' chcui' yu lo'o ma̱: “Cui'ya ma̱ cha' clyu ti' jna', nga'aa cua'ni na' jua'a̱ juani”, ñacui̱ yu, li' nga'a̱ cha' cui'ya ma̱ cha' clyu ti' ji'i̱ yu.
Quiña'a̱ tsa cha' caca ji'na si jlya ti' na ji'i̱ ycui' Ndyosi
5Li' nacui̱ nu ngu' nu ndyaca tsa'a̱ ji'i̱ Jesús:
―Xtyucua nu'u̱ ji'i̱ ya cha' taca jlya la ti' ya cha' jinu'u̱ ―nacui̱ ngu' ji'i̱.
6―Jlo ti' ma̱ cha' piti tsa sca si'yu cuxee ―nacui̱ Jesús ji'i̱ ngu'―, lo'o jua'a̱ cu'ma̱ ni, ná quiña'a̱ tsa cha' nchca ji'i̱ ma̱. Pana masi xti ti cha' jlya ti' ma̱ ji'i̱ ycui' Sti na', taca ñacui̱ ma̱ ji'i̱ yaca quityi re: “Tyu'utsu' nu'u̱ ca su ndu̱ re, yaa nu'u̱ tyu̱ nde lo hitya tyujo'o”. Lo'o li' ña'a̱ ma̱ cha' taquiya' yaca bi' cha' nu cua nchcui' ma̱ lo'o.
Ñi'ya̱ nu nga'a̱ cha' cua'ni na si ndyu'ni na cña ji'i̱ ycui' Ndyosi
7’¿Ñi'ya̱ nti' cu'ma̱ ni? ¿Ñi'ya̱ cua'ni ma̱ si ntsu'u sca msu ji'i̱ ma̱ nu ndyaa ne' quixi̱' cha' cula'a yuu cuentya ji'i̱ ma̱, masi ndyaa yu cha' cña'a̱si̱i̱ yu ji'i̱ bata ji'i̱ ma̱? Nde ngusi̱i̱ lo'o ndyalaa ca ti msu bi' ndyaa yu cña bi', ná tyiquee' ná chcui' ma̱ lo'o yu ndi'ya̱: “Tya̱a̱ clya cua'a̱ to' mesa cha' cua'ni nu'u̱ si̱i̱ juani”. 8Ná yala ñacui̱ ma̱ ji'i̱ yu jua'a̱, nti' na'. Ná tyiquee' ndi'ya̱ chcui' ma̱ lo'o yu: “Cua'ni cho'o clya caque' si̱i̱ cha' cacu ya. Clyo cacu ya co'o ya, cuati cacu co'o nu'u̱”, ñacui̱ ma̱ ji'i̱ msu bi'. 9¿Ha tya ma̱ xlya'be ji'i̱ msu bi', cha' ndaquiya' yu cña nu ngulo ma̱ ji'i̱? Ná ndu'ni xu'na msu jua'a̱. 10Ñi'ya̱ laca msu, jua'a̱ laca cu'ma̱; nu lo'o ngua'ni ma̱ lcaa cña nu culo ycui' Ndyosi ji'i̱ ma̱, nga'a̱ cha' ñacui̱ ma̱ li': “Msu cuxi ti laca cuare, cha' cña nu nga'a̱ cha' cua'ni ti ya, tsa bi' ti cña ngua'ni ya”, ñacui̱ ma̱.
Ngua'ni Jesús jo'o ji'i̱ tii tya'a ñati̱ nu ngusñi quicha nu ndyatsu' cuaña' ji'i̱
11Nu lo'o ngusñi Jesús tyucui̱i̱ ndyaa nde Jerusalén, li' nteje tacui ngu' loyuu su cuentya Galilea, ndyaa ngu' nde loyuu su cuentya Samaria. 12Nu lo'o ndyalaa Jesús sca quichi̱ piti bi', li' ndyacua tya'a yu lo'o tii tya'a ngu' quicha nu cua lijya̱ ngu' slo yu; quicha nu ndyatsu' cuaña' ntsu'u ji'i̱ ngu' bi'. Pana tyijyu' ti ndyatu̱ ngu' slo Jesús, 13cui̱i̱ tsa nchcui' ngu' lo'o yu li':
―Cusu' Jesús ―nacui̱ ngu' li'―, cua'ni tya'na ti' nu'u̱ ji'i̱ cua.
14Nu lo'o na'a̱ Jesús ji'i̱ ngu', li' nacui̱ yu:
―Yaa clya ma̱ slo sti jo'ó cha' ña'a̱ yu ji'i̱ tyucui ña'a̱ ma̱ ―nacui̱.
Ndu'u ngu' ndyaa ngu' li'. Pana su ndyaa ngu' tyucui̱i̱ ti, ngua tii ngu' cha' xa' ngua lubii cuaña' ngu'; ndye cha' quicha ngu' li'. 15Bi' cha' nguxtyu̱u̱ tsaca yu quicha bi', cui̱i̱ tsa nchcui' yu ndyu'ni chi̱ yu loo ycui' Ndyosi. 16Li' ndyatu̱ sti̱' yu slo Jesús, ndyaa stii yu lo yuu nde loo yu cha' ndya yu xlya'be ji'i̱ Jesús. Ngu' Samaria laca yu bi', ngu' xa' tsu' laca yu. 17Li' nacui̱ Jesús:
―¿Ha si'i tii tya'a ngu' nu ndyatsu' cuaña' ngu' ndyaca tso'o ngu' tsa̱? ¿Mala ngua nu chaca caa tya'a ngu' bi' juani? 18Sca ti yu re nu si'i ngu' Israel tya'a na laca, bi' laca nu nguxtyu̱u̱ cha' cua'ni tlyu yu ji'i̱ ycui' Ndyosi.
19Li' nchcui' Jesús lo'o nu qui'yu bi':
―Tyatu̱ nu'u̱ cha' tyaa nu'u̱ juani ―nacui̱―. Cua ngua tso'o nu'u̱ juani cha' jlya ti' nu'u̱ cha' nu nda na' lo'o nu'u̱.
Ndi'ya̱ caca lo'o tyalaa tyempo cha' caca ycui' Ndyosi loo ne' cresiya ji'i̱ ñati̱
20Lo'o li' nchcuane ngu' fariseo ji'i̱ Jesús ni jacua' tyalaa tyempo cha' caca ycui' Ndyosi loo ji'i̱ ñati̱. Nguxacui̱ Jesús cha' ji'i̱ ngu' bi' li':
―Si'i sca na nu tyaca̱' lijya̱ tyijyu' laca cha' bi'. 21Ná caca ñacui̱ na ndi'ya̱: “Nde ti ndu̱ bi'”; masi ndi'ya̱ ná ñacui̱ na: “Ndejua ntucua bi'”. Na cua laca ycui' Ni loo ca ne' cresiya ji'i̱ ñati̱ juani.
22Li' nacui̱ Jesús ji'i̱ ngu' nu ndyaca tsa'a̱ ji'i̱:
―Nde loo la tyalaa tyempo nu nti' tsa ma̱ ña'a̱ ma̱ 'na, masi chaca tya tsa̱ nde chalyuu tya tyi'i̱ na' lo'o ma̱ nti' ma̱, na' nu cua nda ycui' Ni 'na lijya̱a̱ cha' caca na' ñati̱; pana nga'aa ña'a̱ ma̱ 'na li'. 23Chcui' ngu' lo'o ma̱ cha' jna' li': “Nde ti ndu̱ yu”; lo'o jua'a̱ chcui' ngu': “Ndacua ndu̱ ycui' yu”. Pana ná tsaa ma̱, ná taquiya' ma̱ ji'i̱ cha' cuiñi nu nchcui' ngu' bi' ―nacui̱ Jesús ji'i̱ ngu'―. 24Se'i̱ ti ntyiji'i̱ xee tyi'yu nu lo'o ndyubi, pana tyaca̱' ña'a̱ ngu' xee bi' tyucui nde cua̱; jua'a̱ caca lo'o na' nu lijya̱a̱ cha' caca na' ñati̱, nu lo'o tyalaa tsa̱ bi' lo'o ña'a̱ ngu' jna' cha' ca̱a̱ na' chaca quiya'. 25Pana clyo nscua cha' lye tsa chcube' ycui' na'. La cui' jua'a̱ ngu' tya'a quichi̱ tyi na xtyanu ti'i̱ ngu' 'na. 26Ñi'ya̱ ngua ji'i̱ ñati̱ nu nguti'i̱ chalyuu sa'ni la, tya'a stu'ba ngu' lo'o jyo'o Noé bi', jua'a̱ caca ji'i̱ ñati̱ chalyuu lo'o chaca quiya' tya̱a̱ na' nu lijya̱a̱ cha' caca na' ñati̱. 27Tya'a stu'ba jyo'o Noé bi' ni, ngua'ni ngu' ta'a, ndyacu ngu', ndyi'o ngu', ngujui clyo'o ngu'; tsa bi' ti cha' ndube ti' ngu' ña'a̱ cuayá' nu ndyalaa tyempo ngüiñá nu Noé bi' yaca ni'i̱ tonu. Li' ndyatí̱ yu ne' yaca ni'i̱ bi' lo'o lcaa na nu ntsu'u ji'i̱ yu. Lo'o li' ngua'ya tyo clyaa bi', ndye ñati̱ chalyuu ngujuii ngu'. 28Lo'o la cui' ñi'ya̱ ngua ji'i̱ ngu' quichi̱ su nguti'i̱ jyo'o Lot, jua'a̱ caca ji'i̱ ñati̱ chalyuu tsa̱ bi'. Tya'a quichi̱ tyi Lot ni, ndyacu ngu', ndyi'o ngu', ngüi'ya ngu' yu'ba, ndyujui' ngu' yu'ba, ndyataa ngu' xtya̱, ngüiñá ngu' ni'i̱; tsa bi' ti cña nu ndiya ti' ngu' ngua'ni ngu' bi', 29ña'a̱ cuayá' nu ngulo ycui' Ndyosi ji'i̱ yu Lot bi' nde quichi̱ Sodoma bi'. Li' ngusalú Ni quii' lo'o yuu sufri ndyaqui̱ lo yuu. Ndye cha' ji'i̱ lcaa ngu' Sodoma bi'; tya'a stu'ba Lot ni, ngujuii lcaa ngu'. 30Jua'a̱ caca tsa̱ bi' lo'o tya̱a̱ na' nu lijya̱a̱ cha' caca na' ñati̱; lo'o ña'a̱ ngu' 'na chaca quiya', ná ca tii ngu' ni tsa̱ caca bi'.
31’Nu lo'o tyalaa tsa̱ bi', si ntsu'u ngu' nu ndu̱ ca que ni'i̱ ji'i̱ ngu', lo'o ca'ya ngu' ná caja tyempo ji'i̱ ngu' cha' culo ngu' yu'ba ji'i̱ ngu' nu ndi'i̱ nde ni'i̱ ji'i̱ ngu'. Lo'o jua'a̱ si ntsu'u ngu' ne' quixi̱', ná caja tyempo ji'i̱ ngu' cha' xtyu̱u̱ ngu' tya̱a̱ ngu' nde to' tyi ngu'. 32Tyi'u ti' ma̱ ñi'ya̱ nu ngua ji'i̱ nu cuna'a̱ ji'i̱ Lot tyempo bi'; ngua ti' ma' xtyu̱u̱ ma' nde quichi̱, li' ngua'ni ycui' Ndyosi cha' ndyaca ma' sca quee. 33Chcuna' chalyuu ji'i̱ ma̱ si xcui' nclyacua tsa ti' ma̱ ñi'ya̱ nu caca ji'i̱ ycui' ca ma̱; pana quije chalyuu ji'i̱ ma̱ si tyaja'a̱ ma̱, masi cujuii ñati̱ ji'i̱ ma̱ xqui'ya na'.
34’Cacha' na' ji'i̱ ma̱ ñi'ya̱ nu caca si talya lo'o ca̱a̱ na'; si ntsiya tucua tya'a ñati̱ laja' lo sca qui'ña̱ ti, qui'ya ycui' Ndyosi ji'i̱ tsaca, tyanu chaca ycui' ti li'. 35Lo'o jua'a̱ si nga'a̱ tucua tya'a nu cuna'a̱ ndyoo ngu' ndacua̱, qui'ya Ni ji'i̱ tsaca, tyanu chaca li'. 36Lo'o jua'a̱ si ntsu'u tucua tya'a nu qui'yu lo cña ji'i̱ ngu' ne' quixi̱', qui'ya Ni ji'i̱ tsaca, tyanu chaca li'.
37Lo'o ndyuna ngu' cha' bi', li' ndacha' ngu' ji'i̱ Jesús:
―¿Macala caca jua'a̱, cusu'? ―nacui̱ ngu'.
Li' nguxacui̱ Jesús cha' ji'i̱ ngu':
―Ca su ntsiya sca na tyucu̱, ca bi' tyu'u ti'i̱ culexu; jua'a̱ nu lo'o tyu'u ti'i̱ ñati̱ lo'o tye chalyuu, chcube' tsa ngu' li'.
Currently Selected:
SAN LUCAS 17: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.
