LOS HECHOS 15

Ndyu'u ti'i̱ ngu' ca quichi̱ Jerusalén

1Ngua sca tsa̱ ndyalaa xi ñati̱ nu ndu'u nde loyuu su cuentya Judea, ndyalaa ngu' quichi̱ Antioquía bi'. Li' nguxana nclyu'u ngu' ji'i̱ ñati̱ ji'i̱ Jesucristo cha' ná chañi cha' cua'ni lyaá ycui' Ndyosi ji'i̱ ngu', si bilya xi'yu ngu' quiji̱ ngu' qui'yu bi', cha' culacua̱ ngu'. Jua'a̱ laca cña nu ngulo jyo'o Moisés ji'i̱ ngu' sa'ni cha' cua'ni ngu', nacui̱ ngu' bi'. 2Li' nguxana Pablo lo'o Bernabé nxlyú ngu' cha' hichu̱' ngu' bi'. Xqui'ya cha' ná nchca caca stu'ba cha' bi' lo'o ngu' tsiya' ti, bi' cha' nu ñati̱ ji'i̱ Jesucristo bi' ni, ngusubi ngu' ji'i̱ Pablo, lo'o ji'i̱ Bernabé, lo'o ji'i̱ xi xa' la ñati̱, cha' tsaa ngu' nde quichi̱ Jerusalén. Tsaa ngu' slo ngu' nu ngua tsa'a̱ ji'i̱ Jesucristo tya clyo, slo ngu' cusu' nu ji'i̱ la cui' tya'a taju ngu', cha' chcui' tube ngu' ñi'ya̱ caca cha' bi' ji'i̱ ngu': si xi'yu ngu' quiji̱ ngu', si ná xi'yu ngu' quiji̱ ngu'.

3Li' nchcui' salya' ngu' lo'o tya'a ngu', lcaa ngu' taju ñati̱ ji'i̱ Jesucristo quichi̱ Antioquía ngusalya' lo'o Pablo, lo'o Bernabé, lo'o tya'a ndya'a̱ ngu'. Li' ndu'u ngu' ndyaa ngu' tyucui̱i̱ nu tsaa nde Jerusalén. Nteje tacui ngu' loyuu su cuentya Fenicia, lo'o loyuu su cuentya Samaria, nchcui' ngu' lo'o lcaa taju ñati̱ ji'i̱ Jesucristo nu ndi'i̱ quichi̱ tyucui̱i̱ su nteje tacui ngu'. Ndacha' ngu' ñi'ya̱ nu ngua'ni ycui' Ndyosi, cha' nguxcutsa'a̱ Ni cresiya ji'i̱ ngu' xa' tsu', cha' juani cua ngusñi ngu' xa' tsu' cha' ji'i̱ ycui' Ndyosi. Lo'o ndyuna ngu' quichi̱ bi' cha' bi', tso'o tsa ntsu'u tyiquee ngu' li', cha' lo'o ñati̱ xa' tsu' ngusñi ngu' cha' ji'i̱ Jesucristo; nga'aa si'i ngu' judío ti nu ngusñi cha' bi'.

4Ndyalaa Pablo lo'o Bernabé lo'o tya'a ndya'a̱ ngu' ca quichi̱ Jerusalén li'. Tso'o nchcui' ñati̱ ji'i̱ Jesucristo bi' lo'o ngu' li'; jua'a̱ ndi'i̱ ngu' nu ngua tsa'a̱ ji'i̱ Jesús tya clyo, ndi'i̱ ngu' nu laca loo ji'i̱ taju ñati̱ quichi̱ bi'. Lo'o li' nguxana Pablo lo'o Bernabé ndacha' ngu' ji'i̱ ngu' bi' ñi'ya̱ nu ngua'ni ycui' Ndyosi lo'o ñati̱ xa' tsu' ca su ndyaa ngu'. 5Pana lo'o xi ngu' fariseo nu ngusñi cha' ji'i̱ Jesucristo nga'a̱ lo'o ngu' bi'. Li' ndatu̱ ngu' fariseo bi' cha' chcui' ngu':

―Nga'a̱ cha' xi'yu ngu' quiji̱ nu qui'yu ngu' xa' tsu' nu ngusñi cha' ji'i̱ Jesús, cha' culacua̱ ngu' ―nacui̱ ngu' fariseo bi'―. Ntsu'u cha' taquiya' ngu' bi' lcaa cha' nu nguscua jyo'o Moisés sa'ni ―nacui̱ ngu'.

6Li' ndyu'u ti'i̱ lcaa ngu' nu ngua tsa'a̱ ji'i̱ Jesucristo tya clyo lo'o lcaa ngu' nu laca loo ji'i̱ taju ñati̱ bi'; nda ngu' cha' lo'o tya'a ngu', si tso'o cha' culacua̱ ngu' jua'a̱, si ná tso'o laca cha' culacua̱ ngu'. 7Lye tsa nchcui' tube ngu' cha' bi', lo'o li' ndatu̱ Pedro nchcui' lo'o ngu':

―Cu'ma̱ tya'a ngusñi na cha' ji'i̱ Jesucristo ―nacui̱ Pedro―. Jlo ti' ma̱ tilaca laca na'. Clyo ngusubi ycui' Ndyosi jna' nu lo'o tya nguti'i̱ na' lo'o cu'ma̱, cha' tsa'a̱ culu'u na' ji'i̱ ngu' xa' tsu' ñi'ya̱ ndu'ni lyaá Jesús ji'i̱ ñati̱ chalyuu. Lo'o jua'a̱ ngusñi ngu' bi' cha' ji'i̱ Jesús li'. 8Cua na'a̱ ycui' Ndyosi lcaa ña'a̱ nu ntsu'u tyiquee ngu' bi', lo'o li' nda Ni Xtyi'i ycui' Ni cha' tyanu ne' cresiya ji'i̱ ngu' bi', masi ngu' xa' tsu' laca ngu'. Ñi'ya̱ nu ngua'ni ycui' Ndyosi lo'o na, la cui' jua'a̱ ngua'ni Ni lo'o ngu' xa' tsu' bi'; 9stu'ba ngua'ni Ni, masi lo'o na, masi lo'o ngu' xa' tsu' bi'. Nu lo'o ngusñi ngu' cha' ji'i̱ Ni, li' ngua'ni lubii Ni cresiya ji'i̱ ngu' bi'. 10Lo'o nu juani, ná ndiya ti' ma̱ cña nu ngua'ni ycui' Ni lo'o ngu' bi'; nti' ma̱ cha' cua'ni ngu' bi' lcaa cña ñi'ya̱ nu nguxtyanu jyo'o Moisés ji'na. Pana tucui tsa cña bi', ná ngua ji'na tsiya' ti cua'ni na lcaa cña bi'; ni lcaa jyo'o cusu' ji'na, ná ngua ji'i̱ ngu' cua'ni ngu' cña tucui bi'. 11Ná tso'o cha' chcui' ma̱ jua'a̱. Cua ngusñi na cha' ji'i̱ Ni, cha' ngua'ni lyaá ycui' Jesús ji'na ji'i̱ qui'ya nu ntsu'u ji'na, xqui'ya cha' tso'o ti nti' Ni ña'a̱ Ni ji'na; la cui' jua'a̱ ngua'ni Ni lo'o ngu' xa' tsu' nu ngusñi cha' ji'i̱ Ni.

12Cuaana ti ndi'i̱ lcaa ngu' li'. Tso'o ti ndyuna ngu' lo'o nda Bernabé lo'o Pablo cha' lo'o ngu', lcaa ña'a̱ cha' tlyu nu ngua'ni ycui' Ndyosi ca su nguta'a̱ ngu' slo ñati̱ xa' tsu'. 13Lo'o ndye nda Bernabé lo'o Pablo cha' lo'o ngu', li' nchcui' Jacobo lo'o lcaa ngu' bi':

―Cu'ma̱ tya'a ngusñi na cha' ji'i̱ Jesucristo ―nacui̱ Jacobo ji'i̱ ngu'―, cua'a̱ jyaca̱ ma̱ xi 'na. 14Cua nchcui' Simón Pedro lo'o na ñi'ya̱ nu ngua'ni ycui' Ndyosi tya clyo, nu lo'o nguxana ndyuna ngu' xa' tsu' cha' ji'i̱ Ni. Li' nguxana Ni ngusubi Ni ji'i̱ tyu̱u̱ tya'a ñati̱ bi', cha' lo'o ngu' bi' caca ngu' ñati̱ ji'i̱ ycui' Ndyosi. 15Cua sa'ni nguscua jyo'o cusu' nu ngua tu'ba ji'i̱ ycui' Ndyosi la cui' tya'a cha', nu lo'o nchcui' quityi ji'i̱ ycui' Ndyosi ndi'ya̱:

16Tya̱a̱ na' chaca quiya', nacui̱ ycui' Ni.

Ñi'ya̱ laca sca ni'i̱ ngunu'u̱, jua'a̱ nti' cu'ma̱, cha' cua ngujlyaa ti' ma̱ jna', nacui̱ Ni.

Pana ñi'ya̱ lo'o ndu'ni tiji ngu' sca ni'i̱ nu cua ngunu'u̱ bi', la cui' jua'a̱ xa' cua'ni na' cha' taquiya' ma̱ jna'.

Li' taca taquiya' ma̱ jna' ñi'ya̱ ndaquiya' jyo'o cusu' ji'i̱ ma̱ jna', nu lo'o tya lu'ú jyo'o cusu' David.

17Na' laca̱ nu Xu'na nu laca loo.

Jua'a̱ cua'ni na' lo'o ma̱, cha' clyana cua ña'a̱ ca ngu' xa' tsu' jna';

na cua ngusubi na' ji'i̱ ñati̱ bi' sa'ni, cha' caca ngu' ñati̱ jna'.

18Jua'a̱ nacui̱ ycui' Ndyosi lo'o nda Ni cha' lo'o jyo'o cusu' nu ngua sa'ni, cha' cua jlo ti' Ni lcaa ña'a̱ cña nu cua'ni Ni nde loo la.

19’Bi' cha' nti' na' cha' ná tso'o si tatsaa na ji'i̱ ngu' xa' tsu' nu ngusñi cha' ji'i̱ Jesús cha' taquiya' ngu' lcaa cha' cusu' ji'i̱ ngu' judío tya'a na juani, nu lo'o nguxana ca ti cha' nchcutsa'a̱ Ni cresiya ji'i̱ ngu' cha' caca ngu' ñati̱ ji'i̱ ycui' Ni ―nacui̱ Jacobo―. 20Tsa bi' ti cha' cua'ni na, nti' na'; scua na xi cha' tso'o cha' tsaa slo ngu' bi' nu nacui̱ ndi'ya̱: Ná tso'o si cacu ngu' msta̱ ji'i̱ jo'ó, xqui'ya cha' cua'ni ñu'u̱ msta̱ bi' ji'i̱ cresiya ji'na si cacu na ji'i̱; lo'o jua'a̱ ná tso'o tsiya' ti tyu'u cha' ji'i̱ ngu' lo'o clyo'o xa' ñati̱; ná tso'o cacu ngu' na'ni nu ná ndye ndyalú tañi ji'i̱ ni', nu lo'o cua ndyujuii ngu' ji'i̱; ni ná tso'o cacu ngu' tañi. 21Pana cuentya ji'i̱ cha' nu nguscua jyo'o Moisés nu ngua sa'ni, tsa lo cua ti cha' scua na cha' tsaa slo ngu' xa' tsu', cha' jua'a̱ ntsu'u quityi nu nguscua jyo'o bi' ne' laa ji'i̱ ngu' judío lcaa quichi̱. Ndya'a̱ ngu' ne' laa tsa̱ nu ndi'i̱ cña' ngu', lcaa semana ña'a̱ ngu' lo quityi bi'.

Nga'aa nchcui' la Jacobo bi' li'.

22Ngua stu'ba cha' ji'i̱ ngu' lo'o tya'a ngu' li', lcaa ñati̱ ji'i̱ Jesucristo nde Jerusalén, lo'o ngu' nu ngua tsa'a̱ ji'i̱ Jesucristo tya clyo, lo'o ngu' nu laca loo ji'i̱ taju ngu'. Li' ngua ti' ngu' cha' subi ngu' xi xa' la tya'a ngu' cha' tsaa ngu' lo'o Pablo lo'o Bernabé ca quichi̱ Antioquía; ngusubi ngu' ji'i̱ Judas nu laca xtañi Barsabás, lo'o ji'i̱ Silas, ñati̱ nu ndaquiya' tsa ngu' bi' ji'i̱. 23Ndyaa lo'o ngu' ji'i̱ quityi nu nguscua ngu' Jerusalén bi'.

“Xlyo ni'i̱ ji'i̱ lcaa ma̱”, nacui̱ quityi bi', “lcaa cu'ma̱ nu laca ma̱ ñati̱ ji'i̱ Jesucristo tya'a na, masi ngu' xa' tsu' laca ma̱, masi ndi'i̱ ma̱ ca quichi̱ Antioquía, masi ndi'i̱ ma̱ ca quichi̱ loyuu su cuentya Siria, masi ndi'i̱ ma̱ ca quichi̱ loyuu su cuentya Cilicia. Cuare nu nguta'a̱ ya lo'o Jesucristo tya clyo, lo'o ngu' cusu' ji'i̱ taju tya'a na re, lo'o tyu̱u̱ tya'a ñati̱ ji'i̱ Jesús ca nde, stu'ba ti nscua ya quityi re cha' ca̱a̱ ca slo ma̱. 24Cua ndyuna ya cha' cua ndyaa xi ngu' tya'a ya ca slo cu'ma̱, lo'o jua'a̱ cua ngulu'u ngu' ji'i̱ ma̱ cha' ntsu'u cha' xi'yu ma̱ quiji̱ ngu' qui'yu tya'a ma̱; nacui̱ ngu' bi' cha' ntsu'u cha' cua'ni ma̱ lcaa cña nu nguscua jyo'o Moisés lo quityi nu ngua sa'ni. Pana ná ngulo ya cña ji'i̱ ngu' bi', cha' tsaa ngu' slo cu'ma̱; jlo ti' ya cha' xñi'i̱ xi ti' ma̱ ndi'i̱ ma̱ nu lo'o ná nchca cuayá' ti' ma̱ si cha' liñi laca cha' bi'. 25Bi' cha' juani cua ngua stu'ba cha' ji'i̱ ya lo'o tya'a cuare, ngusubi ya tucua tya'a ngu' tya'a ya, la cui' ñati̱ ji'i̱ Jesucristo tya'a na laca ngu'; tsaa ngu' slo ma̱ lo'o Bernabé lo'o Pablo tya'a na. Ntsu'u tsa tyiquee na ña'a̱ na ji'i̱ nu ngu' tya'a na bi', 26masi ntsu'u tyu̱u̱ tya'a ñati̱ nu ngua ti' cujuii ngu' ji'i̱ tya'a na bi' xqui'ya cña nu ngulo Jesucristo nu Xu'na na ji'i̱ ngu' tya'a na bi'. 27Judas lo'o Silas laca ngu' nu cua ngulo ya cña ji'i̱ cha' tsaa ngu' slo ma̱, cha' ta ngu' cha' liñi lo'o ma̱. 28Nguxtyucua Xtyi'i ycui' Ndyosi ji'i̱ cuare lo'o nchcui' ya lo'o tya'a ya, bi' cha' ndi'ya̱ ti chcui' ya lo'o ma̱ juani, cha' ná tso'o si culo ya xa' la cña tucui ji'i̱ ma̱: 29Ná tso'o cacu ma̱ cuaña' na'ni nu laca msta̱, nu cua nda ngu' ji'i̱ jo'ó; ná tso'o cacu ma̱ tañi; ná tso'o cacu ma̱ na'ni nu ná ndye ndyalú tañi lo'o ndyujuii ngu' ji'i̱; la cui' ti cha' ná tso'o tsiya' ti si tyu'u cha' ji'i̱ ma̱ lo'o clyo'o xa' ñati̱. Si taquiya' ma̱ ji'i̱ lcaa cha' nu nscua re, tso'o ti tyi'i̱ ma̱ li'. Tsa lo cua ti cha' nscua ya.”

30Li' ndu'u ngu' ndyaa ngu' lo'o quityi bi', ndyalaa ngu' ca quichi̱ Antioquía. Ndyu'u ti'i̱ lcaa ñati̱ ji'i̱ Jesucristo quichi̱ bi' lo'o nda ngu' quityi ji'i̱ ñati̱ bi'. 31Lo'o cua nchcui' ngu' bi' lo quityi, li' tso'o tsa ngua tyiquee ngu' xqui'ya cha' nu nchcui' quityi lo'o ngu'. 32Tu'ba ji'i̱ ycui' Ndyosi ngua nu Judas lo'o Silas bi', bi' cha' ngua ji'i̱ ngu' ngulu'u ngu' xi ji'i̱ ngu' quichi̱ bi'; li' tlyu la ngua tyiquee lcaa ñati̱ ji'i̱ Jesucristo bi', xqui'ya cha' nu ngulu'u ngu' bi' ji'i̱ ngu'. 33Tyiquee' xi nguti'i̱ ngu' bi' quichi̱ Antioquía, li' nchcui' salya' ñati̱ ji'i̱ Jesucristo lo'o ngu'. Nti' tya'a ngu' cha' xtyucua ycui' Ndyosi ji'i̱ ngu' tyucui̱i̱ su ñaa ngu' nde slo xa' la tya'a ngu'. 34Li' nacui̱ Silas cha' nga'aa tyaa ycui' yu, tyanu yu lo'o ngu'. 35Lo'o jua'a̱ ndyanu Pablo lo'o Bernabé quichi̱ Antioquía bi'; ngulu'u la ngu' ji'i̱ tya'a ngu', nda la ngu' cha' ji'i̱ ycui' nu Xu'na na lo'o tya'a ngu'. Lo'o jua'a̱ tya ntsu'u tya tyu̱u̱ la tya'a ngu' nu ndi'i̱ ndejua nu nchcui' cha' ji'i̱ ycui' nu Xu'na na lo'o tya'a ngu'.

Ndyaa Pablo chaca quiya' cha' chcui' cha' ji'i̱ Jesucristo nde xa' quichi̱

36Ngua sca tsa̱ nchcui' Pablo lo'o Bernabé:

―Tyaa na ―nacui̱―, tsaa na chaca quiya' slo ñati̱ nu tya'a ntsu'u cha' ji'na lo'o Jesucristo, ngu' nu ndi'i̱ tyijyu' ―nacui̱ Pablo ji'i̱ Bernabé―. Xa' tsaa na lcaa quichi̱ su ngulu'u na cha' ji'i̱ Jesucristo tsubi', tsaa na'a̱ na si tso'o ti ndi'i̱ tya'a na bi'.

37Ngua ti' Bernabé cha' lo'o Juan tsaa Juan lo'o ngu', la cui' nu Juan Marcos bi'. 38Pana ná nti' Pablo tsaa lo'o ji'i̱ Juan, cha' lo'o ngulaa ngu' nde loyuu su cuentya Panfilia tya clyo, ndu'u Juan ndyaa li', cha' nga'aa ndalo Juan cha' cua'ni cña bi'. 39Ná stu'ba ntsu'u tyiquee Pablo lo'o Bernabé li', nga'aa ndya'a̱ ngu' stu'ba ti; bi' cha' ndyaa Bernabé ndyatí̱ ne' yaca ni'i̱ cha' tsaa ca loyuu Chipre chaca quiya'; lo'o nu Marcos bi' ndyaa lo'o Bernabé li'.

40Li' ngusubi Pablo ji'i̱ Silas cha' tsaa lo'o. Ndu'u ngu' ndyaa ngu' li', nu lo'o cua nchcui' tya'a ngu' lo'o ycui' Ndyosi nu Xu'na na cha' xtyucua Ni ji'i̱ ngu' tyucui̱i̱. 41Ndyaa ngu' ca loyuu su cuentya Siria, li' ndyaa la ngu' ca loyuu su cuentya Cilicia; nchcui' ngu' lo'o tya'a ñati̱ ji'i̱ Jesucristo nu ndyu'u ti'i̱ tsa tlyu ti ca bi', cha' tlyu cua'ni tyiquee ngu', cha' tyatí̱ tachaa la cha' ji'i̱ Jesús tyiquee ngu'.

Currently Selected:

LOS HECHOS 15: cta

Highlight

Copy