LOS HECHOS 14

Ndi'i̱ Pablo lo'o Bernabé ca quichi̱ Iconio

1Lo'o cua ndyalaa Pablo lo'o Bernabé ca quichi̱ Iconio, ndyatí̱ ngu' ndyaa ngu' ne' laa ji'i̱ ngu' judío tya'a ngu'. Ndejua ngulu'u ngu' cha' ji'i̱ Jesús; bi' cha' quiña'a̱ tsa ngu' ngusñi ngu' cha' bi', masi ngu' judío, masi xa' ñati̱. 2Li' hora ti ngunasi̱' xa' la tya'a ngu' judío, ngu' nu ná jlya ti' cha' bi'. Su'ba ñasi̱' ngu' ji'i̱ xa' ñati̱ nti' ngu', cñilo'o ngu' ji'i̱ ngu' quichi̱ nti' ngu', cha' ca ti'í ti' ngu' ña'a̱ ngu' ji'i̱ ngu' nu ngusñi cha' bi'. 3Tyiquee' xi ndyanu Pablo lo'o Bernabé quichi̱ bi', cha' ná ndyutsi̱i̱ ngu' culu'u ngu' cha' ji'i̱ nu Xu'na na ji'i̱ ngu' quichi̱ bi'. Lo'o jua'a̱ ngua'ni Pablo lo'o Bernabé cña tonu chacuayá' ji'i̱ ycui' Ndyosi, bi' cha' ngua ji'i̱ ngu' quichi̱ ta ngu' cuentya cha' xcui' cha' liñi nclyu'u ngu' bi' ji'i̱ ngu'. 4Ná stu'ba cha' ji'i̱ ngu' quichi̱ lo'o tya'a ngu' li'. Ntsu'u ngu' nu ndaquiya' tsa ji'i̱ tya'a ngu' judío, lo'o jua'a̱ ntsu'u ngu' nu ndaquiya' ji'i̱ cha' nu nda ngu' nu ndya'a̱ nchcui' cha' ji'i̱ Jesucristo bi'. 5Li' ngüiñi cha' ji'i̱ ngu' judío bi' lo'o xa' ñati̱ tya'a quichi̱ tyi ngu', lo'o nu laca loo ji'i̱ quichi̱, cha' cua'ni cuxi ngu' lo'o Pablo lo'o tya'a ndya'a̱ yu; nti' ngu' cu̱ ngu' quee ji'i̱ ngu' bi'. 6Pana ngua cuayá' ti' Pablo lo'o tya'a ndya'a̱ yu cha' bi', ngusna ngu' ndyaa ngu' ca xa' quichi̱ loyuu su cuentya Licaonia li', ndyalaa ngu' ca quichi̱ Listra. Lo'o li' ndyaa lye la ngu' ca quichi̱ Derbe lo'o lcaa quichi̱ cacua ti. 7Ngulu'u ngu' cha' bi' ji'i̱ ngu' lcaa quichi̱, cha' ndu'ni lyaá Jesús ji'i̱ ñati̱ chalyuu.

Ngu̱ ngu' quee ji'i̱ Pablo ca quichi̱ Listra

8Ndi'i̱ sca nu qui'yu ca quichi̱ Listra bi' nu ná nchca tya'a̱ tsiya' ti, cha' quicha quiya'. Ni sca quiya' ná ngua ji'i̱ nu qui'yu bi' tyatu̱, xqui'ya cha' quicha quiya' tya lo'o ngula; xcui' na nchca'a̱ ti nu quicha bi'. 9Tso'o tsa ndyuna nu quicha bi' laja lo'o nclyu'u Pablo ji'i̱ ngu'; li' na'a̱ yu ji'i̱ nu quicha bi', ngua cuayá' ti' yu cha' jlya ti' nu quicha cha' taca ji'i̱ ycui' Ndyosi cua'ni cha' tyaca tso'o. 10Li' nchcui' Pablo lo'o nu quicha bi':

―Tyatu̱ liñi nu'u̱ juani ―nacui̱ Pablo ji'i̱.

Hora ti ndatu̱ nu quicha bi', ngua ji'i̱ ndya'a̱ li'. 11Quiña'a̱ ñati̱ cua na'a̱ ñi'ya̱ nu ngua ji'i̱ nu quicha bi', bi' cha' ndube tsa ti' ngu'. Li' nxi'ya lo'o tsa ngu' ji'i̱ tya'a ngu':

―Cua ndyalaa tucua tya'a jo'ó ca slo na juani ―nacui̱ ngu'―. Ñi'ya̱ ña'a̱ ñati̱, jua'a̱ ña'a̱ jo'ó re ―nacui̱ ngu' ji'i̱ tya'a ngu' cha'cña ji'i̱ ngu' Licaonia.

12Nchcui' ngu' cha' jo'ó Júpiter laca Bernabé, lo'o jo'ó Mercurio laca Pablo nacui̱ ngu', xqui'ya cha' nda tsa Pablo cha' lo'o ngu'. 13Ntsu'u sca laa ji'i̱ jo'ó Júpiter ca to' quichi̱ bi', lo'o jua'a̱ ndi'i̱ sca sti jo'ó cuentya ji'i̱ laa bi'. Li' yala ti ndyalaa sti jo'ó bi' lo'o toro, lo'o jua'a̱ ndi'i̱ tyaaca̱' queé yani toro bi'. Ngua ti' lcaa ngu' bi' cujuii ngu' ji'i̱ toro bi' li', cha' cua'ni tlyu ngu' ji'i̱ nu tucua tya'a jo'ó nu ndyalaa ca ti slo ngu'. 14Ñati̱ nu ndya'a̱ tyijyu' nchcui' cha' ji'i̱ Jesucristo laca Pablo lo'o Bernabé ni, bi' cha' ngua xñi'i̱ tsa ti' tyucuaa ngu' lo'o nda ngu' cuentya ñi'ya̱ nu ndyu'ni ngu' quichi̱ bi'. Li' ngusaa' ycui' ca ngu' ste' ngu', cha' caca cuayá' ti' ngu' quichi̱ cha' ná tso'o cña nu ndyu'ni ngu'. Li' ngusna Pablo lo'o Bernabé ndyaa ngu' lcaa laja ñati̱ quiña'a̱ bi', cui̱i̱ tsa ngusi'ya lo'o ngu' ji'i̱ ngu' quichi̱ bi':

15―Ngu' cusu' cu'ma̱ ―nacui̱ Pablo lo'o Bernabé ji'i̱ ngu' quichi̱―. ¿Ni cha' laca ndyu'ni ma̱ jua'a̱? ―nacui̱ ngu'―. Laca ya ñati̱ chalyuu ti, ñi'ya̱ nu laca cu'ma̱; si'i ndyosi laca ya. Cua ndyalaa ya ca nde cha' ta ya cha' lo'o ma̱, cha' ji'i̱ ycui' Ndyosi nu lu'ú ca. Ná tso'o cua'ni tlyu ma̱ ji'i̱ xa' la jo'ó, sca ti ji'i̱ ycui' Ndyosi nu lu'ú nga'a̱ cha' tyu'u tyiquee ma̱ ji'i̱; bi' laca nu ngüiñá lcaa na nu ntsu'u lo yuu, lo'o lcaa na nu ntsu'u nde cua̱, lo'o lcaa tyujo'o, lo'o lcaa na nu ntsu'u ca bi'. 16Cua sa'ni la ndalo tsa tyiquee ycui' Ndyosi ña'a̱ Ni ji'i̱ lcaa ñati̱ chalyuu, masi ngua'ni ngu' cua ña'a̱ ca cha' cuxi nu nti' ngu' cha' cua'ni ngu'. 17Lo'o jua'a̱ nda Ni lcaa cha' tso'o nu ndyiji ji'na: nda Ni tyo nu nda'ya lo yuu cha' caluu tso'o si'yu nu ntyaa na, cha' tso'o caca clacua ji'na li'; ndyiji cha' bi' ji'na cha' cacu tso'o na, cha' jua'a̱ tso'o tsa caca tyiquee na li'. Jua'a̱ laca cha' nu nclyu'u ycui' Ndyosi ji'na cha' caca cuayá' ti' na tilaca laca Ni.

18Tyucuaa ngu' bi', lye tsa nchcui' ngu' lo'o ngu' quichi̱, pana lqui'ya tsa ngua cuayá' ti' ngu' quichi̱ cha' ná tso'o tsiya' ti' si cujuii ngu' toro cha' cua'ni tlyu ngu' ji'i̱ ngu' bi'.

19Lo'o li' ndyalaa la xi ngu' judío nu xña'a̱ tsa tyiquee, ngu' nu ndu'u quichi̱ Antioquía bi'; lo'o xa' la tya'a ngu' nu ndu'u quichi̱ Iconio ndyalaa ngu'. Nchcui' ngu' bi' lo'o ngu' quichi̱ cha' su'ba ñasi̱' ngu' ji'i̱ ngu' quichi̱ bi' lo'o Pablo. Li' ngu̱ ngu' quichi̱ quee ji'i̱ Pablo cha' ngua ti' ngu' cujuii ngu' ji'i̱ yu bi'. Lo'o ngua ti' ngu' cha' cua ngujuii yu, li' ngujolaqui ngu' ji'i̱ yu ndyaa lo'o ngu' ji'i̱ yu ca to' quichi̱. 20Pana ndyu'u ti'i̱ ngu' nu ngusñi cha' ji'i̱ Jesucristo slo Pablo su ntsiya yu; li' ndaca'a̱ yu, ndyaa yu nde quichi̱ lo'o ngu' chaca quiya'. Ca chaca tsa̱ ndu'u Pablo lo'o Bernabé ndyaa ngu' ca quichi̱ Derbe.

21Li' nda ngu' cha' lo'o ngu' quichi̱ ñi'ya̱ nu ndu'ni lyaá Jesús ji'i̱ ñati̱ chalyuu, bi' cha' quiña'a̱ ngu' quichi̱ bi' ntaja'a̱ ngu' xñi ngu' cha' ji'i̱ Jesús. Li' nguxtyu̱u̱ Pablo lo'o Bernabé ñaa ngu' nde quichi̱ Listra lo'o quichi̱ Iconio lo'o quichi̱ Antioquía bi' chaca quiya'. 22Ca ta'a quichi̱ su ndyaa ngu' bi', nchcui' ngu' lo'o ñati̱ ji'i̱ Jesucristo cha' tso'o la tyatí̱ tyiquee ngu' lo cha' ji'i̱ Jesús, cha' tlyu cua'ni tyiquee ngu', cha' ná cutsi̱i̱ ngu' tsiya' ti.

―Cua'ni lya' ti' ngu' ji'na tu'ni ―nacui̱ Pablo lo'o Bernabé ji'i̱ ngu'―, lo'o jua'a̱ xcube' ngu' ji'na; pana lo'o cua nteje tacui cha' bi', li' tsaa na tyi'i̱ na su laca ycui' Ndyosi loo.

23Lo'o jua'a̱ ngusubi Pablo lo'o Bernabé ji'i̱ ñati̱ cha' caca ngu' loo ji'i̱ scaa taju ñati̱ ji'i̱ Jesucristo nu ndi'i̱ scaa quichi̱ tyi ngu'; ngua'ni Pablo lo'o Bernabé cña bi' lcaa quichi̱ su ndyaa ngu'. Tyu̱u̱ hora ná ndyacu ngu' tyaja tsa̱ nu lo'o nchcui' ngu' lo'o ycui' Ndyosi cha' subi ngu' ji'i̱ ñati̱ nu caca loo ji'i̱ taju tya'a ngu'. Ndijña ngu' ji'i̱ ycui' nu Xu'na na cha' cua'a Ni ji'i̱ ngu' bi', cha' ná caca cuxi ji'i̱ ngu', cha' tso'o tsa ngusñi lcaa ñati̱ bi' cha' ji'i̱ ycui' Ni.

Nguxtyu̱u̱ Pablo lo'o Bernabé ndyaa ngu' ca quichi̱ Antioquía Siria

24Ndu'u nu Pablo lo'o Bernabé bi', ndyaa ngu' li', nteje tacui ngu' loyuu su cuentya Pisidia, ndyalaa ngu' loyuu su cuentya Panfilia li', 25cha' tsaa ngu' ca quichi̱ Perge. Ngulu'u ngu' ji'i̱ ngu' quichi̱ bi' ñi'ya̱ laca cha' ji'i̱ Jesucristo. Li' ndu'u ngu' ndyaa ngu' ca quichi̱ Atalia, 26ndyatí̱ ngu' ne' yaca ni'i̱ ndyaa ngu' chaca tsu' tyujo'o bi' ca quichi̱ Antioquía su nguti'i̱ ngu' clyo. La cui' quichi̱ bi' ndi'i̱ ngu' nu lo'o ngusta ya' tya'a ngu' lo ngu' cuentya ji'i̱ Jesucristo, nu lo'o cua tsaa ti ngu' tyijyu' tya clyo. Cua ndye cña su ndyaa ngu' tyijyu' juani, 27bi' cha' ndyalaa ngu' chaca quiya' quichi̱ Antioquía bi'. Li' ndyu'u ti'i̱ lcaa ñati̱ ji'i̱ Jesucristo slo ngu'; ndu̱ Pablo lo'o Bernabé nda ngu' cha' lo'o tya'a ngu', lcaa ña'a̱ cha' nu cua ngua'ni ycui' Ndyosi lo'o ngu' ca su ndyaa ngu' tyijyu', cha' jua'a̱ cua nda Ni chacuayá' cha' xñi ngu' xa' tsu' cha' ji'i̱ Jesucristo. 28Tyiquee' ndyanu Pablo lo'o Bernabé quichi̱ bi', stu'ba ti ndi'i̱ ngu' lo'o tya'a ñati̱ ji'i̱ Jesucristo quichi̱ bi'.

Currently Selected:

LOS HECHOS 14: cta

Highlight

Copy