LOS HECHOS 13

Nguxana Bernabé lo'o Saulo ngua'ni ngu' cña ji'i̱ ycui' Ndyosi

1Nu taju ñati̱ ji'i̱ Jesucristo ca quichi̱ Antioquía bi' ni, laja ngu' bi' ntsu'u xi ngu' nu laca tu'ba ji'i̱ ycui' Ndyosi. La cui' jua'a̱ laja ngu' bi' tya ntsu'u la xa' tya'a ngu' nu tso'o tsa nclyu'u cha' ji'i̱ ycui' Ndyosi ji'i̱ tya'a ngu'; ngu' nu nclyu'u ji'i̱ tya'a ngu' ngua Bernabé, lo'o Simón nu ngata, lo'o Lucio Cirene, lo'o Saulo, lo'o Manaén. (Nu Manaén bi' ngua tya'a miña'a̱ Herodes nu laca gobernador ji'i̱ loyuu su cuentya Galilea.) 2Ngua sca tsa̱ nu lo'o tyucui tsa̱ ná ndyacu ngu' taju bi', xqui'ya cha' ngua'ni tlyu ngu' ji'i̱ ycui' Ndyosi nu Xu'na na. Li' nchcui' Xtyi'i ycui' Ndyosi lo'o ngu' bi':

―Ta ma̱ chacuayá' ji'i̱ Bernabé lo'o jua'a̱ ji'i̱ Saulo, cha' tsaa ngu' xa' quichi̱ cha' cua'ni ngu' cña nu ta na' ji'i̱ ngu' cha' cua'ni ngu' ―nacui̱ ycui' Ndyosi ji'i̱ ngu'.

3Tyu̱u̱ hora ná ndyacu ngu' li', cha' tsa cu' ti nchcui' ngu' lo'o ycui' Ndyosi. Li' ngusta ya' lcaa tya'a ñati̱ ji'i̱ Jesucristo bi' hique Bernabé, lo'o jua'a̱ hique Saulo, cha' tso'o ti tsaa ngu' ca su cua'ni ngu' cña cuentya ji'i̱ ycui' Ndyosi.

Nda ngu' cha' ji'i̱ ycui' Ndyosi ca loyuu su cuentya Chipre

4Li' ndyaa Bernabé lo'o Saulo ca quichi̱ Seleucia cha' tyatí̱ ngu' ne' yaca ni'i̱, cha' tsaa ngu' chaca tsu' tyujo'o ca loyuu su naa Chipre. Ca bi' cua'ni ngu' cña nu ngulo Xtyi'i ycui' Ndyosi ji'i̱ ngu'. 5Li' ndyaa ngu' ne' yaca ni'i̱ ca quichi̱ Salamina. Lo'o ndyalaa ngu' chaca tsu' bi', li' ndyatí̱ ngu' ndyaa ngu' ne' laa ji'i̱ ngu' judío quichi̱ bi', cha' culu'u ngu' cha' ji'i̱ ycui' Ndyosi ji'i̱ ñati̱ nu ndi'i̱ ne' laa bi'. Tyempo bi' tya ndya'a̱ Juan lo'o ngu' cha' xtyucua ji'i̱ ngu'. 6Li' ndu'u ngu' ndyaa ngu' tyu̱u̱ tya'a quichi̱ nde Chipre bi', ndyaa ngu' ndyalaa ngu' ca quichi̱ Pafos li'. Quichi̱ bi' ndyacua tya'a ngu' lo'o sca nu qui'yu nu cucha'a̱ tsa nu naa Barjesús. Ngu' judío laca nu qui'yu bi', lo'o jua'a̱ nacui̱ yu cha' laca yu tu'ba ji'i̱ ycui' Ndyosi; pana si'i cha' liñi nda yu. 7Ndi'i̱ nu cucha'a̱ bi' slo gobernador nu naa Sergio Paulo. Ngua tsa nu gobernador bi', lo'o jua'a̱ nti' tsa cuna cha' ji'i̱ ycui' Ndyosi; bi' cha' nguane gobernador ji'i̱ Bernabé lo'o ji'i̱ Saulo cha' ca̱a̱ ngu' ca slo, cha' culu'u ngu' cha' bi' ji'i̱. 8Pana ná ndiya ti' nu cucha'a̱ bi' nu lo'o ndyuna gobernador cha' ji'i̱ ycui' Ndyosi. (Elimas naa nu cucha'a̱ bi' cha'cña ji'i̱ ngu' quichi̱ Pafos bi'.) Lye tsa nxu̱u̱ tya'a yu lo'o Saulo lo'o Bernabé, cha' cua nti' yu cua'a yu ji'i̱ gobernador cha' nga'aa xñi nu cusu' bi' cha' ji'i̱ ycui' Ndyosi nu nchcui' ngu' lo'o. 9Li' na'a̱ tsa Pablo ji'i̱ nu cucha'a̱ bi'. (Nu juani naa Pablo nu ngua naa Saulo clyo.) Xtyi'i ycui' Ndyosi laca nu nda juersa ji'i̱ nu Pablo bi', 10bi' cha' nchcui' lo'o nu cucha'a̱ bi':

―Lye tsa ñilo'o nu'u̱ ji'i̱ ngu' ―nacui̱ Pablo ji'i̱ nu cucha'a̱ bi'―. Liye' tsa ti' nu'u̱ ña'a̱ nu'u̱ ji'i̱ ya, cha' msu ji'i̱ nu xña'a̱ laca nu'u̱ ―nacui̱―. Ndaca'a tsa nu'u̱ ji'i̱ ngu' cha' ná cua'ni ngu' sca cha' tso'o ti; bi' cha' juani culo na' cña jinu'u̱ cha' nga'aa cua'a nu'u̱ ji'i̱ ngu' nu nti' xñi cha' ji'i̱ ycui' Ndyosi nu Xu'na ya. 11Xcube' nu Xu'na ya jinu'u̱ juani, cha' nga'aa caja ñi'ya̱ ña'a̱ nu'u̱ xee cua̱; tyu̱u̱ tsa̱ tyanu cuityi̱' ti nu'u̱ li'.

Hora ti ngua cuityi̱' yu cucha'a̱ bi' li', nga'aa ngua ña'a̱ yu tsiya' ti. Li' nclyana yu ji'i̱ sca ñati̱ nu xñi ya' yu cha' tsaa lo'o ji'i̱ yu nde liya'. 12Lo'o na'a̱ gobernador cha' ngua cuityi̱' nu cucha'a̱ bi', li' hora ti ngusñi nu cusu' bi' cha' ji'i̱ Jesucristo. Jua'a̱ ndube tsa ti' nu cusu' bi' ji'i̱ cha' nu ngulu'u ngu' ji'i̱ cuentya ji'i̱ ycui' nu Xu'na na.

Ndyaa Pablo lo'o Bernabé ca quichi̱ Antioquía Pisidia

13Lo'o li' ndu'u Pablo lo'o tya'a ndya'a̱ yu, ndu'u ngu' quichi̱ Pafos ndyaa ngu'. Ndyatí̱ ngu' ne' yaca ni'i̱ ndyaa ngu' chaca tsu' tyujo'o, ndyalaa ngu' ca quichi̱ Perge ca loyuu su cuentya Panfilia li'. Nga'aa ndya'a̱ Juan lo'o ngu' li', na cua ndyaa yu quichi̱ tyi yu. 14Ndu'u ngu' quichi̱ Perge ndyaa ngu' chaca quichi̱ Antioquía ca loyuu su cuentya Pisidia. Nu ngua tsa̱ ta'a nu ndi'i̱ cña' ngu', li' ndyatí̱ Pablo lo'o Bernabé ndyaa ngu' ne' laa ji'i̱ ngu' judío. Ca bi' ndyaa tucua ngu' xi. 15Li' nchcui' sca nu cusu' lo quityi ji'i̱ ycui' Ndyosi cha' cuna lcaa ñati̱ nu ndi'i̱ ne' laa bi'; nchcui' lo quityi nu nscua cña nu ngulo Ni ji'i̱ ngu', li' nchcui' nu cusu' bi' sca cha' nu nguscua jyo'o cusu' nu ngua tu'ba ji'i̱ ycui' Ndyosi nu ngua sa'ni. Lo'o li' nchcuane nu cusu' nu laca loo ne' laa bi' ji'i̱ Pablo lo'o Bernabé:

―¿Ha ntsu'u sca cui̱i̱ ji'i̱ ma̱ cha' ta ma̱ lo'o ya juani? ―nacui̱ ji'i̱ ngu'.

16Li' ndyatu̱ Pablo ngua'ni ya' yu ji'i̱ ngu' cha' cua'a̱ jyaca̱ ngu' ji'i̱ yu. Nchcui' Pablo lo'o ngu' li':

―Tyu'u cha' clyu ti' ji'i̱ ma̱ cua'a̱ jyaca̱ ma̱ ji'i̱ cha' nu chcui' na' lo'o ma̱ juani ―nacui̱ Pablo ji'i̱ ngu'―. Ngu' Israel laca na, lo'o jua'a̱ ndu'ni tlyu na ji'i̱ ycui' Ndyosi. 17La cui' ycui' Ndyosi nu ndu'ni tlyu na ji'i̱, la cui' Ni laca nu ngusubi ji'i̱ jyo'o cusu' ji'na cha' tyu'u tucua quiña'a̱ ñati̱ ji'i̱ ngu' nde loo la. Tya ndi'i̱ jyo'o cusu' ji'na ca loyuu Egipto lo'o ndyatu̱ quiña'a̱ tsa tya'a ngu', masi si'i quichi̱ tyi ngu' ngua quichi̱ bi'. Li' tlyu tsa cña ngua'ni ycui' Ndyosi, cha' ngulo Ni ji'i̱ jyo'o cusu' ji'na ca loyuu Egipto bi'. Jua'a̱ ngua cuayá' ti' xa' ñati̱ chalyuu cha' tonu tsa cña nu ndu'ni ycui' Ndyosi nde chalyuu. 18Nu lo'o nguta'a̱ ngu' loyuu btyi bi' tya tu'ba yija̱, ndalo tsa tyiquee ycui' Ni ji'i̱ jyo'o cusu' ji'na li', masi quiña'a̱ tsa cha' cuxi ngua'ni ngu' bi'. 19Li' ngua'ni tye Ni cha' ji'i̱ cati tya'a nación ñati̱ nu nguti'i̱ loyuu su cuentya Canaán, la cui' ñati̱ nu nguti'i̱ loyuu bi' tya clyo la; nda Ni yuu bi' cha' caja su tyi'i̱ jyo'o cusu' ji'na li'. 20Lo'o jua'a̱ nda Ni ñati̱ nu ngua loo ji'i̱ jyo'o cusu' ji'na cuentya ji'i̱ ycui' Ndyosi. Li' cua ndya'a jacua siyento cla'be yija̱, tya lo'o ndyalaa ngu' loyuu Canaán bi', ña'a̱ cuayá' nu ngula jyo'o Samuel nu ngua tu'ba ji'i̱ ycui' Ndyosi. 21Li' ngüijña ngu' ji'i̱ ycui' Ndyosi cha' ta Ni sca rey cha' caca loo ji'i̱ ngu', bi' cha' nda Ni ji'i̱ jyo'o Saúl sñi' Cis ji'i̱ ngu'; ngua yu bi' loo ji'i̱ ngu' tu'ba yija̱ li'. Jyo'o Saúl bi' ngua tya'a ñati̱ ji'i̱ ngu' Benjamín. 22Nu lo'o ndye tu'ba yija̱, li' nga'aa nda Ni cña bi' ji'i̱ yu bi', nda Ni jyo'o David cha' caca loo ji'i̱ ngu' cña su ndu̱ Saúl nquicha'. Cua nchcui' ycui' Ndyosi cha' ji'i̱ nu jyo'o David bi': “Ntsu'u tsa tyiquee na' ña'a̱ na' ji'i̱ David sñi' Isaí”, nacui̱ ycui' Ndyosi. “Cua nda na' cuentya cha' laca yu bi' sca ñati̱ nu tyaja'a̱ cua'ni lcaa cña nu nti' na' cha' cua'ni yu.” 23Cua sa'ni nda ycui' Ndyosi cha' lo'o na cha' nde loo la cala sca ñati̱ tya'a ji'i̱ jyo'o David bi', nu cua'ni lyaá ji'i̱ lcaa na nu laca na ngu' Israel; yu bi' laca Jesús. 24Nu lo'o bilya xana Jesús culu'u cha' ji'i̱ ngu' tya'a quichi̱ tyi na, nda jyo'o Juan cha' lo'o ngu' tya'a na, cha' ca tyuju'u ti' ngu' tya'a na ji'i̱ qui'ya nu ntsu'u ji'i̱ ngu' lo'o ycui' Ndyosi. Lo'o li' ntyucuatya jyo'o Juan bi' ji'i̱ ngu' nu ngusñi cha' bi'. 25Nu lo'o cua tye ti cña ji'i̱ jyo'o Juan bi', li' nchcui' yu lo'o ngu' tya'a quichi̱ tyi na ndi'ya̱: “Xa' ñati̱ ntajatya ma̱ ji'i̱”, nacui̱ Juan ji'i̱ ngu'; “si'i na' laca̱”, nacui̱ yu. “Ca nde loo la ca̱a̱ sca ñati̱ nu tlyu la chacuayá' ntsu'u ji'i̱. Lo'o na', cua'ni tlyu na' ji'i̱ ñati̱ bi'; tso'o tsa caca tyiquee na' masi caña nu ntsu'u quiya' ñati̱ bi' sati̱' na' juata ti.” Jua'a̱ nchcui' jyo'o Juan cuentya ji'i̱ Jesús.

26’Lcaa na nu laca na la cui' tya'a ñati̱ ji'i̱ jyo'o Abraham, lo'o jua'a̱ lcaa ma̱ nu ndaquiya' ma̱ ji'i̱ ycui' Ndyosi, cuentya ji'i̱ lcaa na laca cha' tso'o nu nda Ni lo'o na, cha' tso'o nu nchcui' ñi'ya̱ ndu'ni lyaá Ni ji'i̱ ñati̱ chalyuu. 27Ná ngua cuayá' ti' ngu' quichi̱ Jerusalén tilaca laca Jesús, lo'o jua'a̱ ná ngua cuayá' ti' ngu' nu laca loo ji'i̱ quichi̱ bi' tilaca laca yu. Ná nda ngu' cuentya ñi'ya̱ ndyu'u cha' nu nguscua jyo'o cusu' nu ngua tu'ba ji'i̱ ycui' Ndyosi sa'ni; masi ndyuna ngu' lo'o ndya'a̱ nchcui' ngu' lo quityi bi' ne' laa lcaa tsa̱ nu ndi'i̱ cña' ngu', ná nda ngu' cuentya si cha' ji'i̱ ycui' Jesús nchcui' quityi bi'. Bi' cha' cuxi tsa cña ngua'ni ngu' lo'o Jesús nu lo'o ngusta ngu' qui'ya ji'i̱ yu. La cui' tya'a cña nu nguscua jyo'o cusu' lo quityi cha' cua'ni ngu' lo'o yu, cua ngua'ni ngu' li'. 28Masi ná ntsu'u qui'ya ji'i̱ Jesús tsiya' ti, ngüijña ngu' ji'i̱ gobernador, la cui' nu Pilato bi', cha' culo cña ji'i̱ ngu' cha' cujuii ngu' ji'i̱ Jesús. 29Nu lo'o cua ndye ngua'ni ngu' lcaa cha' ñi'ya̱ nchcui' lo quityi bi' cha' caca ji'i̱ Jesús, li' nda'ya ngu' ji'i̱ jyo'o bi' su nga'a̱ lo crusi, nguxatsi' ngu' ji'i̱ jyo'o bi' li'. 30Pana ngua'ni ycui' Ndyosi cha' ndyu'ú yu chaca quiya' li'. 31Tyu̱u̱ tsa̱ ndu'u tucua ycui' ca Jesús su ndi'i̱ ngu' tya'a ndya'a̱ yu. La cui' ngu' nu cua ñaa lo'o yu tya lo'o ndu'u ngu' nde Galilea ñaa ngu' ca quichi̱ Jerusalén, bi' ngu' laca nu nda cha' liñi ji'i̱ Jesús lo'o ñati̱ juani.

32’Lo'o juani cua lijya̱ ya ca nde cha' culu'u ya cha' tso'o ji'i̱ ycui' Ndyosi bi' ji'i̱ cu'ma̱. Tya sa'ni la cua ngüiñi cha' ji'i̱ ycui' Ndyosi lo'o jyo'o cusu' ji'na; 33lo'o nu juani cua ngua'ni Ni cha' bi' cuentya ji'na, nu lo'o cua ndyu'ú Jesús chaca quiya'. Ndi'ya̱ nchcui' Salmo nu nchca tyucuaa cha' ji'i̱ Jesús: “Sñi' na' laca nu'u̱”, nacui̱ ycui' Ni ji'i̱ Jesús. “Juani cua ngua'ni na' cha' tyu'ú nu'u̱ chalyuu.” 34Chaca cha' nchcui' quityi cha' ji'i̱ ycui' Ndyosi cha' tyu'ú Jesús chaca quiya' lo'o ndyujuii ngu' ji'i̱, lo'o jua'a̱ nchcui' quityi bi' cha' ná quiñu'u̱ cuaña' Jesús ne' cuaá. “Ta na' lcaa cha' tso'o ji'i̱ ma̱, la cui' ña'a̱ cha' tso'o nu nchcui' na' lo'o David cha' caja ji'i̱ ma̱”, nacui̱ ycui' Ni. 35Lo'o jua'a̱ ntsu'u chaca Salmo, chaca ji̱i̱ ji'i̱ ycui' Ndyosi, nu nchcui' ñi'ya̱ nu nacui̱ Jesús ji'i̱ ycui' Ni: “Jlo ti' na' cha' ná ta nu'u̱ chacuayá' quiñu'u̱ cuaña' na', cha' na' laca̱ Sñi' ycui' nu'u̱”, nacui̱. 36Ngua'ni jyo'o David cña ji'i̱ ycui' Ndyosi lcaa tyempo lo'o nguti'i̱ nu cusu' bi' chalyuu. Lo'o ngujuii yu, li' nguxatsi' ngu' ji'i̱ se'i̱ ti lo'o xa' la jyo'o cusu' ji'na; ndye cuaña' yu ngutsu' li'. 37Pana Jesús ni, ná ngunu'u̱ cuaña' Jesús lo'o nguatsi' yu, xqui'ya cha' ngua'ni ycui' Ndyosi cha' ndyu'ú yu chaca quiya'. 38Bi' cha' ntsu'u cha' ca cuayá' ti' lcaa cu'ma̱, cha' xqui'ya Jesús cua'ni clyu ti' ycui' Ndyosi ji'i̱ lcaa cha' cuxi nu ngua'ni ma̱; 39taca tyu'u laja ti ma̱ ji'i̱ qui'ya nu ntsu'u ji'i̱ ma̱ si xñi ma̱ cha' ji'i̱ Jesús. Ná ndu'ni cha' masi tso'o tsa ndaquiya' ma̱ ji'i̱ lcaa cha' nu nguscua jyo'o Moisés sa'ni, ná nchca ji'i̱ cha' bi' cuityi̱ qui'ya nu ntsu'u ji'i̱ ma̱. 40Tso'o la si cui'ya ma̱ cuentya cha' ná tyacua cha' cuxi ji'i̱ ma̱, la cui' cha' nu nguscua jyo'o cusu' sa'ni cuentya ji'i̱ cu'ma̱ nu nchcui' ndi'ya̱:

41Clyacua tso'o ti' ma̱, lcaa cu'ma̱ nu nti' ma̱ xtyí lo'o ma̱ ji'i̱ ycui' Ndyosi;

cube xi ti' ma̱, tyaa ma̱ cuaana ti li'.

Ycui' Ndyosi laca na', nu tlyu tsa cña tonu cua'ni na' tyempo nu ndi'i̱ ma̱ chalyuu, nacui̱ Ni.

Ná caca jlya ti' ma̱ cha' ndu'ni na' cña bi' tsiya' ti,

masi tso'o tsa culu'u ñati̱ ñi'ya laca cha' bi' ji'i̱ ma̱.

Cua ndye nchcui' Pablo lo'o ngu' li'.

42Na cua tyu'u ti ngu' ne' laa tsaa ngu', lo'o li' ngüijña tsa tyu̱u̱ tya'a ñati̱ bi' ji'i̱ Pablo lo'o ji'i̱ Bernabé cha' culu'u la ngu' cha' ji'i̱ Jesús ji'i̱ ngu' chaca quiya' ca xnu' tsa̱. 43Jua'a̱ lo'o ndye ndyu'u ti'i̱ ngu' ne' laa bi', li' ndyaa ngu' lo'o Pablo lo'o Bernabé. Tyu̱u̱ tya'a ngu' judío ndyaa ngu' lo'o ngu' bi', lo'o jua'a̱ xa' ñati̱ nu ndu'ni tlyu ji'i̱ ycui' Ndyosi stu'ba ti lo'o nu ngu' judío bi', la cui' ti ndyaa ngu' lo'o ngu' bi' li'. Ngulu'u la ngu' bi' ji'i̱ nu quiña'a̱ ngu' bi' li', cha' tso'o ti tyanu cha' ji'i̱ Jesús tyiquee ngu', cha' ca cuayá' tso'o ti' ngu' cha' ntsu'u tsa tyiquee ycui' Ndyosi ña'a̱ Ni ji'i̱ lcaa ñati̱ chalyuu.

44Nu lo'o ngua snu' tsa̱, li' ndyu'u ti'i̱ lcaa tya'a ngu' quichi̱ ne' laa bi', cha' cuna ngu' cha' ji'i̱ ycui' Ndyosi chaca quiya'. 45Ñasi̱' tsa nu ngu' judío bi' lo'o na'a̱ ngu' ji'i̱ nu quiña'a̱ tsa ñati̱ bi'. Nchcui' suba' ngu' judío lo'o Pablo li', nacui̱ ngu' cha' cuiñi tsa cha' nu nclu'u yu bi'. 46Pana ná ndyutsi̱i̱ Pablo lo'o Bernabé cha' xacui̱ ngu' cha' ji'i̱ ngu' judío bi':

―Clyo ntsu'u cha' chcui' ya cha' ji'i̱ ycui' Ndyosi lo'o ma̱ nquicha', cha' ngu' judío tya'a na laca ma̱. Pana juani tsaa ya culu'u ya cha' bi' ji'i̱ ngu' xa' tsu', xqui'ya cha' ná ntaja'a̱ ma̱ cuna ma̱ cha' nu nchcui' ya. Na cua ngüiñi cha' ji'i̱ ma̱ lo'o tya'a ma̱, cha' ná nti' ma̱ caja chalyuu nu ná nga'a̱ cha' tye ji'i̱ ma̱. 47Jua'a̱ cña ngulo ycui' nu Xu'na na ji'i̱ ya nu nchcui' quityi cusu' bi' ndi'ya̱:

Ñi'ya̱ nti' sca xee ndubi nu nclyu'u xee tyijyu',

jua'a̱ nga'a̱ cha' ta ma̱ cha' jna' lo'o ngu' xa' tsu', nacui̱ ycui' Ndyosi,

cha' ca cuayá' ti' lcaa ñati̱ chalyuu tilaca laca nu cua'ni lyaá ji'i̱ ngu'.

48Ndyuna nu ngu' xa' tsu' cha' bi', lo'o li' tso'o tsa ntsu'u tyiquee ngu'. Tso'o tsa laca cha' ji'i̱ ycui' Ndyosi nu Xu'na na, ngulacua ti' ngu' bi'; jua'a̱ ngusñi ngu' cha' bi'. Jlya ti' ngu' bi' cha' ji'i̱ Jesús, lcaa ngu' nu cua ngusubi ycui' Ndyosi ji'i̱; ngujui chalyuu nu ná nga'a̱ cha' tye ji'i̱ ngu' bi' li'. 49Jua'a̱ ngua, lo'o li' ndyaa ngu', ndya'a̱ nchcui' ngu' cha' ji'i̱ nu Xu'na na lo'o lcaa ñati̱ lcaa quichi̱ ca loyuu bi'. 50Hora ti nchcui' ngu' judío lo'o ngu' nu laca loo ji'i̱ quichi̱, jua'a̱ lo'o ngu' cuna'a̱ tlyu, cha' su'ba ñasi̱' ji'i̱ ngu' quichi̱ lo'o ña'a̱ ngu' ji'i̱ Pablo lo'o Bernabé. Ngua ti'í ti' ngu' ji'i̱ ngu' bi' li', ngulo'o ngu' ji'i̱ ngu' bi', cha' tsaa Pablo lo'o Bernabé xa' se'i̱. 51Lo'o li' nu Pablo lo'o Bernabé bi' ni, ngusalú ngu' snii yuu nu ntsu'u quiya' ngu' to' quichi̱. Jua'a̱ ngua'ni ngu' cha' ta ngu' quichi̱ bi' cuentya cha' ná tso'o cña nu ngua'ni ngu', nu lo'o ngulo'o ngu' quichi̱ ji'i̱ tyucuaa ngu' bi'. Ndu'u ngu' ndyaa ngu' ca quichi̱ Iconio li'. 52Lo'o nu ñati̱ ji'i̱ Jesucristo nu ndyanu quichi̱ Antioquía bi' ni, chaa ti' ndyanu ngu' quichi̱ tyi ngu' cha' cua ndyanu Xtyi'i ycui' Ndyosi ne' cresiya ji'i̱ ngu'.

Currently Selected:

LOS HECHOS 13: cta

Highlight

Copy