LOS HECHOS 16

Ndyaa Timoteo lo'o Pablo lo'o Silas

1Ndyalaa Pablo lo'o Silas ca quichi̱ Derbe, li' ndyalaa ngu' ca quichi̱ Listra. Quichi̱ bi' ndyacua tya'a ngu' lo'o sca yu cuañi' tya'a ngusñi ngu' cha' ji'i̱ Jesucristo nu naa Timoteo. Xtya'a̱ yu laca sca nu cuna'a̱ judío nu ntsu'u cha' ji'i̱ lo'o Jesucristo, pana ngu' griego ngua sti yu. 2Nu ñati̱ ji'i̱ Jesús ca quichi̱ Listra bi', tso'o tsa nchcui' ngu' cha' ji'i̱ nu Timoteo bi', lo'o jua'a̱ tso'o nchcui' ngu' ji'i̱ yu bi' ca quichi̱ Iconia. 3Ngua ti' Pablo cha' tsaa Timoteo lo'o ngu' li', bi' cha' ngusi'yu Pablo quiji̱ Timoteo cha' culacua̱ yu. Ná ca ñasi̱' ngu' judío lcaa quichi̱ su tya'a̱ yu lo'o ngu' li', masi jlo ti' lcaa ngu' cha' ngu' griego ngua sti yu. 4Nchcui' ngu' lo'o tya'a ñati̱ ji'i̱ Jesús lcaa quichi̱ su ndya'a̱ ngu', cha' ca cuayá' ti' ngu' bi' lcaa ña'a̱ cha' nu nguscua ngu' Jerusalén lo quityi bi'; nguscua ngu' nu ngua tsa'a̱ ji'i̱ Jesús tya clyo lo'o ngu' cusu' quityi bi', cha' ca cuayá' ti' ngu' xa' tsu' lcaa ña'a̱ cña nu ntsu'u cha' cua'ni ngu' nu laca ñati̱ ji'i̱ Jesucristo. 5Lo'o ndyuna ngu' cha' bi', li' cua ngua tlyu la tyiquee ngu' cha' ji'i̱ Jesucristo; nga'aa ndyutsi̱i̱ ngu' li'. Lo'o jua'a̱ ngua cha' lcaa tsa̱ ndyatu̱ la ñati̱ nu ntsu'u cha' ji'i̱ lo'o Jesucristo.

Nchcui' sca ngu' Macedonia lo'o Pablo laja xcalá yu

6Lo'o li' ná nda Xtyi'i ycui' Ndyosi chacuayá' ji'i̱ ngu' cha' culu'u ngu' cha' ji'i̱ Jesucristo ca quichi̱ nde loyuu su cuentya Asia, bi' cha' nteje tacui ngu' loyuu su cuentya Frigia, lo'o jua'a̱ loyuu su cuentya Galacia, 7ndyalaa ngu' tyucui̱i̱ nu tsaa ca loyuu su cuentya Misia li'. Ngulacua ti' ngu' cha' tya tsaa la ngu' ca loyuu su cuentya Bitinia, pana ná nda Xtyi'i ycui' Jesús chacuayá' cha' tsaa ngu' cajua; 8bi' cha' nteje tacui ngu' loyuu su cuentya Misia ndyaa lye la ngu', ndyalaa ngu' quichi̱ Troas ca to' tyujo'o li'. 9Ngua sca talya laja lo'o ndi'i̱ Pablo quichi̱ bi', li' nchcui' xcalá yu. Cua na'a̱ Pablo sca ngu' Macedonia nu ndacha' ji'i̱ yu: “Tyeje tacui ma̱ chaca tsu' tyujo'o, ca̱a̱ ma̱ xa' tsu' ca nde Macedonia, loyuu quichi̱ tyi na'”, nacui̱ nu qui'yu bi', “cha' xtyucua ma̱ ji'i̱ cua”, nacui̱ ji'i̱ Pablo laja xcalá. 10Lo'o li' ngusñi ya tyucui̱i̱ cha' tsaa ya chaca tsu' tyujo'o bi' ca loyuu Macedonia, xqui'ya cha' nchcui' xcalá Pablo. (Lo'o na' ndya'a̱ na' lo'o ngu'. Lucas naa na', na' nu nscua̱ quityi re.) Jlo ti' ya cha' ycui' Ndyosi laca nu ngulo cña ji'i̱ ya cha' tsaa ya ndejua, cha' ta ya cha' ji'i̱ Jesucristo lo'o ñati̱ nu ndi'i̱ ndejua.

Ndi'i̱ Pablo lo'o Silas ca quichi̱ Filipos

11Hora ti ndyaa ya ndyatí̱ ya ne' yaca ni'i̱ cha' tsaa ya chaca tsu', ndu'u ya ndyaa ya li'. Cuati na'a̱ ya ca su naa Samotracia, sca loyuu piti ti cla'be tyujo'o laca bi'. Ca chaca tsa̱ ndyalaa ya chaca tsu' tyujo'o bi', ca quichi̱ Neápolis. 12Ca bi' ngusñi ya tyucui̱i̱ ndyaa ya nde quichi̱ Filipos, quichi̱ nu laca loo ji'i̱ lcaa quichi̱ loyuu su cuentya Macedonia laca quichi̱ Filipos bi'. (Lo'o nguxana ti quichi̱ bi', ngüiñá ngu' romano ji'i̱.) Lo'o li' ndyanu ya tyu̱u̱ tsa̱ quichi̱ bi'. 13Lo'o nu ngua tsa̱ nu ndi'i̱ cña' ngu' judío, li' ndu'u ya quichi̱ ndyaa ya ca to' sta'a̱ su ndyu'u ti'i̱ ngu' judío cha' chcui' ngu' lo'o ycui' Ndyosi tsa̱ bi'; ngulu'u ya xi ji'i̱ ngu' cuna'a̱ nu ndyu'u ti'i̱ ndacua ti. 14Lidia naa sca nu cuna'a̱ bi'; ngu' Tiatira laca, lo'o cña ji'i̱ laca cha' ndujui' late' nde quichi̱ Filipos bi', sca lo late' nu cuaa ña'a̱, nu tso'o xi ña'a̱. Ndu'ni tlyu ma' cusu' bi' ji'i̱ ycui' Ndyosi, cha' tso'o ndyuna ma' cha' ji'i̱ ycui' Ndyosi nu Xu'na na; jua'a̱ nguxtyucua Ni ji'i̱ ma' cha' cui'ya tso'o cuentya ñi'ya̱ nu ndyu'u cha' nu ngulu'u Pablo ji'i̱ ngu'. 15Li' ntyucuatya ngu' ji'i̱ Lidia lo'o ji'i̱ lcaa tya'a ngu' nu ndi'i̱ slo.

―Si chañi cha' nclyacua ti' ma̱ cha' laca na' ñati̱ ji'i̱ Jesucristo ―nacui̱ nu cuna'a̱ bi' ji'i̱ ya―, tya̱a̱ ma̱ to' tyi na', tyanu ma̱ xi slo cua lacua.

Tyu̱u̱ quiya' nchcui' ma' lo'o ya cha' tsaa ya, bi' cha' ndyaa ya lo'o ma' ca toni'i̱ ji'i̱ ma'.

16Ngua sca tsa̱ ndyaa ya su ndyu'u ti'i̱ ngu' cha' chcui' ngu' lo'o ycui' Ndyosi, lo'o li' ndyacua tya'a ya lo'o sca nu cuna'a̱ cuañi' tyucui̱i̱. Quicha nu cuna'a̱ bi', cha' cua sa'ni tsa ngusñi cui'i̱ ji'i̱. Cuentya ji'i̱ cui'i̱ bi' nchca tii nu cuna'a̱ bi' ñi'ya̱ nu lijya̱ tyempo ji'i̱ ngu' ca nde loo la, bi' laca cha' nu nda cui'i̱ bi' lo'o nu cuna'a̱ bi'. Msu nu ngüi'ya ti ngu' laca nu cuna'a̱ bi', lo'o ná nda xu'na cho' caya' ji'i̱. Ngua'ni tsa xu'na cho' ngana, cha' nda ngu' quichi̱ quiña'a̱ tsa cñi ji'i̱ xu'na cho', cha' caja cha' ji'i̱ ngu' ñi'ya̱ nu caca ji'i̱ ngu' nde loo la lo'o nchcui' nu cuna'a̱ bi' lo'o ngu'. 17Ndyaa lca'a̱ cho' ji'i̱ Pablo lo'o ji'i̱ cuare. Cui̱i̱ tsa ngusi'ya nu cuna'a̱ quicha bi' lijya̱:

―Msu ji'i̱ ycui' Ndyosi nu laca loo laca ngu' re ―nacui̱ nu quicha bi'―. Culu'u ngu' ji'i̱ ma̱ ñi'ya̱ nu cua'ni lyaá ycui' Ndyosi ji'i̱ ma̱.

18Tyu̱u̱ tsa̱ lca'a̱ nu cuna'a̱ bi' ji'i̱ ya, lo'o la cui' jua'a̱ nxi'ya tsa. Li' nga'aa ndiya ti' Pablo cha' nxi'ya cho'. Nguxtyacui yu nde chu̱' yu tyucui̱i̱ su ndyaa yu, nchcui' yu lo'o nu cuna'a̱ quicha bi' cha' ji'i̱ cui'i̱ nu ngusñi ji'i̱ cho', cha' tyu'u cui'i̱ bi' tyaa li':

―Chacuayá' ji'i̱ Jesucristo nchcui' na' ―nacui̱ Pablo ji'i̱. ―Tyu'u cui'i̱ nu ntsu'u laja cuaña' nu'u̱ juani, tyaa nde liya'.

Hora ti ngutu'u cui'i̱ bi' ndyaa li'. Ngua tso'o nu cuna'a̱ bi' li'.

19Tyaala tsa ngu' nu laca xu'na nu cuna'a̱ bi'. Hora ti ngusñi xu'na bi' ji'i̱ Pablo lo'o ji'i̱ Silas, ndyaa lo'o xu'na bi' ji'i̱ ngu' slo ngu' nu laca loo ji'i̱ quichi̱, cha' nda xu'na nu cuna'a̱ bi' cuentya cha' nga'aa caca cua'ni ngu' ngana lo'o nu cuna'a̱ bi' si nga'aa ntsu'u cui'i̱ cuxi ji'i̱. 20Ngusta ngu' qui'ya ji'i̱ Pablo lo'o Silas ca slo bese li':

―Ngu' judío laca ngu' re ―nacui̱ ngu' ji'i̱ bese―. Cuxi tsa ndyu'ni ngu' re, bi' cha' ñasi̱' tsa ngu' quichi̱ juani. 21Xa' cha' nclu'u ngu' re ji'na nu ná ntsu'u chacuayá' ji'na cha' cua'ni na, cha' ngu' romano laca na.

22Ñasi̱' tsa lcaa ngu' quichi̱ li'. Ngulo bese cña cha' tyu'u ste' Pablo lo'o ste' Silas, cha' quiji'i̱ ngu' ji'i̱ ngu' bi' lo'o yaca. 23Quiña'a̱ tsa quiya' ngujui'i̱ yaca ngu' ji'i̱ ngu' bi', li' ngusu'ba ngu' ji'i̱ ngu' bi' ne' chcua̱. Lo'o jua'a̱ ngulo ngu' cña ji'i̱ ngu' nu nga'a̱ cua̱ to' ni'i̱ chcua̱ cha' tso'o tsa ña'a̱si̱i̱ ngu' ji'i̱ ngu' bi'. 24Bi' cha' ngua'ni clya nu laca loo ji'i̱ ni'i̱ chcua̱ bi', ngusu'ba yu ji'i̱ ngu' ne' cuarto cla'be ni'i̱ chcua̱ bi', lo'o li' ngusca̱' yu quiya' ngu' lo'o yaca.

25Nu lo'o ngua cla'be talya nga'a̱ Pablo lo'o Silas ne' chcua̱ bi'; nchcui' ngu' lo'o ycui' Ndyosi, ndyula tu'ba ngu' ji̱i̱ ji'i̱ ycui' Ni. Lo'o jua'a̱ ndyuna lcaa preso tya'a ntsu'u ngu' ne' chcua̱. 26Tsi tsiya' ca ngulacui̱ chalyuu li', lye tsa ngüiña ni'i̱ chcua̱; ndyaala lcaa toni'i̱ chcua̱ bi' li', xqui'ya cha' ngulacui̱ tsa chalyuu, lo'o jua'a̱ ngusi'yu cu' ju̱u̱ chcua̱ su ndyaaca̱' ngu'. 27Hora ti ngue ti' nu laca loo ji'i̱ ni'i̱ chcua̱ bi', na'a̱ yu cha' ntucua yaala toni'i̱. Ndyutsi̱i̱ tsa yu li', cha' ngulacua ti' yu cha' cua ngusna lcaa preso ji'i̱. Hora ti ngusñi yu maxtyi ji'i̱ cha' cujuii yu ji'i̱ ycui' ca yu. 28Cui̱i̱ ngusi'ya Pablo ji'i̱ yu li':

―Ná ntsu'u cha' cua'ni nu'u̱ jua'a̱ ―nacui̱ Pablo ji'i̱ yu―. Nde ti ndi'i̱ lcaa cuare.

29Ngusi'ya nu laca loo cha' ca̱a̱ lo'o ngu' ji'i̱ quii'. Li' ndyatí̱ yu ni'i̱ chcua̱, lye tsa nchcua̱ yu lijya̱ yu li', cha' ndyutsi̱i̱ tsa yu. Ndatu̱ sti̱' yu slo Pablo lo'o Silas li'. 30Li' ngulo yu ji'i̱ ngu' ne' chcua̱.

―Cusu' ―nacui̱ yu ji'i̱ Pablo lo'o Silas―, cuxi tsa ñati̱ laca na'. ¿Ñi'ya̱ cua'ni na' cha' cua'ni lyaá Ni jna'? ―nacui̱ nu laca loo bi'.

31―Xñi nu'u̱ cha' ji'i̱ ycui' Jesucristo nu Xu'na na ―nacui̱ Pablo ji'i̱ yu―, bi' nu taca ji'i̱ cua'ni lyaá ji'i̱ lcaa ma̱, lo'o jinu'u̱, lo'o ji'i̱ sñi' nu'u̱, lo'o ji'i̱ lcaa ngu' nu ndi'i̱ slo nu'u̱.

32Nu Pablo lo'o Silas ni, ngulu'u ngu' cha' ji'i̱ Jesús ji'i̱ lcaa ngu' nu ndi'i̱ ca slo nu laca loo ji'i̱ ni'i̱ chcua̱ bi' li'. 33Talya tsa ngua li', pana ngui'í̱ nu laca loo bi' ji'i̱ su ti'í ji'i̱ Pablo lo'o ji'i̱ Silas, su ngujui'i̱ yaca ngu' ji'i̱ ngu'. Li' ntyucuatya ngu' ji'i̱ nu laca loo bi', lo'o ji'i̱ lcaa ngu' nu ndi'i̱ slo. 34Ndyaa lo'o yu ji'i̱ Pablo lo'o Silas ni'i̱ ji'i̱ yu, cha' ta yu na cacu ngu'. Tso'o tsa tyiquee nu laca loo bi' juani, cha' cua ngusñi yu cha' ji'i̱ ycui' Ndyosi; la cui' ti tso'o ntsu'u tyiquee lcaa ngu' nu ndi'i̱ slo yu.

35Nguxee chaca tsa̱, li' ngulo bese cña ji'i̱ policía cha' tsaa ngu' chcui' ngu' lo'o nu laca loo ji'i̱ ni'i̱ chcua̱ bi', cha' culaá ji'i̱ ngu' bi'. 36Li' nchcui' nu laca loo bi' lo'o Pablo lo'o Silas:

―Cua ngulo bese cña jna' cha' culaá na' ji'i̱ ma̱ ―nacui̱ yu ji'i̱ ngu'―, bi' cha' tso'o ti tyaa ma̱ lacua.

37―Ná tso'o ―nacui̱ Pablo ji'i̱ policía―. Cua na'a̱ lcaa ngu' quichi̱ re nu lo'o ngujui'i̱ yaca ngu' ji'i̱ ya, masi ngu' romano laca cuare. Bilya ca cuayá' ji'i̱ ya lo'o ngusu'ba ngu' ji'i̱ ya ne' chcua̱ re ―nacui̱―. Lo'o juani nti' ngu' cha' culaá ngu' ji'i̱ ya cuaana ti. Si'i jua'a̱ nga'a̱ cha' caca. Tso'o la ca̱a̱ ycui' ngu' cha' culaá ngu' ji'i̱ ya.

38Ndyaa policía li', ndacha' ngu' ji'i̱ bese lcaa ña'a̱ cha' nu nchcui' Pablo lo'o ngu'. Nu lo'o ngua cuayá' ti' bese cha' ngu' romano laca Pablo lo'o Silas, ndyutsi̱i̱ tsa bese bi' li'. 39Hora ti ndyaa ycui' bese ca to' ni'i̱ chcua̱ li':

―Cusu' ―nacui̱ bese bi' ji'i̱ Pablo lo'o Silas―, cui'ya ma̱ cha' clyu ti' ji'i̱ ya ―nacui̱.

Ngulaá ngu' ji'i̱ Pablo lo'o Silas li'.

―Cua'ni ma̱ cha' tso'o tyaa ma̱ chaca quichi̱ ―nacui̱ ngu' ji'i̱ Pablo lo'o Silas.

40Li' ndu'u Pablo lo'o Silas ni'i̱ chcua̱, ndyaa ngu' slo ma' Lidia chaca quiya'. Xa' nchcui' ngu' lo'o ñati̱ ji'i̱ Jesucristo bi', cha' caca tlyu tyiquee ngu' xqui'ya Jesús. Ndu'u ngu' ndyaa ngu' li'.

Currently Selected:

LOS HECHOS 16: cta

Highlight

Copy