LOS HECHOS 12

Ndyujuii ngu' ji'i̱ Jacobo lo'o ngusu'ba ngu' ji'i̱ Pedro ne' chcua̱

1Nu ngua tyempo bi', rey nu ngua naa Herodes ni, nchcube' tsa ji'i̱ ñati̱ ji'i̱ Jesucristo. 2Ngulo rey bi' cña ji'i̱ msu ji'i̱ cha' cujuii ngu' ji'i̱ Jacobo lo'o maxtyi. (Jacobo bi' ngua tya'a ngula Juan.) 3Chaa tsa ti' ngu' judío cha' ndyujuii rey ji'i̱ Jacobo, bi' cha' lo'o ji'i̱ Pedro ntejeya' nu rey bi' li'. La cui' tsa̱ nu ngusñi rey ji'i̱ yu, li' ngua sca ta'a ji'i̱ ngu' judío, ta'a nu lo'o ndacu ngu' xlyá tiji nu ná lo'o scua̱ tiye' ndya'. 4Ntejeya' ngu' ji'i̱ Pedro, li' ndyaa lo'o ngu' ji'i̱, ngusu'ba ngu' ji'i̱ ne' chcua̱. Li' ndyatu̱ jacua latya sendaru cua̱ ji'i̱, jacua tya'a sendaru ntsu'u ji'i̱ sca latya ngu'; ndi'i̱ ngu' bi' cua̱ to' ni'i̱ chcua̱ su ntsu'u Pedro. Nu lo'o tye tsa̱ ta'a pascua, li' tyu'u ti'i̱ lcaa ngu' quichi̱ cha' cua'ni cuayá' nu Herodes bi' ji'i̱ Pedro, nti' ycui' rey bi'; 5bi' cha' ntsu'u cha' ña'a̱si̱i̱ tso'o sendaru ji'i̱ yu lo'o ntsu'u yu ne' chcua̱. Pana laja li' lye tsa nchcui' tya'a ñati̱ ji'i̱ Jesucristo lo'o ycui' Ndyosi cha' cua'ni lyaá Ni ji'i̱ Pedro.

Nclyo ycui' Ndyosi ji'i̱ Pedro ne' chcua̱

6Cua ngua talya li'. Chaca tsa̱ cua culo ti Herodes ji'i̱ Pedro cha' ca cuayá' ji'i̱ yu slo ngu' quichi̱ bi'. Cua ngusca̱' ngu' ji'i̱ Pedro lo'o tucua tya'a carena, sca carena ntsu'u ya' sca sendaru. Lo'o jua'a̱ ndu̱ xa' la sendaru cua̱ toni'i̱ chcua̱ nde liya'. Li' ngua'ya xcalá ti Pedro. 7Laja lo'o laja' ti yu, hora ti ndu'u tucua sca xca̱ ji'i̱ ycui' Ndyosi su nga'a̱ yu. Tso'o tsa xee ngulane ne' ni'i̱ chcua̱ li'. Nguxtyu'u xca̱ bi' ji'i̱ Pedro, nchcui' xca̱ lo'o yu li':

―Tyatu̱ clya nu'u̱ ―nacui̱ xca̱ bi' ji'i̱ yu.

Hora ti ndyati̱' carena chcua̱ nu ndyaaca̱' ya' yu. 8Xa' nchcui' xca̱ lo'o yu li':

―Xca̱' nu'u̱ sii' ―nacui̱―. Xu'ba nu'u̱ caña quiya'.

Ngua'ni Pedro jua'a̱, lo'o li' nchcui' xca̱ lo'o yu chaca quiya':

―Quixi̱i̱ nu'u̱ te' quicha̱' hichu̱'. Ya'a clya tyu'u lca'a̱ nu'u̱ jna' ―nacui̱ xca̱ bi' ji'i̱.

9Li' ndu'u lca'a̱ Pedro ji'i̱ xca̱ bi', pana ná ngua tii yu cha' chañi cha' ndyalaa xca̱ ji'i̱ ycui' Ndyosi slo yu; ngua ti' yu cha' laja xcalá ti yu ngua cha' bi'. 10Nteje tacui ngu' slo sendaru nu nga'a̱ cua̱ ne' ni'i̱ chcua̱, lo'o jua'a̱ nteje tacui ngu' slo xi xa' la sendaru nu nga'a̱ cua̱. Li' ndyalaa ngu' ca toni'i̱ chcua̱ tlyu, xcui' chcua̱ laca toni'i̱ bi'. Lo'o li' ndyaala toni'i̱ bi' ycui' ti; jua'a̱ ngua ngutu'u ngu' to' calle, ndyaa ngu' ndyalaa ngu' nde sca jyaca̱ calle bi'. Lo'o li' ndu'u nu xca̱ bi' ndyaa, chaca tya Pedro ndyanu calle bi'. 11Li' nda Pedro cuentya:

―Juani nchca cuayá' ti' na' cha' cua ngulo ycui' nu Xu'na na' cña ji'i̱ xca̱ bi' ji'i̱ Ni, cha' nu ñaa ngulo jna' ni'i̱ chcua̱ jua ―nacui̱ yu―. Ngua ti' Herodes xcube' jna', cha' xña'a̱ tsa ntsu'u tyiquee ngu' judío tya'a na' ña'a̱ ngu' jna'; pana ná ngua ji'i̱ cua'ni cña cuxi bi'.

12Ngulacua tsa ti' Pedro su ndu̱ ycui' ti yu. Nu lo'o ngua cuayá' ti' yu, li' ndyaa yu ca slo María xtya'a̱ Juan Marcos. Ca ni'i̱ bi' ndyu'u ti'i̱ tyu̱u̱ tya'a ñati̱ ji'i̱ Jesús, nchcui' ngu' lo'o ycui' Ndyosi. 13Ngujui'i̱ ya' yu toni'i̱, lo'o li' sca nu cuna'a̱ cuañi' nu naa Rode, bi' nu ndyaa na'a̱ toni'i̱. Ña'a̱ ndu̱ ti nu cuna'a̱ bi' toni'i̱ nde ni'i̱ ti. 14Hora ti ndyuloo nu cuna'a̱ bi' xtyi'i Pedro lo'o nchcui' yu. Chaa tsa ti' cho' li'. Ngusna cho' ndyaa chcui' lo'o tya'a ndi'i̱ cho' ni'i̱ bi', pana ña'a̱ ti tya ndu̱ ycui' Pedro nde liya' cha' bilya saala ngu' toni'i̱.

15―Cua ngua tonto hique nu'u̱ ―nacui̱ ngu' ji'i̱ Rode li'.

Pana lye la nchcui' nu cuna'a̱ bi' lo'o ngu' li', cha' chañi cha' Pedro laca nu ndu̱ toni'i̱ bi' nde liya'.

―Si'i ―nacui̱ ngu' li'―. ¿Ha si'i nu xca̱ ji'i̱ ycui' Ndyosi nu ña'a̱si̱i̱ ji'i̱ Pedro laca bi'? ―nacui̱ ngu' ji'i̱.

16Ña'a̱ ti tya ndu̱ Pedro nde liya' ntyiji'i̱ ya' yu toni'i̱. Li' ndyaa ngu' cha' saala ngu' toni'i̱. Lo'o na'a̱ ngu' ji'i̱ Pedro ndu̱, li' ndube tsa ti' ngu' cha' cua ndyalaa ycui' yu. 17Ngua'ni ya' yu ji'i̱ ngu' li', cha' ca ti̱ ti ngu'. Ndacha' yu ji'i̱ ngu' ñi'ya̱ ngua lo'o ngua'ni ycui' Ndyosi nu Xu'na na cha' tso'o cha' ngulo Ni ji'i̱ yu ne' chcua̱.

―Chcui' ma̱ lo'o Jacobo lo'o lcaa ngu' tya'a ndya'a̱ na ―nacui̱ Pedro ji'i̱ ngu'―, ta ma̱ cha' lo'o ngu' ñi'ya̱ nu ngua'ni ycui' Ni lo'o na' lo'o ngulo Ni 'na ne' chcua̱.

Ndu'u yu ni'i̱ ndyaa yu xa' se'i̱ li'.

18Nu lo'o nguxee chaca tsa̱ quiña'a̱ tsa ngulacua ti' sendaru bi', cha' nga'aa ngua cuayá' ti' ngu' macala ndyaa Pedro. 19Li' ngulo rey Herodes cña ji'i̱ sendaru cha' tsaa ngu' tsaana ngu' ji'i̱ yu. Ndyaa ngu' li', pana nga'aa nquije yu ji'i̱ sendaru bi'. Li' nchcuane Herodes ji'i̱ sendaru nu nga'a̱ cua̱ ji'i̱ Pedro ni'i̱ chcua̱, pana nga'a ndyiji ñi'ya̱ nu xacui̱ sendaru cha' ji'i̱ rey, cha' ná jlo ti' ngu' ñi'ya̱ ngua ji'i̱ Pedro; bi' cha' ngulo Herodes cña ji'i̱ xa' sendaru cha' cujuii ngu' ji'i̱ lcaa sendaru nu ngua'a̱ cua̱ ji'i̱ nu Pedro bi'. Li' ndu'u rey bi' loyuu su cuentya Judea, ndyaa ca quichi̱ Cesarea, cha' ca bi' tyi'i̱ xi ngua ti'.

Ngujuii Herodes

20Lo'o li' ngua ñasi̱' tsa nu Herodes bi' ji'i̱ ngu' quichi̱ Tiro, lo'o jua'a̱ ji'i̱ ngu' quichi̱ Sidón. Nu ngua tya clyo la cua nda rey Herodes na cacu ngu' quichi̱ bi', lo'o li' nga'aa nda rey na cacu ngu', cha' ñasi̱' tsa ti' rey ña'a̱ ji'i̱ ngu'. Stu'ba ti ntsu'u tyiquee lcaa ngu' quichi̱ bi' lo'o tya'a ngu', cha' tsaa ngu' slo rey cha' chcui' ngu' lo'o. Li' tso'o tsa nchcui' ngu' quichi̱ lo'o nu cusu' Blasto nu laca cña ji'i̱ rey bi'; bi' cha' tso'o nchcui' nu Blasto bi' lo'o rey cuentya ji'i̱ ngu' quichi̱ bi', cha' tyaala' cha' ji'i̱ rey lo'o ngu' bi'. 21Li' ngusta Herodes sca tsa̱ cha' tyu'u ti'i̱ ngu' sca se'i̱ ti. Ndyacu' Herodes lcaa late' tso'o nu ntsu'u ji'i̱ cha' laca rey, ndyaa ntucua lo yaca xlya tso'o su ntyucua ycui' rey, cha' ta sca cui̱i̱ lo'o ngu' nu lo'o ndyu'u ti'i̱ ngu' slo. Li' nguxana rey nda cui̱i̱ lo'o ngu' bi'. 22Cui̱i̱ tsaa ngusi'ya lo'o ngu' ji'i̱ rey li':

―Ndyosi laca nu'u̱ ―nacui̱ ngu' ji'i̱ rey―. Si'i sca ñati̱ chalyuu ti laca nu'u̱ nu nchcui' lo'o cuare juani.

23Hora ti ndyalaa sca xca̱ ji'i̱ ycui' Ndyosi slo rey cha' ta sca quicha tlyu ji'i̱ nu Herodes bi', ndyatí̱ conu' ne' rey bi' li'. Ti'í tsa ne' rey li', cha' ndyacu conu' bi' ne'. Ngujuii rey li', cha' cua nda chacuayá' ji'i̱ ngu' cha' ngua'ni tlyu ngu' ji'i̱ rey ñi'ya̱ nu ndu'ni tlyu na ji'i̱ ycui' Ndyosi; masi sca ñati̱ chalyuu ti ngua rey bi', pana nda chacuayá' cha' cua'ni tlyu ngu' ji'i̱.

24Li' quiña'a̱ tsa ñati̱ ndyuna cha' ji'i̱ ycui' nu Xu'na na, ndyatu̱ la ngu' nu ngusñi cha' ji'i̱ Jesucristo li'.

25Nu lo'o cua ndye cña ji'i̱ Bernabé lo'o Saulo ca quichi̱ Jerusalén, li' nguxtyu̱u̱ ngu' ñaa ngu' nde quichi̱ Antioquía chaca quiya'. Ñaa lo'o ngu' ji'i̱ Juan, la cui' nu naa Juan Marcos.

Currently Selected:

LOS HECHOS 12: cta

Highlight

Copy