LOS HECHOS 10
10
Nchcui' Pedro lo'o Cornelio
1Ndi'i̱ sca nu qui'yu nu naa Cornelio ca quichi̱ Cesarea; laca Cornelio capitán ji'i̱ sca latya ngu' sendaru nu nacui̱ ngu' cha' latya Italiano laca ngu'. 2Ndyu'ni tlyu nu Cornelio bi' ji'i̱ ycui' Ndyosi lo'o lcaa ngu' tya'a nga'a̱ ti yu, masi ngu' xa' tsu' laca yu. Tso'o tsa tyiquee yu, nxtyucua tsa yu ji'i̱ ngu' ti'i. Lcaa tsa̱ ntsu'u yu nchcui' yu lo'o ycui' Ndyosi. 3Lo'o li' ntsu'u sca tsa̱ ndyalaa sca xca̱ ji'i̱ ycui' Ndyosi slo yu bi', hora cua sna nde ngusi̱i̱ ndyalaa xca̱ bi'. Ñi'ya̱ ngua si nchcui' xcalá ti yu, jua'a̱ ngua cha' bi'. Li' nchcui' xca̱ bi' lo'o yu:
―Cornelio ―nacui̱ xca̱ ji'i̱ yu.
4Ndyutsi̱i̱ tsa Cornelio lo'o na'a̱ yu ji'i̱ xca̱ bi' li'.
―Xu'na ―nacui̱ yu―, ¿ñi'ya̱ cha' laca nti' nu'u̱ jna'?
―Cua ndyuna ycui' Ndyosi cha' nu cua nchcui' nu'u̱ lo'o Ni ―nacui̱ xca̱ bi'―. Lo'o jua'a̱ cua na'a̱ Ni cha' tso'o tsa ndu'ni nu'u̱ lo'o ngu' ti'i, bi' cha' cua ndyi'u ti' ycui' Ndyosi jinu'u̱. 5Juani culo nu'u̱ cña ji'i̱ ngu' cha' tsaa ngu' quichi̱ Jope. Quichi̱ bi' ndi'i̱ sca nu qui'yu nu naa Simón, lo'o xtañi yu laca Pedro. 6Cua ndyalaa yu toni'i̱ ji'i̱ chaca Simón nu laca cuityi quiji̱ nu ntucua tyi cacua ti to' tyujo'o. Ta nu Simón Pedro bi' sca cha' lo'o nu'u̱, ni cña ntsu'u cha' cua'ni nu'u̱.
7Ndu'u xca̱ ji'i̱ ycui' Ndyosi bi', ndyaa li'. Lo'o li' ngusi'ya Cornelio ji'i̱ tucua tya'a msu ji'i̱, lo'o ji'i̱ sca sendaru nu ndu'ni cña ji'i̱; lo'o sendaru bi' ndyu'ni tlyu yu ji'i̱ ycui' Ndyosi. 8Li' nchcui' Cornelio lo'o nu ca ta'a sna ngu' lcaa ña'a̱ cha' nu ngua ji'i̱ ycui' tsa̱; li' ngulo yu cña ji'i̱ ngu' cha' tsaa ngu' tsaqui'ya ngu' ji'i̱ Pedro ca quichi̱ Jope bi'.
9Nguxee chaca tsa̱ ndya'a̱ ngu' nde tyucui̱i̱ Jope. Lo'o ndyalaa nde hora, xi tya lyiji tyalaa ngu' quichi̱ bi'. La cui' hora bi' ndyacuí̱ Pedro ndyaa yu que ni'i̱ cha' chcui' yu lo'o ycui' Ndyosi. Jlyacua tsa que ni'i̱ bi'. 10Li' ntucua Pedro ntyute' tsa yu, jña tsa ti' yu cacu yu li'; na cua nguxana ndyique' ngu' scuaa, pana tya lyiji xi caque'. Lo'o li' ngua'ya xcalá yu, nchcui' xcalá yu ña'a̱ nu ntucua ti yu que ni'i̱ bi'. 11Laca cha' nxña'a̱ yu nde cua̱, na'a̱ yu ngusaala ycui' Ndyosi nde cua̱; ngutacui ñi'ya̱ nti' sca tasá tlyu tsa nu ndyaaca̱' ju̱u̱ ca ta'a jacua jyaca̱, lijya̱ ndati'i̱ tasá bi' lo yuu. Jua'a̱ ña'a̱ nti' yu. 12Tyu̱u̱ tsa tya'a na'ni cuxi ntsu'u ne' tasá nu ndati'i̱ nde lo yuu bi': ntsu'u na'ni nu ntucua quiya', ntsu'u na'ni lu'be, lo'o jua'a̱ ntsu'u cuaña. 13Li' ndyuna Pedro cha' nchcui' ycui' Ndyosi lo'o yu, ngua ti' yu:
―Pedro ―nacui̱ Ni ji'i̱ yu―, cujuii clya nu'u̱ ji'i̱ na'ni cua cha' cacu nu'u̱ ji'i̱.
14―Ná nchca jna', Xu'na ―nacui̱ Pedro ji'i̱―. Ni sca quiya' bilya cacu na' cuaña' na'ni jua; na'ni cuxi laca jua cuentya ji'i̱ cuare.
15Xa' nchcui' ycui' Ndyosi lo'o yu li':
―Ná tso'o ñacui̱ nu'u̱ cha' na'ni cuxi laca jua, si cua nacui̱ ycui' Ndyosi cha' lubii ni'.
16Sna quiya' nchcui' ycui' Ndyosi lo'o Pedro jua'a̱, li' ndyuco'o tasá bi' ndyaa nde cua̱ chaca quiya', ña'a̱ ndacui ti lo'o ju̱u̱. 17Laja lo'o ndube tsa ti' Pedro, cha' ná ngua cuayá' ti' yu ni cha' laca nchcui' xcalá jua'a̱, li' ndyalaa ngu' bi' to' ni'i̱; la cui' nu ca ta'a sna ngu' nu ngulo Cornelio cña ji'i̱ cha' ca̱a̱ ngu' laca ngu' bi'. Cua nchcuane ngu' ji'i̱ ngu' quichi̱ mala ntucua tyi Simón nu laca cuityi quiji̱, jua'a̱ ndyalaa ngu' to' ni'i̱. 18Li' cui̱i̱ ndacha' ngu' ji'i̱ nu laca tyi si nga'a̱ Simón Pedro. 19Laja li' quiña'a̱ tsa ngulacua ti' Pedro ni cha' nchcui' xcalá yu, lo'o li' nchcui' Xtyi'i ycui' Ndyosi lo'o yu:
―Cua ndyalaa sna tya'a ñati̱ nclyana ngu' jinu'u̱ ―nacui̱ Ni ji'i̱ Pedro ña'a̱ ntucua ti yu que ni'i̱―. 20Cua'ya nu'u̱ yala ti cha' tsaa nu'u̱ lo'o ngu' re. Ná cube ti' nu'u̱ cha' ji'i̱ ngu', na' ngulu̱ cña ji'i̱ ngu' cha' ca̱a̱ ngu' ca nde.
21Li' hora ti ngua'ya Pedro cha' chcui' lo'o ngu' bi'.
―La cui' na' laca̱ nu ndya'a̱ ma̱ nclyana ma̱ ―nacui̱ Pedro ji'i̱ ngu'―. ¿Ni cña cua'ni ta na' ji'i̱ ma̱ nti' ma̱?
22―Cua ngulo nu cusu' Cornelio cña ji'i̱ ya cha' ca̱a̱ ya ca nde ―nacui̱ ngu' ji'i̱ Pedro―. Tso'o tsa tyiquee nu Cornelio bi', ndu'ni tlyu yu ji'i̱ ycui' Ndyosi, lo'o jua'a̱ tso'o tsa nchcui' lcaa ngu' judío tya'a nu'u̱ ji'i̱ nu cusu' bi'. Cua ndacha' xca̱ ji'i̱ ycui' Ndyosi ji'i̱ Cornelio cha' ta yu ji'i̱ ya ca̱a̱ ya ca nde, ca̱qui'ya ya jinu'u̱ cha' tsaa na ca slo nu cusu' bi', ca quichi̱ Cesarea. Ntsu'u cha' cuna ycui' Cornelio cua ña'a̱ ca cha' nu chcui' nu'u̱ lo'o.
23―Tya̱a̱ ma̱ ni'i̱ ―nacui̱ Pedro ji'i̱ ngu'―. Ntsu'u su caja' ma̱ ca nde. Ca la quee tsaa na cajua.
Nguxee chaca tsa̱, li' ndu'u ngu' quichi̱ Jope ndyaa ngu', ndyaa ngu' lo'o tucua sna tya'a ñati̱ ji'i̱ Jesucristo nu ca tyi quichi̱ bi'.
24Tsa̱ nchca tyucuaa ndyalaa ngu' quichi̱ Cesarea. Nga'a̱ Cornelio ntajatya ji'i̱ ngu'; cua laca ndyu'u ti'i̱ ngu' toni'i̱ ji'i̱, lcaa ñati̱ tya'a nu cusu' lo'o tya'a ndya'a̱ ti ngu'. 25Nu lo'o ndyalaa Pedro to' tyi Cornelio, li' ndu'u nu cusu' ñaa nde liya', ndyatu̱ sti̱' nde loo Pedro cha' cua'ni tlyu ji'i̱ yu ngua ti' Cornelio, ñi'ya̱ ndu'ni tlyu na ji'i̱ ycui' Ndyosi. 26Hora ti ndaya' Pedro ya' Cornelio, nguxatu̱ yu ji'i̱ nu cusu' bi' li'.
―Tyatu̱ nu'u̱, cusu' ―nacui̱ Pedro ji'i̱―, tyucuaa na laca na ñati̱ chalyuu ti.
27Tya nchcui' la Pedro lo'o ngu' lo'o ndyatí̱ ngu' ndyaa ngu' ni'i̱. Li' na'a̱ Pedro cha' cua quiña'a̱ ñati̱ ndyu'u ti'i̱ ni'i̱ bi'. 28Nda Pedro cha' lo'o ngu' bi' li':
―Jlo ti' ma̱ cha' ná ntsu'u chacuayá' ji'i̱ cua nu laca ya ngu' judío, cha' tyu'u ti'i̱ ya lo'o cu'ma̱ ngu' xa' tsu' ―nacui̱ Pedro ji'i̱ ngu'―. Ná ntsu'u chacuayá' tyatí̱ ya ni'i̱ ji'i̱ ngu' xa' tsu' ―nacui̱―. Pana cua ngulu'u ycui' Ndyosi jna' cha' ná tso'o chcui' na' ji'i̱ xa' ñati̱ cha' ñati̱ cuxi laca ngu', cha' si'i ñati̱ lubii laca ngu', masi ngu' xa' tsu' laca ngu'. 29Bi' cha' lijya̱ na' ca nde juani. Nu lo'o ndyalaa ti msu jinu'u̱ ca slo na', hora ti ndu'u na' lijya̱ na' lo'o ngu' re; nga'aa nchcui' tsa na' lo'o msu bi'. Bi' cha' juani, ¿ni cña cua'ni ta na' ji'i̱ cu'ma̱ nti' ma̱?
30Nguxacui̱ Cornelio cha' ji'i̱ Pedro li':
―Cua ngua jacua tsa̱ nchcui' na' lo'o ycui' Ndyosi su nga'a̱ na' ni'i̱ re ―nacui̱ ji'i̱ Pedro―, lo'o hora ti ndyalaa sca ñati̱ slo na' nu lacu' late' ngati̱, hasta ntyiji'i̱ xee ndubi lo late' bi'. Hora cua sna nde ngusi̱i̱ ndyalaa yu bi', nu lo'o bilya cacu na' li'. 31Nchcui' yu bi' lo'o na': “Cornelio”, nacui̱ yu, “cua ndyuna ycui' Ndyosi cha' nu nchcui' nu'u̱ lo'o Ni, jua'a̱ cua na'a̱ ycui' Ni cha' tso'o tsa ndu'ni nu'u̱ lo'o ngu' ti'i; bi' cha' cua ndyi'u ti' ycui' Ndyosi jinu'u̱. 32Juani culo nu'u̱ cña ji'i̱ ngu' cha' tsaa ngu' quichi̱ Jope; quichi̱ bi' ndyalaa sca nu qui'yu nu naa Simón, lo'o xtañi yu laca Pedro. Tsaa ngu', tsaa cacha' ngu' ji'i̱ yu cha' ca̱a̱ yu ca nde. Cua ndi'i̱ yu to' tyi chaca Simón nu laca cuityi quiji̱ nu ntucua tyi cacua ti to' tyujo'o. Nu lo'o tyalaa yu ca nde, li' culu'u yu sca cha' nu tso'o tsa jinu'u̱.” 33Jua'a̱ nacui̱ ñati̱ bi' jna' ―nacui̱ Cornelio―. Bi' cha' hora ti ngulo na' cña ji'i̱ ngu' cha' tsaa ngu' ca su ndi'i̱ nu'u̱. Tso'o tsa ntsu'u tyiquee na' cha' ndyalaa nu'u̱ slo na' juani; bi' cha' cua ndyu'u ti'i̱ lcaa tya'a ya se'i̱ ti chacuayá' ji'i̱ ycui' Ndyosi, cha' cuna ya lcaa cha' nu cua nda ycui' Ni lo'o nu'u̱ cha' chcui' lo'o ya.
Cha' nu nchcui' Pedro lo'o ngu' slo Cornelio
34Li' nguxana Pedro ngulu'u yu ji'i̱ ngu' bi':
―Juani cua ngua cuayá' ti' na' cha' stu'ba tsa ndu'ni ycui' Ndyosi lo'o lcaa ñati̱ chalyuu ―nacui̱―. 35Tso'o tsa ntsu'u tyiquee ycui' Ndyosi ña'a̱ Ni ji'i̱ lcaa ñati̱ chalyuu nu chañi cha' ndu'ni tlyu ngu' ji'i̱ ycui' Ni, ñati̱ nu ndu'ni lcaa ña'a̱ cha' nu nti' Ni. 36Cua nda ycui' Ndyosi cha' lo'o ya nu laca ya ngu' Israel, cha' ti̱ ti tyi'i̱ cresiya ji'i̱ ñati̱ chalyuu xqui'ya Jesucristo, nu laca Xu'na lcaa ñati̱. 37Jlo tso'o ti' ma̱ ña'a̱ cha' nu nteje tacui tya tsubi' la loyuu re, su ca tyi ngu' judío. Clyo nda Juan cha' bi' lo'o ngu' nu lo'o ntyucuatya ji'i̱ ngu', li' nda Jesús cha' bi' lo'o ngu' ca loyuu su cuentya Galilea. Tiya' la li' nda Jesús cha' bi' lo'o lcaa ngu' tya'a ngu' Israel. 38Jlo ti' ma̱ ñi'ya̱ nguti'i̱ Jesús chalyuu, la cui' Jesús Nazaret. Cua ngusubi ycui' Ndyosi Sti yu ji'i̱ Jesús, nda la Ni juersa ji'i̱ nu Jesús bi' nu lo'o ndyalaa Xtyi'i ycui' Ni lo yu. Lcaa su nguta'a̱ yu ngua'ni yu cha' tso'o lo'o ñati̱, lo'o jua'a̱ ngua'ni yu cha' ndyaca tso'o ngu' nu quicha tsa, masi ñati̱ nu ntsu'u tsa cha' ti'í ji'i̱ xqui'ya cha' ngusñi cui'i̱ cuxi ji'i̱ ngu'. Ngua'ni Jesús cña jua'a̱, cha' nguxtyucua ycui' Ndyosi ji'i̱ yu. 39Cua na'a̱ ya lcaa cña nu ngua'ni Jesús ca quichi̱ Jerusalén, lo'o jua'a̱ cña nu ngua'ni yu lcaa quichi̱ tyi ngu' judío tya'a ya. Na cua nguta'a̱ ya lo'o yu, bi' cha' chañi cha' nu nchcui' ya lo'o ma̱. Li' ntejeya' ngu' ji'i̱ Jesús, ngujui'i̱ ca'a̱ ngu' ji'i̱ yu lo crusi; jua'a̱ ngujuii yu li'. 40Pana nu lo'o ndya'a sna tsa̱, li' ngua'ni ycui' Ndyosi cha' ndyu'ú Jesús chaca quiya'. 41Li' ndu'u tucua yu nde su ndi'i̱ ya; ná na'a̱ lcaa ngu' quichi̱ bi' ji'i̱ yu, cua laca ti ñati̱ tya'a ya na'a̱ ya ji'i̱ yu. Cua ngusubi ycui' Ndyosi ji'i̱ ya cha' culu'u ya cha' ji'i̱ ycui' Ni ji'i̱ xa' ñati̱, bi' cha' cua na'a̱ ya ji'i̱ Jesús lo'o ndyu'ú yu chaca quiya'. Stu'ba ti ndyacu ya lo'o ycui' yu li'. 42Tya li' cua ngulo Jesús cña ji'i̱ ya cha' ta ya cha' liñi ji'i̱ ycui' lo'o ñati̱, cha' cua nda ycui' Ndyosi cña ji'i̱ nu Jesús bi', cha' cua'ni cuayá' yu ji'i̱ lcaa ñati̱ chalyuu, masi nu cua ngujuii, masi nu tya lu'ú. 43Na cua nguscua jyo'o cusu' xi cha' lo quityi ji'i̱ ycui' Ndyosi nu ngua sa'ni; lcaa quityi bi' nchcui' cha' ntsu'u cha' ca̱a̱ sca ñati̱ tlyu lo yuu chalyuu tyempo nde loo la; bi' laca nu cuityi̱ yabe' nu ntsu'u ji'i̱ lcaa ñati̱, si xñi ngu' cha' ji'i̱ yu, nacui̱ cha' nu nscua lo quityi bi'. Na cua ndyalaa yu bi' lo yuu re juani, Jesús naa yu.
Ndyanu Xtyi'i ycui' Ndyosi ne' cresiya ji'i̱ ngu' xa' tsu'
44Tya ndu̱ Pedro nchcui' lo'o ngu' bi', lo'o li' ndyalaa Xtyi'i ycui' Ndyosi ne' cresiya ji'i̱ lcaa ñati̱ nu ndyuna cha' nu nclyu'u Pedro ji'i̱ ngu'. 45Ndube tsa ti' ñati̱ ji'i̱ Jesucristo tya'a ndya'a̱ Pedro. Ngu' judío laca ngu' bi', bi' cha' ndube tsa ti' ngu' cha' lo'o ngu' xa' tsu', cua nda ycui' Ndyosi Xtyi'i ycui' Ni cha' tyanu ne' cresiya ji'i̱ ngu'. 46Li' jlo ti' nu ngu' judío bi', cha' chañi cha' cua nda ycui' Ndyosi Xtyi'i ycui' Ni ji'i̱ Cornelio lo'o ji'i̱ tya'a yu, nu lo'o ndyuna ngu' cha' nchcui' ngu' bi' cha'cña ji'i̱ ngu' xa' quichi̱, masi bilya chcui' ngu' jua'a̱ nquicha'. Lo'o jua'a̱ lye tsa ngua'ni tlyu ngu' bi' ji'i̱ ycui' Ndyosi. Li' nchcui' Pedro lo'o tya'a ndya'a̱ yu:
47―Ñi'ya̱ nu lo'o ndyanu Xtyi'i ycui' Ndyosi ne' cresiya ji'na, la cui' jua'a̱ cua ndyanu Xtyi'i ycui' Ndyosi ne' cresiya ji'i̱ ngu' re juani ―nacui̱ Pedro ji'i̱ tya'a ndya'a̱ yu―, bi' cha' tso'o la si tyucuatya na ji'i̱ ngu' re.
48Li' nchcui' ngu' bi' lo'o ñati̱ tya'a Cornelio bi':
―Tso'o la si tyucuatya ya ji'i̱ ma̱ juani, cha' ca cuayá' ti' ngu' quichi̱ re cha' ñati̱ ji'i̱ Jesucristo laca ma̱.
Lo'o li' xa' nchcui' nu ngu' ca tyi lo'o Pedro cha' tyanu yu la xi lo'o ngu' bi'.
Currently Selected:
LOS HECHOS 10: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.
