LOS HECHOS 9

Nguxcutsa'a̱ ycui' Ndyosi cresiya ji'i̱ Saulo

1Ña'a̱ ti ñasi̱' tsa Saulo ji'i̱ lcaa ngu' nu ngusñi cha' ji'i̱ ycui' nu Xu'na na. Nti' tsa Saulo xcube' yu ji'i̱ ngu' bi', ña'a̱ cuayá' nu cujuii yu ji'i̱ ngu' nti' yu; bi' cha' ndyaa yu ca slo xu'na sti jo'ó ji'i̱ ngu' judío, 2cha' nti' yu culo yu quityi chacuayá' ji'i̱ cha' tsaa sca̱' yu ji'i̱ ngu' nu ngusñi cha' ji'i̱ Jesucristo. Nti' yu tsaa yu quichi̱ Damasco cha' culu'u yu quityi chacuayá' bi' ji'i̱ ngu' nu laca loo ne' laa bi', nu laa ji'i̱ ngu' judío bi'. Li' nti' Saulo sca̱' ji'i̱ ñati̱ ji'i̱ Jesucristo quichi̱ bi', cha' xtyu̱u̱ yu tya̱a̱ lo'o yu ji'i̱ ngu' nde Jerusalén; masi ngu' qui'yu, masi ngu' cuna'a̱, lcua ti ña'a̱ ñati̱ bi' tejeya' yu ji'i̱ ngu', nti' yu. 3Ngusñi yu tyucui̱i̱ ndyaa yu ca quichi̱ Damasco bi' li'. Cua tyalaa ti yu quichi̱ bi', li' tsi tsiya' ca ngua'a̱ sca xee tlyu ji'i̱ ycui' Ndyosi slo yu; lcaa su ndu̱ Saulo ntyiji'i̱ xee bi' lo yuu. 4Nclyú yu lo yuu lo'o ndyuna yu cha' nu nda ycui' Ndyosi lo'o yu:

―Saulo, Saulo ―nacui̱ Ni―, ¿ni cha' laca lye tsa nxu̱u̱ tya'a nu'u̱ lo'o na'?

5―¿Tilaca laca nu'u̱, Cusu'? ―nacui̱ Saulo.

―Jesús laca na' ―nacui̱ Ni―. Na nxu̱u̱ tya'a nu'u̱ lo'o na' laca ―nacui̱ Ni―. La cui' ca nu'u̱ ndu'ni cha' quicha ti' ycui' nu'u̱. Ñi'ya̱ nu ndu'ni sca toro, jua'a̱ ndu'ni nu'u̱; na ntyiji'i̱ quiya' toro la cui' se'i̱ su ndatu̱ ngu' yaca cha siyu' ni', lo'o jua'a̱ nu'u̱, ndu'ni ñu'u̱ ji'i̱ ycui' ca ti nu'u̱.

6Lye tsa nchcua̱ Saulo cha' ndyutsi̱i̱ yu li'.

―¿Ñi'ya̱ nu nti' nu'u̱ cha' cua'ni na', Xu'na? ―nacui̱ Saulo li'.

―Tyatu̱ nu'u̱ ni ―nacui̱ Jesús ji'i̱― cha' tye tyalaa ca quichi̱ Damasco jua. Ca ndacua ndi'i̱ sca ñati̱ nu culu'u jinu'u̱ ñi'ya̱ caca cña nu cua'ni nu'u̱ cuentya jna'.

7Ndyutsi̱i̱ tsa ngu' tya'a ndya'a̱ Saulo, nga'aa ngua chcui' ngu' li'; cua ndyuna ngu' cha' nchcui' ycui' Ndyosi lo'o Saulo, masi ná na'a̱ ngu' ji'i̱ Ni, tilaca laca nu cua nchcui'. 8Li' ndatu̱ Saulo, ngusaala yu cloo yu; pana nga'aa ngua ña'a̱ yu, ngua talya loo yu tsiya' ti. Li' ntejeya' chaca ñati̱ ya' yu cha' nga'aa ngua ña'a̱ yu, ndyaa lo'o ngu' ji'i̱ yu nde quichi̱ Damasco. 9Sna tsa̱ ndyanu yu sca ni'i̱ ti; ná sca na ndyacu yu chu̱' sna tsa̱, ni xixi ca na, ná ndyo'o yu, lo'o xcui' talya ña'a̱ xee cloo yu.

10La cui' quichi̱ Damasco ndi'i̱ sca nu qui'yu nu naa Ananías, nu ngusñi cha' ji'i̱ Jesucristo. Ñi'ya̱ laca lo'o nchcui' xcalá na, jua'a̱ nchcui' ycui' nu Xu'na na lo'o Ananías bi'.

―Ananías ―nacui̱ Ni.

―Nde ti nga'a̱ na', Xu'na ―nacui̱ Ananías.

11―Yaa nu'u̱ toni'i̱ ji'i̱ Judas nu ntucua to' calle liñi bi' ―nacui̱ nu Xu'na na―, yaa xcuane nu'u̱ ji'i̱ ngu' bi' si ndi'i̱ Saulo nu ca tyi quichi̱ Tarso ndacua. Nta̱' cha' tsaa nu'u̱ ca slo yu bi', xqui'ya cha' nga'a̱ yu nchcui' yu lo'o ycui' Ndyosi Sti na' juani. 12La cui' jua'a̱ cua ngua'ni Ni cha' nchcui' xcalá yu; laja xcalá yu na'a̱ yu jinu'u̱ cha' ndyaa nu'u̱ slo yu cha' cua'ni nu'u̱ jo'o ji'i̱ cloo yu, cha' sta ya' nu'u̱ lo yu cha' tyaca tso'o cloo yu chaca quiya'.

13―Xu'na ―nacui̱ Ananías―, tyu̱u̱ quiya' cua ndañi cha' nu nchcui' ngu' ji'i̱ nu Saulo bi', cha' tyaala tsa yu ji'i̱ ñati̱ jinu'u̱ nu ndi'i̱ nde quichi̱ Jerusalén. 14Lo'o juani cua ndyalaa yu quichi̱ re, ndyi'ya lo'o yu ji'i̱ quityi chacuayá' ji'i̱ xu'na sti jo'ó cha' sca̱' ji'i̱ cua, lcaa ngu' tya'a ya nu ngusñi ya cha' ji'i̱ ycui' nu'u̱.

15Nguxacui̱ ycui' nu Xu'na na cha' ji'i̱ Ananías li':

―Ntsu'u cha' tsaa nu'u̱ ca slo nu Saulo bi' ―nacui̱ Ni ji'i̱―. Cua ngusubi na' ji'i̱ yu cha' cua'ni yu cña jna' ―nacui̱ Ni―. Tsaa yu bi' ca slo ngu' xa' loyuu, tsaa yu ca slo nu laca xu'na loyuu tyijyu', lo'o jua'a̱ tsaa yu ca slo tya'a ma̱, nu ngu' Israel bi'. Ta yu cha' jna' lo'o lcaa ñati̱ ca su tya'a̱ yu, bi' laca cña jna' nu cua'ni yu. 16Culu'u na' ji'i̱ yu ñi'ya̱ cha' ti'í nu tyacua ji'i̱ yu lo'o ta yu cha' jna' lo'o ñati̱.

17Li' ndyaa Ananías slo Saulo ca to' tyi Judas bi'. Ndyatí̱ Ananías ni'i̱, ngusta ya' yu lo Saulo, nchcui' yu lo'o nu Saulo bi' li':

―Saulo, tya'a na' ―nacui̱ yu―. La cui' Jesucristo nu laca Xu'na na cua ngulu'uloo Ni jinu'u̱ tyucui̱i̱ su lijya̱ nu'u̱ ca quichi̱ re. Lo'o nu juani cua ngulo nu Xu'na na cña 'na cha' ca̱a̱ na' slo nu'u̱ cha' cua'ni na' jo'o ji'i̱ cloo nu'u̱, cha' caca ña'a̱ nu'u̱ chaca quiya'; bi' cha' lijya̱ na' slo nu'u̱ juani, xqui'ya cha' nti' Xtyi'i ycui' Ndyosi tyanu ne' cresiya jinu'u̱.

18Nu lo'o ndyaala cloo Saulo, ngua ti' yu cha' ngutu'u sca na cloo yu, ñi'ya̱ si laca sa yu'be quiji̱. Hora ti ngua tso'o cloo yu li', ña'a̱ tso'o yu chaca quiya'. Li' ntyucuatya Ananías ji'i̱ yu. 19Lo'o li' ndyacu Saulo cha' quije juersa ji'i̱ yu chaca quiya', cha' ñi'ya̱ ngua yu tya tsubi' la, jua'a̱ ndyaca yu chaca quiya'. Li' stu'ba nguti'i̱ yu xi lo'o ñati̱ ji'i̱ Jesucristo ca quichi̱ Damasco bi'.

Nchcui' Saulo cha' ji'i̱ Jesucristo lo'o ngu' quichi̱ Damasco

20Hora ti nguxana Saulo ndya'a̱ yu lcaa ne' laa ji'i̱ ngu' judío quichi̱ bi', ngulu'u yu ji'i̱ ngu' cha' chañi cha' laca Jesús nu sca ti Sñi' ycui' Ndyosi. 21Quiña'a̱ tsaa ngulacua ti' ngu' lo'o ndyuna ngu' cha' bi'.

―¿Ha si'i Saulo jua laca nu lye tsa nchcube' ji'i̱ ñati̱ ji'i̱ Jesucristo ca quichi̱ Jerusalén? ―nacui̱ ngu' ji'i̱ tya'a ngu'―. ¿Ha si'i nu jua laca nu ndyalaa nde quichi̱ re cha' sca̱' ji'i̱ ñati̱ bi', cha' caca cuayá' ji'i̱ ngu' ca slo xu'na sti jo'ó?

22Lye la ngulu'u Saulo ji'i̱ ngu' cha' chañi cha' Cristo laca ycui' Jesús, la cui' nu cua nda ycui' Ndyosi ji'i̱ ya̱a̱ chalyuu. Nga'aa ngujui la ñi'ya̱ nu xacui̱ ngu' cha' ji'i̱ nu Saulo bi' li', lcaa tya'a ngu' judío nu ndi'i̱ quichi̱ Damasco bi'.

Ngulaá Saulo ji'i̱ ngu' judío

23Cua nteje tacui tyu̱u̱ tsa̱, li' nguane ngu' judío ji'i̱ tya'a ngu' cha' cujuii ngu' ji'i̱ Saulo. 24Pana ngua tii Saulo cha' cua nti' ngu' cujuii ngu' ji'i̱. Ca to' quichi̱ bi' ntsu'u sca lo'o tlyu, xcui' quee laca lo'o bi'; cua̱ tsa lo'o bi', lo'o jua'a̱ lcaa to' lo'o bi' nga'a̱ ngu' cua̱ cha' xñi ngu' ji'i̱ Saulo. Ntsu'u ngu' cua̱ to' lo'o tsa̱ talya. 25Ngua sca talya, li' ndyalaa xi tya'a ñati̱ ji'i̱ Jesucristo; ndyacuí̱ ngu' que lo'o bi', cha' culo ngu' ji'i̱ Saulo ne' lo'o. Li' ndyatí̱ Saulo ne' sca chcubi tlyu, lo'o li' nda'ya ngu' ji'i̱ Saulo, ngua'ya yu chaca chu̱' lo'o lo'o reta; ndu'u yu ne' chcubi li', ngusñi yu tyucui̱i̱ ndyaa yu.

Ndyalaa Saulo ca Jerusalén

26Ndyalaa Saulo ca quichi̱ Jerusalén li', ndyalaa yu slo ñati̱ ji'i̱ Jesucristo ca quichi̱ bi'. Pana ndyutsi̱i̱ ngu' bi' ji'i̱ Saulo, cha' ná jlya ti' ngu' cha' chañi cha' cua ngusñi yu cha' ji'i̱ Jesús. 27Li' ndyaa lo'o Bernabé ji'i̱ yu slo ngu' nu ngua tsa'a̱ ji'i̱ Jesucristo tya clyo, cha' chcui' yu lo'o ngu':

―Cua na'a̱ Saulo re ji'i̱ ycui' nu Xu'na na ―nacui̱ Bernabé ji'i̱ ngu'―. Cua na'a̱ yu ji'i̱ ycui' Jesús nu lo'o ndya'a̱ yu nde quichi̱ Damasco, nchcui' Ni lo'o yu li' ―nacui̱―. Lo'o jua'a̱ ná ndyutsi̱i̱ Saulo li', ngulu'u yu cha' ji'i̱ Jesucristo ji'i̱ ngu' quichi̱ bi'.

28Li' jlya tso'o ti' ngu' cha' nu nchcui' Bernabé ji'i̱ Saulo, bi' cha' ndyanu Saulo lo'o ngu' quichi̱ Jerusalén cha' tya'a ndya'a̱ ngu' cña laca yu. 29Lo'o jua'a̱ ná ndyutsi̱i̱ yu, nda yu cha' ji'i̱ ycui' Jesús lo'o ngu' quichi̱ bi'. Pana ndi'i̱ xi ngu' judío nu nchcui' cha' griego, nchcui' ngu' bi' lo'o Saulo li'; lye tsa nxu̱u̱ tya'a ngu' lo'o yu li', hasta ngua ti' ngu' bi' cujuii ngu' ji'i̱ yu. 30Ngua tii nu ngu' tya'a ndya'a̱ lo'o Saulo cha' nti' ngu' bi' cujuii ngu' ji'i̱ yu, bi' cha' ngutu'u ngu' ndyaa lo'o ngu' ji'i̱ yu nde quichi̱ Cesarea. Nchcui' ngu' lo'o Saulo li', cha' tso'o la si tyaa yu ca quichi̱ Tarso.

31Li' ndyaa ti'i̱ ti̱ ñati̱ ji'i̱ Jesucristo, masi ca loyuu Judea, masi ca loyuu Galilea, masi ca loyuu Samaria; lcaa tsa̱ ndyaca tsa'a̱ la ngu' cha' ji'i̱ Jesucristo. Ndyu'ni tlyu ngu' ji'i̱ Jesús, lo'o jua'a̱ ndyu'ni ngu' lcaa cña nu nti' ycui' Ndyosi nu Xu'na na cha' cua'ni ngu'. Xtyi'i ycui' Ndyosi nda juersa ji'i̱ ngu' bi', lo'o jua'a̱ ndyatu̱ la ngu' nu ngusñi cha' ji'i̱ Jesús li'.

Ngua'ni Pedro jo'o ji'i̱ Eneas

32Lo'o nu Pedro bi' ni, ndya'a̱ Pedro slo lcaa ngu' nu ntsu'u cha' ji'i̱ lo'o Jesucristo, lcua ti quichi̱ su ndi'i̱ ngu' bi'. Li' ndyalaa yu ca su ndi'i̱ ñati̱ ji'i̱ Jesucristo bi' ca quichi̱ Lida. 33Lo'o jua'a̱ ndi'i̱ sca nu qui'yu quicha nu naa Eneas quichi̱ bi'; cua nchcu̱' tyucuí̱ yu, cua snu' yija̱ ntsiya yu lo qui'ña li'. 34Li' nchcui' Pedro lo'o yu quicha bi':

―Eneas ―nacui̱― cua ngua'ni Jesucristo cha' ndyaca tso'o nu'u̱ juani ―nacui̱―. Bi' cha' tyatu̱ nu'u̱, xcua tso'o late' lo qui'ña cua.

Hora ti ndatu̱ Eneas li'. 35Lcaa ñati̱ na'a̱ ngu' ji'i̱ nu Eneas bi', cha' ndyaca tso'o yu; na'a̱ ngu' tya'a quichi̱ tyi yu, lo'o jua'a̱ ngu' quichi̱ Sarón na'a̱ ngu' ji'i̱ yu. Li' ngusñi ngu' cha' ji'i̱ ycui' Jesús nu Xu'na na, ngulochu̱' ngu' ji'i̱ cha' cuxi nu ntsu'u ne' cresiya ji'i̱ ngu'.

Ndyu'ú Dorcas chaca quiya'

36Cua ndi'i̱ sca nu cuna'a̱ nu naa Tabita nde quichi̱ Jope, jua'a̱ ñati̱ ji'i̱ Jesucristo laca ma' bi'. Dorcas nchcui' ngu' cha'cña ji'i̱ ngu' griego ji'i̱ ma'. Tso'o tsa tyiquee nu cuna'a̱ bi', tso'o tsa nxtyucua ma' ji'i̱ lcaa ngu' ti'i. 37Pana la cui' tyempo nu lo'o ndi'i̱ Pedro quichi̱ Lida, ngusñi sca quicha ji'i̱ ma', ngujuii ma' li'. Nu lo'o cua nguxcaata ngu' ji'i̱ jyo'o, li' ndyaa lo'o ngu' ji'i̱ ngusta ngu' ji'i̱ ca chaca ba'a ni'i̱ bi' nde cua̱. 38Cua ngujui cha' ji'i̱ ngu' cha' ndi'i̱ Pedro quichi̱ Lida, bi' cha' nguane nu ñati̱ ji'i̱ Jesucristo ji'i̱ tucua tya'a ñati̱ ji'i̱ cha' tsaa ngu' cuane ngu' ji'i̱ Pedro cha' ca̱a̱ yu hora ti, cha' cacua ti quichi̱ Jope ndi'i̱ quichi̱ Lida bi'. Ngulaa ngu' slo Pedro li', nchcui' ngu' lo'o yu:

―Cua'ni cha' tso'o ca̱a̱ nu'u̱ nde quichi̱ Jope lo'o ya hora ti ―nacui̱ ngu' ji'i̱ nu Pedro bi' li'.

39Hora ti ndu'u Pedro lijya̱ lo'o ngu' li'. Nu lo'o ndyalaa ngu' ca toni'i̱, ngulu'u ngu' ji'i̱ Pedro macala su nscua jyo'o bi'. Ndi'i̱ lcaa nu cuna'a̱ ti'i ca slo, nxi'ya tsa ngu' ndi'i̱ ngu' cha' cua ngujuii. Nda ngu' cha' lo'o Pedro cha' quiña'a̱ tsa cha' tso'o ngua'ni nu jyo'o bi' lo'o ngu', jua'a̱ ngulu'u ngu' ji'i̱ yu lcaa late' nu cua ngujyacua̱ nu jyo'o bi' cha' ta xlya'be ti ji'i̱ ngu'. 40Nchcui' Pedro lo'o ngu' li':

―Tyu'u ma̱ xi nde liya' ―nacui̱ yu ji'i̱ ngu'.

Nu lo'o ndye ndu'u ngu' nde liya', li' ndyatu̱ sti̱' Pedro nchcui' yu lo'o ycui' Ndyosi. Nu lo'o ndye nchcui' yu lo'o ycui' Ndyosi, li' ndyaa yu nde su nscua jyo'o bi', nchcui' yu lo'o jyo'o bi' li':

―Tabita ―nacui̱ yu―, tyatu̱ nu'u̱ juani.

Lo'o li' tsa tsiya' ca nguxuti'i̱ Tabita bi' cloo; li' nguxña'a̱ ji'i̱ Pedro, hora ti ndaca'a̱ li'. 41Ngusñi Pedro ya' ma', nguxatu̱ yu ji'i̱ ma'; li' ngusi'ya yu ji'i̱ ngu' nu ndi'i̱ nde liya'. Hora ti ñaa nu ñati̱ ji'i̱ Jesucristo bi' nde ni'i̱ lo'o lcaa nu cuna'a̱ ti'i bi', na'a̱ ngu' ji'i̱ Tabita cha' cua ndyu'ú ma' chaca quiya'. 42Lcaa ngu' quichi̱ Jope ni, nu lo'o ndyuna ngu' ñi'ya̱ ngua cha' ji'i̱ nu cuna'a̱ bi', ndube tsa ti' ngu' li'; quiña'a̱ tsa ngu' bi' ngusñi ngu' cha' ji'i̱ ycui' Jesús nu Xu'na na li'. 43Ndyanu Pedro tyu̱u̱ tsa̱ quichi̱ Jope bi' li'; to' tyi Simón nu cuityi quiji̱, ca bi' ndyanu yu.

Currently Selected:

LOS HECHOS 9: cta

Highlight

Copy