1 Corintios 13

Xel-la zri'i lazre' li

1Che dxuchálaja' dizra' chee̱ benne', ne chee̱ gubáz chee̱ xabáa ca', san quebe napa' xel-la zri'i lazre' li, quebe nácadxa' ca tu xide da dxenné̱ na, u ca tu xia da dxenné̱ na. 2Che dxuchálaja' waláz chee̱ Dios, ne che nezda' xúgute̱ da zaj nagache, ne dxéajni'ida' xúgute̱ da dxelaca, ne napa' xel-la dxeajlí lazre' chee̱ séqueda' gucuasa' xi'a ca', san che quebe napa' xel-la zri'i lazre' li, quebe nu nácaqueza'. 3Che quísia' xúgute̱ da de̱ chia', ne che guzúa' be̱la' dxen chia' chee̱ chezxe na, san che quebe napa' xel-la zri'i lazre' li, quebe bi da ba neza naca na chia'.

4Bénnea' nape̱' xel-la zri'i lazre' li:

Naque̱' zren lazre'.

Naque̱' zri'i lazre', ne quebe naque̱' xa lazre'.

Quebe dxucá'ana szren cuine̱', ne quebe dxuzé̱cu'e̱.

5Quebe dxune̱' da cale̱la,

ne quebe naque̱' zre'e lazre'.

Quebe dxezre̱'e̱, ne quebe dxu'u lazre̱'.

6Quebe dxebene̱' gate nu benne' dxeajcházie̱' lu dul-la,

san dxebene̱' lu da li.

7Dxuchaga lawe̱' xúgute̱ da dxaca nen dute̱ xel-la dxeajlí lazre' chee̱',

ne dute̱ xel-la dxebeza lazre' chee̱',

ne dute̱ xel-la zren lazre' chee̱'.

8Xel-la zri'i lazre' li quebe te chee̱ na. Wazrín zra gate québedxa chínedxu nu benne' guchálajle̱ne̱' dxi'u waláz chee̱ Dios, ne benne' dxéajni'ine̱' xúgute̱. 9Na'a dxéajni'idxu látedauze, ne látedauze dxuchálajdxu waláz chee̱ Dios. 10Zrin zra gate na' chéajni'idxu dute̱ ca naca, na' te chee̱ da na' naca na látedauze.

11Gate ne naca' bidau' bchálaja' ca bidau', ne gulaba lazra' ca bidau', ne bchi'a ca bidau', san gate guca' benne' waca, bzua' chalá'ala da zaj naca chee̱ bidau'. 12Cá'anqueze na'a quebe dxelé'edxu cáte̱queze, ne da dxelé'edxu ze̱ zrul-la, san lu zra na' lé'edxu cáte̱queze. Na'a látedauze núnbe'a, san lu zra na' gúnbe'a cáte̱queze ca dxun Dios, núnbe'tequeze̱' neda'. 13Ca' naca na, xel-la dxeajlí lazre', ne xel-la dxebeza lazre', ne xel-la zri'i lazre' li xelezúaqueze na chadía chacanna, san da blaudxa chee̱ da caní naca na xel-la zri'i lazre' li.

Currently Selected:

1 Corintios 13: zat

Highlight

Copy