Teacha 1
1
No Make Sense
1Dis wat da Teacha tell. His faddah, David, da king inside Jerusalem.
2Da Teacha tell,
“No make sense!
No make sense!
Fo shua eryting no make sense!
No mo notting make sense!
3“From all da stuff anybody do,
No matta dey stay bus ass in da sun.
Wen pau, wat goin get from all dat?
4One generation come, an anodda generation go,
But da earth stay foeva.
5Da sun come up an da sun go down one side,
An fas come up da odda side!
6Da wind blow from one side,
Den turn aroun an blow from da odda side,
Ova an ova.
7All da streams go to da ocean.
But da ocean level no go up.
Da watta go back da place
Wea come from befo time.
8All dis kine stuff dat happen ova an ova,
An stay boring,
Cuz get way mo stuff fo talk bout,
Way mo fo see an hear.
9Wateva happen, goin happen one mo time.
Wateva somebody do, somebody goin do um one mo time.
No mo notting new unda da sun!
10Peopo tell,
‘Look! I get someting new fo tell!’
No ways! Da ting was hea awready,
From long time befo time.
Was hea even befo us guys born.
11Nobody rememba da peopo dat live long time befo time.
An same ting fo da peopo dat goin come bumbye:
Da peopo dat goin come afta dem, goin foget dem too.”
No Can Undastan How Fo Know Wat Fo Do Erytime
12Da king ova da Israel peopo inside Jerusalem, dass me, da Teacha. 13I make up my mind fo study, an fo try see if da stuff work dat da peopo dat know wat fo do erytime tell. I do dis cuz I like figga out eryting peopo do unda da sky. God give erybody one real hard job fo do, az why! 14I wen see eryting da peopo do unda da sun. An you know wat?! Eryting hard fo undastan! Jalike erybody stay try catch da wind!
15Get tings dat stay kapakahi,
An no mo nobody can make um come strait.
An tings dat no moa,
No can count dem too!
16 #
1Kings 4:29-31
I wen figga lidis, “Eh! From small kid time, I wen learn wat fo do erytime, mo den any odda king dat wen stay in charge inside Jerusalem befo me. I know plenny stuff, an I know plenny bout wat fo do erytime.” 17Den, I make up my mind fo undastan wat “fo know wat fo do erytime” mean, wat “fo ack pupule” mean, an wat “fo ack stupid kine” mean. But wen I find out wat all dat stuff mean, jalike I stay try fo catch da wind too.
18Cuz wen somebody know wat fo do erytime,
Dat mean dey goin hurt mo plenny inside.
Mo stuff somebody know,
Mo dey come sore inside.
Currently Selected:
Teacha 1: HPB
Highlight
Share
Copy
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
