San Marcos 11

Catúj Jesús chumanꞌ Jerusalén a

1Ga̱a ne̱ nichrunꞌ Jesús ga̱ nij síí tucuꞌyón snana̱ soꞌ ro̱j chumanꞌ cuꞌna̱j Betfagé ga̱ Betania, ne̱ ro̱j chumanꞌ yoꞌ roꞌ, naj nichru̱nꞌ tuꞌva chumanꞌ Jerusalén, ne̱ tacóó tacaan cuꞌna̱j Tacaan ma̱n Chruun Olivó naj ro̱j chumanꞌ yoꞌ a. Ga̱a ne̱ caꞌnéé Jesús man vi̱j nij síí tucuꞌyón snana̱ soꞌ, 2ne̱ cataj soꞌ rihaan ro̱j soꞌ a:

―Caꞌa̱nj ro̱j so̱j, ne̱ catu̱u̱ ro̱j so̱j chumanꞌ na̱j rihaan níꞌ, ne̱ nu̱ꞌ nari̱ꞌ ro̱j so̱j man ꞌo̱ burró leꞌe̱j yaꞌa̱nj numi̱i a. Dan me se nache̱ ro̱j so̱j man xoꞌ, ne̱ ni̱caj ro̱j so̱j caꞌna̱ꞌ ro̱j so̱j rihanj á. 3Ne̱ sese xna̱ꞌanj nii man ro̱j so̱j me cheꞌé ꞌyaj ro̱j so̱j da̱nj ga̱ burró, ne̱ cata̱j ro̱j so̱j a: “Síí ꞌNi̱j Raꞌa man níꞌ achiin xcuu nihánj rihaan chugua̱nj. Ne̱ rque do̱j nanica̱j uún xoꞌ, quiꞌya̱j soꞌ na̱nj á”, cata̱j ro̱j so̱j á ―taj Jesús a.

4Dan me se caꞌanj ro̱j soꞌ, ne̱ catúj ro̱j soꞌ chumanꞌ, ne̱ nariꞌ ro̱j soꞌ man burró leꞌe̱j nicu̱nꞌ rá ꞌo̱ callé rihaan taꞌyaa ꞌo̱ veꞌ, ne̱ numi̱i xoꞌ a. Dan me se nache ro̱j soꞌ man xoꞌ a. 5Ne̱ nicu̱nꞌ do̱j yuvii̱ rej yoꞌ, ne̱ xnáꞌanj taꞌa̱j nij soꞌ man ro̱j soꞌ a:

―Me cheꞌé nache ro̱j so̱j burró ga̱ ―taj nij soꞌ a.

6Ne̱ cataj ro̱j síí tucuꞌyón snana̱ Jesús nda̱a vaa caꞌneꞌ Jesús suun rihaan ro̱j soꞌ, ga̱a ne̱ caꞌvej rá nij síí nicu̱nꞌ rej yoꞌ ni̱caj ro̱j soꞌ burró caꞌa̱nj ro̱j soꞌ a.

7Dan me se nica̱j ro̱j soꞌ burró namán ro̱j soꞌ rej nicu̱nꞌ Jesús, ne̱ cutaꞌ ro̱j soꞌ saga̱nꞌ ro̱j soꞌ xráá burró, ne̱ caꞌanj quita̱j Jesús xráá burró yoꞌ a. 8Dan me se uchruj ndoꞌo nij yuvii̱ yatzíj saga̱nꞌ nij soꞌ rá chrej, ne̱ ꞌó taꞌa̱j nij yuvii̱ roꞌ, aꞌneꞌ nij soꞌ coj chruun ma̱n tacaan, uchruj nij soꞌ rá chrej, ne̱ achén Jesús ga̱ burró leꞌe̱j a.

9Ne̱ va̱j yuvii̱ ta̱j ya̱a̱n rihaan Jesús, ne̱ ꞌnaꞌ yuvii̱ noco̱ꞌ rej xco̱ Jesús, ne̱ caguáj nij yuvii̱, cataj nij yuvii̱ a:

―Síí sa̱ꞌ uxrá me Yaꞌanj na̱nj ado̱nj. ꞌNaꞌ síí caꞌnéé Síí ꞌNi̱j Raꞌa man níꞌ á. Se lu̱j ndoꞌo me ꞌyaj Yaꞌanj cheꞌé soꞌ a. 10Cuna̱j uxrá vaa ꞌnaꞌ síí gu̱un chij nda̱a vaa guun chij xi̱i níꞌ rey David ga̱a naá a. Síí sa̱ꞌ uxrá me Yaꞌanj si̱j nicu̱nꞌ xta̱ꞌ na̱nj á ―taj nij yuvii̱ yoꞌ a.

11Ga̱a ne̱ catúj Jesús chumanꞌ Jerusalén ne̱ caꞌanj soꞌ rej ya̱nj nuvií noco̱o, ne̱ niꞌya̱j Jesús man cunuda̱nj nij rasu̱u̱n ma̱n anica̱j rihaan nuvií noco̱o, ne̱ ma̱an cheꞌé se nichrunꞌ gu̱un rmi̱ꞌ, ne̱ cheꞌé dan curiha̱nj uún Jesús ga̱ chuvi̱j nij síí tucuꞌyón snana̱ soꞌ, ne̱ nanica̱j soꞌ caꞌanj soꞌ chumanꞌ Betania a.

Caꞌmii Jesús rihaan chruun higó nuviꞌ chruj raa̱ a

12Ne̱ ꞌó güii me se curiha̱nj uún nij soꞌ chumanꞌ Betania, ne̱ naꞌaan rque Jesús a. 13Ga̱a ne̱ ga̱nꞌ nicunꞌ ꞌo̱ chruun higó ta̱j coj raa̱ queneꞌen Jesús a. Ne̱ cuchiꞌ soꞌ tacóó chruun, ne̱ niꞌya̱j soꞌ, ne̱ taj va̱j a̱ doj chruj mán raa̱ chruun a̱ maꞌ. Ma̱an na̱nj coj u̱u̱n táá raa̱ chruun yoꞌ a. ꞌO̱ se né tie̱mpó avii chruj higó me yoꞌ maꞌ. 14Ga̱a ne̱ cataj Jesús rihaan chruun a:

―Daj chiha̱a̱ míj se̱ cumán chruj raá so̱ꞌ cha̱ yuvii̱ a̱ maꞌ ―taj Jesús a.

Ne̱ cuno nij síí tucuꞌyón snana̱ soꞌ se vaa caꞌmii soꞌ da̱nj a.

Quirii Jesús man nij yuvii̱ tuꞌvéj rasu̱u̱n ma̱n rej ya̱nj nuvií noco̱o a

15Ga̱a ne̱ catúj Jesús ga̱ nij síí tucuꞌyón snana̱ soꞌ chumanꞌ Jerusalén, ga̱a ne̱ catúj Jesús rej ya̱nj nuvií noco̱o, ga̱a ne̱ guun cheꞌe̱ soꞌ quirii soꞌ man nu̱ꞌ nij síí tuꞌvéj rasu̱u̱n do̱ꞌ, man nij síí quiránj rasu̱u̱n ma̱n rej ya̱nj nuvií noco̱o do̱ꞌ a. Ne̱ tiguíj raꞌa soꞌ nij chruun mesá natuná nii saꞌanj rihaan, ne̱ tiguíj raꞌa soꞌ chruun xlá ta̱j nij síí tuꞌvéj chaꞌaa̱n a. 16Ne̱ caráán soꞌ chrej se̱ cata̱ nij yuvii̱ rasu̱u̱n tuꞌvéj cache̱n nij soꞌ rej ya̱nj nuvií a. 17Ga̱a ne̱ tucuꞌyón soꞌ man nij síí ma̱n rihaan nuvií, ne̱ cataj soꞌ a:

―Ya̱ uxrá taj Danj Yaꞌanj se vaa tucuá Yaꞌanj rej achíín niꞌya̱j nda̱a nij yuvii̱ yaníj rihaan Yaꞌanj me nihánj ado̱nj. Tza̱j ne̱ ase vaa yuꞌuj yuvej rej atúj yuve̱ síí itu̱u̱ vaa tucuá Yaꞌanj nihánj, quiꞌyaj soj na̱nj á ―taj Jesús a.

18Cuno nij xrej ata̱ suun noco̱o do̱ꞌ, nij síí naquiꞌyaj cu̱u stucua̱nj Moisés do̱ꞌ, da̱j caꞌmii Jesús, ga̱a ne̱ nanoꞌ uxrá nij soꞌ da̱j quiꞌya̱j nij soꞌ ne̱ caꞌve̱e cavi̱ꞌ Jesús a. ꞌO̱ se chuꞌviꞌ nij soꞌ niꞌya̱j nij soꞌ man Jesús, cheꞌé se caꞌanj ndoꞌo rá cunuda̱nj nij yuvii̱ cuno nij yuvii̱ tucuáán tucuꞌyón Jesús a. 19Tza̱j ne̱ caꞌanj güii, ne̱ nichrunꞌ gu̱un rmi̱ꞌ, ne̱ curiha̱nj uún Jesús ga̱ nij síí tucuꞌyón snana̱ soꞌ chumanꞌ Jerusalén caꞌanj nij soꞌ a.

Nacoo̱ chruun higó a

20Ga̱a ne̱ rej naꞌya̱a̱n ꞌó güii me se va̱j Jesús ga̱ nij síí tucuꞌyón snana̱ soꞌ chrej, ne̱ cachén nij soꞌ rej nicu̱nꞌ chruun higó caꞌmii Jesús rihaan güii quii, ne̱ ꞌo̱ nacoo̱ nda̱a yáá chruun yoꞌ a. 21Dan me se nanuj rá Pedró da̱j caꞌmii Jesús rihaan chruun yoꞌ, ne̱ cheꞌé dan cataj soꞌ rihaan Jesús a:

―Ni̱ꞌyaj so̱ꞌ, maestro. Nacoo̱ nu̱ꞌ chruun cataj so̱ꞌ rihaan se vaa se̱ cavii sa̱ꞌ na̱nj á ―taj Pedró a.

22Ga̱a ne̱ cataj Jesús rihaan ta̱ranꞌ nij soꞌ a:

―Cuchuma̱n rá soj ni̱ꞌyaj soj Yaꞌanj á. 23Ya̱ ya̱ cata̱j xnaꞌanj ꞌu̱nj rihaan soj se vaa me maꞌa̱n ꞌo̱ síí cata̱j rihaan nda̱a quij xca̱a̱n yoꞌ se vaa cu̱riha̱nj quij rej nicu̱nꞌ quij ne̱ caꞌa̱nj ni̱j quij rque na yaꞌa̱nj, ne̱ sese se̱ guun vi̱j rá soꞌ ne̱ cuchuma̱n ya̱ rá soꞌ se vaa gu̱un nu̱ꞌ nda̱a vaa cataj soꞌ, ne̱ ya̱ da̱nj gu̱un ado̱nj. 24Cheꞌé dan cata̱j xnaꞌanj ꞌu̱nj rihaan soj se vaa nu̱ꞌ se vaa cachi̱nj niꞌya̱j soj rihaan Yaꞌanj roꞌ, sese cuchuma̱n rá soj se vaa ya̱ quiꞌya̱j Yaꞌanj da̱nj cheꞌé soj, ne̱ ya̱ ya̱ gu̱un nda̱a vaa cachíín niꞌya̱j soj ado̱nj. 25Ne̱ ga̱a nicunꞌ soj achíín niꞌya̱j soj rihaan Yaꞌanj, ne̱ sese vaa cacunꞌ quiꞌyaj ꞌo̱ soꞌ rihaan soj, ne̱ cara̱a̱ xꞌnaa soj cheꞌé cacunꞌ tumé tuviꞌ soj, ga̱a ne̱ caꞌve̱e tinavi̱j Rej soj síí nicu̱nꞌ xta̱ꞌ cacunꞌ tumé maꞌa̱n soj ado̱nj. 26Tza̱j ne̱ sese se̱ caráj xꞌnaa soj cheꞌé cacunꞌ quiꞌyaj tuviꞌ soj rihaan soj, ne̱ daj chiha̱a̱ míj se̱ tinavij Rej soj síí nicu̱nꞌ xta̱ꞌ cacunꞌ tumé maꞌa̱n soj a̱ maꞌ ―taj Jesús rihaan nij síí tucuꞌyón snana̱ soꞌ a.

Xnáꞌanj nii man Jesús me síí caꞌneꞌ suun rihaan soꞌ quiꞌya̱j soꞌ nda̱a vaa ꞌyaj soꞌ a

27Ga̱a ne̱ catúj uún Jesús ga̱ nij síí tucuꞌyón snana̱ soꞌ rque chumanꞌ Jerusalén, ga̱a ne̱ chéé Jesús rej ya̱nj nuvií noco̱o, ne̱ cuchiꞌ nij xrej ata̱ suun noco̱o do̱ꞌ, nij síí naquiꞌyaj cu̱u stucua̱nj Moisés do̱ꞌ, nij síí uun chij do̱ꞌ, rihaan soꞌ, 28ga̱a ne̱ cataj nij soꞌ rihaan soꞌ a:

―Me síí caꞌneꞌ suun rihaan so̱ꞌ qui̱ꞌyáá so̱ꞌ nda̱a vaa ꞌyáá so̱ꞌ ga̱ ―taj nij soꞌ a.

29Ga̱a ne̱ cataj Jesús rihaan nij soꞌ a:

―Ne̱ vaa ꞌo̱ nana̱ xna̱ꞌanj ꞌu̱nj man nij soj, ne̱ sese ya̱ cata̱j xnaꞌanj nij soj nana̱ yoꞌ rihanj, ne̱ cata̱j xnaꞌanj ꞌu̱nj rihaan soj me síí caꞌneꞌ suun rihanj a. 30Dan me se me síí caꞌneꞌ suun rihaan Juan síí cuta̱ꞌ ne man yuvii̱, rá soj ga̱. Yaꞌanj naꞌ. Ase nij yuvii̱ xa̱ꞌ. Cata̱j xnaꞌanj nij soj rihanj á ―taj Jesús a.

31Ga̱a ne̱ nuchruj ra̱a̱ ndoꞌo nij soꞌ ga̱ tuviꞌ nij soꞌ, ne̱ cataj nij soꞌ a:

―Sese cata̱j níꞌ se vaa Yaꞌanj caꞌneꞌ suun rihaan Juan cuta̱ꞌ ne soꞌ man yuvii̱, ne̱ cata̱j Jesús rihaan níꞌ me cheꞌé ne cuchuma̱n rá níꞌ nana̱ caꞌmii Juan a. 32Tza̱j ne̱ a̱ doj se̱ caꞌvee cata̱j níꞌ se vaa ma̱an yuvii̱ caꞌneꞌ suun rihaan Juan quiꞌya̱j soꞌ da̱nj maꞌ ―taj nij soꞌ rihaan tuviꞌ nij soꞌ, cheꞌé se cuchuꞌviꞌ nij soꞌ niꞌya̱j nij soꞌ man nij yuvii̱ a.

ꞌO̱ se síí caꞌnéé Yaꞌanj nata̱ꞌ snana̱ Yaꞌanj rihaan yuvii̱ me ya̱ Juan, rá cunuda̱nj nij yuvii̱ a.

33Ga̱a ne̱ cataj nij soꞌ rihaan Jesús a:

―Ne neꞌen núj me síí caꞌneꞌ suun rihaan Juan cuta̱ꞌ ne soꞌ man yuvii̱ maꞌ ―taj nij soꞌ a.

Ga̱a ne̱ cataj Jesús rihaan nij soꞌ a:

―Cheꞌé dan se̱ cataj xnaꞌanj ꞌu̱nj rihaan nij soj me síí caꞌneꞌ suun rihanj qui̱ꞌyáj nda̱a vaa ꞌyáj maꞌ ―taj Jesús a.

Currently Selected:

San Marcos 11: trc

Highlight

Copy