San Marcos 12

Nanó Jesús cuentó cheꞌé yuvii̱ chiꞌi̱i̱ ꞌyaj suun rihaan naa̱ a

1Ga̱a ne̱ guun cheꞌe̱ Jesús nanó soꞌ cuentó rihaan nij soꞌ a:

―Dan me se cuchruj ꞌo̱ soꞌ naa̱ chruj uvá, ne̱ quiꞌyaj soꞌ chingá nu̱ꞌ anica̱j tuꞌva naa̱ yoꞌ, ga̱a ne̱ gáán soꞌ yuꞌuj rej xtu̱nꞌ chruj uvá ne̱ cavi̱i̱ na uvá, ne̱ cuneꞌ soꞌ ꞌo̱ veꞌ nataꞌ ca̱yáán nij síí tu̱mé naa̱ yoꞌ a.

’Ga̱a ne̱ tanáj soꞌ naa̱ yoꞌ rihaan nij síí quiꞌya̱j suun naa̱ yoꞌ, ne̱ curiha̱nj soꞌ caꞌanj soꞌ ga̱nꞌ a. 2Ga̱a quisíj yavii cuta̱ nii chruj uvá, ne̱ caꞌnéé síí xna̱a̱ yoꞌ man ꞌo̱ se‑mo̱zó soꞌ rihaan nij síí nu̱u̱ tumé xnaa̱ soꞌ a. Me rá soꞌ caꞌna̱ꞌ ni̱caj se‑mo̱zó soꞌ taꞌa̱j chruj uvá rihaan maꞌa̱n soꞌ a.

3’Ga̱a ne̱ taꞌaa nij síí nu̱u̱ tumé naa̱ man se‑mo̱zó síí xna̱a̱, ne̱ goꞌ uxrá nij soꞌ chruun xráá soꞌ, ne̱ caꞌnéé nij soꞌ man soꞌ rihaan síí xna̱a̱ a. Tza̱j ne̱ a̱ doj chruj uvá ne ni̱caj soꞌ caꞌanj soꞌ, quiꞌyaj nij soꞌ a̱ maꞌ. 4Ga̱a ne̱ caꞌnéé síí xna̱a̱ man ꞌó mozó rihaan nij síí nu̱u̱ tumé xnaa̱ soꞌ uún a. Tza̱j ne̱ goꞌ nij soꞌ yahij raa̱ soꞌ, ne̱ caxríj naꞌa̱j nij soꞌ man soꞌ a.

5’Ga̱a ne̱ caꞌnéé síí xna̱a̱ ꞌó mozó uún, ne̱ ticaviꞌ nij síí nu̱u̱ tumé naa̱ man soꞌ, ne̱ queꞌe̱e̱ doj mozó caꞌnéé uún síí xna̱a̱, ne̱ taꞌa̱j nij soꞌ goꞌ nij síí nu̱u̱ tumé naa̱, ne̱ ꞌó taꞌa̱j nij soꞌ ticaviꞌ nij síí nu̱u̱ tumé naa̱ a.

6’Ne̱ da̱j o̱rúnꞌ soꞌ quináj, ne̱ síí quináj me taꞌníí síí xna̱a̱, ne̱ ꞌe̱e̱ ndoꞌo rá síí xna̱a̱ man taꞌníí soꞌ a. Tza̱j ne̱ caꞌnéé síí xna̱a̱ yoꞌ man taꞌníí soꞌ rihaan nij síí tumé xnaa̱ soꞌ, ne̱ cataj soꞌ a: “Cara̱a̱ cochro̱j nij síí tumé naa̱ rihaan taꞌníj sese caꞌa̱nj taꞌníj tza̱j xe̱e̱”, taj síí xna̱a̱ yoꞌ a.

7’Tza̱j ne̱ cataj nij síí tumé naa̱ rihaan tuviꞌ nij soꞌ a: “Síí nihánj me síí gu̱un xna̱a̱ naa̱ nihánj vaa güii na̱nj á. Cheꞌé dan ticavi̱ꞌ níꞌ man soꞌ, ne̱ vaa güii, ne̱ gu̱un xna̱a̱ maꞌa̱n níꞌ man naa̱ nihánj chugua̱nj”, taj nij soꞌ niꞌya̱j nij soꞌ man taꞌníí síí xna̱a̱ yoꞌ a. 8Ga̱a ne̱ taꞌaa nij soꞌ man soꞌ, ne̱ ticaviꞌ nij soꞌ man soꞌ, ne̱ quiriꞌíj nij soꞌ man soꞌ xeꞌ a.

9’Ne̱ da̱j quiꞌya̱j síí xna̱a̱ man nij síí tumé xnaa̱ soꞌ, rá soj ga̱. Dan me se caꞌna̱ꞌ soꞌ, ne̱ ticavi̱ꞌ soꞌ man nij soꞌ, ne̱ ta̱cuachén soꞌ xnaa̱ soꞌ rihaan ꞌó nij síí tu̱mé xnaa̱ soꞌ a. 10Ne naya̱a̱ nij soj nana̱ nihánj nana̱ no̱ rihaan Danj Yaꞌanj naꞌ:

Yuvej quiriꞌíj nij síí cuneꞌ veꞌ roꞌ,

guun yuvej sa̱ꞌ vaa se uun doj

rihaan cunuda̱nj nij yuvej ma̱n tacóó veꞌ yoꞌ na̱nj ado̱nj.

11Maꞌa̱n Yaꞌanj Si̱j ꞌNi̱j Raꞌa man níꞌ quiꞌyaj da̱nj,

ne̱ cuna̱j uxrá vaa yoꞌ, rá níꞌ ado̱nj,

taj Danj Yaꞌanj a ―taj Jesús rihaan nij síí uun chij rihaan nij yuvii̱ israelitá a.

12Ga̱a ne̱ nanoꞌ nij soꞌ da̱j ga̱a̱ ta̱ꞌaa nij soꞌ man Jesús, ese queneꞌen nij soꞌ se vaa cheꞌé maꞌa̱n nij soꞌ me cuentó nanó Jesús a. Tza̱j ne̱ cuchuꞌviꞌ nij soꞌ niꞌya̱j nij soꞌ man nij yuvii̱ nuu chre̱ꞌ a. Ne̱ tanáj nij soꞌ man Jesús, ne̱ caꞌanj nij soꞌ a.

Nataꞌ Jesús cheꞌé impuestó go̱ꞌ níꞌ rihaan gobiernó do̱ꞌ, cheꞌé se rque̱ níꞌ rihaan Yaꞌanj do̱ꞌ a

13Ga̱a ne̱ caꞌnéé nij síí uun chij yoꞌ do̱j síí fariseo do̱ꞌ, do̱j síí noco̱ꞌ man Herodes do̱ꞌ, rihaan Jesús, cheꞌé rej cuta̱ꞌ nij soꞌ cacunꞌ xráá Jesús cheꞌé nana̱ caꞌmi̱i̱ Jesús a. 14Dan me se cuchiꞌ nij síí tihaꞌ yuꞌunj yoꞌ rihaan Jesús, ne̱ cataj nij soꞌ rihaan soꞌ a:

―Neꞌen núj se vaa nana̱ ya̱ ina̱nj aꞌmii so̱ꞌ, maestro. Ne̱ ne chuꞌvíꞌ so̱ꞌ niꞌya̱j so̱ꞌ man nij yuvii̱ da̱j cata̱j nij yuvii̱ maꞌ. Ne̱ ꞌo̱ cuya̱a̱n vaa nu̱ꞌ yuvii̱ rihaan so̱ꞌ chugua̱nj. Ma̱an se ya̱ tucuꞌyón so̱ꞌ rihaan yuvii̱ da̱j quiꞌya̱j yuvii̱ canoco̱ꞌ yuvii̱ man Yaꞌanj ado̱nj. Ne̱ no̱ xcúún yuvii̱ rque̱ yuvii̱ impuestó rihaan síí nica̱j suun emperador César naꞌ. Ase se̱ rqué yuvii̱ xa̱ꞌ. Dan me se rque̱ núj naꞌ. Se̱ rqué núj xa̱ꞌ ―taj nij soꞌ a.

15Dan me se a̱j neꞌen Jesús se vaa síí nucuiꞌ rá me nij soꞌ, ne̱ cheꞌé dan cataj soꞌ rihaan nij soꞌ a:

―Me cheꞌé me rá soj tiha̱ꞌ yuꞌunj soj manj ne̱ cuta̱ꞌ soj cacunꞌ xráj ga̱. Ti̱haa̱n soj ꞌo̱ saꞌanj aga̱ꞌ rihanj ni̱ꞌyaj á ―taj Jesús rihaan nij soꞌ a.

16Ne̱ tihaa̱n nij soꞌ ꞌo̱ saꞌanj aga̱ꞌ rihaan soꞌ, ne̱ xnáꞌanj soꞌ man nij soꞌ a:

―Me síí no̱ rihaan saꞌanj aga̱ꞌ nihánj ga̱. Ne̱ me síí se‑chuvi̱i no̱ rihaan saꞌanj aga̱ꞌ nihánj ga̱ ―taj Jesús a.

Ga̱a ne̱ cataj nij soꞌ rihaan Jesús a:

―Síí nica̱j suun César me nó rihaan saꞌanj aga̱ꞌ yoꞌ, ne̱ nó se‑chuvi̱i soꞌ rihaan saꞌanj a ―taj nij soꞌ a.

17Ga̱a ne̱ cataj Jesús a:

―Rque̱ soj siꞌyaj síí nica̱j suun rihaan maꞌa̱n soꞌ, ne̱ rque̱ soj siꞌyaj Yaꞌanj rihaan Yaꞌanj á ―taj Jesús a.

Ga̱a ne̱ caꞌanj ndoꞌo rá nij síí me rá tiha̱ꞌ yuꞌunj yoꞌ niꞌya̱j nij soꞌ man Jesús a.

Cataj Jesús se vaa ya̱ cunu̱u iꞌna̱ꞌ uún nij síí caviꞌ a

18Ga̱a ne̱ cuchiꞌ do̱j síí saduceo rihaan Jesús a. Nij síí saduceo roꞌ, taj se vaa daj chiha̱a̱ míj se̱ cunuu iꞌna̱ꞌ uún yuvii̱ asa̱ꞌ caviꞌ yuvii̱ a. Dan me se xnáꞌanj nij soꞌ man Jesús a:

19―Cachrón Moisés nana̱ nihánj rihaan yanj cuno̱ níꞌ a: “Sese caviꞌ ꞌo̱ soꞌ, ne̱ quináj nica̱ soꞌ, ne̱ sese taj va̱j taꞌníí soꞌ, ne̱ no̱ xcúún tinúú soꞌ xca̱j tinúú soꞌ man choco̱ꞌ soꞌ, ne̱ coto̱j tinúú síí caviꞌ ga̱ noꞌ, ne̱ cuchru̱j noꞌ neꞌej, ne̱ gu̱un taꞌni̱j síí caviꞌ man neꞌej yoꞌ a.” Nihánj me nana̱ cachrón Moisés rihaan yanj ga̱a naá, maestro. 20Dan me se vaa chi̱j nij tinu̱j ꞌo̱ nij soꞌ, ne̱ síí chava̱ꞌ me se xcaj soꞌ chana̱, ga̱a ne̱ caviꞌ soꞌ, ne̱ taj va̱j neꞌej cuchruj nica̱ soꞌ, quiꞌyaj soꞌ maꞌ. 21Ga̱a ne̱ xcaj scueꞌe̱e̱ síí caviꞌ man chana̱ caviꞌ nica̱, ga̱a ne̱ caviꞌ soꞌ uún, ne̱ taj neꞌej cuchruj chana̱ yoꞌ, quiꞌyaj soꞌ, ne̱ veé da̱nj xcaj scueꞌe̱e̱ soꞌ uún man chana̱, ne̱ caviꞌ soꞌ uún, ne̱ veé da̱nj quiꞌyaj chi̱j nij tinu̱j nij soꞌ, ne̱ taj va̱j a̱ ꞌó neꞌej cuchruj chana̱ yoꞌ a̱ maan ado̱nj. 22Nda̱a síj, ga̱a ne̱ caviꞌ maꞌa̱n chana̱ uún, 23ne̱ dan me se asa̱ꞌ cunuu iꞌna̱ꞌ uún nij síí caviꞌ, ga̱a ne̱ me nij soꞌ ni̱caj man chana̱ yoꞌ, rá so̱ꞌ ga̱. ꞌO̱ se ga̱a vaa iꞌna̱ꞌ nij soꞌ, ne̱ nica̱ ta̱ranꞌ nij tinu̱j nij soꞌ guun noꞌ a ―taj nij síí saduceo, xnáꞌanj nij soꞌ man Jesús a.

24Ga̱a ne̱ cataj Jesús rihaan nij soꞌ a:

―Tuná uxrá soj se vaa nuchruj ra̱a̱ soj, cheꞌé se ne neꞌen soj me taj snana̱ Yaꞌanj do̱ꞌ, da̱j vaa snucua̱j Yaꞌanj do̱ꞌ maꞌ. 25ꞌO̱ se asa̱ꞌ cunuu iꞌna̱ꞌ uún nij síí caviꞌ, ne̱ se̱ xcaj tuviꞌ nij soꞌ a̱ maꞌ. ꞌO̱ se ase vaa nij se‑mo̱zó Yaꞌanj ma̱n rej xta̱ꞌ roꞌ, da̱nj ga̱a̱ nij soꞌ na̱nj ado̱nj. 26Cata̱j xnaꞌanj ꞌu̱nj rihaan soj da̱j ga̱a̱ queneꞌe̱n soj se vaa ya̱ ya̱ cunu̱u iꞌna̱ꞌ uún yuvii̱ asa̱ꞌ caviꞌ yuvii̱ ado̱nj. Ataa naya̱a̱ soj nana̱ nihánj nana̱ no̱ rihaan danj Moisés nana̱ cheꞌé coj acoꞌ yaꞌan raa̱ naꞌ. Ne̱ dan me se ga̱a queneꞌen Moisés coj yoꞌ, ne̱ cataj Yaꞌanj rihaan Moisés a: “Yaꞌanj noco̱ꞌ nij síí ma̱n ga̱a naá síí cuꞌna̱j Abraham do̱ꞌ, Isaac do̱ꞌ, Jacob do̱ꞌ, mej a.” Da̱nj cataj Yaꞌanj cheꞌé nij síí ma̱n ga̱a naá yoꞌ a. 27Dan me se né Taꞌa̱nj nij xnangá me Yaꞌanj maꞌ. Ina̱nj nij síí vaa iꞌna̱ꞌ aꞌvee aráj gue̱e̱ rihaan Yaꞌanj na̱nj ado̱nj. Ya̱ uxrá tuná raa̱ soj na̱nj á ―taj Jesús rihaan nij síí saduceo yoꞌ a.

Cataj Jesús me suun me suun noco̱o doj cuno̱ níꞌ a

28Ga̱a ne̱ ꞌo̱ nij síí naquiꞌyaj cu̱u stucua̱nj Moisés cuchiꞌ rihaan Jesús, ne̱ soꞌ roꞌ, me síí cuno da̱j caꞌmii Jesús ga̱ nij síí saduceo yoꞌ a. Ne̱ queneꞌen soꞌ se vaa sa̱ꞌ uxrá caꞌmii Jesús, ne̱ cheꞌé dan xnáꞌanj soꞌ man Jesús a:

―Me suun me suun noco̱o doj rihaan cunuda̱nj nij suun caꞌneꞌ Yaꞌanj no̱ xcúún níꞌ cuno̱ níꞌ ga̱ ―taj soꞌ a.

29Ga̱a ne̱ cataj Jesús rihaan soꞌ a:

―Suun noco̱o doj rihaan cunuda̱nj nij suun no̱ xcúún níꞌ cuno̱ níꞌ me suun nihánj a: “Cuno̱ soj si̱j israelitá á. Yaꞌanj Si̱j ꞌNi̱j Raꞌa man níꞌ me se o̱rúnꞌ soꞌ, 30ne̱ nda̱a nimán yá so̱ꞌ gu̱un rá so̱ꞌ ni̱ꞌyaj so̱ꞌ man Yaꞌanj Si̱j ꞌNi̱j Raꞌa man níꞌ, ne̱ ꞌo̱ nda̱a cúú yave̱ yá so̱ꞌ cuchuma̱n ya̱ rá ni̱ꞌyaj man Yaꞌanj, ne̱ nda̱a nu̱ꞌ snucua̱j yá so̱ꞌ cara̱a̱ cochro̱j rihaan Yaꞌanj na̱nj ado̱nj.” Ne̱ nihánj me ya̱ suun noco̱o vaa se uun doj na̱nj á. 31Ne̱ vaa ꞌó suun nihánj suun me rá Yaꞌanj cuno̱ uún níꞌ a: “Adi̱ꞌ se ꞌe̱e̱ rá so̱ꞌ man ma̱ꞌán so̱ꞌ roꞌ, da̱nj ga̱a̱ ꞌe̱e̱ rá so̱ꞌ man tuvíꞌ so̱ꞌ á.” Taj va̱j ꞌó suun noco̱o doj rihaan ro̱j suun nihánj suun caꞌneꞌ Yaꞌanj no̱ xcúún níꞌ cuno̱ níꞌ a̱ maan ado̱nj ―taj Jesús a.

32Ga̱a ne̱ cataj síí naquiꞌyaj cu̱u stucua̱nj Moisés yoꞌ rihaan Jesús a:

―Cuna̱j uxrá caꞌmii so̱ꞌ, maestro, ne̱ ya̱ uxrá vaa nana̱ caꞌmii so̱ꞌ, se vaa o̱rúnꞌ Yaꞌanj, ne̱ taj va̱j tuviꞌ Yaꞌanj, ma̱an se o̱rúnꞌ soꞌ nicunꞌ a. 33Ne̱ ya̱ uxrá vaa nana̱ se vaa sese nda̱a nimán ya̱ níꞌ gu̱un rá níꞌ ni̱ꞌyaj níꞌ man Yaꞌanj do̱ꞌ, sese ꞌo̱ cuchuma̱n rá nda̱a cúú yave̱ ya̱ níꞌ ni̱ꞌyaj níꞌ man Yaꞌanj do̱ꞌ, sese nda̱a nu̱ꞌ se nucua̱j man níꞌ cara̱a̱ cochro̱j rihaan Yaꞌanj do̱ꞌ, sese ga̱a̱ ꞌe̱e̱ rá níꞌ man tuviꞌ níꞌ nda̱a se ꞌe̱e̱ rá níꞌ man maꞌa̱n níꞌ do̱ꞌ, ne̱ sa̱ꞌ doj vaa ro̱j suun nihánj rihaan nu̱ꞌ nij xcuu acaa do̱ꞌ, nij xcuu aviꞌ do̱ꞌ, rihaan Yaꞌanj ado̱nj ―taj síí naquiꞌyaj cu̱u stucua̱nj Moisés yoꞌ rihaan Jesús a.

34Ga̱a ne̱ queneꞌen Jesús se vaa ya̱ cavii raa̱ síí caꞌmii da̱nj rihaan soꞌ, ne̱ cheꞌé dan cataj Jesús rihaan soꞌ a:

―So̱ꞌ me se nichrunꞌ ya̱ caꞌve̱j rá so̱ꞌ gu̱un chij Yaꞌanj nimán so̱ꞌ na̱nj ado̱nj ―taj Jesús a.

Ne̱ taj va̱j síí quisíj rá xna̱ꞌanj ꞌó nana̱ man Jesús a̱ maꞌ.

Síí Caꞌnéé Yaꞌanj Ti̱nanii man Yuvii̱ rihaan Sayuun roꞌ, né na̱nj yuvii̱ me soꞌ maꞌ

35Dan me se ga̱a tucuꞌyón Jesús snana̱ soꞌ man nij yuvii̱ rej ya̱nj nuvií noco̱o, ne̱ cataj soꞌ a:

―Nij síí naquiꞌyaj cu̱u stucua̱nj Moisés roꞌ, me cheꞌé taj nij soꞌ se vaa na̱nj taꞌníí taꞌnij siꞌno̱ rey David me Síí Caꞌne̱j Yaꞌanj Ti̱nanii man Yuvii̱ rihaan Sayuun, rá soj ga̱. 36ꞌO̱ se nuû Nimán Yaꞌanj nimán David, ne̱ cataj soꞌ a:

Caꞌmii Yaꞌanj Si̱j ꞌNi̱j Raꞌa man níꞌ rihaan Síí ꞌNi̱j Raꞌa manj a:

“Caꞌa̱nj ca̱yáán so̱ꞌ xꞌnúú ꞌu̱nj rej nuva̱ꞌ ꞌu̱nj,

nda̱a se quisi̱j quiꞌya̱j canaán ꞌu̱nj

rihaan ta̱ranꞌ nij síí ta̱j riꞌyunj mán so̱ꞌ,

ne̱ quiri̱i̱ taꞌngáꞌ so̱ꞌ rihaan nij soꞌ ado̱nj”,

taj David a. 37Dan me se Síí ꞌNi̱j Raꞌa man David me Síí Caꞌne̱j Yaꞌanj, taj maꞌa̱n David a. Sese ꞌni̱j raꞌa soꞌ man David, ne̱ asa̱ꞌ aꞌvee guun soꞌ na̱nj taꞌníí taꞌnij siꞌno̱ David ga̱. Taj cheꞌé cata̱j nij soꞌ se vaa na̱nj yuvii̱ me soꞌ maꞌ ―taj Jesús a.

Cuno ri̱i̱ yuvii̱ snana̱ Jesús, ne̱ guun niha̱ꞌ rá nij soꞌ uno nij soꞌ snana̱ soꞌ a.

Nataꞌ Jesús cheꞌé cacunꞌ tumé nij síí naquiꞌyaj cu̱u stucua̱nj Moisés a

38Dan me se ga̱a tucuꞌyón Jesús stucua̱nj soꞌ man nij yuvii̱, ne̱ cataj soꞌ a:

―Xca̱j nij soj cuentá da̱j ꞌyaj nij síí naquiꞌyaj cu̱u stucua̱nj Moisés, ne̱ tu̱mé soj man soj se̱ gaa na̱nj quiꞌya̱j soj nda̱a vaa ꞌyaj nij soꞌ á. Dan me se niha̱ꞌ rá nij soꞌ cu̱nuû nij soꞌ yatzéj sa̱ꞌ xca̱a̱n cache̱e̱ nij soꞌ rej queneꞌe̱n yuvii̱ man nij soꞌ, ne̱ me rá nij soꞌ caꞌmi̱i̱ sa̱ꞌ yuvii̱ ga̱ nij soꞌ ga̱a chéé nij soꞌ rihaan yuꞌvee a. 39Ne̱ uun rá nij soꞌ quita̱j nij soꞌ chruun xlá sa̱ꞌ doj ga̱a ꞌanj nij soꞌ veꞌ nuu chre̱ꞌ níꞌ tu̱cuꞌyón níꞌ stucua̱nj Moisés do̱ꞌ, ga̱a ꞌanj nij soꞌ chaꞌanj do̱ꞌ a. 40Ne̱ aꞌnéj nij soꞌ veꞌ tucuá chana̱ caviꞌ nica̱, ne̱ yu̱u̱n cheꞌe̱ guun tucua̱ nij soꞌ man veꞌ yoꞌ, ne̱ ꞌyaj xca̱a̱n ndoꞌo nij soꞌ cuentó achíín niꞌya̱j nij soꞌ rihaan Yaꞌanj, cheꞌé rej sa̱ꞌ doj gu̱un nucua̱j nij soꞌ tiha̱ꞌ yuꞌunj nij soꞌ man yuvii̱ a. Cheꞌé dan doj a̱ ga̱a̱ sayuun quira̱nꞌ nij soꞌ quiꞌya̱j Yaꞌanj, asa̱ꞌ caꞌneꞌ Yaꞌanj cacunꞌ cheꞌé yuvii̱ ado̱nj ―taj Jesús a.

ꞌO̱ chana̱ nique̱ caviꞌ nica̱ roꞌ, sa̱ꞌ doj quiꞌyaj noꞌ rihaan nij ruꞌvee, niꞌya̱j Yaꞌanj a

41Dan me se ta̱j Jesús rej ta̱j chrúún saꞌanj ta̱j rihaan nuvií noco̱o, ne̱ neꞌen soꞌ da̱j quiꞌyaj nij yuvii̱ ga̱a araa nij yuvii̱ saꞌanj aga̱ꞌ rque chrúún saꞌanj yoꞌ cheꞌé Yaꞌanj, ne̱ dan me se ma̱n ndoꞌo síí ruꞌvee araa uxrá saꞌanj rque chrúún yoꞌ a. 42Ne̱ dan me se caꞌnaꞌ ꞌo̱ chana̱ caviꞌ nica̱ chana̱ nique̱, ne̱ caraa noꞌ vi̱j gue̱e̱ saꞌanj aga̱ꞌ leꞌe̱j rque chrúún yoꞌ a. 43Ga̱a ne̱ canacúún Jesús man nij síí tucuꞌyón snana̱ soꞌ caꞌna̱ꞌ nij soꞌ rihaan soꞌ, ga̱a ne̱ cataj soꞌ rihaan nij soꞌ a:

―Cata̱j xnaꞌanj yá yá ꞌu̱nj rihaan nij soj cuano̱ se vaa xa̱ꞌ chana̱ caviꞌ nica̱ chana̱ nique̱ nihánj, tza̱j ne̱ doj a̱ caraa noꞌ saꞌanj rque chrúún yoꞌ rihaan saꞌanj caraa cunuda̱nj ꞌó nij yuvii̱ na̱nj ado̱nj. 44ꞌO̱ se nij soꞌ me se da̱j doj saꞌanj quináj raa̱ se‑saꞌa̱nj nij soꞌ roꞌ, caraa nij soꞌ rque chrúún a. Xa̱ꞌ noꞌ, tza̱j ne̱ nda̱ꞌ se achiin ndoꞌo saꞌanj rihaan noꞌ, tza̱j ne̱ rqué noꞌ rihaan Yaꞌanj cunuda̱nj saꞌanj nica̱j noꞌ saꞌanj quira̱a̱n noꞌ se cha̱ noꞌ na̱nj ado̱nj ―taj Jesús a.

Currently Selected:

San Marcos 12: trc

Highlight

Copy