San Lucas 23
23
Cavisehen Jesucristu xcun Pilatu
1Hya xi camá ne, cavisatjenhnga yëjë xu xuta xi matitjun jan ne, sehe quijicojo me Jesús xcun Pilatu. 2Hane cavetsihin xu cavinchajyë me cuitjin:
―Casacuntsin cha xi cuijyihi vi tivisecjan cha cjuatacun rë xuta. Hacuaha mijí rë cha xi cuechjin tujúnsa niji cojo César, me xi matitjun. Hacuaha chja sa cha ta hacui cha xi catsingatju Nina cha, hacuaha matitjun xu cha. ―Cuatjin xu cachja me xi cavinchajyë me Jesús.
3Sehe ngajan xi Pilatu ne, cavinenguise xu me Jesús cuitjin:
―¿Há ngaye xu matitjun ngaye tsëhë xuta tjë rë Israel? ―Cuatjin xu cavinenguise Pilatu.
Hane Jesús ne, cuitjin xu cafayangui me:
―Cuatjin sacuatjin nújun vë. ―Cuatjin xu cafayangui me.
4Ngajan xi Pilatu ne, cuitjin xu cachja me cojo nahmi xi matitjun cojo yëjë xutacjín jan:
―Sacuiin ná hisca ngu jyë́ rë cha xi cuijyihi vi. ―Cuatjin xu cachja Pilatu.
5Peru quijinduju sa xu cachja xuta xi matitjun jan cuitjin:
―Jemu tivisecjan cha cjuatacun rë xuta ngatsë rë cjua xi tivicuya cha jingujyë ni distritu Judea vi. Cavetsihin cha hisca ngajan distritu Galilea, hisca nguehe cafehe cha. ―Cuatjin xu cachja me.
Cavisehen Jesucristu xcun Herodes
6Hane xi cahndë Pilatu cjua vëhë ne, sehe cavinenguise xu me xuta jan cuitjin:
―¿Há cha Galilea cha xi cuijyihi vi ni? ―Cuatjin xu cavinenguise me.
7Hane xi casacu xu rë Pilatu cjuaquixi xi hiscan xi vitexa Herodes canduva Jesús ne, sehe catsingatju xu Pilatu me xcun Herodes, tsëhë xi Herodes ne, hacuaha quitahá xu me ngajan Jerusalén nixtin hya. 8Hane hya xi cavëë Herodes Jesús ne, jemu ndaja camá xu rë me, tsëhë xi ha titjun sa ne, jemu meje scuëë me Jesús, tsëhë xi ha machaya rë me cjua tsëhë Jesús, hacuaha meje scuëë xu me xi sahmi Jesús ngu cjuarcun. 9Hane jercu cjín cjuachjinenguise casahmi xu me Jesús, peru Jesús ne, tsajin camahani mé xi cafayangui xu me. 10Hane nahmi xi matitjun cojo cha xi vicuya cjuachacun ne, jemu tivincha xu me jyë́ rë Jesús. 11Ngajan xi Herodes cojo sindadu rë me ne, jemu casahmixta xu me cojo Jesús, hacuaha catsixcuehyu me me. Hane xi catsicaja xu me Jesús ngu tsjian xi jemu ndajyihi camahani ne, sehe cavuya catsingatju nga xu me Jesús xcun Pilatu. 12Hane nixtin hya ne, Herodes cojo Pilatu ne, jemu cavinga xu rë me xicjin me, handasa titjún xu ne, maji vëë xicjin me.
Camá entregadu Jesucristu xi cjue cueya me
13Hya xi camá ne, xi casahmitangun xu Pilatu nahmi xi matitjun cojo xutaxa rë cojo xuta nandya ne, 14sehe cachja xu me cojo cuitjin:
―Ngayujun ni matsejen ne, canduvuncujun cha xi cuijyihi vi nguehe matsejen, tsëhë xi xi má nuju matsejen ne, tivisecjan cha cjuatacun rë xuta. Peru quihndë matsejen ne, chutsujun ta, xcún ni matsejen ne, cafahátaha rë cha, peru casacuiin ná hisca xi ngu jyë́ rë cha sacuatjin jyë́ xi cavinchun. 15Hacuanitjin ni Herodes matsejen ta, casacuiin rë me jyë́ rë cha, vëhë xi catsicuya nga me cha. Chutsujun ta tsajin camahani mé casahmi cha xi vechú chuva rë xi niquen cha. 16Vëhë xi cuitéxa sehen ni rë cha matsejen ne, sehe tsisme cha. ―Cuatjin xu cachja Pilatu.
17Hatuxa xcusun xu rë Pilatu xi tsismi me ngu presu xi xuta vaxijin me nu nu ni nixtin rë suhi. 18Peru yëjë ni xuta xi matitjun jan ne, ngu tangun ni camá xu me cajindaya me cachja me cuitjin:
―¡Nicuhun cha vi ne, Barrabás nismu cha! ―Cuatjin xu cajindaya me.
19Cha Barrabás ne, quiji cha ndavaya ngatsë rë xi casahmi xu cha ngu si cojo xutaxa rë, hacuaha catsiquehen xu cha. 20Peru ngu ndiya nga cachja xu Pilatu cojo xuta xi matitjun jan, tsëhë xi Pilatu ne, meje tsismi me Jesús. 21Peru xuta xi matitjun jan ne, cavuya cajindaya nga me cachja xu me cuitjin:
―¡Tetuhun cha, tetuhun cha xcun cru! ―Cuatjin xu cajindaya me.
22Hane xi ma jyan ndiya ne, cavinenguise xu Pilatu xuta xi matitjun jan cuitjin:
―Peru ¿mé xi jemu choho casahmi cha ni? Tsajin camahani mé jyë́ rë cha casacu ná xi vechú chuva rë xi niquen cha. Vëhë xi cuitéxa sehen ni rë cha matsejen ne, sehe tsisme cha. ―Cuatjin xu cachja Pilatu.
23Peru yëjë ni xuta xi matitjun jan ne, quijinduju sa xu cajindaya me cafehya me xi setaha Jesús xcun cru. Vëhë xi cajne cacun xu Pilatu, 24hacuaha cavejña cacun xu me xi sahmi me hacutjin xi fehya xuta jan. 25Hya xi camá ne, catsismi xu me cha xi cafehya xuta xi matitjun jan, ngu cha xi quiji ndavaya tsëhë xi casahmi xu si cojo xutaxa rë hacuaha catsiquehen xu cha. Peru Jesús ne, casua xu Pilatu me xi cjue cueya me, sacuatjin meje rë xuta xi matitjun jan.
Casetaha Jesucristu xcun cru
26Hane xi cjuicojo sindadu Jesús ne, ngajan ndiya jan cavechútáha xu cha ngu me xi hmí rë Simón tsëhë nandya Cirene, xi nduva xu me quiji me nguijña. Hane cafaha xu sindadu jan me, catsicaniji xu cha me cru xi cjue me cojo hacutjin cjui Jesús.
27Hane jercu cjín camaha xu ni xuta quiji me cojo Jesús hacuaha jercu cjín xu yachjin xi hisca chja hisca jihnda na xi jemu choho má rë na ngatsë rë Jesús quiji xu na cojo me. 28Hane xi cavuya Jesús cavutsejen me na ne, sehe cachja xu me cuitjin:
―Ngayun na quihndi nandya Jerusalén, xicachjihnduun ngatsë naha. Chjihndun ngatsë nuju suvun cojo ngatsë rë quihndi nuju ta, 29cuechú nixtin xi cuichja xuta cuitjin: “Jemu ndaja tsëhë yachjin xi hatuxa maji sacu rë na quihndi; jemu ndaja tsëhë yachjin xi hisca ngu quihndi casacuiin rë na; hacuaha jemu ndaja tsëhë yachjin xi casacuiin quihndi catsicha na.” Cuatjin cuichja xuta. 30Nixtin hya ne, hacuaha cuichja xuta cojo ndetjún cuitjin: “Tjinengunsun niji.” Hane naxi ne, cuitjin cuichja me cojo: “Tatsun niji.” Cuatjin cuichja me ta, 31sá xi cuitjin choho tisahmi xuta vi cojo ná quihndë, ngahan xi tangun ngahan sacuaha ngu ya xcuen ne, hatuxa hitsë sa choho sahmi me cojo nuju nchujun ni nguini, ngayun xi tangun ngayun sacuaha ngu ya quixí. ―Cuatjin xu cachja Jesús.
32Hacuaha cojo sa xu jo cha tsehen quijicojo sindadu jan cha, xi tsiquehen tangun cha cha cojo Jesús. 33Hane xi cafehe cha cojo Jesús hiscan xi hmí rë Nínda Rcuun ne, ngajan cavetaha xu cha Jesús xcun cru hacuaha caviyujutaha sa cha catsijo cha tsehen jan xcun cru rë cha. Ngu cru xi quitahá ngu cha ne, casecun xu táha xcun tsëhë Jesús, hane ngu nga ne, táha quixi. 34Ngajan xi Jesús ne, cachja xu me cuitjin:
―Ngayun Nahmi naha. Ninchatuhun rë xuta vi ta, hvíin me mé xi tisahmi me. ―Cuatjin xu cachja Jesús.
Hane xi cuatëcja sindadu tsjian rë Jesús jan ne, cavaxë xu cha ngu suerte. 35Hane xutacjín jan ne, caxinchacun xu me cavutsejen me xcusun xi tijima jan. Hacuaha xutaxa rë jan ne, cavejnucëë me Jesús, cuitjin xu cachja me:
―Cavaxëtje cha jingu sa xuta. Quihndë ne, cataxëtje suvá cha yojo rë cha, sá xi hacui jain cha xi cavaxijin Nina hacuaha catsingatju me. ―Cuatjin xu cachja xutaxa rë.
36Hacuaha sindadu jan ne, catsixcuehyu xu cha Jesús. Quijitiña cha hiscan tyjangui me xcun cru, hane meje sua xu cha xan yufa cuihi me, 37sehe cachja xu cha cuitjin cojo rë me:
―Sá xi ngaye jain matitjun ngaye tsëhë xuta tjë rë Israel ne, naxetje sove yojo riji. ―Cuatjin xu cachja cha.
38Hacuaha camahindu xu ngujo cjua rcu cru rë Jesús xi chja cuitjin: “Matitjun cha vihi tsëhë xuta tjë rë Israel.” Cuatjin xu camahindu. Jyan hne camahindu cjua xi cuacun vë: hne griego cojo latín cojo hebreo.
39Hane ngu cha tsehen xi cojo casetaha xcun cru jan ne, cuitjin xu choho cachja cha tsëhë Jesús:
―¿Hacuiin ngaye xi catsingatju ri Nina ni? ¡Naxetje sove yojo riji ne, hacuaha naxetje niji! ―Cuatjin xu cachja cha.
40Hane xi cavatëcja xu cha xingu jan cjua rë cha xi choho chja tsëhë Jesús ne, cuitjin xu cachja cha:
―¿Há rcuiin Nina, quihndë xi tivatjun castigu sacuatjin tivatju me vëhë tijima? 41Ngayaan ne, cojo cjuaquixi xi tivatjun tijima ta, ngatsë rë xcusun xi canihña ne, vëhë xi vechú chuva rë xi cuitjin tivatjun castigu. Peru me vihi ne, tsajin mé xi jemu choho casahmi me. ―Cuatjin xu cachja cha.
42Sehe cachja xu cha cojo Jesús cuitjin:
―Jesús, ninguitsjun ná hya xi cuinduvun nihñu gubiernu. ―Cuatjin xu cachja cha.
43Hane Jesús ne, cuitjin xu cafayangui me:
―Cuichjá cojo nuju cjuaquixi ta ha cojo quihndë ni ne, cuinechun cojo ná ngajan cahndë́ ndajyihi hiscan xi hmí rë Paraíso. ―Cuatjin xu cafayangui Jesús.
Xcusun xi camá hya xi cahme Jesucristu
44Hane hora vëhë ne, camajñu xu jingujyë ni. Cavetsihin xi camanchisen ne, quiji cani rë hisca fane jyan, 45tsëhë xi tsuhi ne, ha quihndë casuaain xu ndavá rë. Hacuaha ngajan cahntsua yungun xi matitjun, tsjian xi vitechja rë tingotjo rë Ndava Nina ne, catiyavasen xu. 46Hya xi camá ne, jercu hñu camaha xu ni cachja Jesús cuitjin:
―Ngayun Nahmi naha. Ntsun cuejñá hasen naha. ―Cuatjin xu cachja me.
Hane xi cavatju cachja me cuatjin ne, cahme xu me.
47Hane ngu capitán xi secun tiña xu jan ne, xi cavëë cha xcusun xi camá jan ne, casahmi jyë casahmi hnga cha Nina, cachja xu cha cuitjin:
―Quixi jain xi cha xi cuijyihi vi ne, tsajin jyë́ rë cha. ―Cuatjin xu cachja cha.
48Hane yëjë ni xutacjín xi camatangun me xi scutsejen xu me xcusun jan ne, xi cavatju cavëë me yëjë xcusun xi camá jan ne, cavuya me cafe xu me, ña yaha xu me rcu me ngatsë rë cjuachoho rë me. 49Peru yëjë ni xuta xi cavinga xu rë Jesús cojo yëjë yachjin xi cavetju me tsëhë distritu Galilea cojo Jesús ne, tsëhë cjin ni hinchacun cuaha xu me tivutsejen me xcusun xi tivatju Jesús.
Caseya nima Jesucristu cahntsua tsjun
50Hane tacun ngu xu me xi hmí rë José, ngu xuta nandya Arimatea, ngu nandya rë xuta tjë rë Israel. Me vëhë ngu xihin ndaja me hacuaha tsajin xu mé jyë́ rë me tjin. 51Hacuaha cachuyiin xu rë me sacuatjin caviyuju xutaxa rë xi yahnga jan cjuatacun rë me cojo xcusun xi casahmi me. Hacuaha José jan ne, jemu meje xu rë me xi cuinduva Nina sahmi me gubiernu. 52Ngajan xi me vëhë ne, quiji xu me xcun Pilatu, hane cafehya xu me nima Jesús. 53Hane xi casacu cahndë́ ne, quiji catsitujne me, sehe cavaxtë xu me ngu tsjian. Hya xi camá ne, quiji caveya xu me cahntsua ngu tsjun xi catjuhngui rë taha naxi, hacuaha hisca ngu xu nima cjëë seyaniji. 54Nixtin hya ne, vispra xu. Ha hisca meje cuechú xu hora xi cuisehen nixtin xi chjahájenda rë.
55Hane yachjin xi cojo xu me cavetjutangun me cojo Jesús ngajan Galilea ne, tjengui xu me quiji me cojo nima. Hane cavëë me tsjun hacuaha cavëë xu me hacutjin caseya nima. 56Hane xi cavuya me ne, cavëhëchjine xu me rqui cojo aceite xi ndaja jne tsëhë nima.
Hane xi camá nchujun jan, xi cavechú xu nixtin xi chjahájenda rë ne, caviyujujyuu xu me, sacuatjin vitexa ley rë Moisés.
Currently Selected:
San Lucas 23: maq
Highlight
Share
Copy
Want to have your highlights saved across all your devices? Sign up or sign in
© 1991, Wycliffe Bible Translators, Inc. All rights reserved.
