Salmos 65
65
Yuusru shuar ainati ememattaimka ameketme tusa timau
David kantamamu.
1Yuusa, ameka Siónnum pujuwaitme,
emematam amainmeka ametme,
shuar aina amina takarsatjame tusa
turamin ainaka metek umirtammain ainawai.
2Ameka ii ainati aujmaka antame.
Tura ashi nugkanmaya shuar ainaka ima aminig wininawai.
3Tunau takat nepettamkaisha, ame ina tunauri tsagkurkartame.
4Yuusru winau arti tusam etegkram,
amina emematramiartasa iruuntai jea pegkera nui
amijai pujustin ainatika
shir aneastin ainaji.
Tura ame ememattasa iruuntai jea pegkera nui pujusa
ame pegkerumea nu nekaa asar
shir aneastatji.
5Ina Yuusriya ametme ina uwemtikartinmeka,
tumau asam ina shuari aina waitat susauwaitme.
Nu turamun ashi nugkanmaya shuar aina
tura nayantsanam jeashat matsamin ainasha
ima aminak nekaspapita tusa enentaimturmainawai.
6Ame nain ainasha
amina senchirmijai najankauwaitme.
Tura asam muchittsuk atii tusam kuitamme.
7Ameka nayants tsukateakaisha imijnaitme.
Tura shuar aina aantar pampannaiya matsatusha,
pampannaitsuk matsamsarti tusam itatmamtiknaitme.
8Yuusru, nugka nagkatkamunam matsamin ainasha,
wainchatai aina amina senchirmijai iwainakminka,
nuna wainainak ashamainak kurainawai.
Etsa watainmaya aina, tura etsa akatainmaya ainasha shir anenak senchi chichainawai.
9Nugka ainasha kuitamnumka ameketme.
Yumisha yutumtikme,
tura árak ainasha tsapamtikme,
ame yumi yutumtikam nugka pegker jasmatai,
trigo ainasha shir tsapak nerenawai.
10Arak aina arattsar nugka taimu ainasha
ame yumi yutumtikam inijame,
árak aina nukap nerekarti tusam nuka turame.
11Ameka árak aina nerekarti tusam,
uwí nukapek yumi yutumtiknaitme.
12Ame turamu asa nain aya nugkak ainanmasha,
nupa aina tsapakar pegker jas ainawai.
Turamu asar nain ainasha shir iwarmamainawai.
13Tura nugka pegker ainanam tagku ainasha piakarai,
Tura nugka paka ainanmagka trigo aina nukap neren ainawai.
Nu aina shir anenak kantamainawai.#Sal 104.10-16
Currently Selected:
Salmos 65: hubDBL
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
