Salmos 66
66
Ashi nugkanmaya shuar ainatiram Yuus emematkurum kantamatarma tusa timau
1Ashi nugkanmaya shuar ainatiram shir aneakrum
Yuus emematkurum kantamatarma.
2Yuusa naari pegkera nu pachisrum emematkurum kantamatarma.
Tura nina imantriya nusha pachisrum kantamatarma.
3Yuus chicharkurum:
“Ame najankamu aina nuka shir pegker ainawai.
Tura ame ima senchirtin asaakmin,
amina kajertamin aina nuka ashamramainak,
aminig weamkartin ainawai.
4Ashi nugkanmaya shuar aina,
amina naarmin pachisar emematramainak
kantamawartin ainawai”.
5Shuar ainatin nekamtikramattsa,
Yuus najankamu aina nu,
tura wainchatai ainan iwainakua nusha enentaimtusrum iistarma.
6Yuus nayantsa ukuyua muku amajsauwaiti,
nu entsanam ina uuntri aina wekasar katiararu ainawai.
Tura asamtai Yuus shir anentsa emematiarmi.
7Yuuska senchirtin asa,
shuar ainan tuke inawai.
Tura shuar chichaman umichu aina nu wina pachittsar pegkerchau chichakcharti tusa ashi iiyawai.
8Ashi shuar ainatiram,
ina Yuusriya nu pegkernum chicharkatarma
tumakrum emematkurum kantamruatarma.
9Ni ii ainatinka jakai turamu asa,
shir kuitamramawaitji.
10Ina Yuusriya
ameka ima winakeash
umirtuina tusam nekapkartakum,
shuar jiru plata tutain jinum jia
pegker amajna numamtuk,
incha pegker amajkartusuitme.#1Pe 1.7
11Shuar kuntinan achiktasa
yaragken nenar ikuwa numamtuk,
nita shuari aina waitkasarti tusam
tsagkamkartukuitme.
Turukrata asaakmin shuar kijinan yanaki kijimak waitna numamtuk, ika waitu pujaji.
12Nita shuari aina nitan nepetkarti tusam tsagkamkartukuitme.
Ame turukrata asaakmin entsanam
jakeawa numamtin nekapsamiajai.
Tura ji keamunam egkeamua numamtin nekapsamiajai.
Turasha ame nugka pegkernum apujkartusuitme.
13-14Wii yaunchuk ashammainnum pujusan
ame yaintsakmin nagkaikinka,
ame emematku iruuntai jeanam wayan
tagkun maa epeakun ememattatjame tusan tinaitjam nuna umiktatjai.
15Turakun vaca aishmag nuweram ainan,
maan ashi epeattajai.
Chivo nuweram ainan, tura oveja ainancha jukin,
amina eme anentsa iiyakun maan ajamnaisattajai.
16¡Ashi atum ina Yuusri eme anentsa iin ainatiram taatarma!
Tumarum Yuus wina yainkamun
pachisan etserkai antuktarma.
17Wina Yuusrun untsukmiajai,
tura nina emematkun kantamruamiajai.
18Tunau takatnumag
enentaimsan pujakaigka
Yuuska wii aujmasha anturtumain amajtukchamayi.
19Turasha wii tumachu asamtai,
Yuus anturtuk yainkauwaiti.
20Tura nina anenkarin,
tura seamsha nakitrurchau asamtai,
Yuuska pegkernum pachisar chichartai atii.
Currently Selected:
Salmos 66: hubDBL
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
