Salmos 94
94
1Hneˉ DSAˉJØ̱Ø̱Hˈ kya̱a̱nꜙ hi̱ˉ te̱e̱hˉ jwɨɨ˜ kihꜗ dsaꜙ,
miˊjnääˈ kya̱a̱ꜗ jnäähꜗ heˉ jʉhˉga̱a̱ˉ heˉ jmeehˉ.
2Hneˉ hi̱ˉ la̱a̱ꜗ jwëëꜚ kihꜗ dsaˉ jmɨˉgyʉʉꜙ,
nooˉ mahꜗ te̱e̱hˋ jwɨɨ˜ kihꜗ hi̱ˉ jmää˜ hñiiꜘ ka̱a̱hˊ.
3Hneˉ DSAˉJØ̱Ø̱Hˈ kya̱a̱nꜙ,
¿haˉ ko̱hꜘ ji̱i̱hˈ lloo˜ heˉ cha̱a̱ˉ lluꜗ hi̱ˉ hñaaˉ dsëꜗ heꜘ?
4¿Lɨhꜘ baˊ lla̱a̱ꜙ heˉ hlëëhꜙ juuˈ wɨɨꜘ hi̱ˉ hñaaˉ dsëꜗ?
¿Lɨhꜘ baˊ lla̱a̱ꜙ heˉ jmääy˜ hñiiyꜘ ka̱a̱hˊ?
5DSAˉJØ̱Ø̱Hˈ kya̱a̱nꜙ, peerꜙ heˉsoyh˜ kihꜗ dsaˉ kya̱a̱hꜗ,
hiꜙ jmääy˜ saꜙ kye̱e̱ꜘ goˉte˜ hi̱ˉ hnaahˉ hneˉ.
6Jngëëyhꜙ dsaˉmëꜘ hnɨɨꜘ, jngëëyhꜙ dsaˉ hi̱ˉ goˉnääꜘ ʉ̱ʉ̱ꜘ,
läꜙkye̱ˉ gyʉ̱ʉ̱ˉ hnɨɨꜘ jngëëyhꜙ.
7Jäyhꜘ:
“Saꜙ jëë˜ Dio läꜙjëꜙ heˉ jmeeˉ jneˊ kihˈ dsaˉ kya̱a̱yꜗ,
niꜙ saꜙ kye̱ˉ Dio kwa̱a̱t˜ kiyhꜗ.”
8Waˊ läꜙngëëhꜘ hnähꜘ miihˉ, hnähꜘ hi̱ˉ saꜙ kyʉʉh˜ niꜙ miihˉ.
¿Lɨhꜘ baˊ läꜙchaˉ miihˉ hʉʉˊdsëˉ kyahꜗ hnähꜘ?
9Hi̱ˉ gaꜙjmeeꜘ toˉgwaˊ jneˊ, ¿cheˊ saꜙ nuuyꜗ?
Hi̱ˉ gaꜙjmeeꜘ mɨˈnëˊ jneˊ, ¿cheˊ saꜙ jë̱ë̱yꜗ jneˊ?
10Hi̱ˉ heeh˜ dsaˉ cha̱a̱ˉ ʉ̱ʉ̱ꜘ wɨɨꜘ,
¿cheˊ saꜙ heeyhꜗ jneˊ wɨɨꜘ?
Hi̱ˉ miˉtë̱ë̱ꜙ läꜙjë̱ë̱ꜙ jneˊ,
¿cheˊ saꜙ kyʉʉyh˜ haˉ läꜙ laꜗ tuhˉdsëˉ jneˊ?
11DSAˉJØ̱Ø̱Hˈ jnänˋ kyʉʉh˜ baˊ läꜙjëꜙ hʉʉˊdsëˉ heˉ jmeeꜙ dsaˉ jmɨˉgyʉʉꜙ.
Ñeˉ bihꜗ heˉ saꜙ jmääꜗ niꜙ miihˉ hʉʉˊdsëˉ kihꜗ dsaꜙ.
12DSAˉJØ̱Ø̱Hˈ kya̱a̱nꜙ, lluꜗ laꜗ kihꜗ dsaˉ hi̱ˉ heehˈ wɨɨꜘ.
Lluꜗ laꜗ kihꜗ hi̱ˉ miˉtë̱ë̱hˈ nʉʉhꜚ kyahꜗ.
13Läꜙja̱ˉ tä̱ä̱yhˊ cha̱a̱yˉ lluꜗ waˊraˉ jaꜗ jmɨɨˊ hlɨɨhꜗ,
taˊko̱ˉji̱i̱hˈ tä̱ä̱hˊ hi̱ˉ hñaaˉ dsëꜗ heꜘ jmeeꜙ toˉhø̱ø̱ˉ kihꜗ hñiiꜘ.
14Jëëhꜘ DSAˉJØ̱Ø̱Hˈ jnänˋ saꜙ jmääyꜗ taꜙ kooꜘ hi̱ˉ la̱a̱ꜗ kya̱a̱yꜗ,
ji̱hˊko̱hꜘ saꜙ be̱e̱yꜗ hi̱ˉ hnääyꜗ.
15Maꜙraꜙ heˉ llaꜗ baˊ Dio taˊ läꜙko̱o̱ˉ lleˋ kihˈ.
Ja̱ˉgaˊ naꜙ jähꜙ läꜙjë̱ë̱ꜙ hi̱ˉ llu̱u̱ꜗ:
“Maꜙraꜙ heˉ ngɨɨhꜗ baˊ Dio kwa̱a̱t˜ kihꜗ dsaˉ
läꜙko̱o̱ˉ lleˋ kihˈ.”
16¿Hi̱i̱ˉ yaˉhë̱ë̱ˈ yaˊlä̱ä̱ˊ jnäꜘ jeeˊ kihˈ hi̱ˉ hñaaˉ dsëꜗ?
¿Haˉ taꜙ jäꜙ hi̱ˉ kwaꜗ beꜘ kinꜙ
mahꜗ lä̱ä̱nꜘ jeeˊ kihˈ hi̱ˉ jmeeꜙ heˉ hlɨɨhˈ?
17Waˊraˉ jähꜘ kihꜗ DSAˉJØ̱Ø̱Hˈ jnänˋ saꜙ gaꜙkwaꜘ beꜘ kinꜙ,
läꜙcha̱hꜘ ja̱ˉ maˊ lloon˜ jeeˊ saꜙ jnäꜘ saꜙ nʉʉhꜘ.
18Läꜙko̱o̱ˉ maˊ jëën˜ ngooꜗ gaꜙta̱hnꜘ goˉte˜,
maˊja̱ˉ gaꜙkwahˊ beꜘ kinꜙ, hneˉ DSAˉJØ̱Ø̱Hˈ kya̱a̱nꜙ,
kihꜗ heˉ läˉñihꜘ hohꜘ jnäꜘ.
19Läꜙko̱o̱ˉ maˊ jmeenꜙ chaˉmiihˉ hʉʉˊdsëˉ,
hneˉ gaꜙjmeehˊ gaꜙnøhꜗ dsënꜙ, heˉja̱ˉ jë̱ë̱ˉ baˊ dsënꜙ.
20¿Cheˊ jwaꜚ jmeehˈ ko̱ˉjø̱hꜘ kya̱a̱hˊ dsaˉtaˊ hi̱ˉ jmeeꜙ heˉ hlɨɨhˈ?
¿Cheˊ jwaꜚ kwëëh˜ hohꜘ kya̱a̱hˊ dsaˉtaˊ hi̱ˉ jähꜘ kyʉʉh˜ ley mahꜗ heeyh˜ dsaˉ wɨɨꜘ?
21Dsaˉta̱a̱yhˋ juuˈ kweeˉ mahꜗ jmeeyhꜙ hi̱ˉ llu̱u̱ꜗ
hiꜙ bä̱ä̱yhˉ dsooˊ hi̱ˉ saꜙ chaˉ maˉjmeeꜘ niꜙ miihˉ.
22Pero DSAˉJØ̱Ø̱Hˈ kya̱a̱nꜙ kwayꜙ dsaˉhenꜘ jeeˊ saꜙ hiiꜘ gooˉ.
Dio kya̱a̱nꜙ hi̱ˉ chaˉ oˉjø̱hꜙ dsëˉ kinꜙ kya̱a̱hˊ,
la̱a̱yꜗ läꜙko̱o̱ˉ ku̱u̱ˊ hlooˉ kiꜙ jnäꜘ.
23Hi̱ˉ heꜘ jmeeꜗ tä̱hꜙ hi̱ˉ hñaaˉ dsëꜗ heꜘ
kya̱a̱hˊ ja̱ˉbaˊ heˉ hlɨɨhˈ heˉ maˊ jmeeyˈ.
Dsaˉlla̱a̱yꜙ goˉte˜ jeeˊ tä̱ä̱yhˊ jwëꜘ hlɨɨhˈ.
Jëëhꜘ DSAˉJØ̱Ø̱Hˈ jnänˋ he̱e̱yꜗ goˉte˜ hi̱ˉ heꜘ.
Currently Selected:
Salmos 94: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
