Salmos 83
83
1Hneˉ Dio kya̱a̱nꜙ, ¿cheˊ ko̱o̱ˉ jëëhꜘ baˊ hneˉ?
¿Cheˊ ko̱o̱ˉ ka̱a̱hˋ baˊ hneˉ, cheˊ ko̱o̱ˉ ñehꜘ tiiˊ baˊ?
2Jëëˋ daˊ haˉ läꜙ jmeeꜙ hi̱ˉ naˉhøøhˊ kyahˈ,
tä̱ä̱yhˊ tooyh˜ mɨɨhˊ tiˉchooyꜙ juuˈ kya̱a̱hˊ hneˉ.
3Toˉkëˊ baˊ maˉhnooyhˉ haˉ läꜙ jmeeyꜗ kihꜗ dsaˉ kya̱a̱hꜗ.
Maˉta̱a̱yhˋ juuˈ kweeˉ haˉ läꜙ jmeeyꜗ kihꜗ hi̱ˉ naˉlle̱e̱hˊ kya̱a̱hˈ.
4Maˉjmeeyꜘ hʉʉˊdsëˉ yaˉnääyꜘ he̱e̱yꜗ goˉte˜ dsaˉ kya̱a̱hꜗ.
Läꜙja̱ˉ moꜙsoꜙ hɨɨꜗ gaˊ juuꜗ kya̱a̱ꜗ jnäähˈ dsaˉ Israel.
5Maˉllaꜙ dsëyꜗ te̱e̱yꜗ kya̱a̱hˊ hneˉ.
Maˉta̱a̱yhˋ juuˈ kweeˉ
mahꜗ jmeeyꜗ ko̱o̱ˉ nääꜗ baˊ jeeˊ läꜙjë̱ë̱yꜙ.
6Dsaˉ hi̱ˉ cha̱a̱ˉ Edom, hiꜙ dsaˉ kya̱a̱ꜗ Ismael,
saˊju̱ˉ kya̱a̱ꜗ Moab hiꜙ saˊju̱ˉ kya̱a̱ꜗ Agar,
7dsaˉ hi̱ˉ cha̱a̱ˉ Gebal, hi̱ˉ cha̱a̱ˉ Amón, hi̱ˉ cha̱a̱ˉ Amalec,
dsaˉ Filisteo hiꜙ dsaˉ hi̱ˉ cha̱a̱ˉ Tiro maˉtä̱ä̱hˊ kya̱a̱yhˊ.
8Läꜙja̱ˉ dsaˉ Asirio maˉjmeeyꜘ ko̱ˉjø̱hꜘ kya̱a̱yhˊ,
maˉsaˉ maˉjwa̱yhꜘ juuˈ kya̱a̱hˊ saˊju̱ˉ kihꜗ Lot.
9Jmeeˊ kiyhˈ läꜙko̱hꜘ gaꜙjmeehˊ kihˈ Madián.
Jmeeˊ kiyhˈ läꜙko̱hꜘ gaꜙjmeehˊ kihˈ Sísara,
hiꜙ kihꜗ Jabín, hi̱ˉ gaꜙju̱u̱ꜗ jeeˊ ngëëꜙ jmɨˉgwaˉ heˉ che̱e̱ˉ Cisón.
10Waˊ ju̱u̱ꜘ dsaˉ heꜘ läꜙko̱hꜘ gaꜙju̱u̱ꜗ dsaˉ hi̱ˉ maˊ tä̱ä̱hˊ Endor, hi̱ˉ gaꜙjngaahˉ jmɨˉngoꜗ kihꜗ,
mahꜗ gaꜙlɨɨꜗ läꜙko̱hꜘ tʉˊhohꜗ kihꜗ hwaꜗ.
11Waˊ ju̱u̱ꜘ hi̱ˉ kye̱ˉ nëˊ kiyhˈ,
läꜙko̱hꜘ gaꜙju̱u̱ꜗ Oreb kya̱a̱hˊ Zeeb.
Waˊ ju̱u̱ꜘ dsaˉka̱a̱hˊ kya̱a̱yˈ,
läꜙko̱hꜘ gaꜙju̱u̱ꜗ Zeba kya̱a̱hˊ Zalmuna.
12Dsaˉ heꜘ jähꜘ:
“Waˊ jmeenˊ jnänˋ jeeˊ laˈ hwaꜗ kihꜗ Dio.”
13Hneˉ Dio kya̱a̱nꜙ, waˊ jä̱ꜘ lleꜘ gyʉ̱hˊ dsaˉ heꜘ,
waˊ së̱ë̱yhˉ läꜙko̱hꜘ mooˉ ki̱i̱ˉ.
14Läꜙko̱hꜘ kooˉ mohꜘ, läꜙja̱ˉ waˊ ka̱a̱ˉ dsaˉ heꜘ.
Läꜙko̱hꜘ dsaˉllaꜙ jeeˊ kooˉ, läꜙja̱ˉ waˊ lla̱a̱ˉ dsaˉ heꜘ.
15Waˊ jmeeꜘ gooˉ kiyhꜗ kya̱a̱hˊ lleꜘ täꜘ kyahꜗ.
Jʉʉhˊ kiyhˈ kya̱a̱hˊ jmaˈ lleꜘ.
16Hneˉ DSAˉJØ̱Ø̱Hˈ kya̱a̱nꜙ, jmeeˊ jä̱yˈ oˉhihꜙ,
mahꜗ dsaˉje̱e̱yh˜ kya̱a̱hˊ hneˉ.
17Waˊ jä̱yꜘ kya̱a̱hˊ oˉhihꜙ läꜙjëꜙ johꜘ jmɨɨˊ chaˉ.
Waˊ ka̱hˈ waˊ gwë̱hˈ hʉʉˊdsëˉ kiyhꜗ, waˊ ju̱u̱yꜘ goˉte˜.
18Waˊ läˉñeyˉ ja̱a̱ˉ hneˉ baˊ la̱a̱hˈ DSAˉJØ̱Ø̱Hˈ kya̱a̱nꜙ.
Ja̱a̱ˉ hneˉ baˊ hi̱ˉ la̱a̱ꜗ Dio jø̱ø̱hˈ läꜙka̱a̱ˉ läꜙjʉhꜗ jmɨˉgyʉʉꜙ.
Currently Selected:
Salmos 83: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
