Salmos 81
81
1Waˊ hänˊ kihˈ Dio hi̱ˉ la̱a̱ꜗ beꜘ jnänˋ,
waˊ jë̱ë̱ˉ dsëˉ jneˊ hänˊ ki̱ˉga̱a̱ˉ kihꜗ Dio kya̱a̱ꜗ Jacob.
2Waˊ hänˊ su̱ꜚ kihꜗ Dio hiꜙ waˊ banˊ pandero.
Waˊ nʉʉhꜘ naˊhñaahꜗ heˉ hi̱i̱ˊ tu̱ˉ kya̱a̱hˊ arpa.
3Jmeeˊ hi̱i̱ˊ luuꜘ hooˊ maˊ he̱e̱hˊ sɨhˉ
hiꜙ läꜙja̱ˉ maˊ hñaahˊ sɨhˉ,
jëëhꜘ heˉ ja̱ˉ laꜗ jmɨɨˊ jʉʉhˉ jnänˋ.
4Jëëhꜘ heˉ laˉ ja̱ˉ madaꜚ heˉ gaꜙjmeeꜘ Dio kihꜗ dsaˉ Israel.
Läꜙja̱ˉ laꜗ hihꜙ heˉ gaꜙjmeeꜘ Dio kya̱a̱ꜗ Jacob.
5Läꜙja̱ˉ gaꜙjmeeꜘ Dio kihꜗ dsaˉgooˉ jneˊ
mahꜗ läꜙdsooh˜ dsënˉ haˉ läꜙ gaꜙhwë̱ë̱ˉ dsaˉ maˉgyu̱hˉ jnänˋ hwaꜗ Egipto.
Gaꜙnuunꜗ ko̱o̱ˉ lleꜚ dsaˉ hi̱ˉ saꜙ kyu̱u̱nꜙ, maˊ jähꜘ:
6“Maˉjñuuhnˋ løøˈ heˉ maˊ kye̱hˊ hnähꜘ, hiꜙ maˉlä̱ä̱nˋ hnähꜘ kihꜗ løøˈ hiiˉ heˉ maˊ jmeeꜙ jwɨɨhˋ kyahˈ hnähꜘ.
7Maˊ jëëhꜘ hnähꜘ wɨɨꜘ, gaꜙteehˉ hnähꜘ kinꜙ,
hiꜙ jnäꜘ gaꜙlä̱ä̱nˋ hnähꜘ.
Gaꜙnuuꜗ baˊ jnäꜘ kyahꜗ hnähꜘ
läꜙ gaꜙtëꜘ jeeˊ jniiꜘ jeeˊ maˊ hɨ̱ɨ̱˜ ñihꜗ.
Gaꜙjëënꜗ haˉ läꜙ laꜗ tuhˉhohꜘ hnähꜘ
läꜙ maˊ gaꜙta̱a̱hˋ hnähꜘ chaˊhooˊ jmɨɨˉ Meriba.
8Hnähꜘ dsaˉ kya̱a̱nꜙ, nʉʉˉ kihꜗ läꜙjëꜙ heˉ hlë̱ë̱hnˊ hnähꜘ.
Waˊraˉ jähꜘ kihꜗ nuuhˈ baˊ hnähꜘ kinꜙ dsaˉ Israel.
9Taꜙ ta̱a̱hꜙ chaˊnehꜙ kyahꜗ hnähꜘ dio hi̱ˉ naˉla̱a̱ꜚ ka̱a̱h˜ dsaˉ,
niꜙ taꜙ jmeeˉ hnähꜘ jʉʉhˉ kihꜗ dio kya̱a̱ꜗ dsaꜙ.
10Jnäꜘ heꜘ la̱a̱nꜗ DSAˉJØ̱Ø̱Hˈ kya̱a̱hꜗ hiꜙ Dio kya̱a̱hꜗ,
hi̱ˉ gaꜙhwë̱ë̱ꜗ hnähꜘ hwaꜗ Egipto.
Kwaˊ daˊ hnähꜘ jwëˈ
mahꜗ miˊjä̱ä̱nꜚ hnähꜘ chaˉmiihˉ.
11ʼPero dsaˉ kya̱a̱nꜙ saꜙ gaꜙnuuyꜘ juuˈ kinꜙ.
Dsaˉ Israel, läꜙ maˉtä̱ä̱yhˊ ja̱ˉbaˊ cha̱a̱yhˉ kya̱a̱hˊ jnäꜘ.
12Heˉja̱ˉ gaꜙkwanꜗ jwëˈ
waˊ tä̱ä̱hˊ bihꜗ kihꜗ hwehˉ tuhˉdsëyꜗ.
Heˉja̱ˉ läꜙ maˉtä̱ä̱hˊ bihꜗ läꜙ hnøøyꜗ hñiiyꜘ.
13Waˊraˉ jähꜘ kihꜗ dsaˉ kya̱a̱nꜙ gaꜙnuuꜘ kinꜙ,
waˊraˉ jähꜘ kihꜗ dsaˉ Israel läꜙ maˊ tä̱ä̱hˊ bihꜗ kya̱a̱hˊ jnäꜘ.
14Läꜙ cha̱hꜘ ja̱ˉ maˊ lla̱a̱nꜚ taꜙ hwaꜗ hi̱ˉ naˉhøøhˊ kiyhˈ, hiꜙ maˊ heehnꜚ wɨɨꜘ hi̱ˉ naˉhøøhˊ heꜘ.”
15Läꜙjë̱ë̱ꜙ hi̱ˉ naˉhøøhˊ kihˈ Dio maˊ sa̱a̱ˈ chaˊnëyˊ.
Läꜙ maˉnaˉbä̱ä̱yhˋ ja̱ˉbaˊ kya̱a̱hˊ dsoˊkyeˉ kiyhꜗ läꜙjëꜙ johꜘ jmɨɨˊ chaˉ.
16Dio maˊ ä̱ä̱hꜙ dsaˉ kya̱a̱ꜗ kya̱a̱hˊ heˊñiihꜚ heˉ lluꜗ chaˉgaˊmiihˉ,
hiꜙ kya̱a̱hˊ tahˈ heˉ chaˉ mohꜘ maˊ ka̱yˈ yaˊjøøꜚ.
Currently Selected:
Salmos 81: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
