Salmos 57
57
1Hneˉ Dio kya̱a̱nꜙ, waˊ läˉñihꜘ hohꜘ jnäꜘ,
jëëhꜘ jmɨˉlleꜘ kinꜙ kye̱ˉ oˉjø̱hꜙ dsëˉ kyahꜗ.
Hiꜙ jeeˊ hiiꜘ hi̱i̱hˈ kyahꜗ hneˉ baˊ lä̱ä̱nˊ hñiinꜙ
läꜙji̱i̱hˈ ngëëꜘ heˉ jmeeꜙ gooˉ.
2Chu̱u̱nꜘ kya̱a̱hˊ Dio hi̱ˉ gyaꜗ gyʉʉhˈ,
hi̱ˉ heꜘ baˊ kwaꜙ beꜘ kinꜙ kihꜗ läꜙjëꜙ.
3Läꜙ gaꜙtëꜘ gyʉʉhˈ Dio che̱e̱ꜗ beꜘ kihꜗ mahꜗ lä̱ä̱yꜗ jnäꜘ.
Lä̱ä̱yꜗ jnäꜘ kihꜗ hi̱ˉ cha̱a̱ˈ kaahˋ kinꜙ.
Miˉjnääyꜙ heˉ hnääyꜗ jnäꜘ hiꜙ miˉteꜗ bihꜗ juuˈ kiyhꜗ.
4Läꜙko̱hꜘ heˉ hä̱ä̱nˊ tä̱ä̱ꜘ jeeˊ kihˈ león baˊ laˈ kinꜙ.
Läꜙko̱o̱ˉ heˉ naˉkya̱a̱nˈ hwaꜗ jeeˊ kihˈ dsaˉ hñaaˉ dsëꜗ hi̱ˉ hlëëhꜙ juuˈ wɨɨꜘ jmahꜗ baˊ.
Chaˊja̱yˊ laˈ läꜙko̱hꜘ ñeˈchʉ̱ʉ̱hˉ, hiꜙ laꜗ läꜙko̱o̱ˉ flecha kaˉlähꜘ.
Naˊsɨɨyhˊ laˈ läꜙko̱hꜘ ñeˈtuuhꜚ naˉjniiˊ.
5Hneˉ Dio kya̱a̱nꜙ,
waˊ laˈ jʉʉhˉ kyahꜗ hneˉ gyʉʉhˈ jmɨˉgyʉʉꜙ.
Läꜙja̱ˉ waˊ jmeeꜘ hi̱ˉ tä̱ä̱hˊ hwaˈ laˉ kaˉlähꜘ.
6Hi̱ˉ naˉhøøhˊ kinꜙ gaꜙhɨɨyꜘ ko̱o̱ˉ läꜘ kinꜙ,
heˉja̱ˉ moꜙsoꜙ manꜙ haˉ läꜙ jmeenˋ.
Gaꜙjmeeyꜘ ko̱o̱ˉ tooˉ jeeˊ maˊ tä̱hnꜙ,
pero ja̱ˉbaˊ jeeˊ ja̱ˉ gaꜙta̱yhꜘ hñiiyꜘ.
7Läꜙlluꜗ heˉ chaˉ oˉjø̱hꜙ dsëˉ kinꜙ kya̱a̱hˊ hneˉ Dio kya̱a̱nꜙ,
heˉja̱ˉ maˉllaꜙ dsënꜙ hänˋ kyahˈ läꜙka̱a̱ˉ tuhˉdsënꜙ.
8Miˉjnøønꜚ mɨˈnënꜙ, mahꜗ miˊllunˋ tu̱ˉ kinꜙ
mahꜗ hänˋ kyahˈ kya̱a̱hˊ tu̱ˉ hiꜙ salterio kinꜙ.
Tiih˜ gaˊ noonˋ gaˊ maˉjnäꜗ.
9Dsaˉjø̱ø̱hˈ kya̱a̱nꜙ hänˋ kyahˈ jeeˊ tä̱ä̱hˊ dsaˉ.
Hänˋ kyahˈ jeeˊ kihˈ dsaˉ hi̱ˉ cha̱a̱ˉ taꜙ jeeˊ jyohꜘ.
10Läꜙko̱hꜘ gyʉʉhˈ jmɨˉgyʉʉꜙ jʉʉhˉ heˉ läˉñihꜘ hohꜘ,
heˉ miˉtehˋ juuˈ kyahꜗ dsë̱ë̱ꜗ läꜙ gaꜙtëꜘ jeeˊ hiiꜘ jniiꜘ.
11Hneˉ Dio kya̱a̱nꜙ,
waˊ laˈ jʉʉhˉ kyahꜗ hneˉ gyʉʉhˈ jmɨˉgyʉʉꜙ,
läꜙja̱ˉ waˊ laˈ nëˊ hwaˈ laˉ kaˉlähꜘ.
Currently Selected:
Salmos 57: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
