Salmos 56
56
1Hneˉ Dio kya̱a̱nꜙ, waˊ läˉñihꜘ hohꜘ jnäꜘ.
Jëëhꜘ cha̱a̱ˈ dsaˉ kaahˋ kinꜙ
hnooyhˉ haˉ läꜙ jeeˊ jmeeyhꜙ jnäꜘ.
Te̱e̱y˜ kya̱a̱hˊ jnäꜘ,
hlëëyhꜙ juuˈ paˊjnaahˊ läꜙjëꜙ jmɨɨˊ baˊ.
2Hi̱ˉ naˉhøøhˊ läꜙjëꜙ jmɨɨˊ heˉsoyh˜ kinꜙ.
Jëëhꜘ jwë̱ë̱ꜘ la̱a̱ꜗ hi̱ˉ te̱e̱˜ kya̱a̱hˊ jnäꜘ,
kihꜗ heˉ jmääy˜ hñiiyꜘ ka̱a̱hˊ.
3Jmɨɨˊ maˊ gyanˊ gohnꜙ,
kye̱nˊ oˉjø̱hꜙ dsëˉ kyahꜗ.
4Jmeenˋ jʉʉhˉ kihꜗ juuˈ kihꜗ Dio,
kihꜗ bihꜗ chaˉ oˉjø̱hꜙ dsëˉ kinꜙ, niꜙ miihˉ saꜙ gohnꜙ.
¿Heeˉ leꜘ jmeeꜗ dsaˉ kinꜙ?
5Läꜙjëꜙ jmɨɨˊ baˊ miˉsɨɨyꜗ juuˈ kinꜙ.
Ko̱o̱ˉ taˊ jmeeꜙ hʉʉˊdsëˉ heˉ jmeeyꜗ hlɨɨhˈ kinꜙ.
6Taꜙ laꜙ taꜙ jnøꜙ baˊ tä̱ä̱y˜ jnäꜘ jeeˊ naˉhmääˊ,
cha̱a̱yˈ kaahˋ kinꜙ jø̱ø̱y˜ lɨhꜘ baˊ jngëëyhˈ jnäꜘ.
7Hneˉ Dio kya̱a̱nꜙ, taꜙ kwaˉ jwëˈ lä̱ä̱ꜘ
läꜙjë̱ë̱ꜙ hi̱ˉ jmeeꜙ chaˉmiihˉ heˉ hlɨɨhˈ.
Heˉ yaˉjë̱ë̱ˈ hohꜘ kya̱a̱yhˊ,
jwä̱ä̱yꜙ taꜙ hwaꜗ läꜙjë̱ë̱ꜙ hi̱ˉ heꜘ.
8Ñehˊ baˊ hneˉ johꜘ ji̱i̱h˜ saꜙ gaꜙkyʉ̱ʉ̱nꜗ kihꜗ hi̱ˉ heꜘ.
Hneˉ baˊ hi̱ˉ jʉhˊlä̱ä̱hˊ jmɨɨˉ heˉ tu̱u̱ˉ mɨˈnënꜙ.
¿Cheˊ saꜙ naˉsɨɨˉ nëˊ moˊjeˉ kyahꜗ?
9Cha̱hꜘ baˊ dsaˉje̱e̱h˜ taꜙ kaˊluuˊ hi̱ˉ naˉhøøhˊ kinꜙ,
waˊraˉ gaꜙngɨɨnˋ beꜘ kyahꜗ.
Jnäꜘ manꜙ kweeˉ Dio chehꜗ kya̱a̱hˊ jnäꜘ.
10Jmeenˋ jʉʉhˉ kihꜗ juuˈ kihꜗ Dio.
Jmeenˋ jʉʉhˉ kihꜗ juuˈ kihꜗ DSAˉJØ̱Ø̱Hˈ jnänˋ.
11Kihꜗ Dio baˊ chaˉ oˉjø̱hꜙ dsëˉ kinꜙ, niꜙ miihˉ saꜙ gohnꜙ.
¿Heeˉ leꜘ jmeeꜗ dsaˉ kinꜙ?
12Saꜙ gaaꜘ dsënꜙ hmoohˊ heˉ gaꜙjmeenꜗ kya̱a̱hˊ hneˉ.
Maꜙraꜙ heˉ miˉteeˋ baˊ jnäꜘ kyahˈ.
Maꜙraꜙ heˉ hänˋ kyahꜗ hneˉ Dio kya̱a̱nꜙ,
13läꜙlluꜗ heˉ maˉlä̱ä̱hˋ jnäꜘ heˉ maˊ ju̱u̱nꜘ
hiꜙ maˉlä̱ä̱hˋ jnäꜘ heˉ maˊ tä̱hnꜙ,
heˉja̱ˉ ngooꜗ baˊ cha̱a̱nˉ jmɨˉgyʉʉꜙ laˉ
läꜙko̱o̱ˉ miˉjä̱ä̱ꜗ Dio jnäꜘ.
Currently Selected:
Salmos 56: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
