Salmos 50
50
1Dio hi̱ˉ jø̱ø̱hˈ gaˊ kihꜗ jeeˊ läꜙjë̱ë̱ꜙ dio hi̱ˉ naˉla̱a̱ꜚ,
hñiiꜘ DSAˉJØ̱Ø̱Hˈ jnänˋ maˉhlëëhꜘ.
Maˉjø̱ø̱yhˉ läꜙjë̱ë̱ꜙ dsaˉ hi̱ˉ tä̱ä̱hˊ hwaˈ laˉ,
hi̱ˉ tä̱ä̱hˊ taꜙ jeeˊ dsaˉhyaꜙ hyooˉ,
hiꜙ läꜙja̱ˉ hi̱ˉ tä̱ä̱hˊ läꜙ gaꜙtëꜘ taꜙ jeeˊ dsaˉhmääˋ.
2Dio miˉjnääꜙ jmëëꜗ kihꜗ taꜙ mohꜘ Sión,
taꜙ jeeˊ jwɨɨˉ heˉ jnäꜘ naˊhñaahꜗ.
3Dio jnänˋ jä̱hꜘ pero saꜙ jä̱yhꜘ toˉkëˊ.
Taꜙ chaˊnëyˊ jäꜙ ko̱o̱ˉ jeˉ heˉ jngɨɨhꜙ, läꜙkuˊ läꜙji̱i̱ꜗ kiyhꜗ hiiꜘ lleꜘ täꜘ.
4Jø̱ø̱yhꜙ hi̱ˉ tä̱ä̱hˊ gyʉʉhˈ hwaˈ mahꜗ dsaˉta̱a̱yhˋ jëëyˈ
haˉ läꜙ llaꜗ Dio taˊ kihˈ hi̱ˉ la̱a̱ꜗ kya̱a̱yꜗ.
5Gaꜙjäyhꜘ: “Jø̱ø̱hˋ hi̱ˉ naˉjngëëˈ kya̱a̱nꜙ.
Jëëhꜘ hi̱ˉ heꜘ, kya̱a̱hˊ heˉ gaꜙtʉ̱ʉ̱yꜗ jmaꜚ jahꜘ gaꜙjmeeyꜘ ko̱o̱ˉ hmoohˊ kya̱a̱hˊ jnäꜘ.”
6Gyʉʉhˈ jmɨˉgyʉʉꜙ miˉjnääꜙ heˉ jmeeyꜙ heˉ lluꜗ jmahꜗ.
Ja̱a̱ˉ hñiiꜘ baˊ Dio la̱a̱ꜗ jwëëꜚ.
7“Nʉʉˉ hnähꜘ dsaˉ Israel hi̱ˉ la̱a̱ꜗ jwɨɨˉ kinꜙ,
jnäꜘ heꜘ la̱a̱nꜗ Dio kya̱a̱hꜗ.
Naꜗ miˊjnäänˈ heˉ maˉhlä̱ä̱hˉ hnähꜘ kya̱a̱hˊ jnäꜘ.
8Saꜙ jʉʉhnˊ kyahˈ hnähꜘ kihꜗ heˉ kwa̱a̱hꜙ jahꜘ
niꜙ heˉ ka̱a̱ꜙ jahꜘ tä̱ä̱ꜘ nëˊ naˊhyooꜘ.
9Saꜙ cha̱a̱ˉ hi̱ˉ jwa̱hnꜚ gyʉ̱ʉ̱ˉ kyaˊ dsooˈ kya̱a̱hꜗ hnähꜘ
niꜙ chivo kya̱a̱hꜗ hnähꜘ.
10Jëëhꜘ, kya̱a̱ꜙ baˊ jnäꜘ la̱a̱ꜗ läꜙjë̱ë̱ꜙ jahꜘ hi̱ˉ cha̱a̱ˉ nehꜙ nuuꜙ, läꜙja̱hꜘ jahꜘ hi̱ˉ cha̱a̱ˉ mohꜘ.
11Kyu̱u̱ꜙ baˊ jnäꜘ läꜙjë̱ë̱ꜙ ta̱ˈ hi̱ˉ hë̱ë̱ꜙ,
hiꜙ läꜙjë̱ë̱ꜙ jahꜘ hi̱ˉ gaꜙnääˊ nehꜙ nuuꜙ.
12Waˊraˉ jähꜘ kihꜗ kyo̱hnꜙ niꜙ saꜙ jwë̱ë̱hnꜚ hnähꜘ.
Jëëhꜘ kiꜙ baˊ jnäꜘ laꜗ jmɨˉgyʉʉꜙ
kya̱a̱hˊ läꜙjëꜙ heˉ chaˉ nëˊ kihˈ.
13Saꜙ jmeeꜙ biiꜗ kinꜙ kwëëhˈ jnäꜘ ngoꜗ kihꜗ jahꜘ
mahꜗ kuhnˋ niꜙ jmaꜚ jahꜘ heˉ huhnˋ.
14Jeeˊ läꜙjëꜙ heˉ hnoonꜗ kwëëhˈ jnäꜘ, häˊ hnähꜘ kinꜙ,
hiꜙ miˊtehˋ hnähꜘ heˉ maˉbä̱ä̱hˋ hñaahˈ kya̱a̱hˊ jnäꜘ hi̱ˉ gyaꜗ gyʉʉhˈ.
15Chu̱u̱ˊ hnähꜘ kya̱a̱hˊ jnäꜘ läꜙ maˊ cha̱a̱hˉ heˉ wɨɨꜘ.
Jnäꜘ lä̱ä̱nˊ hnähꜘ mahꜗ jmeehˈ hnähꜘ jʉʉhˉ kinꜙ.”
16Pero Dio sɨɨyhꜙ hi̱ˉ hñaaˉ dsëꜗ heꜘ:
“¿Hi̱i̱ˉ kwaꜙ jwëˈ heˉ gaꜙlloohꜘ gaˊ hneˉ hlëëhˊ kihꜗ nʉʉhꜚ kinꜙ mahꜗ saꜙ miˉtehˋ,
hiꜙ gaꜙlloohꜘ gaˊ hneˉ hlëëhˊ kihꜗ hmoohˊ heˉ gaꜙjmeenꜗ?
17Hneˉ hi̱ˉ saꜙ tɨh˜ dsëꜗ heˉ jʉʉhnˊ kyahˈ,
hneˉ hi̱ˉ saꜙ toohˉ taˊ juuˈ kinꜙ.
18Waˊraˉ gaꜙjë̱ë̱hˋ ja̱a̱ˉ hi̱ˉ hɨ̱ɨ̱ˉ,
naꜗko̱hꜘ jmeehˈ ko̱ˉjø̱hꜘ kya̱a̱yhˊ.
Ja̱ˉbaˊ läꜙja̱ˉ jmeehˈ kya̱a̱hˊ hi̱ˉ hñaaˉ dsëꜗ.
19Heˉ hlɨɨhˈ jmahꜗ hiꜙ juuˈ taˉjuuˈ baˊ hwëëˉ toˊhoohˊ.
20Gaꜙlloohꜘ gaˊ hneˉ hlëëhˊ wɨɨꜘ kihꜗ ø̱ø̱hꜗ
hiꜙ koohꜘ juuˈ haˉ läꜙ tä̱ä̱hˊ jo̱o̱ꜘ maaˋ kya̱a̱hˈ.
21Läꜙjëꜙ heˉ naˉ maˉjmeehˊ
taˊko̱ˉji̱i̱hˈ ko̱o̱ˉ taˉjëë˜ baˊ jnäꜘ.
Heˉja̱ˉ gaꜙjmeehˊ hʉʉˊdsëˉ, kweeˉ baˊ la̱a̱nˈ kya̱a̱hˊ hneˉ.
Pero naꜗ toꜙloꜙnëhˊ hnëënꜚ hneˉ
mahꜗ ngɨɨnˊ kwa̱a̱t˜ kyahꜗ.
22ʼWaˊ läꜙngëëhꜘ hnähꜘ kweeˉ heˉ laˉ,
hnähꜘ hi̱ˉ maˉgaaꜘ dsëꜗ kihꜗ Dio,
naꜗ saꜙ gaˊ maˉjmäänꜙ hnähꜘ jwɨˊdsuhꜗ,
haˉ gaˊ moꜙtoꜙ jäꜙ hi̱ˉ lä̱ä̱ꜗ hnähꜘ.
23Hi̱ˉ häꜙ kinꜙ kwëëyh˜ jnäꜘ tiˊhmaahˊ,
hi̱ˉ heꜘ baˊ jmeeꜙ jʉʉhˉ kinꜙ.
Läꜙja̱ˉ hi̱ˉ tä̱ä̱hˊ ko̱o̱ˉ hwehˉ kya̱a̱hˊ juuˈ kinꜙ,
jnäꜘ lä̱ä̱ˊ jnihꜘ”, gaꜙjähꜘ Dio.
Currently Selected:
Salmos 50: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
