Salmos 51
51
1Hneˉ Dio kya̱a̱nꜙ,
waˊ läˉñihꜘ hohꜘ kinꜙ läꜙlluꜗ heˉ hnaahꜙ jnäꜘ.
Cheꜗ dsoˊkyeˉ kinꜙ läꜙlluꜗ heˉ hnaahꜙ jnäꜘ chaˉmiihˉ.
2Gye̱e̱hˋ jnäꜘ, cheꜗ dsoˊkyeˉ kinꜙ,
mahꜗ jä̱nꜙ naˉjngëëˈ goˉte˜.
3Jëëhꜘ saꜙ maˉhmänꜗ niꜙ miihˉ juuˈ heˉ cha̱a̱hnˉ kya̱a̱hˊ hneˉ.
Peerꜙ jmeeꜙ jwɨɨhˋ kinꜙ läꜙjëꜙ dsoˊkyeˉ.
4Läꜙjëꜙ heˉ hlɨɨhˈ heˉ gaꜙjmeenꜗ kihꜗ dsaˉ,
heˉ gaꜙhlä̱ä̱hnˉ kya̱a̱hˊ hneˉ baˊ ja̱ˉ,
hneˉ baˊ heꜘ hi̱ˉ gaꜙjmeehnˋ.
Gaꜙjmeenꜗ heˉ saꜙ jnäꜘ lluꜗ kyahꜗ,
heˉja̱ˉ saꜙ naˉhe̱e̱ꜚ juuˈ kyahꜗ läꜙko̱o̱ˉ jmeehˈ kinꜙ.
Kya̱a̱hˊ juꜗdsooꜘ jmahꜗ llahˉ taˊ.
5Maˉhñaaˉ dsënꜙ läꜙko̱hꜘ gaꜙläꜙcha̱a̱nꜙ.
Jä̱ä̱ꜗ saꜙ gaˊ maˉläˉcha̱a̱nꜙ, maˉchaˉ dsoˊkyeˉ kinꜙ.
6Tɨh˜ baˊ hohꜘ hi̱ˉ tä̱ä̱hˊ läꜙka̱a̱ˉ tuhˉdsëꜗ.
Maˉheehˋ jnäꜘ mahꜗ läꜙkyʉʉhn˜ nehꜙ gaˊ kinꜙ.
7Hu̱u̱ˋ jnäꜘ jmaˉ kya̱a̱hˊ gohꜗ hisopo, mahꜗ jä̱nˋ naˉjngëëˈ.
Gye̱e̱hˋ jnäꜘ mahꜗ läꜙtä̱ä̱nˉ gaˊ läꜙko̱hꜘ tøøˉ hmooˉ.
8Jmeeˊ jë̱ë̱ˉ dsënꜙ, läꜙja̱ˉ jmeeˊ cha̱a̱nˉ lluꜗ.
Jmeeˊ nøhꜗ dsënꜙ kaˉlähꜘ jëëhꜘ maˉheehˋ jnäꜘ chaˉmiihˉ wɨɨꜘ.
9Moꜙtoꜙ ka̱ˉ kwa̱a̱t˜ kihꜗ dsoˊkyeˉ kinꜙ.
Cheꜗ läꜙjëꜙ heˉ hlɨɨhˈ heˉ maˉjmeenꜗ.
10Hneˉ Dio kya̱a̱nꜙ, jmeeˊ waˊ naˉjngɨɨˈ tuhˉdsënꜙ.
Jmeeˊ waˊ läꜙhmëëꜘ jmɨˉlleꜘ kinꜙ.
11Taꜙ jmääꜙ jnäꜘ taꜙ kooꜘ,
niꜙ taꜙ jñuuhˋ kinꜙ Jmɨˉlleꜘ Naˉjngɨɨˈ kyahꜗ.
12Jmeeˊ jë̱ë̱ˉ dsënꜙ kaˉlähꜘ, läꜙlluꜗ heˉ maˉlä̱ä̱hˋ jnäꜘ.
Tøøhˈ llenꜙ ko̱o̱ˉ hʉʉˊdsëˉ heˉ nʉʉhˊ mahꜗ të̱ë̱hnꜗ beꜘ.
13Ja̱ˉgaˊ naꜙ heehnꜚ läꜙjë̱ë̱ꜙ hi̱ˉ saꜙ nʉʉhˊ haˉ läꜙ laꜗ jwëꜘ kyahꜗ,
läꜙja̱ˉ läꜙjë̱ë̱ꜙ hi̱ˉ jmeeꜙ dsoˊkyeˉ dsaˉje̱e̱h˜ kya̱a̱hˊ hneˉ.
14Hneˉ Dio kya̱a̱nꜙ hi̱ˉ lä̱ä̱˜ dsaˉ,
hä̱ä̱ˋ jnäꜘ mahꜗ saꜙ ka̱ꜗ dsënꜙ jngëëhnꜚ dsaˉ,
mahꜗ hänˋ kyahꜗ kihꜗ heˉ llu̱u̱hꜗ.
15Dsaˉjø̱ø̱hˈ kya̱a̱nꜙ, miˉjä̱ä̱ꜚ jnäꜘ chaˉmiihˉ,
mahꜗ hänˋ kyahˈ läꜙka̱a̱ˉ tuhˉdsënꜙ.
16Jëëhꜘ saꜙ hnoohˉ heˉ kwëëhnꜚ hneˉ waˊ heˉ chaˉ heˉ,
niꜙ heˉ ka̱a̱ꜙ jahꜘ nëˊ naˊhyooꜘ.
17Kwëëhnꜚ hneˉ ko̱o̱ˉ jmɨˉlleꜘ heˉ kuˈji̱i̱ꜙ kihꜗ,
jëëhꜘ heˉ ja̱ˉ baˊ tɨh˜ hohꜘ.
Ko̱o̱ˉ jmɨˉlleꜘ heˉ hwa̱a̱ˊ saꜙ jmeehˈ taꜙ kooꜘ.
18Jmeeˊ lluˈ kihꜗ Sión läꜙ hyohˉ hohꜘ.
Choohˋ kaˉlähꜘ naˊhyahˉ heˉ chihꜗ läꜙkuˊ läꜙji̱i̱ꜗ kihꜗ Jerusalén.
19Ja̱ˉgaˊ naꜙ he̱e̱hˊ läꜙjëꜙ heˉ kwëëhꜗ dsaˉ hneˉ läꜙ lleˋ kihˈ.
Ja̱ˉgaˊ naꜙ kwë̱ë̱hꜙ dsaˉ hneˉ jahꜘ hi̱ˉ ka̱a̱ꜙ goˉte˜,
hiꜙ kwë̱ë̱yhꜙ hneˉ gyʉ̱ʉ̱ˉ kyaˊ dsooˈ nëˊ naˊhyooꜘ kyahꜗ.
Currently Selected:
Salmos 51: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
