Salmos 44
44
1Hneˉ Dio kya̱a̱nꜙ, gaꜙnʉʉˊ baˊ jnäähꜗ juuˈ heˉ gaꜙjmeehꜗ dsaˉ maˉgyu̱hˉ kya̱a̱ꜗ jnäähˈ,
kihꜗ läꜙjëꜙ taˊ heˉ gaꜙjmeehˊ läꜙ maˊ cha̱a̱yˉ lloꜘjooꜗ.
2Hñaahꜗ baˊ hneˉ gaꜙhwë̱ë̱hˋ läꜙjë̱ë̱ꜙ dsaˉ hi̱ˉ saꜙ kyu̱u̱ꜙ hneˉ,
mahꜗ gaꜙkwëëhˋ dsaˉ maˉgyu̱hˉ kya̱a̱ꜗ jnäähˈ jeeˊ maˊ tä̱ä̱yhˊ ja̱ˉ.
Gaꜙheehˋ wɨɨꜘ läꜙjë̱ë̱ꜙ hi̱ˉ heꜘ
hiꜙ gaꜙhwë̱ë̱hˋ hnihꜘ jeeˊ ja̱ˉ.
3Pero dsaˉ maˉgyu̱hˉ kya̱a̱ꜗ jnäähˈ
saꜙ gaꜙlɨyhꜗ hwaꜗ ja̱ˉ kya̱a̱hˊ ñeˈtuuhꜚ,
niꜙ saꜙ gaꜙlɨyhꜗ kya̱a̱hˊ beꜘ kihꜗ hñiiyꜘ.
Kya̱a̱hˊ beꜘ kyahꜗ hñaahꜗ hiꜙ kya̱a̱hˊ jmëëꜗ kyahꜗ baˊ
gaꜙlɨyhꜗ jeeˊ ja̱ˉ, kihꜗ heˉ maˊ hnaahꜙ hnihꜘ.
4Hneˉ Dio kya̱a̱nꜙ, hneˉ hi̱ˉ la̱a̱ꜗ dsaˉtaˊ jø̱ø̱hˈ kya̱a̱nꜙ.
Kya̱a̱hˊ hihꜙ kyahꜗ gaꜙjmeehˊ gaꜙlɨhꜗ dsaˉ kya̱a̱hꜗ.
5Taꜙlaꜙ kyahꜗ hneˉ baˊ
gaꜙlë̱hꜙ jnäähꜗ hi̱ˉ naˉhøøhˊ kya̱a̱ꜗ jnäähꜗ,
hiꜙ läꜙja̱ˉ kya̱a̱hˊ hihꜙ kyahꜗ
heˊsohˊ jnäähꜗ kihꜗ hi̱ˉ paˉjnaahˉ jnäähˈ juuˈ.
6Jëëhꜘ, saꜙ kye̱nˊ oˉjø̱hꜙ dsëˉ kihꜗ flecha,
niꜙ saꜙ lä̱ä̱ꜗ jnäꜘ ñeˈtuuhꜚ kinꜙ.
7Hneˉ baˊ gaꜙjmeehˊ gaꜙlë̱hꜗ jnäähˈ kihꜗ hi̱ˉ naˉhøøhˊ kya̱a̱ꜗ jnäähꜗ.
Gaꜙjmeehˊ gaꜙjä̱yꜘ oˉhihꜙ hi̱ˉ saꜙ ta̱a̱hˉ jnäähˈ taˊ.
8Kyahꜗ hneˉ baˊ cha̱a̱ˉ jnäähˈ lluꜗ läꜙjëꜙ jmɨɨˊ baˊ,
hiꜙ häˊ jnäähꜗ kyahꜗ tä̱ä̱ꜘ kaˉlähꜘ.
9Pero naꜗ maˉjmäähˋ jnäähꜗ taꜙ kooꜘ
kya̱a̱hˊ chaˉmiihˉ oˉhihꜙ.
Moꜙsoꜙ goˉhë̱ë̱hˈ kya̱a̱ꜗ jnäähˈ
mahꜗ kwahˈ beꜘ kya̱a̱ꜗ jnäähꜗ jeeˊ hniiˉ.
10Maˉkwahˊ jwëˈ kihꜗ hi̱ˉ naˉhøøhˊ,
heˉ llaˉdsëëyˋ kya̱a̱ꜗ jnäähꜗ.
Hi̱ˉ saꜙ ta̱a̱hˉ jnäähˈ taˊ, hɨ̱ɨ̱y˜ kya̱a̱ꜗ jnäähꜗ
mahꜗ ko̱o̱yˈ läꜙjëꜙ heˉ llaꜙ dsëyꜗ.
11Maˉjmäähˋ jnäähꜗ läꜙko̱hꜘ borrego hi̱ˉ ngooꜗ jeeˊ ju̱u̱ꜘ.
Maˉjmeehˊ maˉsaaˊ maˉjñeeꜘ jnäähˈ jeeˊ kihˈ dsaˉ jmɨˉgyʉʉꜙ.
12Maˉhnëëhˋ jnäähꜗ kya̱a̱hˊ jñaaˉ.
Niꜙ miihˉ saꜙ chaˉ heˉ maˉlë̱h˜.
13Kwa̱a̱t˜ kihꜗ heˉ maˉjmeehˊ läꜙnaˉ kya̱a̱ꜗ jnäähˈ,
moꜙsoꜙ läꜙjë̱ë̱˜ dsaˉ jnäähˈ
hi̱ˉ tä̱ä̱hˊ läꜙka̱a̱ˉ kooꜘ kya̱a̱ꜗ jnäähˈ.
Miˉkwa̱hꜗ dsaˉ jnäähˈ,
hlëëhˈ dsaˉ juuˈ heˉ tohˉ wɨɨꜘ kya̱a̱ꜗ jnäähꜗ.
14Maˉkwahˊ jwëˈ kihꜗ dsaꜙ mahꜗ chaˉhä̱ä̱y˜ jnäähˈ,
waˊraˉ gaꜙjë̱ë̱yꜗ jnäähˈ mahꜗ jiiyh˜ lleyˊ.
15Läꜙjëꜙ jmɨɨˊ baˊ kya̱a̱hnˊ oˉhihꜙ.
Saꜙ manꜙ heˉ jmeenꜙ, peerꜙ naˉhiihnꜙ,
16dsooˊ kihˈ hi̱ˉ naˉhøøhˊ kinꜙ baˊ laˉ, hi̱ˉ hlëëhꜙ juuˈ heˉ tohˉ wɨɨꜘ kinꜙ,
dsooˊ kihˈ hi̱ˉ saꜙ ta̱a̱hˉ jnäꜘ taˊ,
hiꜙ dsooˊ kihꜗ hi̱ˉ hnøøꜗ te̱e̱hꜙ jwɨɨ˜ kinꜙ baˊ laˉ.
17Läꜙjëꜙ heˉ laˉ maˉja˜ nëˊ kya̱a̱ꜗ jnäähꜗ,
pero saꜙ maˉgaaꜘ dsëˉ jnäähˈ kyahꜗ,
niꜙ saꜙ maˉhlä̱ä̱hˉ jnäähꜗ kya̱a̱hˊ hmoohˊ kyahˈ.
18Saꜙ jmeeˊ jnäähˈ hʉʉˊdsëˉ be̱e̱ˊ jnäähˈ hneˉ.
Niꜙ ko̱o̱ˉ nɨɨh˜ saꜙ maˉtʉꜗ jnäähˈ jwëˈ kyahꜗ.
19Pero hneˉ maˉlla̱a̱hˋ jnäähꜗ ko̱o̱ˉ hwaꜗ ki̱i̱ꜙ
jeeˊ saꜙ chaˉ niꜙ miihˉ.
Maˉlla̱a̱hˋ jnäähꜗ jeeˊ naˉho̱o̱ˉ jeeˊ saꜙ jnäꜘ saꜙ nʉʉhꜘ.
20Hiꜙ waˊraˉ jähꜘ kihꜗ gaꜙbe̱e̱ꜙ jnäähˈ hneˉ Dio kya̱a̱nꜙ,
hiꜙ gaꜙjmeeˊ jnäähꜗ jʉʉhˉ kihꜗ dio hi̱ˉ naˉla̱a̱ꜚ ka̱a̱h˜ dsaˉ,
21hneˉ baˊ maˊ läˉñehˊ heˉ laˉ,
jëëhꜘ hneˉ kyu̱u̱h˜ läꜙjëꜙ heˉ naˉhmääˊ nehꜙ tuhˉdsëꜗ dsaˉ.
22Pero kwa̱a̱t˜ kyahꜗ hneˉ, läꜙjëꜙ jmɨɨˊ baˊ maˊ hnøøˈ dsaˉ maˊ jngëëhˈ jnäähꜗ.
Maˉla̱a̱ꜚ jnäähꜗ läꜙko̱hꜘ ja̱a̱ˉ borrego hi̱ˉ ngooꜗ jeeˊ ju̱u̱ꜘ.
23¿Heˉlaˈ läꜙgwɨ̱ɨ̱hˈ Dsaˉjø̱ø̱hˈ kya̱a̱nꜙ?
Näˊ mɨˊnëhˊ, taꜙ waˊ läꜙø̱ø̱hꜘ kya̱a̱ꜗ jnäähꜗ goˉte˜.
24¿Heˉlaˈ hmäähˊ kya̱a̱ꜗ jnäähꜗ?
¿Heˉlaˈ maˉgaaꜘ hohꜘ läꜙjëꜙ heˉ wɨɨꜘ heˉ jëëˊ jnäähˈ
hiꜙ kihꜗ juuˈ paˊjnaahˊ heˉ hlëëhꜙ dsaˉ?
25Maˉjä̱ˊ jnäähꜗ taꜙ hwaꜗ goˉte˜.
Maˉjlu̱u̱ˊ jnäähˈ läꜙ gaꜙtëꜘ hwaꜗ nëˊ hløøˉ.
26Nooˉ kwaˊ beꜘ kya̱a̱ꜗ jnäähˈ.
Lä̱ä̱ˋ jnäähꜗ läꜙlluꜗ heˉ läˉñihꜘ hohꜘ.
Currently Selected:
Salmos 44: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
