Salmos 146
146
1Häˊ hneˉ jmɨˉlleꜘ kinꜙ
kihꜗ DSAˉJØ̱Ø̱Hˈ jnänˋ.
2Hänˋ kihꜗ DSAˉJØ̱Ø̱Hˈ kya̱a̱nꜙ taˊko̱ˉji̱i̱hˈ cha̱a̱nˉ.
Hänˋ su̱ꜚ kihꜗ Dio kya̱a̱nꜙ taˊko̱ˉji̱i̱hˈ jëën˜ jmɨˉgyʉʉꜙ.
3Taꜙ ka̱ˉ oˉjø̱hꜙ dsëˉ kihꜗ dsaˉ hi̱ˉ hiiꜘ juuˈ kihꜗ.
Jëëhꜘ dsaˉ taꜙjmahꜗ baˊ heꜘ, saꜙ naˉkë̱yhˊ jmɨɨˊ lä̱ä̱yꜗ dsaˉ.
4Waˊraˉ gaꜙju̱u̱yꜗ, le̱e̱yꜙ kaˉlähꜘ tʉˊhløøˉ.
Ja̱ˉbaˊ jmɨɨˊ ja̱ˉ lla̱a̱ꜙ goˉte˜ läꜙjëꜙ hʉʉˊdsëˉ kihꜗ taˊ heˉ maˊ jmeeyˈ.
5Lluꜗ laꜗ kihꜗ hi̱ˉ jmeeꜙ kwa̱a̱t˜,
Dio kya̱a̱ꜗ Jacob kwaꜙ beꜘ kiyhꜗ.
Lluꜗ laꜗ kihꜗ hi̱ˉ kye̱ˉ oˉjø̱hꜙ dsëˉ kihꜗ Dio DSAˉJØ̱Ø̱Hˈ jnänˋ.
6Hñiiyꜘ gaꜙjmeeyꜘ gyʉʉhˈ hwaꜗ hiꜙ jmɨˉñeehꜚ
hiꜙ läꜙjëꜙ gaˊ heˉ chaˉ nëˊ kihˈ.
Ji̱hˊko̱hꜘ saꜙ läꜙsɨɨꜗ juuˈ kiyhꜗ.
7Llayꜙ taˊ kihˈ hi̱ˉ jëë˜ wɨɨꜘ, ä̱ä̱yhˉ läꜙjë̱ë̱ꜙ hi̱ˉ kyo̱hꜙ.
DSAˉJØ̱Ø̱Hˈ jnänˋ baˊ hi̱ˉ lä̱ä̱˜ läꜙjë̱ë̱ꜙ hi̱ˉ naˉjnë̱ë̱ˈ.
8DSAˉJØ̱Ø̱Hˈ jnänˋ baˊ hi̱ˉ nä˜ mɨˈnëˊ hi̱ˉ tʉʉˊ,
cha̱a̱yhˉ hi̱ˉ dsaˉtä̱hꜙ hiꜙ hnääyꜗ hi̱ˉ jmeeꜙ heˈ juuˈ kiyhꜗ.
9DSAˉJØ̱Ø̱Hˈ jnänˋ hä̱ä̱˜ läꜙjë̱ë̱ꜙ hi̱ˉ tä̱ä̱hˊ läꜙka̱a̱ˉ gooˈ dsaˉ,
hä̱ä̱y˜ chihˉ hnɨɨꜘ hiꜙ dsaˉmëꜘ hnɨɨꜘ.
Pero kihꜗ hi̱ˉ hñaaˉ dsëꜗ jneyꜙ jwëˈ.
10DSAˉJØ̱Ø̱Hˈ jnänˋ baˊ jmeeˈ hihꜙ gaꜙläꜙjëꜙ johꜘ jmɨɨˊ chaˉ.
Hnähꜘ hi̱ˉ cha̱a̱ˉ jwɨɨˉ Sión,
Dio kya̱a̱hꜗ hnähꜘ la̱a̱ꜗ dsaˉtaˊ jø̱ø̱hˈ gaꜙläꜙjëꜙ johꜘ jmɨɨˊ chaˉ.
¡Aleluya!
Currently Selected:
Salmos 146: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
