Salmos 147
147
1Häˊ hnähꜘ kihꜗ DSAˉJØ̱Ø̱Hˈ jnänˋ.
Jëëhꜘ läꜙja̱ˉ baˊ lluˈ heˉ hänˊ salmo kihꜗ Dio jnänˋ.
Jëëhꜘ lleˋ hänˊ kiyhˈ su̱ꜚ heˉ nʉʉhꜘ naˊhñaahꜗ.
2DSAˉJØ̱Ø̱Hˈ jnänˋ jmeeyh˜ kaˉlähꜘ läꜙhmëëꜘ Jerusalén.
Hiꜙ tëëyˉ kaˉlähꜘ dsaˉ Israel hi̱ˉ gaꜙnääˊ naˉsa̱a̱ꜘ naˉjñeeꜘ.
3Jmeeyꜙ dsaˉnøhꜗ dsëꜗ hi̱ˉ kuˈji̱i̱ꜙ tuhˉdsëꜗ.
Läꜙja̱ˉ løøy˜ jeeˊ laˈ nëˊ dsooˊ kaˉlähꜘ.
4Läꜙjë̱ë̱ꜙ nʉʉꜘ maˉnaˉhe̱e̱ˈ heꜘ ka̱a̱h˜ Dio.
Läꜙja̱a̱ˉ läꜙja̱a̱ˉ tëëyh˜ läꜙche̱e̱ˉ baˊ.
5Haˉ ko̱hꜘ saꜙ jø̱ø̱hˈ Dio jnänˋ hi̱ˉ chaˉ gaꜙläꜙjëꜙ beꜘ kihꜗ.
Hi̱i̱ˉ të̱ˊdsë̱ë̱ꜗ llaꜗ hihꜙ läꜙko̱o̱ˉ kyʉʉyh˜.
6DSAˉJØ̱Ø̱Hˈ jnänˋ kwaꜙ beꜘ kihꜗ hi̱ˉ hwa̱a̱ˊ.
Pero jwä̱ä̱y˜ taꜙ hwaꜗ goˉte˜ hi̱ˉ hñaaˉ dsëꜗ.
7Häˊ hnähꜘ kihꜗ DSAˉJØ̱Ø̱Hˈ jnänˋ,
kwaˊ hnähꜘ tiˊhmaahˊ kiyhˈ.
Häˊ hnähꜘ kihꜗ Dio jnänˋ kya̱a̱hˊ tu̱ˉ
heˉ chooˈ chaˉmiihˉ sɨˊñeꜗ.
8Hñiiyꜘ jmeeꜙ dsaˉløøꜙ gyʉʉhˈ jmɨˉgyʉʉꜙ kya̱a̱hˊ jniiꜘ.
Hñiiꜘ bihꜗ jmeeyꜙ jmaꜗ mahꜗ gwaꜘ nëˊ hwaˈ laˉ.
Jmeeyꜙ dsaˉhyaꜙ nuuˉ läꜙka̱a̱ˉ mohꜘ.
9Hñiiyꜘ kwayꜙ heˉ kuhˉ läꜙjë̱ë̱ꜙ jahꜘ,
hiꜙ ä̱ä̱yhˉ ta̱ˈjahꜘ maˊ ngɨɨyꜙ heˉ kuyhˉ.
10Maꜙkeꜙ be̱e̱ꜘ jwërte kyaˊjɨɨhˊ saꜙ jmääꜗ kihꜗ Dio.
Maꜙkeꜙ heˉ gaˊ hñuuˊ dsaˉñʉʉhˉ saꜙ jmääꜗ kiyhꜗ.
11Pero heˉ laˉ baˊ tɨh˜ dsëꜗ DSAˉJØ̱Ø̱Hˈ jnänˋ,
heˉ läꜙga̱hꜙ jneˊ kiyhˈ.
Hiꜙ tɨh˜ dsëyꜗ
kihꜗ hi̱ˉ kye̱ˉ oˉjø̱hꜙ dsëˉ heˉ läˉñihꜘ dsëyꜗ.
12Hnähꜘ hi̱ˉ cha̱a̱ˉ Jerusalén,
häˊ hnähꜘ kihꜗ DSAˉJØ̱Ø̱Hˈ jnänˋ.
Hnähꜘ hi̱ˉ cha̱a̱ˉ jwɨɨˉ Sión,
häˊ hnähꜘ kihꜗ Dio jnänˋ.
13Dio gaꜙjmeeꜘ chihꜗ ko̱o̱ˉ hwehˉ hoˊhaahˊ kihˈ jeeˊ jwɨɨˉ
mahꜗ saꜙ dsaˉta̱a̱hˋ hi̱ˉ naˉhøøhˊ kyahˈ hnähꜘ.
Läꜙja̱ˉ gaꜙmiꜙjä̱ä̱yꜗ hnähꜘ kaˉlähꜘ
hi̱ˉ cha̱a̱ˉ jeeˊ jwɨɨˉ naˉ.
14Hñiiyꜘ jmeeyꜙ hiiꜘ tiiˊ läꜙka̱a̱ˉ hwaꜗ kyahꜗ hnähꜘ.
Jmeeyꜙ läꜙchaˉ chaˉmiihˉ mɨˈtrigo lluꜗ kyahꜗ hnähꜘ.
15Läꜙko̱o̱ˉ waˊraˉ gaꜙjmeeyꜘ hihꜙ kihꜗ hwaꜗ laˉ,
naꜗ baˊ ko̱hꜘ leꜘ, heeˉ naˉ llaꜙ dsëyꜗ jmeeyꜙ.
16Hñiiyꜘ che̱e̱yꜙ hmooˉ heˉ tøˉjlë̱ë̱ˉ läꜙko̱o̱ˉ tøøˉ jñuꜚ borrego.
Jñeey˜ jwɨˊhmooˉ hwaꜗ läꜙko̱o̱ˉ tʉˊhløøˉ.
17Hñiiyꜘ jmeeyꜙ saˉhlaˉ mɨˈdsëꜗ.
¿Hi̱i̱ˉ baˊ tä̱ä̱ꜙ waˊraˉ gaꜙche̱e̱yꜗ ko̱o̱ˉ lleꜘ gyʉʉꜘ?
18Ko̱o̱ˉ hlëëyhꜗ baˊ liiꜘ kaˉlähꜘ jmɨɨˉ heˉ laꜗ jwɨˊhmooˉ ja̱ˉ.
Waˊraˉ gaꜙche̱e̱yꜗ lleꜘ llooꜘ, ko̱o̱ˉ kaˉlähꜘ ngëëꜘ jmɨɨˉ.
19Hñiiyꜘ gaꜙmiꜙtë̱ë̱yˉ dsaˉ kya̱a̱ꜗ Jacob juuˈ kiyhꜗ.
Gaꜙkwëëyhꜗ dsaˉ Israel ley mahꜗ høøyꜗ.
20Pero kihꜗ jñahꜘ dsaˉ, saꜙ gaꜙjmeeꜘ Dio läꜙja̱ˉ.
Heˉja̱ˉ saꜙ gaꜙläꜙkyʉʉyh˜ ley kihꜗ Dio. ¡Aleluya!
Currently Selected:
Salmos 147: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
