Salmos 109
109
1Hneˉ Dio kya̱a̱nꜙ hi̱ˉ hänꜙ kihꜗ,
taꜙ naꜘ tiˊsɨ̱hꜘ waˊraˉ gaꜙchu̱u̱nꜗ kya̱a̱hˊ hneˉ.
2Jëëhꜘ hi̱ˉ hñaaˉ dsëꜗ,
läꜙkye̱ˉ hi̱ˉ miˉga̱a̱ꜙ dsaˉ hlëëyhꜙ wɨɨꜘ kinꜙ.
Peerꜙ chaˉhä̱ä̱y˜ jnäꜘ kya̱a̱hˊ juuˈ taˉjuuˈ.
3Läꜙka̱a̱ˉ baˊ jeeˊ ngënꜙ jmeeyꜙ läꜙja̱ˉ kinꜙ.
Saꜙ chaˉ heˉ kihꜗ heˉ jmeeyꜗ naˉhä̱ä̱yhˊ jnäꜘ.
4Läꜙnaˉ baˊ miˉhmaayhˋ kinꜙ.
Läꜙlluꜗ heˉ hnaaꜙ jnihꜘ, maˉje̱e̱yh˜ naˉhøøyhˊ kinꜙ.
Pero jnäꜘ maˉngɨɨnˊ kinꜙ kya̱a̱hˊ Dio.
5Heˉ hlɨɨhˈ baˊ miˉhmaayhˋ kinꜙ kihꜗ heˉ lluꜗ heˉ jmeenꜙ.
Hiꜙ naˉhä̱ä̱yhˊ jnäꜘ maꜙkeꜙ hnaaꜙ jnihꜘ.
6Che̱e̱ꜙ ja̱a̱ˉ hi̱ˉ hñaaˉ dsëꜗ mahꜗ jmeeꜗ läꜙ tëˉ dsëꜗ kiyhꜗ.
Hi̱ˉ chehꜗ nëˊ kiyhˈ, waˊ hnɨɨˈ kiyhꜗ chaˉgaˊmiihˉ.
7Waˊraˉ gaꜙtëꜘ jeeˊ nøøˈ taˊ kiyhˈ,
waˊ jä̱ꜘ heˉ maˉnaˉbä̱ä̱yhˋ.
Saꜙ waˊ jmääˈ taˊ kihˈ hi̱ˉ chehꜗ nëˊ kiyhˈ.
8Waˊ cha̱a̱yˉ miihˉ jmɨɨˊ baˊ.
Waˊ kye̱ˉ jñahꜘ nëˊ kiyhˈ.
9Waˊ jä̱ꜘ hnëëꜘ chihˉ kya̱a̱yꜗ.
Waˊ jä̱ꜘ hnëëꜘ dsaˉmëꜘ kya̱a̱yꜗ.
10Waˊ gaꜙnääˊ chihˉ kya̱a̱yꜗ waˊ laˈ chaˉ laˈ,
ngɨɨyꜙ kihꜗ dsaꜙ heˉ kuhˉhɨ̱yh˜.
Waˊ hwë̱ë̱yˈ chaˊnehꜙ jeeˊ naˉhe̱e̱ꜚ goˉte˜ kiyhꜗ.
11Dsaˉ hi̱ˉ gaꜙmiꜙhä̱ä̱ꜙ dsaˉ heꜘ kuuˊ,
waˊ jä̱ꜘ kiyhꜗ läꜙjëꜙ heˉ chaˉ kihꜗ hi̱ˉ heꜘ.
Hiꜙ jñahꜘ baˊ waˊ kye̱ˉ yaˊjøøꜚ taˊ kiyhˈ.
12Saꜙ waˊ jnä̱ä̱ꜘ niꜙ ja̱a̱ˉ hi̱ˉ läˉñihꜘ dsëꜗ kiyhꜗ,
niꜙ hi̱ˉ läˉñihꜘ dsëꜗ kihꜗ chihˉ kya̱a̱yꜗ.
13Waˊ lla̱a̱ˉ goˉte˜ jo̱o̱ꜘsɨɨyhˊ.
Waˊ gaaꜘ dsëꜗ dsaˉ goˉte˜ jmɨɨˉ kiyhꜗ.
14Saꜙ waˊ gaaꜘ dsëꜗ Dio läꜙjëꜙ heˉ hlɨɨhˈ
heˉ gaꜙjmeeꜘ maˉhyaaˊ taˉgyʉʉhˊ kya̱a̱yˈ.
Saꜙ waˊ ko̱o̱ꜗ Dio dsëꜗ kihꜗ dsoˊkyeˉ kihꜗ chooyˈ.
15Waˊ kye̱ꜘ DSAˉJØ̱Ø̱Hˈ jnänˋ kwa̱a̱t˜ läꜙjëꜙ jmɨɨˊ
kihꜗ heˉ hlɨɨhˈ heˉ jmeeyꜙ.
Saꜙ waˊ läꜙdsooh˜ dsëꜗ dsaˉ kiyhꜗ ji̱hˊko̱hꜘ.
16Jëëhꜘ, niꜙ ko̱ˉhi̱ˊpihˈ saꜙ gaꜙläꜙñihꜘ dsëyꜗ kihꜗ dsaꜙ.
Saꜙ gaꜙtʉyꜗ heˉ maˊ jmeeyhꜙ hi̱ˉ täˉñeeꜘ.
Ko̱o̱ˉ saꜙ jngëëyhꜙ hi̱ˉ tiˉmeehˉ dsëꜗ.
17Maˊ tɨh˜ dsëyꜗ jwäyꜗ dsoˊjwɨɨꜘ nëˊ kihꜗ dsaꜙ.
Läꜙja̱ˉ waˊ jäꜘ dsoˊjwɨɨꜘ nëˊ kiyhˈ.
Saꜙ maˊ tɨh˜ dsëyꜗ heˉ maˊ miˉjä̱ä̱yꜗ dsaˉ.
Läꜙja̱ˉ taꜙ miˉjä̱ä̱ꜚ hnihꜘ.
18Saꜙ maˊ tʉy˜ goˉte˜ heˉ jwäy˜ dsoˊjwɨɨꜘ kihꜗ dsaꜙ,
maˉkya̱a̱yhˊ goˉte˜ dsoˊjwɨɨꜘ.
19Läꜙja̱ˉ waˊ jlë̱ë̱yˈ dsoˊjwɨɨꜘ läꜙko̱hꜘ hmɨɨhˉ heˉ kë̱yhˉ.
Läꜙja̱ˉ waˊ läꜙñuuyhˊ tä̱ä̱ꜘ kya̱a̱hˊ dsoˊjwɨɨꜘ.
20Läꜙja̱ˉ waˊ miˊhmaahˊ DSAˉJØ̱Ø̱Hˈ jnänˋ
kihˈ hi̱ˉ chaˉhä̱ä̱˜ jnäꜘ.
Ja̱ˉbaˊ läꜙja̱ˉ kihꜗ hi̱ˉ hlëëhˊ wɨɨꜘ kinꜙ.
21Hneˉ DSAˉJØ̱Ø̱Hˈ kya̱a̱nꜙ,
jmeeˊ heˉ lluꜗ kinꜙ läꜙko̱o̱ˉ të̱ë̱ˈ jmeehˉ.
Lä̱ä̱ˋ jnäꜘ, läꜙlluꜗ heˉ läˉñihꜘ hohꜘ.
22Jëëhꜘ täˉñeeꜘ baˊ jnäꜘ hiꜙ llaˉkya̱a̱nꜗ chaˉmiihˉ.
Läꜙ gaꜙtëꜘ nehꜙ tuhˉdsënꜙ peerꜙ kuˈji̱i̱ꜙ.
23Ngooꜗ dsaˉlla̱a̱nꜙ läꜙko̱o̱ˉ dsaˉä̱ä̱hꜗ jeeˊ hiiꜘ hi̱i̱hˈ.
Dsaˉlle̱e̱nꜘ läꜙko̱o̱ˉ dsaˉlle̱e̱ꜘ i̱i̱hˉ.
24Moꜙsoꜙ be̱e̱ꜘ goˉte˜ chaˊjnënꜙ
kwa̱a̱t˜ kihꜗ heˉ saꜙ kuhˉhuhnꜙ, maˉdsa̱a̱ꜗ maˉjë̱hnˉ.
25Gaꜙläꜙka̱a̱ˉ baˊ miˉkwa̱hꜗ dsaˉ jnäꜘ.
Waˊraˉ gaꜙjë̱ë̱yꜗ jnäꜘ, lleˊ bihꜗ jiiyh˜ kinꜙ.
26Hneˉ DSAˉJØ̱Ø̱Hˈ kya̱a̱nꜙ, kwaˊ beꜘ kinꜙ.
Lä̱ä̱ˋ jnäꜘ läꜙlluꜗ heˉ läˉñihꜘ hohꜘ.
27Mahꜗ jëëꜗ läꜙjë̱ë̱ꜙ dsaˉ, hneˉ baˊ hi̱ˉ maˉjmeeꜘ läꜙja̱ˉ.
Läꜙja̱ˉ waˊ läꜙngëëyꜘ, hneˉ baˊ naˉ hi̱ˉ maˉkwaꜘ beꜘ kinꜙ DSAˉJØ̱Ø̱Hˈ kya̱a̱nꜙ.
28Dsaˉ heꜘ jwäy˜ dsoˊjwɨɨꜘ, pero hneˉ miˉjä̱ä̱hꜚ dsaˉ.
Waˊraˉ yaꜙnääyꜗ nëˊ kinꜙ, jä̱yꜗ kya̱a̱hˊ oˉhihꜙ.
Pero jnäꜘ hi̱ˉ jmeeꜙ taˊheꜗ kyahꜗ,
ngooꜗ baˊ jnäꜘ cha̱a̱nˉ lluꜗ.
29Waˊ jlë̱ë̱ˈ kya̱a̱hˊ oˉhihꜙ läꜙjë̱ë̱ꜙ hi̱ˉ hlëëhꜙ wɨɨꜘ kinꜙ.
Waˊ jlëˈ nëˊ kiyhˈ läꜙko̱o̱ˉ hmɨɨhˉ.
30Pero jnäꜘ,
ko̱ˉchaˉji̱i̱h˜ kwanˋ tiˊhmaahˊ kihˈ DSAˉJØ̱Ø̱Hˈ kya̱a̱nꜙ,
hiꜙ jmeenˋ jʉʉhˉ kiyhꜗ chaˊnëˊ jeeˊ läꜙjë̱ë̱ꜙ dsaˉ.
31Jëëhꜘ hñiiyꜘ cheyhꜗ nëˊ kihˈ hi̱ˉ täˉñeeꜘ,
läꜙja̱ˉ lä̱ä̱y˜ kihꜗ dsaˉ hi̱ˉ bä̱ä̱yhˉ dsooˊ.
Currently Selected:
Salmos 109: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
