Salmos 108
108
1Dio kya̱a̱nꜙ,
läꜙka̱a̱ˉ tuhˉdsënꜙ maˉjmeenꜗ hʉʉˊdsëˉ heˉ hänˋ kyahˈ.
Maꜙraꜙ heˉ hnoonꜗ hänˋ kyahˈ kya̱a̱hˊ salmo.
2Peerꜙ hnoonꜗ sanꜚ tu̱ˉ heˉ chooˈ chaˉmiihˉ sɨˊñeꜗ
hiꜙ sanꜚ tu̱ˉ mähˉ.
Läꜙja̱ˉ hnoonꜗ jnäähnꜙ läꜙjëꜙ høøˉ.
3Jmeenˋ jʉʉhˉ kyahꜗ hneˉ DSAˉJØ̱Ø̱Hˈ kya̱a̱nꜙ,
jeeˊ kihˈ läꜙjë̱ë̱ꜙ dsaˉ.
Hänˋ kyahˈ kya̱a̱hˊ salmo jeeˊ kihˈ läꜙjë̱ë̱ꜙ nääꜗ dsaˉ.
4Jʉʉhˉ gaˊ läꜙko̱o̱ˉ gyʉʉhˈ jmɨˉgyʉʉꜙ
heˉ läˉñihꜘ hohꜘ kihꜗ dsaꜙ.
Hiꜙ heˉ miˉtehˋ juuˈ kyahꜗ,
läꜙ maˉngooꜗ ja̱ˉbaˊ läꜙjëꜙ johꜘ jmɨɨˊ chaˉ.
5Haˉ ko̱hꜘ naˊhñaahꜗ saꜙ la̱a̱hꜗ hneˉ Dio kya̱a̱nꜙ,
jeeˊ kihˈ läꜙjë̱ë̱ꜙ hi̱ˉ tä̱ä̱hˊ gyʉʉhˈ hwaꜗ.
Läꜙja̱ˉ ko̱o̱ˉ häˊ baˊ waˊ jmeeyꜘ jʉʉhˉ kyahꜗ hneˉ jeeˊ läꜙjë̱ë̱yꜙ.
6Kya̱a̱hˊ beꜘ kyahꜗ lä̱ä̱ˋ läꜙjë̱ë̱ꜙ hi̱ˉ hnaahꜙ,
lä̱ä̱yˋ mahꜗ dsaˉta̱a̱yhˋ naˉla̱a̱yˊ,
nʉʉˉ heˉ chu̱u̱ꜘ jnäähˈ kya̱a̱hˊ hneˉ.
7Läꜙ gaꜙtëꜘ jeeˊ gyaˈ Dio jähꜘ:
“Läꜙka̱a̱ˉ tuhˉdsënꜙ tiˊlloohnꜚ hwaˈ Siquem.
Hiꜙ läꜙja̱ˉ jmeenˋ kihꜗ hwaˈ Sucot kaˉlähꜘ.
8Kiꜙ baˊ jnäꜘ laꜗ hwaꜗ Galaad, läꜙja̱ˉ hwaꜗ Manasés.
Hiꜙ Efraín la̱a̱yꜗ läꜙko̱o̱ˉ mɨˈkyahˊ heˉ häˊ llenꜙ.
Jëëhꜘ, kihꜗ hi̱ˉ heꜘ naˉ, hwë̱ë̱ˉ hi̱ˉ le̱e̱ꜘ hløøꜘ kya̱a̱nꜙ.
Hiꜙ Judá la̱a̱yꜗ kinꜙ läꜙko̱o̱ˉ maˉhɨɨh˜.
Jëëhꜘ, kihꜗ hi̱ˉ heꜘ naˉ, hwë̱ë̱ˉ hi̱ˉ le̱e̱ꜘ rey.
9Pero Moab la̱a̱yꜗ kinꜙ läꜙko̱o̱ˉ palaga̱a̱ˊ jeeˊ gyihnꜚ goonꜙ.
Nëˊ kihˈ Edom llanˋ looˉ heˉ häˊ tɨɨnꜙ.
Hlëëhnˊ ki̱ˉga̱a̱ˉ waˊraˉ gaꜙlɨhnꜗ llaˉdsëënˋ kihˈ dsaˉ filisteo.”
10¿Pero hi̱i̱ˉ jä̱ä̱ꜗ jnäꜘ taꜙ jeeˊ nɨɨnˋ naˊte̱e̱nˈ kya̱a̱hˊ jeeˊ jwɨɨˉ jeeˊ tä̱ä̱hˊ dsaˉ hä̱ä̱ˈ?
¿Hi̱i̱ˉ jøøꜗ kinꜙ läꜙ gaꜙtëꜘ Edom?
11¿Ja̱a̱ˈ heꜘ hneˉ Dio kya̱a̱nꜙ hi̱ˉ maˉbe̱e̱ꜗ jnäähˈ,
hi̱ˉ moꜙsoꜙ goˉhë̱ë̱ˈ kya̱a̱ꜗ jnäähꜗ jeeˊ hniiˉ?
12Kwaˊ beꜘ kya̱a̱ꜗ jnäähꜗ
mahꜗ te̱e̱ˊ jnäähꜗ kya̱a̱hˊ hi̱ˉ naˉhøøhˊ kya̱a̱ꜗ jnäähꜗ.
Jëëhꜘ saꜙ jmääꜗ maꜙlaꜙ beꜘ kihꜗ hñiiꜘ dsaˉñʉʉhˉ.
13Kya̱a̱hˊ Dio baˊ le̱hꜙ jneˊ llaˉdsëënˋ.
Hñiiꜘ bihꜗ heˉsoyhꜗ kihꜗ hi̱ˉ naˉhøøhˊ jnänˋ.
Currently Selected:
Salmos 108: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
