Salmos 107
107
Libro Cinco
(Salmos 107-150)
1Häˊ hnähꜘ kihꜗ DSAˉJØ̱Ø̱Hˈ jnänˋ, jëëhꜘ lluꜗ dsëyꜗ.
Läꜙja̱ˉ läˉñihꜘ dsëyꜗ tä̱ä̱ꜘ.
2Läꜙja̱ˉ waˊ hlëëhꜘ läꜙjë̱ë̱ꜙ hi̱ˉ gaꜙlä̱ä̱ꜗ DSAˉJØ̱Ø̱Hˈ jnänˋ,
läꜙjë̱ë̱ꜙ hi̱ˉ gaꜙla̱a̱ꜘ kihꜗ hi̱ˉ naˉhøøhˊ heꜘ.
3DSAˉJØ̱Ø̱Hˈ jnänˋ baˊ gaꜙtëëyˉ jeeˊ maˊ gaꜙnääyˊ
taꜙ kye̱ꜗ taꜙ ñiiꜘ.
Gaꜙjø̱hˉ gaꜙlä̱ä̱yhˉ jeeˊ maˊ tä̱ä̱yhˊ
läꜙka̱a̱ˉ läꜙjʉhꜗ jmɨˉgyʉʉꜙ.
4Maˊ gaꜙnääyˊ naˉhë̱ë̱yˈ läꜙka̱a̱ˉ jeeˊ laˈ hwaꜗ ki̱i̱ꜙ.
Saꜙ gaꜙtë̱ë̱yhꜗ jeeˊ jwɨɨˉ jeeˊ maˊ dsaˉta̱a̱yhˋ.
5Maˊ gaꜙnääyˊ maˊ kyo̱yhꜙ maˊ gaꜙnääyˊ läꜙki̱i̱ˉ dsëyꜗ,
läꜙji̱i̱hˈ ngooꜗ gaꜙhwa̱a̱yꜘ goˉte˜.
6Gaꜙchu̱u̱yꜘ kya̱a̱hˊ DSAˉJØ̱Ø̱Hˈ jnänˋ
kihꜗ heˉ maˊ jëëy˜ lliꜘwɨɨꜘ,
heˉja̱ˉ gaꜙlä̱ä̱yꜗ kihꜗ läꜙjëꜙ heˉ maˊ cha̱a̱yˉ.
7Dio gaꜙjä̱ä̱yꜗ ko̱o̱ˉ jwëˈ baˊ
läꜙji̱i̱hˈ gaꜙtë̱ë̱yꜘ jeeˊ jwɨɨˉ jeeˊ gaꜙta̱a̱yhˋ.
8Kwaˊ hnähꜘ tiˊhmaahˊ kihˈ DSAˉJØ̱Ø̱Hˈ jnänˋ
kihꜗ heˉ lluꜗ dsëyꜗ.
Häˊ hnähꜘ kiyhꜗ,
kwa̱a̱t˜ kihꜗ läꜙjëꜙ heˉ jʉhˉga̱a̱ˉ heˉ jmeeyꜙ.
9Läꜙja̱ˉ gaꜙtë̱hꜗ beꜘ hi̱ˉ maˊ naˉki̱i̱ˉ dsëꜗ.
Hiꜙ läꜙja̱ˉ gaꜙka̱ꜗ yaˊjøøꜚ hi̱ˉ maˊ kyo̱hꜙ.
10Ko̱ˉlla̱a̱ˊ maˊ tiˉmeehˉ dsëꜗ,
maˊ jmeeyꜙ kwa̱a̱t˜ moꜙsoꜙ chaˉ jeeˊ lä̱ä̱yꜘ.
Kya̱a̱hˊ chaˉmiihˉ wɨɨꜘ heˉ maˊ jëëy˜,
laꜗ kiyhꜗ läꜙko̱o̱ˉ heˉ naˉhñuuyhˉ kya̱a̱hˊ caden˜.
11Taꜙlaꜙ kihꜗ heˉ gaꜙjmeeyꜘ cha̱a̱yhˉ kya̱a̱hˊ Dsaˉjø̱ø̱hˈ jnänˋ,
hiꜙ taꜙlaꜙ kihꜗ heˉ gaꜙjmeeyꜘ taꜙ kooꜘ madaꜚ kihˈ hi̱ˉ gyaꜗ gyʉʉhˈ,
12heˉja̱ˉ baˊ ja̱ˉ heˉ gaꜙløøyꜗ jmeeyꜙ taˊ läꜙjmɨɨˈ läꜙjeˉ.
Gaꜙjä̱yꜘ taꜙ hwaꜗ goˉte˜,
saꜙ cha̱a̱ˉ hi̱ˉ maˊ kwaˈ beꜘ kiyhꜗ.
13Ja̱ˉgaˊ gaꜙchu̱u̱yꜘ kya̱a̱hˊ DSAˉJØ̱Ø̱Hˈ jnänˋ
kihꜗ heˉ wɨɨꜘ heˉ maˊ jëëy˜.
Hi̱ˉ heꜘ gaꜙlä̱ä̱yꜗ kihꜗ heˉ wɨɨꜘ ja̱ˉ.
14Kihꜗ hi̱ˉ maˊ tä̱ä̱hˊ tiˉmeehˉ dsëꜗ,
hi̱ˉ maˊ jmeeꜙ kwa̱a̱t˜ moꜙsoꜙ chaˉ jeeˊ lä̱ä̱yꜘ,
gaꜙjmeeyꜘ gaꜙnøhꜗ dsëyꜗ.
Gaꜙchiꜗ gaꜙjøøyꜗ caden˜ heˉ maˊ naˉhñuuyhˉ.
15Kwaˊ hnähꜘ tiˊhmaahˊ kihˈ DSAˉJØ̱Ø̱Hˈ jnänˋ
kihꜗ heˉ lluꜗ dsëyꜗ.
Häˊ hnähꜘ kiyhꜗ,
kwa̱a̱t˜ kihꜗ läꜙjëꜙ heˉ jʉhˉga̱a̱ˉ heˉ jmeeyꜙ.
16Jëëhꜘ gaꜙchiꜗ gaꜙjøøyꜗ hoˊhaahˊ heˉ laꜗ ñeˈ.
Gaꜙjmeeyꜘ jwɨˊdsuhꜗ ñeˈ kahˊbo̱hˊ.
17Ko̱ˉlla̱a̱ˊ gaꜙlë̱ë̱ꜗ dsaˉ tooˉ kihꜗ heˉ maˊ cha̱a̱yhˉ.
Maˊ jëëy˜ lliꜘwɨɨꜘ kihꜗ heˉ hlɨɨhˈ heˉ maˊ jmeeyꜙ.
18Saꜙ hnøøyꜗ maˊ kuhꜙ maˊ hɨ̱yhˈ niꜙ miihˉ.
Miihˉ gaˊ saꜙ gaꜙju̱u̱yꜗ.
19Ja̱ˉgaˊ gaꜙchu̱u̱yꜘ kya̱a̱hˊ DSAˉJØ̱Ø̱Hˈ jnänˋ
kihꜗ heˉ wɨɨꜘ heˉ maˊ jëëy˜.
Hi̱ˉ heꜘ gaꜙlä̱ä̱yꜗ kihꜗ heˉ wɨɨꜘ ja̱ˉ.
20Gaꜙjmeeꜘ Dio hihꜙ heˉ gaꜙhla̱a̱yꜘ.
Gaꜙlä̱ä̱yꜗ mahꜗ saꜙ dsaˉnääyꜗ nehꜙ toˉhø̱ø̱ˉ.
21Kwaˊ hnähꜘ tiˊhmaahˊ kihˈ DSAˉJØ̱Ø̱Hˈ jnänˋ
kihꜗ heˉ lluꜗ dsëyꜗ.
Häˊ hnähꜘ kiyhꜗ,
kwa̱a̱t˜ kihꜗ läꜙjëꜙ heˉ jʉhˉga̱a̱ˉ heˉ jmeeyꜙ.
22Häˊ hnähꜘ kiyhꜗ, heˉ naˉ baˊ lleˋ kihˈ kwëëhˈ hnihꜘ.
Jë̱ë̱ˉ hohꜘ hnähꜘ hlëëhˊ hnähꜘ,
kihꜗ heˉ jʉhˉga̱a̱ˉ heˉ jmeeyꜙ.
23Ko̱ˉlla̱a̱ˊ gaꜙnääˊ jwëꜘ nëˊ jmɨˉñeehꜚ kya̱a̱hˊ barco.
Läꜙka̱a̱ˉ jeeˊ dsaˉnääyꜗ llayꜙ hmoohˊ kiyhˈ.
24Jeeˊ gaꜙnääyˊ ja̱ˉ,
jëëy˜ haˉ läꜙ laꜗ heˉ jʉhˉga̱a̱ˉ heˉ jmeeꜙ DSAˉJØ̱Ø̱Hˈ jnänˋ.
25Gaꜙjmeeꜘ Dio hihꜙ kihꜗ lleꜘ, heˉja̱ˉ jaꜗ ko̱o̱ˉ lleꜘ täꜘ,
heˉ gaꜙjmeeꜘ gaꜙhlu̱hꜗ wɨɨꜘ jwërte jmɨˉñeehꜚ.
26Heˉja̱ˉ barco kiyhꜗ maˊ sooˉ taꜙ gyʉʉhˈ
hiꜙ maˊ jyooꜙ läꜙko̱o̱ˉ hlu̱hꜙ jmɨɨˉ.
Läꜙjë̱ë̱ꜙ hi̱ˉ tä̱ä̱hˊ nehꜙ barco
laꜗ kiyhꜗ läꜙko̱o̱ˉ heˉ moꜙsoꜙ häˊ mɨˈdsëyꜗ.
27Dsaˉtuꜘ dsaˉjä̱ä̱yꜘ läꜙko̱o̱ˉ dsaˉ chaˊhi̱i̱hꜚ,
moꜙsoꜙ ñeyˉ heˉ jmeeyꜗ.
28Ja̱ˉgaˊ gaꜙchu̱u̱yꜘ kya̱a̱hˊ DSAˉJØ̱Ø̱Hˈ jnänˋ
kihꜗ heˉ wɨɨꜘ heˉ maˊ jëëy˜.
Hi̱ˉ heꜘ gaꜙlä̱ä̱yꜗ kihꜗ heˉ wɨɨꜘ ja̱ˉ.
29Jëëhꜘ gaꜙjmeeyꜘ gaꜙjä̱ꜘ tiˊsɨ̱hꜘ goˉte˜ lleꜘ,
ja̱ˉ ji̱i̱hˈ moꜙsoꜙ gaꜙhlu̱hꜗ gaˊ jmɨˉñeehꜚ.
30Peerꜙ gaꜙjë̱ë̱ꜘ dsëyꜗ maˊ gaꜙjëëyꜗ heˉ gaꜙlaꜗ läꜙja̱ˉ.
Hñiiꜘ Dio gaꜙjä̱ä̱yꜗ läꜙ gaꜙtëꜘ jeeˊ hnøøyˈ llaˉnääyꜗ.
31Kwaˊ hnähꜘ tiˊhmaahˊ kihˈ DSAˉJØ̱Ø̱Hˈ jnänˋ
kihꜗ heˉ lluꜗ dsëyꜗ.
Häˊ hnähꜘ kiyhꜗ,
kwa̱a̱t˜ kihꜗ läꜙjëꜙ heˉ jʉhˉga̱a̱ˉ heˉ jmeeyꜙ.
32Hlëëhˊ hnähꜘ lluꜗ kiyhꜗ jeeˊ dsaˉñeeꜙ läꜙjë̱ë̱ꜙ dsaˉ.
Läꜙja̱ˉ kaˉlähꜘ jeeˊ dsaˉñeeꜙ taˉgyʉʉhˊ,
hlëëhˊ hnähꜘ lluꜗ kiyhꜗ.
33Jëëhꜘ hñiiyꜘ miˉki̱yhꜘ jmɨˉjʉʉhˉ,
hiꜙ läꜙja̱ˉ miˉki̱yhꜘ jmɨˉgwaˉ kaˉlähꜘ.
34Läꜙja̱ˉ hwaꜗ lluꜗ tooyhˉ ñeˊ,
kwa̱a̱t˜ kihꜗ hi̱ˉ hñaaˉ dsëꜗ hi̱ˉ tä̱ä̱hˊ hwaˈ ja̱ˉ.
35Heꜘ baˊ hñiiyꜘ jmeeyꜙ chaˉ jmɨɨˉ jeeˊ laˈ hwaꜗ ki̱i̱ꜙ.
Läꜙja̱ˉ läꜙka̱a̱ˉ jeeˊ maˉläˉki̱i̱ꜙ,
jmeeyꜙ hyaˉ chaˉmiihˉ jmɨɨˉ,
36mahꜗ leꜘ dsaˉta̱a̱hˋ hi̱ˉ saꜙ chaˉ heˉ kuhˉhɨ̱h˜.
Hiꜙ jmeeyꜗ ko̱o̱ˉ jeeˊ jwɨɨˉ jeeˊ dsaˉta̱a̱yhˋ.
37Jeeˊ ja̱ˉ gaꜙløøyꜗ jngëëyˉ hu̱ˊjmɨhꜗ,
gaꜙløøyꜗ tä̱ä̱y˜ chahˈ wɨ̱ɨ̱ˉ jëhˈ,
haˉ ko̱hꜘ taˊ saꜙ gaꜙchooyhꜗ jeeˊ ja̱ˉ.
38Haˉ ko̱hꜘ saꜙ gaꜙmiꜙjø̱ø̱ꜗ Dio hwaꜗ ja̱ˉ,
heˉja̱ˉ gaꜙläꜙjwë̱ë̱ꜘ jwërte dsaˉ heꜘ,
hiꜙ läꜙkye̱ˉ jahꜘ kya̱a̱yꜗ gaꜙläꜙjwë̱ë̱ꜘ.
39Ko̱o̱ˉ jmɨɨˊ kihˈ jeeˊ läꜙjëꜙ gaꜙløøꜗ jëëy˜ wɨɨꜘ,
gaꜙjä̱yꜘ taꜙ hwaꜗ goˉte˜ kwa̱a̱t˜ kihꜗ hi̱ˉ gaꜙløøꜗ jmeeyhꜙ,
hiꜙ läꜙja̱ˉ kwa̱a̱t˜ kihꜗ hi̱ˉ hñaaˉ dsëꜗ kaˉlähꜘ.
40Pero Dio niꜙ miihˉ saꜙ ta̱a̱yhˉ taˊ läꜙjë̱ë̱ꜙ dsaˉka̱a̱hˊ.
Jmeeyꜙ heˉ dsaˉsa̱a̱ꜘ dsaˉjñeeꜘ dsaˉ heꜘ,
dsaˉnääyꜗ taꜙ laꜙ taꜙ jnøꜙ naˉhë̱ë̱yˈ goˉte˜.
41Pero taꜙ jyohꜘ ko̱ˉta̱a̱ˉ,
Dio lä̱ä̱˜ hi̱ˉ täˉñeeꜘ hi̱ˉ jëë˜ wɨɨꜘ.
Hiꜙ jmeeyꜙ dsaˉläˉjwë̱ë̱ꜘ jo̱o̱ꜘsɨɨyhˊ
läꜙko̱o̱ˉ dsaˉläˉjwë̱ë̱ꜘ jahꜘ.
42Läꜙjë̱ë̱ꜙ hi̱ˉ llu̱u̱ꜗ,
waˊraˉ gaꜙjëëyꜗ maˉlaꜙ läꜙja̱ˉ, läꜙcha̱a̱yˉ lluꜗ.
Pero hi̱ˉ hñaaˉ dsëꜗ dsaˉta̱a̱yhˋ tiˊsɨ̱hꜘ goˉte˜.
43Cherˊmahꜗ hi̱ˉ kyʉʉh˜,
hnøøꜗ ka̱yꜗ kwa̱a̱t˜ läꜙko̱o̱ˉ jmeeꜙ Dio.
Hnøøꜗ tä̱hꜙ dsëyꜗ haˉ ko̱hꜘ saꜙ lluꜗ dsëꜗ DSAˉJØ̱Ø̱Hˈ jnänˋ.
Currently Selected:
Salmos 107: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
