Salmos 105
105
1Kwaˊ hnähꜘ tiˊhmaahˊ kihˈ DSAˉJØ̱Ø̱Hˈ jnänˋ.
Jmeeˊ hnähꜘ jʉʉhˉ kiyhꜗ.
Läꜙka̱a̱ˉ läꜙjʉhꜗ jmɨˉgyʉʉꜙ hlëëhˊ hnähꜘ
kihꜗ läꜙjëꜙ taˊ heˉ jmeeyꜙ.
2Häˊ hnähꜘ kiyhꜗ kya̱a̱hˊ su̱ꜚ naˊhñaahꜗ.
Hlëëhˊ hnähꜘ kihꜗ läꜙjëꜙ heˉ jʉhˉga̱a̱ˉ heˉ jmeeyꜙ.
3Waˊ cha̱a̱ˉ jneˊ lluˈ kya̱a̱hˊ DSAˉJØ̱Ø̱Hˈ jnänˋ.
Waˊ jë̱ë̱ˉ dsëꜗ läꜙjë̱ë̱ꜙ hi̱ˉ hnaayhˉ.
4Hnäähˈ hnähꜘ DSAˉJØ̱Ø̱Hˈ jnänˋ, hnøøhˈ hnähꜘ beꜘ kiyhꜗ.
Hnäähˈ hnähꜘ läꜙjëꜙ jmɨɨˊ baˊ.
5Waˊ dsooh˜ hohꜘ hnähꜘ kihꜗ heˉ jʉhˉga̱a̱ˉ heˉ gaꜙjmeeyꜘ lloꜘjooꜗ, hiꜙ läꜙja̱ˉ kihꜗ läꜙjëꜙ heˉ gaꜙhlëëyhꜘ,
6hnähꜘ hi̱ˉ la̱a̱ꜗ saˊju̱ˉ kihꜗ Abraham
hi̱ˉ maˊ jmeeꜙ taˊheꜗ kihꜗ Dio,
hnähꜘ hi̱ˉ la̱a̱ꜗ saˊju̱ˉ kihꜗ Jacob hi̱ˉ naˉlle̱e̱hˊ kya̱a̱yˈ.
7Jëëhꜘ hñiiꜘ bihꜗ la̱a̱yꜗ DSAˉJØ̱Ø̱Hˈ jnänˋ hiꜙ Dio jnänˋ.
Hñiiꜘ bihꜗ jmeeyꜙ hihꜙ läꜙka̱a̱ˉ läꜙjʉhꜗ jmɨˉgyʉʉꜙ.
8Ji̱hˊko̱hꜘ saꜙ gaaꜘ dsëyꜗ hehꜗ hmoohˊ heˉ gaꜙjmeeyꜘ.
Maꜙkeꜙ ngooꜗ baˊ chaˉmiihˉ mil ji̱ˉñeˉ,
läꜙ maˉnaˊji̱i̱hꜙ ja̱ˉbaˊ heˉ gaꜙbä̱ä̱yhˉ hñiiyꜘ,
9läꜙko̱o̱ˉ maˊ gaꜙjmeeyꜘ hmoohˊ kya̱a̱hˊ Abraham.
Läꜙja̱ˉ kaˉlähꜘ gaꜙtä̱ä̱yˉ hñiiyꜘ
heˉ miˉteyꜗ hmoohˊ ja̱ˉ kya̱a̱hˊ Isaac.
10Ja̱ˉbaˊ läꜙja̱ˉ gaꜙjmeeyꜘ kya̱a̱hˊ Jacob.
Gaꜙjmeeyꜘ ko̱o̱ˉ hmoohˊ hwehˉ kya̱a̱hˊ aIsrael,
11läꜙko̱o̱ˉ maˊ gaꜙsɨɨyhꜙ:
“Kwëëhnꜚ hneˉ hwaꜗ Canaán laˉ, jeeˊ laˉ leꜘ he̱e̱hꜚ.”
12Jmɨɨˊ ja̱ˉ miihˉ goˉte˜ baˊ jo̱o̱ꜘsɨɨyhˊ maˊ cha̱a̱ˉ.
Hiꜙ kihꜗ hwaꜗ heˉ maˉlaꜗ he̱e̱yꜚ ja̱ˉ,
maˊ la̱a̱yˈ läꜙko̱o̱ˉ dsaˉ cha̱a̱ˉ ʉ̱ʉ̱ꜘ baˊ.
13Heˉja̱ˉ maˊ gaꜙnääyˊ taꜙ laꜙ taꜙ jnøꜙ,
läꜙko̱o̱ˉ läꜙko̱o̱ˉ jeeˊ jwɨɨˉ.
14Pero Dio saꜙ gaꜙkwaꜘ jwëˈ heˉ maˊ jmeeˈ dsaˉ hñaaˉ dsëꜗ kiyhꜗ taꜙ jeeˊ maˊ gaꜙnääyˊ.
Ja̱ˉbaˊ kwa̱a̱t˜ kihꜗ hi̱ˉ heꜘ
gaꜙjʉʉhꜗ Dio kihꜗ dsaˉ hi̱ˉ maˊ la̱a̱ˈ taˊ.
15Gaꜙsɨɨyhꜙ: “Taꜙ ka̱a̱hꜙ hi̱ˉ naˉlle̱e̱hˊ kya̱a̱nꜙ,
niꜙ taꜙ jmeehˋ hi̱ˉ ngëë˜ juuˈ kinꜙ.”
16Maˉngëëꜘ heˉ ja̱ˉ,
gaꜙjmeeꜘ Dio jaꜗ ko̱o̱ˉ hooˉ hwaꜗ Canaán.
Gaꜙdsaꜗ goˉte˜ läꜙjëꜙ heˉ kuhˉhɨ̱yh˜.
17Pero jä̱ä̱ꜗ gaˊ gaꜙche̱e̱yꜗ ja̱a̱ˉ dsaˉñʉʉhˉ taꜙ Egipto,
kë̱ë̱ˉ gaˊ gaꜙllaꜙnääꜗ jeeˊ läꜙjë̱ë̱ꜙ.
Hi̱hꜗ dsaˉñʉʉhˉ heꜘ che̱e̱ˉ José
hi̱ˉ gaꜙhnëëyꜗ jmeeꜗ taˊheꜗ kihꜗ dsaꜙ.
18Jeeˊ ja̱ˉ gaꜙta̱a̱yhˉ nehꜙñeˈ
hiꜙ gaꜙhñʉʉyˉ tɨɨyˊ kya̱a̱hˊ caden˜.
19Läꜙ maˉhä̱ä̱yˊ ja̱ˉ nehꜙñeˈ
läꜙji̱i̱hˈ gaꜙläꜙteꜗ ko̱o̱ˉ juuˈ heˉ gaꜙlleyˉ kihꜗ dsaꜙ.
Taˊko̱ˉji̱i̱hˈ ja̱ˉ, DSAˉJØ̱Ø̱Hˈ jnänˋ baˊ heꜘ hi̱ˉ maˊ ka̱˜ dsëyꜗ.
20Ja̱ˉgaˊ gaꜙjmeeꜘ dsaˉtaˊ madaꜚ heˉ yaˉhë̱ë̱yˈ nehꜙñeˈ.
Heꜘ baˊ hñiiꜘ dsaˉtaˊ jø̱ø̱hˈ gaꜙlä̱ä̱yꜗ.
21Gaꜙlla̱a̱yꜗ läꜙko̱o̱ˉ dsaˉjʉʉˊ chaˊnehꜙ kiyhꜗ.
Gaꜙtooyhˉ gooyˉ läꜙjëꜙ heˉ chaˉ kiyhꜗ.
22Gaꜙhñaayꜗ mahꜗ miˉtë̱ë̱yꜙ läꜙjë̱ë̱ꜙ dsaˉtaˊ mähꜗ,
hiꜙ läꜙja̱ˉ miˉtë̱ë̱yꜙ dsaˉ maˉgyu̱hˉ kya̱a̱yꜗ.
23Maˉngëëꜘ heˉ ja̱ˉ gaꜙllaꜙnääꜗ läꜙjë̱ë̱ꜙ hi̱ˉ cha̱a̱ˉ kya̱a̱ꜗ Jacob hwaꜗ Egipto.
Dsaˉ Israel gaꜙløøꜗ dsaˉta̱a̱yhˋ hwaꜗ aCam.
24Dio baˊ gaꜙjmeeꜘ heˉ gaꜙläꜙjwë̱ë̱ꜘ dsaˉ kya̱a̱ꜗ Jacob.
Läꜙji̱i̱hˈ gaꜙlaꜗ ko̱o̱ˉ jwɨɨˉ jʉhˉga̱a̱ˉ,
heˉja̱ˉ gaꜙläꜙhøøhˋ dsaˉ Egipto kiyhꜗ.
25Dio gaꜙmiꜙsɨɨꜗ dsëꜗ dsaˉ Egipto
mahꜗ gaꜙläꜙhøøyhˋ kihˈ dsaˉ Israel.
Gaꜙtooyhˉ hʉʉˊdsëˉ hlɨɨhˈ lleˊ dsaˉ heꜘ
mahꜗ jmeeyhꜙ hi̱ˉ jmeeꜗ taˊheꜗ kihꜗ Dio.
26Maˉngëëꜘ heˉ ja̱ˉ gaꜙche̱e̱yꜗ Moisé kya̱a̱hˊ Aarón
hi̱ˉ gaꜙlle̱e̱yhˉ nooˉ nëˊ kihˈ dsaꜙ.
27Läꜙu̱u̱ꜘ hi̱ˉ heꜘ gaꜙjmeeꜘ heˉ jʉhˉga̱a̱ˉ
chaˊnëˊ dsaˉka̱a̱hˊ kya̱a̱ˈ dsaˉ Egipto.
Johꜘ heˉ jʉhˉga̱a̱ˉ saꜙ gaꜙjmeeyꜘ hwaꜗ aCam.
28Gaꜙjmeeyꜘ gaꜙjä̱ꜘ naˉho̱o̱ˉ lähˉ läꜙka̱a̱ˉ hwaꜗ Egipto,
kihꜗ heˉ saꜙ maˊ kwayˈ jwëˈ maˊ hwë̱ë̱ꜙ dsaˉ Israel.
29Gaꜙjmeeyꜘ gaꜙlɨɨꜗ jmaˉ läꜙjëꜙ jmɨɨˉ jë̱ë̱ˉ.
Hiꜙ gaꜙju̱u̱ꜗ läꜙjë̱ë̱ꜙ jahꜘ cha̱a̱ˉ chaˊjmɨɨˉ.
30Gaꜙjmeeyꜘ gaꜙhña̱a̱ˉ jwë̱ë̱ꜘ jwërte jehˉwë̱hꜙ,
läꜙji̱i̱hˈ gaꜙta̱a̱yhˋ chaˊnehꜙ kihꜗ dsaˉka̱a̱hˊ kya̱a̱yˈ.
31Gaꜙkwayꜘ jwëˈ gaꜙhña̱a̱ˉ jwë̱ë̱ꜘ jwërte jëëˊ,
läꜙja̱ˉ gaꜙhña̱a̱ˉ chaˊluˉ läꜙ gaꜙdsaꜗ hwaꜗ ja̱ˉ.
32Gaꜙjmeeyꜘ gaꜙhlaꜗ mɨˈdsëꜗ llaꜚ jmaꜗ,
gaꜙjmeeyꜘ gaꜙta̱hꜘ ñihꜗ läꜙka̱a̱ˉ hwaꜗ ja̱ˉ.
33Läꜙja̱ˉ gaꜙhnooˉ dsooˊ kihˈ chahˈ wɨ̱ɨ̱ˉ jëhˈ
hiꜙ kihꜗ chahˈhmaˉ higo.
Gaꜙchiꜗ gaꜙjøøꜗ läꜙjëꜙ chahˈhmaˉ kihꜗ jeeˊ jwɨɨˉ ja̱ˉ.
34Gaꜙkwayꜘ jwëˈ gaꜙhña̱a̱ˉ jwë̱ë̱ꜘ jwërte i̱i̱hˉ
hi̱ˉ saꜙ tä̱ä̱ꜙ jneˊ he̱e̱nˊ.
35I̱i̱hˉ heꜘ gaꜙmiꜙllaˉ läꜙjëꜙ nuuˉ eehˉ
hiꜙ läꜙja̱ˉ läꜙjëꜙ mɨˈhmaˉ kihꜗ hwaꜗ ja̱ˉ.
36Gaꜙjngëëyhꜗ läꜙjë̱ë̱ꜙ jo̱o̱ꜘ dsaˉ Egipto
hi̱ˉ la̱a̱ꜗ hi̱ˉ ñʉʉhˉ toˉnëˊ kya̱a̱yˈ,
heˉ gaˊ gyʉ̱ʉ̱ˉ hi̱ˉ maˊ kye̱yˉ oˉjø̱hꜙ dsëˉ kihꜗ.
37Läꜙja̱ˉ baˊ gaꜙhwë̱ë̱ꜗ Dio dsaˉ kya̱a̱ꜗ
hi̱ˉ maˊ tä̱ä̱hˊ hwaˈ Egipto ja̱ˉ.
Gaꜙhyoyhꜗ kihꜗ dsaˉ Egipto kuˊtøøˉ kuˊnøøꜚ.
Niꜙ ja̱a̱ˉ hi̱ˉ heꜘ saꜙ gaꜙläꜙdsaahˋ.
38Peerꜙ gaꜙläꜙcha̱a̱ꜙ dsaˉ Egipto lluꜗ
maˊ gaꜙhwë̱ë̱ˉ dsaˉ heꜘ,
jëëhꜘ gaꜙjwa̱a̱yhˈ jwërte kihꜗ läꜙjëꜙ heˉ gaꜙlaꜗ kiyhꜗ.
39Dio maˊ jmeeꜙ hiiꜘ jniiꜘ nëˊ kiyhˈ taꜙlaꜙ jmɨɨˈ
heˉ maˊ jmeeꜙ hi̱i̱hˉ kiyhꜗ.
Hiꜙ taꜙlaꜙ hwëˈ maˊ jmeeyꜙ maˉjnäꜘ jeˉ
heˉ maˊ chooꜙ kiyhꜗ.
40Dsaˉ kya̱a̱yꜗ gaꜙchu̱u̱ꜘ kya̱a̱yhˊ gaꜙngɨɨyꜘ ngoꜗ,
heˉja̱ˉ gaꜙche̱e̱yꜗ juˉto̱o̱ꜘ.
Läꜙ gaꜙtëꜘ gyʉʉhˈ gaꜙche̱e̱yꜗ maná
heˉ gaꜙkuhˉ dsaˉ heꜘ läꜙji̱i̱hˈ gaꜙkë̱ë̱yꜗ.
41Gaꜙjøøyꜗ dsohꜘ ku̱u̱ˊ hlooˉ mahꜗ gaꜙhyaˉ chaˉmiihˉ jmɨɨˉ.
Gaꜙngëëꜘ läꜙko̱o̱ˉ jmɨˉjʉʉhˉ jeeˊ laˈ hwaꜗ ki̱i̱ꜙ jmahꜗ.
42Maꜙraꜙ heˉ dsooh˜ baˊ dsëyˈ kihꜗ hmoohˊ heˉ gaꜙjmeeyꜘ
kya̱a̱hˊ Abraham hi̱ˉ maˊ jmeeꜙ taˊheꜗ kiyhꜗ.
43Heˉja̱ˉ gaꜙhwë̱ë̱yꜗ dsaˉ kya̱a̱yꜗ hwaꜗ Egipto.
Peerꜙ maˊ cha̱a̱yˉ lluꜗ maˊ gaꜙhwë̱ë̱yˉ jeeˊ ja̱ˉ.
44Ja̱ˉ gaˊ gaꜙhwë̱ë̱yꜗ dsaˉ hi̱ˉ maˊ tä̱ä̱hˊ hwaˈ Canaán,
mahꜗ gaꜙkwëëyhꜗ dsaˉ kya̱a̱yꜗ.
Läꜙjëꜙ heˉ maˊ chaˉ maˊ hi̱i̱ˊ kihˈ dsaˉ heꜘ
gaꜙlaꜗ kihꜗ dsaˉ kya̱a̱yꜗ.
45Ko̱o̱ˉ baˊ heˉ maˊ hnøøˈ Dio maˊ jmeeyˈ,
heˉ maˊ miˉteyꜗ madaꜚ heˉ gaꜙjmeeꜘ Dio kiyhꜗ,
heˉ maˊ høøyˈ ley kihꜗ Dio. ¡Aleluya!
Currently Selected:
Salmos 105: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
