Salmos 104
104
1Häˊ hneˉ jmɨˉlleꜘ kinꜙ kihꜗ DSAˉJØ̱Ø̱Hˈ jnänˋ.
Peerꜙ jø̱ø̱hˈ la̱a̱hꜗ hneˉ DSAˉJØ̱Ø̱Hˈ kya̱a̱nꜙ.
Haˉ ko̱hꜘ saꜙ jø̱ø̱hˈ hneˉ,
haˉ ko̱hꜘ naˊhñaahꜗ saꜙ laꜗ jeeˊ ñehˊ.
2Jeeˊ baˊ jmëëˈ hä̱ä̱hˊ hneˉ.
Läꜙ gaꜙdsaꜗ gyʉʉhˈ jmɨˉgyʉʉꜙ gaꜙjmeehˊ hë̱ë̱ˈ nʉʉꜘ.
3Jniiꜘ laꜗ läꜙko̱hꜘ hmaˉchaꜗ kihꜗ hneꜗ kyahꜗ.
Ja̱ˉbaˊ jniiꜘ naˉ laꜗ läꜙko̱hꜘ carro kyahꜗ.
Nëˊ lleꜘ baˊ ngëhˉ.
4Kihꜗ lleꜘ jmeehˉ läꜙko̱o̱ˉ ja̱a̱ˉ hi̱ˉ kwaꜙ juuˈ kyahꜗ.
Kihꜗ ñihꜗ jmeehˉ läꜙko̱o̱ˉ ja̱a̱ˉ hi̱ˉ jmeeꜙ taˊheꜗ kyahꜗ.
5Gaꜙjmeehˊ gaꜙjä̱ꜘ ko̱o̱ˉ hwehˉ hwaꜗ,
ji̱hˊko̱hꜘ saꜙ saˊjehꜗ.
6Gaꜙjmeehˊ gaꜙnøøꜗ jmɨɨˊ nëˊ hwaˈ
hiꜙ läꜙ gaꜙtëꜘ nëˊ mohꜘ gaꜙjlëꜗ.
7Kya̱a̱hˊ ko̱o̱ˉ gaꜙhlëëhˊ baˊ hneˉ gaꜙjñahꜗ jmɨɨˉ.
Naꜗ baˊ ko̱hꜘ gaꜙjñahꜗ jmɨɨˉ
maˊ gaꜙnuuyꜘ gaꜙhlëëhˊ läꜙko̱o̱ˉ hɨ̱ɨ̱ˊ ñihꜗ.
8Gaꜙjmeehˊ gaꜙläꜙjnäꜘ mohꜘ ñiiꜘ
hiꜙ gaꜙjmeehˊ gaꜙläꜙjnäꜘ jeeˊ hwa̱a̱ˈ kaˉlähꜘ.
9Gaꜙtø̱ø̱hꜘ hihꜙ haˉ ji̱i̱hˈ jeeˊ gaꜙnøøꜗ jmɨɨˉ,
mahꜗ moꜙsoꜙ dsaˉheꜘ gaˊ nëˊ hwaˈ.
10Hneˉ jmeehˉ hyaˉ jmɨˉgwaˉ läꜙka̱a̱ˉ mohꜘ,
heˉ dsaˉngëëꜘ läꜙka̱a̱ˉ jeeˊ hwa̱a̱ˈ.
11Jeeˊ ja̱ˉ jña̱a̱ꜗ jahꜘ hi̱ˉ cha̱a̱ˉ nehꜙ nuuꜙ hɨ̱h˜ jmɨɨˉ.
Läꜙkye̱ˉ jahꜘ ka̱a̱hˊ hi̱ˉ cha̱a̱ˉ nehꜙ nuuꜙ
dsaˉkë̱ë̱ꜗ kya̱a̱hˊ jmɨɨˉ ja̱ˉ.
12Chaˊhooˊ jmɨɨˉ ja̱ˉ laꜗ hø̱ø̱ˈ ta̱ˈjahꜘ,
dsaˉta̱a̱yhˋ häyꜗ läꜙka̱a̱ˉ gyʉʉhˈ hmaˉ heˉ chaˉ kooꜘ ja̱ˉ.
13Läꜙ gaꜙtëꜘ gyʉʉhˈ che̱e̱hˈ jmaꜗ nëˊ mohꜘ
mahꜗ ka̱ꜗ yaˊjøøꜚ hwaꜗ.
14Hneˉ jmeehˉ dsaˉkwa̱a̱ꜙ nuuˉ heˉ kuhˉ jahꜘ
hiꜙ jmeehˉ dsaˉkwa̱a̱ꜙ läꜙjëꜙ heˉ jngëëˉ dsaˉ.
Läꜙja̱ˉ dsaˉläˉchaˉ heˉ kuhˉhɨ̱h˜ dsaˉ.
15Dsaˉläˉchaˉ jmɨhꜗ mɨˈjëhꜗ heˉ jmeeꜙ jë̱ë̱ˉ dsëꜗ dsaˉ.
Dsaˉläˉchaˉ aceit heˉ jmeeꜙ dsaˉnøhꜗ dsëꜗ dsaˉ.
Dsaˉläˉchaˉ läꜙjëꜙ heˉ ka̱˜ dsaˉ yaˊjøøꜚ.
16Läꜙkye̱ˉ chahˈhmaˉ kihꜗ DSAˉJØ̱Ø̱Hˈ jnänˋ
ka̱˜ yaˊjøøꜚ kya̱a̱hˊ jmaˈ.
Läꜙja̱ˉ kaˉlähꜘ ka̱˜ yaˊjøøꜚ chahˈ hmaˉñihˊ
heˉ chaˉ mohꜘ Líbano heˉ gaꜙjngëëyꜘ.
17Nëˊ chahˈhmaˉ ja̱ˉ jmeeꜙ ta̱ˈ sɨɨˊ kihˈ.
Gyʉʉhˈ hmaˉkɨɨˈ jmeeꜙ ta̱ˈ ka̱a̱hˊ sɨɨˊ kihˈ.
18Gaꜙjmeehˊ mohꜘ ñiiꜘ jeeˊ cha̱a̱ˉ ko̱o̱ˉ nääꜗ chivo nuuˉ,
läꜙja̱ˉ nehꜙ tooˉ mohꜘ jeeˊ hmähˊ loˉkyaˈ.
19Gaꜙjmäähˋ sɨhˉ mahꜗ läꜙkyʉʉh˜ dsaˉ kihꜗ maꜙ ja̱a̱ˉ sɨhˉ.
Gaꜙjmäähˋ hyooˉ hi̱ˉ miˉjnääꜙ kihꜗ ko̱o̱ˉ jmɨɨˊ ko̱o̱ˉ jmɨɨˊ.
20Hneˉ gaꜙjmeehˊ chaˉ hwëˈ.
Hiꜙ taꜙlaꜙ hwëˈ baˊ jmeehˉ hwë̱ë̱ˉ ko̱ˉlla̱a̱ˊ jahꜘ
mahꜗ hnooyhˉ heˉ kuyhˉ.
21Hooh˜ hyahˉ mähˈ maˊ kyo̱yhꜙ,
chu̱u̱yꜘ kya̱a̱hˊ Dio mahꜗ kwaꜗ heˉ kuyhˉ.
22Mahꜗ waˊraˉ gaꜙhyaˉ hyooˉ
dsaˉnääyˋ nehꜙ tooˉ kiyhꜗ.
23Hiꜙ dsaˉ, hwë̱ë̱yˉ dsaˉnääyꜗ dsaˉjmeeyꜘ taˊ
läꜙji̱i̱hˈ gaꜙnʉʉˉ.
24Hneˉ DSAˉJØ̱Ø̱Hˈ kya̱a̱nꜙ,
saꜙ tä̱ä̱ꜙ jnäähˈ heˊ jnäähꜗ läꜙjëꜙ heˉ jʉhˉga̱a̱ˉ heˉ gaꜙjmeehˊ.
Läꜙjëꜙ heˉ ja̱ˉ gaꜙjmeehˊ kya̱a̱hˊ hʉʉˊdsëˉ lluꜗ kyahꜗ.
Läꜙka̱a̱ˉ jmɨˉgyʉʉꜙ jnääꜘ läꜙjë̱ë̱ꜙ hi̱ˉ gaꜙjmäähˋ.
25Haˉ ko̱hꜘ saꜙ huꜘ kyeˉ jmɨˉñeehꜚ, haˉ ko̱hꜘ saꜙ juuhˉ.
Nehꜙ ja̱ˉ tä̱ä̱hˊ läꜙkuˊ läꜙngëëˈ jahꜘ, hi̱ˉ mähˈ hi̱ˉ ka̱a̱hˊ.
26Nëˊ kihˈ jmɨɨˉ ja̱ˉ gaꜙnääˊ barco
hiꜙ nehꜙ jmɨɨˉ ja̱ˉ, haˉ ko̱hꜘ saꜙ ka̱hˊga̱a̱ˉ jahꜘ hi̱ˉ gaꜙjmäähˋ hi̱ˉ gaꜙnääˊ kooꜙ nehꜙ jmɨɨꜙ.
27Läꜙjë̱ë̱ꜙ jahꜘ hi̱ˉ gaꜙjmäähˋ jä̱ä̱y˜ hneˉ,
heˉ kwëëhˈ hnihꜘ heˉ kuyhˉ läꜙko̱o̱ˉ lleˋ kihˈ.
28Waˊraˉ gaꜙkwëëhˋ hnihꜘ, cha̱hꜘ baˊ he̱e̱yhˉ.
Waˊraˉ gaꜙsa̱a̱ˊ gaꜙjñeehˊ mɨɨˈ, kuyhˉ läꜙji̱i̱hˈ kë̱ë̱yꜗ.
29Pero waˊraˉ gaꜙhmähˊ kiyhˈ, gaꜙläꜙjë̱ë̱ꜙ baˊ dsaˉjø̱ø̱hꜙ.
Cherˊmahꜗ gaꜙki̱i̱hˈ lleꜘ heˉ ko̱o̱yˈ, läꜙjë̱ë̱ꜙ baˊ ju̱u̱ꜘ,
ja̱ˉ ji̱i̱hˈ he̱e̱yꜘ goˉte˜.
30Hñaahꜗ che̱e̱hꜙ Jmɨˉlleꜘ kyahꜗ,
heˉja̱ˉ ngooꜗ baˊ dsaˉläˉcha̱a̱yˉ jmɨˉgyʉʉꜙ,
läꜙja̱ˉ jmeeꜙ dsaˉläˉhmëëꜘ kaˉlähꜘ jmɨˉgyʉʉꜙ.
31Waˊ jmeenˊ jʉʉhˉ kihꜗ DSAˉJØ̱Ø̱Hˈ jnänˋ
läꜙjëꜙ johꜘ jmɨɨˊ chaˉ.
Haˉ ko̱hꜘ saꜙ cha̱a̱yˉ lluꜗ kya̱a̱hˊ taˊ kiyhˈ.
32Kya̱a̱hˊ ko̱o̱ˉ hlëëhꜗ bihꜗ jehꜙ hwaꜗ.
Waˊraˉ jähꜘ kihꜗ su̱yꜗ gooyˉ dsohꜘ mohꜘ,
läꜙcha̱hꜘ ja̱ˉ hyaˉ ñeˊ.
33Hänˋ kihˈ DSAˉJØ̱Ø̱Hˈ jnänˋ taˊko̱ˉji̱i̱hˈ cha̱a̱nˉ.
Hänˋ su̱ꜚ kiyhꜗ läꜙji̱i̱hˈ ju̱u̱nꜘ.
34Lluꜗ waˊraˉ jähꜘ kihꜗ tɨhꜗ dsëyꜗ hʉʉˊdsëˉ kinꜙ.
Jëëhꜘ kihꜗ bihꜗ gwaꜘ heˉ cha̱a̱nˉ lluꜗ.
35Waˊ lla̱a̱ꜘ goˉte˜ läꜙjë̱ë̱ꜙ hi̱ˉ jmeeꜙ heˉ hlɨɨhˈ
hi̱ˉ tä̱ä̱hˊ hwaˈ laˉ.
Waˊ ä̱ä̱hˈ goˉte˜ läꜙjë̱ë̱ꜙ hi̱ˉ hñaaˉ dsëꜗ.
Häˊ hneˉ jmɨˉlleꜘ kinꜙ kihꜗ DSAˉJØ̱Ø̱Hˈ jnänˋ. ¡Aleluya!
Currently Selected:
Salmos 104: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
