Éxodo 40

Cana Coaunera que banijiaaineein nihane coujunacaneein, santoario ichoaae erene chorocuruhane

1Nitohaneein inae besautiaa tabernacolone jaun jetaote, Moisesa rai jetao:

2“Cana bajaanaa batene cojoanonaa nunuheque, inara Coaunera nichaaune acatiha, turuhichene jaanu loanari tabernacolo aina, santoario laurihana nunuheteeu. 3Chaaen, nii bujua cajione que bujuateein, nii inara ichao rai rauhi tonoraain ichaohichene coina, quiicha teei camela teeu cuhane. 4Jerichanejeeichu, nii bujuaque jauhequiin nenaa cuhane, nii mesa aina, usi nujua teeu cuhane. Caohachaain rauhijiriin nihane jaun teein, nii mesa rucuhecu, nii usi nujuaque rai conooru raanfariichuru teein. 5Jerichanejeeichu, nii inara ichao rai rauhi quiicha teei que jauhecaain, nii oro caje, jujuhi mocooruhane jaa usi rori teeu cuhane, chaaen nii santoario bacuujua bujua teroracaau. 6Nii baiha, nii santoario bacuujua roha, nii usi rori teeu, nii loanari tabernacolo cuhane. 7Nii baiha jerichanejeein, nii loanari tabernacolo cuhane, nii usi rori rohan, nii ojoaichu teein, cuhane acau curuhacu. 8Nitohaneein inaen ichaaine baiha, tinonoritiin, nii airichai corihateein, nii airichai bacuujua enonaanaja bacuujua fuera teroracaau.

9Nitohaneein, inaen jitariin ichaaine baiha, canuque banijiaain nihane coujunacaneque, nii santoario ichoaae erene choroo, nii cuhane satiin nenacaauru choaaene maajeein. Nitohaneeinte, canuque banijiaaineein nihane coujunacaneque, esinae rauhijiriin, jelai teein, jataain canuque banijiaaineein nihane coina ichariquiin. 10Jerichanejeeinchu, canuque banijiaaineein niha, nii usi rorine coujunacaneque, nichoae erene choroo, satiin nii corujeleeuru choaaene maajeein. Nitohaneein rujuaaute, esinae rauhijiriin, jelai teein canuque banijiaaineein niha, nii rori coujunacaneein neeine. 11Jerichanejeeinchu, esinae rauhijiriin canuque banijiaaineein niha, nii ojoaichune coujunacaneque, nelaurianajan choaaene maajeein erene choroo.

12Inaen nitohaneein, jitariin ichana nainaaine baiha, nii loanari tabernacolo bacuujua rohan, calaohichuru aina Aaroon amaain, camuhanajaaine, 13nii jelai teein que banijiaaineein nenaa cajione curuhamiin Aaroon. Nii baiha, jelai teein canuque banijiaain saseredoteneein nihane coujunacaneque, nichoae erene choroo. 14Nii baiha, nii calaohichuru cotijiaain, jerichanejeein nii Aaroon ichaaine rijijieein, nii acaauru cajione curujuaain, canu rai saseredoteneein neeuruhane coina, 15acaauru ichoaae erene choroo. Nii acaauru ichoaae erene iicha chorohite, chariji bana satonohelanaala, ena caje coaauneein nerichaain canu rai saseredotene coujunacaneein ichariquiin”, naa Cana Coaunerane jaun jetaote, 16nii rai aitoha Cana Coaunerane rijijieein jetao, jitariin ichae Moisesa.

17Nitohaneein jetaote, inaen coroata jaanacaa Egipto caje mituurune batene nunuheque jetao, nii santoario lauriana nunuhetelu. 18Nitohaneein, inaen jitariin nii santoario lauriana besautiaain jetaote, temuracuru teein, tabaraauru teein, cabairichanecurune maajeein teein, nujuaaurune maajeein chujuriaain jetao, 19nii santoario ichoaae, jitariin bucu teracaain, nii rai aitoha Cana Coaunerane rijijieein, nii jacari caje nenaa loanari teracae nichoae Moisesa.

20-21Nitohaneein ichaane baiha jetaote, nii tonoraain ichaaoruhane coina, Cana Coauneraacha teei camela cuhane jetao, nii rauhi siricha, ajeri caje nenaa tabaraauru te cuhane. Nii baiha jetaote, nii camela cobairichanacuru teein, nichoae fuera teein, nii rai aitoha Cana Coaunerane rijijieein, santoario cuhane, nii bujua cajioneque bujuateein tihane jaun jetao, inae bujuatenohineein nedae nii camela jelai.

22Nii baiha jetaote, nii bujua cajione que jauhecaain, enoto mitu nichaji coarajeein, cana ajaabiji nichaji loanari Cana Coaunera acatiha turuurunaja santoario cuhane jetao, nii mesa te. 23Nitohaneein cuhane teein jetaote, nii rai aitoha Cana Coaunerane rijijieein jetao, Cana Coaunera notaracae, nii mesa ichoaae jetao, caohachajeein faan te.

24Jerichanejeein jetaote, nii Cana Coaunera acatiha turuurunaja loanari santoario cuhane, enoto mitu nichaji coarajeein, cana raotono nichajique jetao, nii mesa jeraniha usi nujuan teein, nii rai aitoha Cana Coaunerane rijijieein, 25nii Cana Coaunera turunajaun, nacatiha raanfariinchuru mocoe.

26Nii bujua cajione jeraniha jetaote, nii oro caje nenaa rori te, loanari tabernacolo cuhane, nii rai aitoha Cana Coaunerane rijijieein, 27ecu teein jujuhi mocohane coina.

28Nii baiha jetaote, nii santoario bacuujua enonaanaja, bacuujua fuera teroracae jetao, Moisesa. 29Nitohaneein teroracaane baiha jetaote, nii loanari tabernacolo cuhane jetao, nii usi rori te, santoario bacuujuaniha, rai aitoha Cana Coaunerane rijijieein, ecu teein, niicha teeuri lenonecuru aina temulecuru mocoa Cana Coaunera raine coina.

30Nii Cana Coaunera acatiha turuurunaja loanari rohan jetaote, rori aina, ojoaichu te, cuhane acau teein, que nuculejeeuruhane coina. 31Nii ojoaichu caje acau raainihane jetaote, que biji aina tijia culeerejetecure Moisesa, Aaroon, rai calaohichuru, naaojoainuri. 32Nii Cana Coaunera acatiha turuurunaja loanari asaae enooruha coina, chaaen rori rohan nichuutaauruhane ajiniha jetaote, nuculejeeure, Moisesa rai aitoha Cana Coaunerane rijijieein.

33Inaen satononejeein jetaote, rori aina, santoario tinonoritiin jetao, airichai ichaain, nii airichai bacuujua enonaanaja bacuujua teroracae jetao, Moisesa.

Cana Coaunera acatiha turuurunaja loanari ichoaae niha dede sacarine

(Nm 9.15-23)

Inaen nitohaneein, jitariin besautiaa Moisesane jana jetaote, acaauru ajiniha cuhin acaauru amaaemaera 34dede sacari jetao, nii Cana Coaunera acatiha turuurunaja loanari tabernacolo cuhanai memoaane jana, nii santoario cuhanai conae Cana Coaunera cono. 35Nitohaneein, nii loanari tabernacolo ichoaae fauha dede sacarine jana jetaote, nii dede sacari aina cuaain, nii santoario cuhanai conaa Cana Coaunera conone jaun jetao, cuhane enonaa nainene Moisesa. 36Nii jaun jetaote, nii santoario ichoae nihane caje nerurujuaa, nii dede sacarine jetao, jacari caje nenaa acaauru loanari rucujueein jetao, cuha nii dede sacari caaijie cuure isaraelitaauru. 37Nejetaote laen, jelai caje nerurujuaeniha dede sacarine, nii acaauru nihanatiin, nii loanari rurujuaaurene, jelai caje nerurujuaa, nii dede sacarinereetiaain. 38Coriaaeneein amuuruha, isaraelitaauru natiin jetaote, nii santoario ichoaji caje amuelanaala, sonafaajeein itolere bana acaauru notaracaaecha, ecuhacha niha nii dede sacari coaracuruhane jana, janoaajeein nichoae ne usi.

Currently Selected:

Éxodo 40: URA

Highlight

Copy