Éxodo 39

Saseredotecuru cajione ichacuruhane

(Ex 28.1-43)

1Tabernacolo asaae enohin, niicha ichanenu ichacuruhane jaa cajione jetaote, cajione beraurosiojoai, cajione lanaajiojoain, cajione lanajain, naaojoain caje ichaae. Jerichanejeein Moisesa rai aitoha Cana Coaunerane rijijieein jetaote, jeelai teein Aaroon que banihateein cajione ichaae Besalee.

2Cajione beraurosiojoai, cajione lanaajiojoain, cajione lanajain, lino caje aohin ichanohin cajione, naaojoain caje cajione buri ichaane coina jetaote, oro que jasiiteein ichaae. 3Mariticho que oro macacaain jetaote, rishaaecaain sauhin, cajione beraurosiojoai, cajione lanaajiojoain, cajione lanajain, lino caje ichanohin cajione, naaojoain que ruujuinohineein nihane coina ichaae. 4Nitohaneein ichaain jetaote, nii cajione buri que, jerane rai nichora te. 5Jerichanejeein, nii cajione buri ichoaae neeninu nichora jetaote, jerichanejeein cajione beraurosiojoai, cajione lanaajiojoain, cajione lanajain, lino aohin caje ichanohin cajione, naaojoain que ruujuinohineein ichaae, nii Moisesa rai aitoha Cana Coaunerane rijijieein.

6Nii oro nitiririchanajan ichoaae jetaote, aiha sechone rijijieein nenaa, Isaraeli calaohichuru curuaa siricha, nii cornalino ajerichuru tiririchae. 7Nii baiha jetaote, nii Isaraeli calaohichuru coaaucane coina, Moisesa rai aitohalu Cana Coaunerane rijijieein jetao, nii cajione buri ichora ichoaae tiririchae Besalee.

8Jerichanejeein aiha, nii cajione burine rijijieein jetaote, oro caje, cajione beraurosiojoai, cajione lanaajiojoain, cajione lanajain, lino aohin ichanohin, naaojoain caje, nii nelarijia bujua ichae, jataain caohatiin ruujuinohineein. 9Jarana aina ita caanijiha carene coina, le coaratajeein muluutiin. 10Jataain caohachaain nenaa ajeri caohacha que jetaote, jena tocharaain carihanojoine. Nii jauriaanejeein le tochara jetaote, leeinjiin robi, leeinjiin crisolito, leeinjiin esmeralda, naaojoain que ichanoinihane jana, 11coroata tochara, leeinjiin qranate, leeinjiin safiro, leeinjiin jade, naaojoain caje ichanohine. 12Jana nichata tochara jetaote, leeinjiin jasinto, leeinjiin agata, leeinjiin Amatista, naaojoain caje ichanoinihane jana, 13jena tochara, leeinjiin topasio, leeinjiin cornalino, leeinjiin jaspe, naaojoain caje ichanohine. Nii nitiririchaa orone jaun jetaote, tiririchanojoine, 14nii lechoonca coroatajaain nenaa ajerichuru, nii lechoonca coroatajaain Isarael calaohichuru curuaacuru siricha. Nii le tocharacuru jetaote, aiha sechone rijijieein, lechoonca coroatajaain nenacaauru, Isaraeli foerateranuuru curuaacuru siri.

15Nii nelarijia bujuanu ichoaae jetaote, oro nejesina caje cadena ichaae, inunojoi rijijieein. 16Chaaen jetaote, oro caje coroatajaain nitiririchanajan ichaain, oro caje coroatajaain jachuujianaain ichae. Nii oro caje coroatajaain jachuujianaain nenaa jetaote, nii nelarijia bujua ucuhi nichaji que, ita jeraniha teein jetao, 17nii coroatajaain jachuujianaain nenaa cuhane, oro caje coroatajaain nenaa cadena enoae. 18Nii coroatajaain oro caje nenaa cadena jetaote, nii coroatajaain nitiririchanajanu que ruluhin, nii cajione buri nichora ichoaae teein, nacatichei nichaji que ruluhe. 19Chaaen jetaote, coroatajaain oro caje jachujianaain ichaain jetao, nii nelarijia bujua que, ocoai nichaji que itajeraniha te, nii cajione buri nichaji que, lucuniha. 20Jerichanejeein jetaotechu, oro caje coroatajaain jachuujianaain ichaain, nii cajione buri ichora, acatichai nichaji que te. Nii cajione buri ichora macoajeeri, tocoora jeloon bujuaihu. 21Nii baiha jetaote, nii cajione buri mucuera jachuujianaain nenaa aina jetao, nii nelarijia mucuera jachuujianaain nenaa tiririchae ita que, beraurosiojoaain nenaa nichora que, Moisesa rai aitohalu Cana Coaunerane rijijieein, cajione buri ichora ecuhi nichaji que niha, nii nelarijia bujua, jelai caje nerurujuae lanaalane coina.

22Satiin, nii cajione buri ichoaae nenaa obiri jetaote, cajione beraurosiojoai caje janojoine. 23Jacari caje nenaa obiri auha maronera rijijieein jetaote, nii nuluno auha maroneein ichaae, nesoaihane coataa. 24Cajione beraurosiojoai, cajione lanaajiojoain, cajione lanajain, lino aohin ichanohin, naaojaoin caje jetaote, aiha tijiemelene rijijieein jabebiaain, nii cajione auha tinunoritiin te. 25Nitohaneein ichaain jetaote, oro nejesina caje campana laaohinaa ichaain jetao, nii tijiemele rijiinanaain nichanaa que requiteein, nii cajione auha tinonoritiin ichae, 26batirineeuruhane cajioneneein inanacaane coina. Nii Moisesa rai aitohalu Cana Coaunerane rijijieein jetaote, leeinjiin campana laaohinaa, leeinjiin tijiemele rijijieein nenaa, leeocha campana laaohinaa, leeocha tijiemele rijijieein nenaa naaojoain teein ichaae.

27Aaroon aina calohichuru cajione, lino caje nenaa jetaote, ichaae leeinjiin nitohanai ichana inaeraneein nenaa. 28Jerichanejeein jetaote, ichanohine nii couturi conaara aina, nichoae nenaa, chaaen nii lino aohin ichanohin caje nenaa acaauru lebaari, 29lino aohin caje ichanohi acaauru ichora, cajione beraurosiojoai, cajione lanaajiojoain, cajione lanajain, naaojoainuri ichacure jetao, nii Moisesa rai aitoha Cana Coaunerane rijijieein, ichana inaauruhane rijijieein.

30Chaaen jetaotechu, saseredoteneeuruhane coujunacane que, oro nejesina tojoeriaain: “Cana Coaunera que banijiaaineein nenaa”, naain que teein laenae, aiha sechone rijijieein. 31Nii baiha jetaote, Moisesa rai aitohalu Cana Coaunerane rijijieein, nii couturi conaara ichoaae, nii oro tojoerianohi tihane coina jetao, beraurosiojoaain nenaa que cojoite.

Tabernacolo ichacuruhane nainaauruhane

(Ex 35.10-19)

32Nitohaneein jetaote, tabernacolo aina, Cana Coaunera acatiha turuurunaja loanari ichacuruhane besautiaaure. Nii Moisesa rai aitohalu Cana Coaunerane rijijieein jetaote, jerichanejeein ichaain jetao, 33Moisesa rai, nii tabernacolo aina, Cana Coaunera acatiha turuurunaja loanari teeure, satiin corujeleeuru, mucueracuru, tabaraauru, cobairichanacuru, temura aina nujuaauru, 34conaaranu que lanajai que lomonojoineein nenaa carenero cari, jacari caohacha caje nenaa conaaranu, camela conaacuruhane jaa cajione, 35acaauru ichao rai raui rucuhecuruhane jaa camela, cobairichane aina, rai fuera, 36satiin rai corujeleeuru aina mesa, Cana Coaunera que banijiaaineein nenaa faan, 37raanfariichuru aina, oro nejesina caje cono nujuanu, satiin corujeleeuru aina, caohachaain nelatihane coina, caohachaain tenojoineein nenaa raanfariichuru, cono noinu que erene, 38oro caje rori, chaaen Cana Coaunera que banijiaaineein nenaa erene, jujuaain mocoeeni, Cana Coaunera acatiha turuurunaja loanari bacuujua bujuanu, 39bronce caje usi rori, bronce caje iniho asichocuruhane jaa, satiin corujeleeuru aina cobairichanacuru, nelaurianajan aina ojoaichu, 40temuracuru aina, airichai bujuanu nujuaauru, airichai bacuujua enonaanaja bujuanu, nii airichai nuneraauru nichoracuru, nii tabernacolo asae nelatenenecuri, satiin rai corujeleeuru, Cana Coaunera acatiha turuurunaja loanari, 41tabernacolo asae enooruhane, niicha jiaaeneeuri cajione ichanohi, saseredote Aaroon que banijiaain nenaa cajione, nii saseredoteneein nenacaauru calaohichuru que banijiaain nenaa cajione, naaojoainuri ichaain jetao, teeure.

42Nitohanein jetaote, Moisesa rai aitohalu Cana Coaunerane rijijieein jetao, satiin jerichanejeein ichacure isaraelitaauru. 43Nitohaneein ichacuruhane coaraain jetaote: “Caohachate ichaquichera”, naain jetao, acaauru coroaje Moisesa.

Currently Selected:

Éxodo 39: URA

Highlight

Copy