Éxodo 3

Egiptoo letoaane coina Moisesa cotihaca cana Coaunerane

1Nitohaneein jetaote, rai tanaa Jetro, Roele neiin curuajai Mariaan cocoaicha Saseredote rai carenerocuru beraichaneein nihane jaun jetao nii carenerocuru amaain cacha areroo situhin jetao Cana Coaunera turunaja Sinaain bichatane ucuuno Horebeu que jetao turue nii Moisesa. 2Nii jana jetaote, cuu amuhemuheca Moisesane jana jetao usinein iihane leinjiin nuna laaojoiri enujue rijijiein ecoainejein nenaa. Nii cataaun jetaote ecocoe leeinjiin Cana Coaunera letono neein nenaa aanjera. 3Nii jana jetaote, nainacoriin caohachaain rautaain coarae nii Moisesa. Coaraain jetao “Taane coanicha. Chanuna jacanaa chara neje”, naain coaraa Moisesane jana jetaote, jacaelanaala iihane nii enujue foenejeein nenaa nuna laaojoiri.

4Nii jana jetaote rohan nichuuntaain coaraa Moisesane jana jetao nii nuna laaojoiri ihanenaa caje coaauneein jetao:

“Moisesa, Moisesa”, naain Moisesa bajaa Cana Coaunerane jana jetao:

“Cauna neeura”, naa Moisesa, Cana Coaunera raine jana jetaote; 5“Coa ii safato aina carohan nichuuntaara. Ii safato rocoora. Coatiha calani turuanaa najaan nihein caa canu nenajata”, nae jetao Moisesa rai Cana Coaunera.

6Niritiin jetaote, nacoauneein:

“Canune inara inoaesihuru coaunera, Cana Coaunera neein neeunra. Nii inara inoaesihuru Abaraaun, Isaca, Jacobo, naaonjoainuri coaunera Cana Coaunera Nichaunra”, naa Cana Coaunera, Moisesa raine jana jetaote, elunaa rai notana jaun jetao cajione que nota conajae nii Moisesa. 7Nejetaote nii Moisesa rai:

“Jataain jianacoon teeinna Egiptoo necairichaauruha canu cachaauru Isaraele cocoaichacurune coaraaunra. Chaenachu mainajeein cairichanajaauruha amihanenaa beraichacuruna jaun nererojoecaaeriin neeuruhane aonacaaunna jaun coitucuunra. 8Nii jaunna Egipto cocoaichacuru caje Isaraelitaauru rocohin, ichoteratenajaanune coina cau turuha uun. Nii jaunna caa Egipto caje roconajaain amanajaain, atane tabai caohacha que lanaeniha lenone, conacai, naaonjoainena jaaun tenajaa cureeunni, nii atane neeuruha Cananeo, Ititia, Amoreo, Fereseo, Ebeo, Jeboseo, naaonjoainurine najaaun. 9Jataain nererojoecaauruha Isaraele cocoaichacurune aonajeeun. Chaenachu, baasoneein tenajaauruha Egipto cocoaichacurune coarajeeu. 10Nii jaunna Egipto curuaanaa Faraaon rene ii letoareeunni, Egipto caje canu cachaauru Isaraele cocoaichacuru rocohine coinara”, naain jetao Moisesa rai ereereje Cana Coaunera.

11Nii jana jetaote: “Chaneeina nereeun canu, Faraaon rene turuin Egipto caje Isaraele cocoaichacuru rocohanune coina”, naa Moisesa Cana Coaunera raine jana jetaote; 12“Cuuna chujia ii aina nereeunni canu. Caate canu eletoaanune coujunaca ne. Nii banate Egipto caje canu cachaauru Isaraele cocoaichacuru rocohanune, caa Sinaai bichatane ucuuno que uhin inara Coaunera nichaaunne coroajeein, canu bajaaebajaaeca curiquicheein”, nae jetao Cana Coaunera Moisesa rai.

13Nii jana jetaote, “Niite jataain carai caaintate. Chatohanerihanu jana, ‘Inara inoaesihuru coaunera Cana Coaunerate, caletoae inara renera’, naanune jana ‘Tonaa rai curuaata’, naauruha carai Isaraele cocoaichacuruneta. Chatoarihanu jana acaauru raita”, naa Moisesane jana jetaote, 14“Canune Acaneein caa aitoon. Nii jaunte, ‘Acate Acaneein caletoae inara rene’, naaun, Isaraelitauru raicha, nae jetao Cana Coaunera Moisesa rai”. 15Nii choae tacaain jetaotechu, Moisesa rai aite Cana Coaunera. Chaenchu aitoo Isaraele cocoaichacuru rai. “Inoaenlu inara inoaesihuru Coaunera Cana Coaunera, nii inara inoaesihuru Abaraaun, Isaca, Jacobo naaonjoainuri Coaunera Cana Coaunerate caletoae inara renera. Caate inoaenlunetiin Canu Curuaaneein niha cureeincha. 16Chajaain cuhin, Isaraele cocoaichacuru bichauhenaauru taojiaain, acaauru aina erenihunra ‘Inara inoaesihuru coaunera Cana Coaunera nii inara inoaesihuru Abaraaun, Isaca, Jacobo, naaonjoainuri coaunera Cana Coaunerate carai ecocohin, inara coroatajanihane coina aite carai, baasoneein inara teeuruha Egipto cocoaichacurune coaraane jaunra. 17Chaentechu, nii Egiptoo mainajeein necairichaaichene caje jianacoon inara mitaain, Cananeeo, Ititia, Amoreo, Fereseo, Ebeo, Jeboseo, naaojoaihunri atane que inara amaain, nii atane tabai que lanaeniha lenone, conacai, naaonjoainne najaaun amaain inara tereein Cana Coaunera’, 18naaine jana, Ii ere tonoraauruha Isaraelitaauru bichauhenaaurune, acaauru aina cuhin Egipto curuaanaa coaanihun. Coaraain Egipto curuaanaa rai ‘Ebereeo curu coaunera Cana Coaunerate, canacaanu coaraa uuhera. Nii jaunna caalai caje canacaanu jianeeine jerichaanu. Cacha areroo cuhin canacaanu iri sohin mocohin que Cana Coaunera belaichaanune coina, nichata janoin coamueraneein cuhin, cacha areroo canacaanu rai caoachanu que canacaanu iri sohin mocohin que Cana Coaunera belaichaanune coinara’, 19naaichene jana, inara jianena jereniha Egipto curuaanaane coitucuhanu raotojoeeincha. Nitohaneein raotojoein inara jianena jereniha Egipto curuaanaane janana, 20jataain mijiaainnetiin, Cana Coaunera nichaaune coaarateein, nii Egipto batane que itolere cojoaelanaacojoai ichaain, nii Egipto cocoaichacuru cunaitaain ateinareeunni. Nii baihate laen, inara jianereein Egipto curuaanaa Faraaonra, nae jetao Cana Coaunera, Moisesa rai. 21Chaaen nachu nii choaetacaain, caohatiin Isaraele cocoaichacuru jerenohin teeuruha Egipto cocoaichacurune coina, acaauru suujua rucujueein suujuatenajareeunicha, nabana chacolane caalai caje amuuruha Isaraele cocoaichacurune coataara. 22Nii banate laurijira caje, chaaen joaereein leeochaauru enecuru, acaauru aina nenacaauru, naaonjoainuri rai rucuhele teeuruhane coina bajaaurureein Isaraele benecuru. Nii janate, acaauru coasichuruhane jaun, itolere rucuhele coata caohacha caje ichanohin, chaae nii amuritoheriin jataain coretiin nenaa oro caje ichanohin rucuhele, chaae inara cajione, inara bereecuru, inara cacunucuru, naaonjoainuri cajioneteeichene jaanu que itolere rucuhele teeurureein Egipto cocoaichacuru”, naa Cana Coaunera Moisesa raine jana jetaote.

Currently Selected:

Éxodo 3: URA

Highlight

Copy