Éxodo 4

1“Niritiin acaauru rai aitocoaaunne niha natiin, coatiha quesenetaaururihane coaalanaalata. ‘Coatiha esinae ii rene ecooca Cana Coaunerane esenetahacaanu’, naaururiha carainatiinta”, naa Moisesa Cana Coaunera raine jana jetaote:

2“Cha nitohaneein sirii ichoii cuhane”, naa Cana Coaunerane jana jetaote, “Basotoon”, naa Moisesane jana jetao:

3“Nii atane choae nii basotoon jaotoo”, naain jetao Moisesa letoae Cana Coaunera.

Nii jana jetaote, nii atane choae nii basotoon jaotoha Moisesane rijieeoritiin jetao acanoneein nerotohin jetao tocha tochaque nii Moisesaacha jaoti basotoon. Nii jaun jetaote, que janoriin coohacotiin soroe Moisesa. 4Nii jana jetaote, “Ichoii tochataain nuseei que mucuura”, naa Cana Coaunera Moisesa raine jaun, biji tochataain mucuha Moisesane jana jetao, nacoaauneein basotoon neein nerotori nii acano.

5Nii jana jetaote, “Caana ichaaun, coaraain esinae rauhijiriin Cana Coaunera ichei ecoocane esenetaain, ii inoaesi Abaraaun, Isaca, Jacobo, naaojoaihunri curuaanaa Cana Coaunera nichaaune esenetaaine coinara”, 6nae jetao Moisesa rai Cana Coaunera.

Niritiin jetaote, “Chalarijia choae ichoii metaaute coaracaara”, naa Cana Coaunera Moisesa raine jana, nelarijia choae biji metaane baiha, nelarijia caje biji raaoriha Moisesane jana jetaote, biji que somaa que jetao cunaineein biji que somane.

7Nii jana jetaote, “Nacoauneein chalarijia choae ichoii metaain nii baiha chalarijia caje nacoauneein ichoii raaorihute coaracaara”, naa Cana Coaunerane jana, nelarijia choae biji metaane baiha jeelai caje raaoriha Moisesane jana jetaote, jerichanejeein jabereco raurononeein neeorite Moisesa.

8Nii baiha jetaote, “Jauriaa nejeein coujuhin coaraaine jana, ii esenetaelanaala ii ere tonoraaurenihane, coroata sateeine cuhane, ii esenetaaurureein. 9Nii coroata saain coujuhin coaraaine jana, ii esenetaelanaala ii ere tonoraaurenihane, nucuhe caje jesinaeca soriin rain atane choae chotainete, ichananeein nerotoreein nii jesinaeca”, naa Cana Coaunera Moisesa raine jana jetaote:

10“Coatiha raotojoeein erenaa naininaaunta Curuaanaa. Coatiha enaacha ii cacha nichaaune aina ereheeita Curuaanaa. Inae inoaelu caje coaauneein irihanune naineein erenaa maroasihei caleleta”, nae jetao Moisesa Cana Coaunera rai.

11Nejetaote:

“Chana jana ujuaeteein cacha coaaunae. Tana jana canu erenaacharaauru rautaain, uricho saaecuru rautaain, nenotana nainihane coina maosacuru rautaain, naaonjoaanune”, naain jetaote; 12“Aihana jaun chajaain cunihu. Cuuna ii aina nereeunni”, 13naa Cana Coaunera Moisesa raine jana jetaote, ainaa jerelanaala:

“Ooa, ainaa naininaaunta. Chunucoha leeocha cacha letoaaura Curuaanaa”, nae jetao Moisesa Cana Coaunera rai.

14Niritoha Moisesane jaun jetaote Moisesa aina obajeein jetao:

“Cuu chujiara ne inana Aaroon, lebitaneein nenaara. Caohatiin ererichaainne coitucuhanu Canura. Nii choae tacaain techu, ii que tacaain ii coaraa uhane, jataain rachoojoereeincha. 15Chaaen aina caohatiin ereein coitucuerateein jitariin caa aitocoaaunne jaan beeu raicha. Cuuna Aaroon, ii, naaonjoai neeinchene aina nereeunicha. Inae ereeichenena, inara relaain inaraacha ichanenu coitucueratereeunni, inara que. 16Chaaen caraajenihane aitocoaaunne rijitojoeein ereeu Aaroon rai. Aihute ineein aitohine rijitojoeein cachaauru rai ereeine Aaroon. 17Caa basotoon amaaun. Caa basotoon ainate, itolere cojoaelanaacojoai ichariquiin”, nae jetao Cana Coaunera Moisesa rai.

Jelaiha Egiptoo Moisesa letoaa Cana Coaunerane

18Nii jaun jetaote, jelaiha tanaa Jetro loreri asaae cauha cue Moisesa. Nitohaneein cauhin jetaote:

“Egiptoona nii neeuruha caraaichuru calaurineein nenacaauruna jaaun cunaa jereeun. Jaiti nacha ichaojoeeuruha”, naain bajaa Moisesa, rai tanaa Jetro raine jana jetaote, “Saan, caohachaain necohalajiin aihu”, nae jetao Jetro, Moisesa rai.

19Nii jana jetaote, jaiti Mariaan batane que niha Moisesane jana jetao:

“Chajaain jelaiha Egiptoo caunihura. Inae satiin ooruha nii ii sohin ii jaonaa jereraaurura”, naain jetao jelaiha Egiptoo Moisesa letoae Cana Coaunera, Egipto caje Isaraele cocoaichacuru rocoha cuha Moisesane coina.

20Nii jana jetaote, cabario rijijieein nenaa asno choae jetao comasai, rai beree, naaonjoainuri aina jelaiha Egiptoo cue Moisesa, Cana Coaunera basotoon que biji achunequin.

21Nii jana jetaote Moisesa rai aite Cana Coaunera: “Inae Egiptoo turuhine caa ichei aitocoaaunne rijijiein, Egipto curuaanaa Faraaon acatiha teein cojoaelanaacojoai ichaaine janane, tonoraelanaala nechu aansaineein mituhichene caohatiha Faraaonne coina ichareeunni”. 22Nii jana nii Egipto curuaanaa Faraaon rai aitoo: “Isaraele cocoaichane jauriaanejeein canu calaohichuru inananeein nenaa ne, inae ichei beratihanu coitucuhine coina. 23Caa canu calaohichuru Isaraelitaauru jianeeun caaelai cajete, coroajeein canu bajaae bajaaeca cuuruhine, naain ichei beratihanune saijieein acaauru jianena jereneeine jaunne, ii calaohichuru inana ne ateinareeunni, naa Cana Coaunera ii rai, naau Egipto curuaanaa Faraaon raicha”, nae jetao Cana Coaunera Moisesa rai.

24Nii jana jetaote, rai comasai Sejora, rai beree, naaonjoai aina cuujueein jetao sini Moisesa. Nii jana jetaote, ecoetacaaeneein ecocohin Moisesa sohin jaonaajere Cana Coaunera. Nii bana inae fosajanoniha nejanoaane jana cachaauru jabereco cari jiununuhin sauhin cojunacatiha Moisesane coina rai aitosihalu jauriaa nejeein Cana Coaunera natiin, Cana Coaunera ere tonoraelanaala, nii rai calaohi jabereco cari jiununuhin saeniha Moisesane jaun jetaote, sohin jaonaa jere Cana Coaunera.

25Nii jana jetaote, ajeri banojoa que jetao nii calaohi jabereco cari jiununuhin sae Moisesa comasai Sejora. Nitohaneein nii calaohi jabereco cari sauhin jetaote, que Moisesa tijia dadaain jetao: “Inae laen esinae rauijirin cacoichana aina cutaain casinejera neeicha”, nae jetao Sejora, rai lana Moisesa rai.

26Nii jana jetaote, inae nii rai calaohi jabereco cari jiununuhin sauhin jetao, “Inae laen esinae rauijirin, cacoichana aina cutaain casinejera esine neeicha”, naa Sejorane jaun jetaote, inae Moisesa jiane Cana Coaunera, Egiptoo turuha cuhane coina.

27Nii jana jetaote, inae Aaroon rai beein jetao:

“Chajaain cacha areroo Moisesa que tacaa uura”, naa Cana Coaunerane jaun jetao, Moisesa que tacaa cue Aaroon. Nitohaneein cuhin jetaote Sinaain bichatane ucuuno nii Cana Coaunera turunajaun Moisesa que tacaain jetao:

“Ichaaojoeeita ichaso”, naain jetao, nii Moisesa aina ita rai ereeure nii Aarooncuru.

28Nii jana jetaote, itolere que aitiin bihane coina letoaa Cana Coaunerana jaan que ereerejeein beebeje Moisesa, Aaroon rai. Chaaen nii jataain cojoelatiin coaanacai icharatiha Cana Coaunerana jaun, nii que ereerejeein beebeje nii Moisesa, Aaroon rai, coitucuhin Isaraele cocoaichacuru rai ereerejeein beebejiha Aaroonne coina.

29Nii jana jetaote, Moisesa que coroatajaain cuhin jetao, Isaraele cocoaichacuru bichauhenaauru taojiaain jetao, itolere que aitiin Moisesa rai beein, Moisesa letoaa Cana Coaunerana jaan que Isaraele cocoaichacuru rai ereerejeein beebeje Aaroon. 30Nii choae tacaain jetaotechu, nii cachaauru rai cojoaelanaacojoai ichaain coaaratihane coina, rai beein letoaa Cana Coaunerana jaan ichae Moisesa.

31Nii jana jetaote, jerecure inae nii Isaraele cocoaichacuru, Egiptoo neein necairichaauruhane coaraain acaauru coroatajaniha Cana Coaunerane coitucuuruhana jaun. Nii jaun jetaote, nelararajiaain Cana Coaunera coroajeein nenoracaain Cana Coaunera bajaaure nii Isaraele cocoaichacuru.

Currently Selected:

Éxodo 4: URA

Highlight

Copy