Éxodo 26

Loanari santoario

(Ex 36.8-38)

1Chaaen, lino inuhin ichanohin caje loanari santoario ichaain, cajione beraurosiojoai, cajione lanaajiojoai, cajione lanajain, naaonjoain lechooncaain ichanohineein nenaa que bujuatijia coaain, caoachaain inanacaane coina cacha rijiinanaain coroatajaain itaroacoaain, ereriaain ichaau. 2Lechoonca coroata metoro, coroata coarataananaaine, satiin ita caanijianaain nii bujuanu. Jana rai jarana coroata metorohine. 3Ita ichoae saoquiinanaain teein, nii rai bujuanu tocoocu, jerichanejeein saoquiiananaain, nii rai jeranu tococohin, 4nii jauriaanejeein, le jeraque neterorocaeni, mucueranu teeu beraurosiojoai que, le taa tijitijiriin. Chaaen jerichanejeein, nii leeocha bujuanu auha mucuera teeu. 5Jerichanejeein, nii jauriaane jeein neterorocaeni mucuerateeine jeeoneein saoquichooncaain, nii coroataja mucuera ichaau, ita que nitiririchana nainiha, nii bujuane coina. 6Chaaen jerichanejeein, oro caje saoquichooncaain mucueranu jaau, ita que nii bujuanu tiririchaacoaai quene, satiin ita que tiririchanojoineein niha, nii loanari santoarione coina.

7Chaaen carenero bene ujuhi caje, lechoonca leinjiin bujuanu jaau, caje loanari jaain, que nii loanari santoario asaaquine jaanu que. 8Lechoonca nichata metoro, coroata coarataananaaine satiin ita caanijianaain, nii bujuanu aina rai jarana, coroata metoroananaain. 9Le turijieein jelai teein, ita aina saoquiin nii bujuanu tocoocu, jana rai jeranu saotaneein teein ichaain, nii loanari coonri nichaji bujua marohitiin sichunojoineein ichaau. 10Nii baiha, nii jauriaanejeein, ita que nitiririchaenihu jelai, bujuanu auha mucuera ichaau saoqui chooncaain, jerichanejeein nii coroatajanu nitiririchaenihu auha mucueranu ichaau saoqui chooncaain. 11Chaaen coata bronce caje mucueranu jaau, aihate ita que nii loanari mucuera tiririchaacoaai, ita mucuhacoa satiine coina. 12Caratoanaa nii bujuanu tijianete, nii loanari santoario tinunoritiin janori que cautenacaauru terorocoariquin. 13Nitohaneein, nii caratohanaain cautenacaauru que, tinonoritiin, nii loanari santoario conaacu, coroata cataaun uujeein le jera ucuuno, jerichanejeein nii jera ucuuno naaonjoaain.

14Chaaen nujuhin aina lanajai que lomonojoin carenero cari, jacari caohacha, naaonjoain caje loanari jaaute, que nii nichoajai asaaqui.

15Chaaen nii loanari santoario rainu que, inatajajeein nijin acasia caje tabara ichaain, rauhijiriin tocharacaau. 16Jena metoro coroata coarataaine nii tabara carecuru, rai jarana coroata coarata cataaun uujemiin. 17Ita que nitiririchaain, ita mucunaa nainiha, nii tabarane coina, nii leeocha catuteein, jachuute cuhane coroatajaain enuha enoaain, ita mucuhane coina. Nitohaneein jitariin, nii loanari santoario rainu que, neeni tabara jachuhacoaau. 18Inaen nitohaneein ichaaine, enoto mitu uuri nichajai que nihane coina, coroata chooncaain tabara ichaain, 19asae neenihurune que, jenachoonca jachuneein jachuacoaau. Nii asae neeninu, le tabaraauru coroata jachuhananaain jachuhacoaau, cuhane enoha, nii coroatajaananaain nichoae neenine coina.

20Chaaen jerichanejeein, enoto soo nichaji coarajeein, cana raotononichaji que, nii loanari santoario netatajichi rainu que, coroata chooncaain tabara ichaain, 21jena choonca jachuneein jachuacoaau, coroata jachuhananaain, rai jachu siriha letabaraaurune coina. 22Nii enoto soo nichajai que, santoario coonri que neeninu que, saotaneein tabara ichaau, 23jelai nichajiicha que neenihurune que coroatajaain ichaau. 24Nii jauriaanejeein mucuera ecuun nenaa que tiaain, ita rijijieein nitiririchaaine, nii tabaraauru. Nitohaneeinte, nii coroatajai nuurihuru que, coroatajaain tabara teeine caohachae. 25Aihane jaun, fosani tabara te, lechoonca saotaneein, que banijiaain nenaa coata jachunojoin sirihane ne, coroata jachuananaa, nii asae nenaa le tabaraauru jaun.

26Le jera, nii santoario rai tabaraauru cobairichananu que, saoquiin acasia caje tabara ichaau. 27Jerichanejeein saoquiin rai jera cobairichananu que tabara ichaau, enoto soo nichajique neeninu, rai coonri cobairichananu quene maajeein saoquiin ichaau. 28Nii cataaun nenaa cobairichane te, nainereei cataaun uujoaain mucuhane coina teeu. 29Nii baiha oro que, nii tabaraauru carijiaain, oro caje rai mucueracuru ichaaute, oro que carihanojoine cobairichanacuru enoaain cuhane. 30Nii ichatane ucuuno, ichei coaaratihanulune rijijieein, jerichanejeein nii loanari santoario ichaau.

31Chaaen cajione beraurosiojoai, cajione lanaajiojoain, lino caje inuhin ichanohin cajione lanajain, naaonjoain ichaain, caoachaain inanacaane coina, cacha rijiinanaain coroatajaain itaroacoaain, que teein ereriaau. 32Nii baiha, acasia caje jenaananain nujua que teroracain, oro que carihanojoi, nii temuranuque jenaain nenaa coata jachunaa cuhane teeun. 33Nitohaneein, nii mucueraque cajione teroracain, nii cajione bujua, nii inara ichao rai rauhi tonoraain ichaohichene coina, quiicha tei camela teeu cuhane. Nitohaneeinte, canu que banijiaain nenaa jelai caje, jelai teein canu que jataain banijiaain neeninu jelai leruheranuque nelatiha cureein, nii cajione, inaraacha teroracai. 34Nii baiha, nii inara ichao rai rauhi tonoraain ichaohichene coina, quiicha tei que, nii canu turunaja camela fuu. 35Enoto mitu nichaji coarajeein- cana ajaabiji nichaji santoario uuriniha, nii cajione udacaique mesa teein, nii mesa jeraniha usi nujuan teeu, enoto mitu coarajeein cana raotono nichajique.

36Chaaen nii loanari bacuujuane que, cajione beraurosiojoai, cajione lanaajiojoain, cajione lanajain, lino caje ichanohin, naaonjoainuri ichaain, caohachaain inanacaane coina ereriaau. 37Chaaen acasia caje saoquiin bujuanu nujua ichaau, oro que carianojoineein, oro que mucueratihacoaain, coata bronce caje saoquiin temura nenajaanu ichaau.

Currently Selected:

Éxodo 26: URA

Highlight

Copy