Ichanohichuru 10

Corenerio aina, Fedorone

1Nii jana jetaote ne, leeinjiin cacha, soondarooru curuaanaa Corenerioneein curuajaain, Sesareea neseu. Nii jetaote, saota fashanei Romanocuru soondarooru, Italia cocoaicha neein acaauruacha curuaatei, lefashai curuaanaa cafitaan neein ne. 2Aca jetaote, niqui Romanoneein ne. Nejetaote, atiin rai sinijiera, rai bereecuru naaonjoaihunri aina jiniiquiin, jataain Cana Coaunera ere tonoraeraauru ne. Aca jetaote, cairicheineein nenacaauru Jorioocuru rai nihane, coriqui nihane te tejeein, coroatajanenajae. Chaaen jetaotechu, inetono janonaa bana, Cana Coaunera bajaebajajeein ne. 3Nii jaun jetaote, letono anjera que, coaarate Cana Coaunera, sona nichae.

Nii jana jetaote, coarajihane jana, nii nihane jaun turuhin enohin: “Corenerio”, naa nacatiha turuhine jana jetao, 4cuu anjera coaraain, nesoonetiin:

“Cha ichei ichareeunte, Curuaanaa”, naain tonoraa Corenerione jana jetaote:

“Bajaebajajeein neeine aonaa Cana Coaunerara. Chaaen techu, cairicheihuru coroatajaneeine coaraain, satiin caohacha ichaaine rautatelu Cana Coaunerara. 5Aihana jaun, Jofeu cacha letoaaute, leeinjiin cacha Simoonneein curuajaain nenaa Fedoro cotihaca cuhinera. 6Nii cuu nenaa cucuana auhaniha loreriquiin nenaa jacari nojoelaain rucuhera rijitocojoai curuajai leeocha Simoon loreri asaaete nera”, nae jetao, rai Cana Coaunera letono anjera.

7Niritohane baiha, inae amuha nii aina erenaa Cana Coaunera letono anjerane jana jetaote, coroatajai nere tonoraeraauru, chaaen leeinjiin soondaro Cana Coaunera ere tonoraain jataain Cana Coaunera coitucuera rai suujua rijitojoeein nenaa niichuru cotijiaain jetao, 8rai aitoha Cana Coaunera letono anjerane bee jetao, Corenerio. Nitohaneein, acaauru rai bihane baiha jetaote, letoanajae Jofeu.

9Nii cojoano jetaote, enoto chujutaelalajeein, turuelalajeein cuujueeuruha, Jofeune jana jetao, loreri janori macararo ichoae, ecuun iniha cue jetao, Fedoro, cuu Cana Coaunera bajaane coina.

10Nii jana jetaote, rai banetojoe niha mijitenane jaun jetao, lenonene rijitocojoaain jetao, Cana Coaunera bajae, lenone enohalaauruha icharaaurune cohaca. Nii jana jetaote, notaaca Cana Coaunerane coina, 11nejoracaa dede bacuujuane jana jetao, caje mituha uhe, shojoera tocohaneein jaraantiin. Nitohaneein ecocohin jetaote, tajiha fauha uhe, jena turiin rulunojohineei. 12Nii jana, coaraane jana jetaote, nii shojoera tocoanai nainecojoain jetao, uhe itolere cautene rijihuru, atane ichoae terei lenone, itolere tajaaecuru, itolere ataebinae acanocuru, itolere Joriooneeuruhane lenone niheichuru, naaonjoaihunri jetao, uhe nainecojoain. 13Nii jana jetaote, coarajihane jana jetao dedeeu toniin:

“Nimichuhin nichaauraain, niichuru soote que lenoneeicha Fedoro”, naain toniha dedeeune jana jetaote:

14“Chabana, Jorionichaanune lenonenihei quinaa nainihaaunta, lanichana nainihaaunta. Nihei ataebinae quinaa nainihaaunta, Curuaanaa”, naain tonoraa Fedorone jana jetaote:

15“Coa Cana Coauneraacha, coluuonojoi que, ‘Calanichareta. Ataebinae quinaa nainihaaunta’, naain irihara. Jauriaate chuhisi niqui, nainenelu que lenonequichenera, nete inae enene, que lenonena nainequichene coina coluunojoinera. Aihana jaun, Cana Coauneraacha coulucohi que, nainihein niritiin ereeinera”, naain jetao, dedeeu toni. 16Nitohaneein nichata saain ecoocane baiha jetaote, inae jelaiha dedeeu iniha cue, nii shojoera tocoanai.

17Nii jaun jetaote, nii que suujua rerohecaain, cuu suujuane ereerejeein, “Chatoanai ichacaaunne coinaacha, catohaneein canotajae Cana Curuaanaara”, naain suujuane ereereeca Fedorone jana jetaote, turuure bacuujuaniha nichatajai cachaauru Corenerio letonocuru, Simoon loreri bajaebajajeein. 18Turuhin jetaote, bacuujuaniha netiin jetao, tonijiaain:

“Cauna niha caa loreri asaae, leeinjiin cacha Simoon Fedoroneein acaauruacha curuaatei”, naain jetao bajaaure.

19Nii jana jetaote, cuu jaiti, nii rene ecoona que suujuane ereereeca Fedorone jana jetao:

“Aonaaun, nichatajai cachaaurute ii ariirijiera. 20Chajaain nimichuhin, acaauru aina cunihu necoatelanaala. Canune acaauru letoaaun ii renera”, nae jetao, nuricho rai Cana Coaunera Suujue.

21Nii jaun jetaote, fauhin nii Corenerio letonocuru cachaauru coaraain jetao:

“Canune nii inaraacha ariirijiei neeunra. Chate raaicheta”, naa Fedorone jana jetaote:

22“Canacaanu letoaa, canacaanu curuaanaa cafitaan Corenerione jaunne, uhacaanura. Acate, caohacha cachaneein, jataain Cana Coaunera ere tonoraeranera. Nii jaunte, jataain que suujua acateein, belaihure satiin Joriocurura. Acate, ii cotiharate, rai beein, que ii cotiharatiha Cana Coaunera letono anjerane jaunra. Nii jaunne, ii cotihaca uhacaanu, nenajaun cuhin, iicha coitucuhi que rai ereeine, aonaane coinara”, naaure jetao, Fedoro rai.

23Niritocuruhane jaun jetaote, nii notaaca Cana Coaunerane que nainaain jetao, nii nihanejaaun loreri asaae ranajae Fedoro, Jorionecureniha nii cachaaurune saijieein. Nii jaun jetaote, cuu aina sinihuruhane cojoanoo, cauha cuuruhane jana jetao, acaauru aina cue Fedoro, corianiha cunacaauru Jofeu neseu nenacaauru tabaauru Jesocurisito esenetaerauru aina. 24Nitohaneein cuhin jetaote, cojoanoo Sesareea turuha cuure.

Nii jana jetaote, le laurii naraaichuru, jataain belaichaauru, naaonjoaihunri cotijiaain, acaauru cojoae Corenerio. 25Inae turuha Fedorone jana jetaote, mituhin raain jetao, nacatiha neseeonriaain coroaeca Corenerione jana jetaote:

26“Nichaauraaura. Canu netonaine, ichejijieein cachaneein neeunra”, naain michuha Fedorone jaun jetaote, 27ereerejeein, enoha cuuruhane jana, cuu najiniha netaojiaain cohacure arajiin cachaauru. 28Nii jaun jetaote, acaauru rai:

“Inarate raotojoeein coitucuhiche, canacaanu Jorionichaanune, nejelau cachaauru Jorioniheichuru aina, netaojiaain nenaa nainenihacaanunera. Niheichu. Nejelau cacha loreri asaae enonaa nainihaacaanu, nitohane niha canacaanu ichaona jaunta. Nete, nii que, canu notajaain carelae Cana Coaunera, nabana chunei cacha que jaolequiin, ‘Nechu aansai ataebinae’, naain irihanu chunei nejelau cachaauru quene coataara. 29Nii jaunna, cacotijiaaichene rijijieein inauheneecha, cha que erelanaala uunra. Nii jaunna, ‘Chanunacha cacotijiaaureta’, naain, coitucunaa jerichaaunne jaun, carai beeichene jereeunra”, naain jetao, acaauru caje bajae Fedoro.

30Nii jaun jetaote:

“Inae, jena janoha, enarijiu, cau canu loreri asaae, cosinacaa casuri couu, canu ichaoneein Cana Coaunera bajaebajaecaaun sonainane jana, jataain somajai que, cajionequin, cau, caatiha neeorite leeinjiin cachara. 31Nii cachate, carai: ‘Corenerio, bajaebajaequine aonaa Cana Coaunerara. Chaaen techu, cairicheihuru coroatajaneeine coarajeein, nii coacuhin coroaje Cana Coaunerara. 32Nitohanihane jaun, cachaauru letoaaute, Jofeu, Simoonneein curuajaain nenaa Fedoro cotihaca cuuruinera. Nii cucuana auhaniha, loreriquiin, cuu nenaa jacari nojoelaain rucuhera rijitocojoai curuajai leeocha Simoon loreri asaaete nera’, naa carai nii cachara. 33Nii jaunne, nii rijieeoritiin ii cotiharateeunra. Caohachate jataain ichaai uhincha. Aihana jaun, caute jiniiquiin, Cana Coaunera notaracae nihacachera. Nii jaunna, canacaanu rai Cana Coauneraacha beratei que, ereeine aohana jerichaanura”, naain jetao, Fedoro tonorae Corenerio.

Nereretaa, Corenerio loreri asaae, Fedorone

34Nii jaun jetaote, acaauru rai:

“Inae laen coitucuhanu, coatiha nejelauneein, chunei cachaauru coaraain nihein, Cana Coaunerata. 35Jerichanejeeinte, satiin coaraain, naain coriajai atane nenacaauru nihanatiin, nere tonoraane, rae Cana Coaunerara, caohacha ichaain neeuruhanera. 36Nitohanihane coina, Isaraele inamacooru rai, baaso ichaain, Cana Coaunera que nejeratenaa neein, niha cachane niha natiin, niha leeinjiin, nii rucuhera, raotojoeein neeuruha Cana Coaunera aina cachaaurune que beratelu Cana Coaunerara. Acate, Jesocurisitoneein satiin Curuaanaaneein nenaa nera. 37-38Inarate, cachaauru rai, baaso ichaain neeuruhane jianeein, nebaotisaerateeuruhane, raotojoeein acaauru raa Cana Coaunerane coina, biha Joaane coitucuhiche raotojoeeincha. Nii baihate, Nasarete cocoaicha Jesoso baotisaa Joaane jana, nii Jesoso ichoae, rai Suujue letoaa Cana Coaunera, itolere ichaain nenaa nainihane coinane coitucuhiche. Nitohaneein baotisaa Joaane caje coauneeinte, Jodea batane sacutaain, amuhemujuelu Jesoso, Calileea nunuheteeinte, itolere caohacha ichaain, moconajaaera ichanohineein cunaitein necairichanacaaurune maajeein rautaelura.

39Nii jana, canacaanune, itolere ichaain niha Jesosone coaaraneein nihacaanu, aina amuhemuhecaanulu, itolere Jodea batane sacutaain, Jerosaleeun nese sacutaain, naaonjoain jaunra. Nitohanihane baihate, inae coroso que teein atinaaurelura. 40Nete, atinaauruhane jana, nichata jano cuhane, ichatelu Cana Coaunerara. Nitohaneein ichateeinte, canacaanu rai, ecoocane coina, letoae Cana Coaunerara. 41Coatiha, satiin cacha rai, ecoohai. Leeinjiin canacaanu Cana Coauneraacha janijiin nii beranu que niicha ranojoi nichaanune raiichate ecocoe. Nitohaneein oo caje ichanaa Jesosone baihane, aina lenoneein, aina acau cohacaanura. Inae inoaelu, nitohanihane coina, Cana Coauneraacha ranojoineein nihacaanulune jaunte, 42canacaanu letoae, itolere ichaonacaauru, onacaauru, naaonjoaihunri coaraanu que nii Jesoso teein nihalu Cana Coaunerane beebejihacaanu, cachaauru raine coinara. 43Chaaen techu, inoaelu najiincha caje coaauneein, nii Jesoso beebejerejetocure, nere bera inoaesihuru: ‘Nere tonoraain esenetaeraaurute, baaso ichacuruhalune niha natiin, coreniha caseteco caje nichotiha cureeincha’, naain beratihalu, nere bere inoaesihuru profetacuru que, aitiin Cana Coaunerane jaunra”, naain jetaote, acaauru rai beebeje Fedoro.

Cana Coaunera Suujue raauruha Jorioniheichuru netonaine

44Nii jana jaiti niritiin beebejiha Fedorone jana jetaote, nii satiin nere aonajeeurera choae, fauha uhe Cana Coaunera Suujue. 45Nii jaun jetaote, coarajeein cojoelatoore, nii Fedoro aina unacaauru Jesocurisito esenetaeraauru Jorioocuru, Jorioniheichuru rai netonai, tenojoi niha Cana Coaunera Suujuane jaun, 46chaaen, Cana Coaunera coroaecuruhane, nejelau ere cuhane cuaain nejelau ere que erenacaaurune jaun. Nii jaun jetaote:

47“ ‘Nainihaacache cana, caa cachaauru baotisaain coujunacatechaachene, Joriooneeurenihane jaunneta’, naain erenaa nainihaacache cana, inae cana rijijieein, Cana Coaunera Suujue que, cojunacatenohineein neeuruhane jaunta”, naa Fedoro nii corihaniha cunacaauru Jorioocuru raine baiha jetaote:

48“Jesocurisito coreniha, baotisaain cojunacatenohineein neeuruhinera”, nae jetao, acaauru rai Fedoro. Nii jaun jetaote, nii baiha, Fedoro chunaaure, acaauru aina, inata janojoeein neeorihane coina.

Currently Selected:

Ichanohichuru 10: URA

Highlight

Copy