Ichanohichuru 11

“Chanuna Jorioniheichuru aina lenoneein”, naain Jerosaleeun nenacaauru Jesocurisito ranojoihunru Jorioocuru tabaaurune

1Jodea batane netiin jetaote, inae Cana Coaunera ere esenetaain tonoraauruha Jorioniheichuru netonaine coitucuure Jesocurisito letonocuru afosotooru aina cana nejeraauru Jesocurisito ranojoihunru. 2Nitohaneein coitucuuruhane jaun jetaote, inae Jerosaleeun turuha Fedorone jana jetao, necoejechanuure Joriooneein Jesocurisito ranojoihunru tabaauru. Niritiin necoejechanuhin jetaote:

3“Chaanate cocoaeraa cana Jorionichaachene ichao rai, Jorioniheichuru rene turuhin, acaauru aina, naaonjoaacachene natiin acaauru aina lenoneeita”, naain bajaaure jetao, Fedoro caje.

4Nii jaun jetaote, satiin niicha coaraai bee jitariin nunuhe caje coaauneein:

5“Naain nii Jofe neseu nihanune jaunne niqui, Cana Coaunera bajaaunra. Nii jana, canu notaaca Cana Coaunerane jana coaracaaunne janate, shojoera tocohaneei jaraantiin, jenaain rulunojohineei dede caje fauha uhe caatiha, nii nihanune jaunra. 6Nii jana, rautaain cuhanai coaracaaunne janate, cuu ne, itolere taibinaecuru, atane ichoae terei lenone, tajaaecuru, acanocuru naaonjoaihunricha. 7Nii janate, carai dedeeu toniin: ‘Chajaaojoaain nimihuritiin, soote que lenoneeicha’, naane janana: 8‘Jiaohinera, Curuaanaa. Chabana cujuaae cuhane aansai calani enohaaunta’, naanune janate, 9dedeeu toniin: ‘Coa, “Aansai calani”, naain iriha, ii coauneraacha coulucohi quera’, naain 10toniha nichata saain dedeeune janate, jelaiha dedeeu iniha cue nii shojoera tocohanaicha. 11Nii rijieeoritiinte turuure, Sesareea caje uhin, nichatajai canu ariha unacaauru cachaauru, nii nihacaanunejaaun loreri asaaera. 12Nii janate, caletoae Cana Coaunera Suujue, necoatoelanaala acaauru aina cuhanune coinara. Nii janate, canu aina cuure caa saotaneein Jesocurisito coreniha cana nejeraaurura. Nitohaneein cuhine, Sesareea turuhin, nii canu cotihaca unacaauru letoaera cacha loreri asaae enohacaanu saaincha. 13Nii janate, canacaanu rai: ‘Naaojoaainte, cau ecocoe Cana Coaunera letono aanjera. Caute chujuhequiin, “Cachaauru letoaau Jofe neseeute, Simoonneein curuajai Fedoroneein acaauruacha curuaatei cotihaca cuuruinera. 14Acate, ‘Naaonjoaain neeute, satiin, isinejera, charaaichuru, ichoerejeeuru, naaonjoaihunri aina, raotojoeein jianacoon neeincha’, naain ichei bereeincha” ’, naa canaacaanu raine nainaa nii loreri erorane jana, 15acaauru rai irihanune nunuhetihanune janate, acaauru choae fauha uhe Cana Coaunera Suujue, cana choae fauha uhalune rijijieeincha. 16Nii janate casuujuaniha neeorite, ‘Acau quete niqui cacha camujuaain, cacha coujunacate Joaanra. Nete inara laaen Cana Coaunera Suujue que, cojunacatenohi niha curiquicheeincha’, naain aitohalu Cana Curuaanaa Jesocurisito nera. 17Aihana jaun, Jesocurisito esenetaacachene jana, cana rai Suujue tihane rijijieein, leeochaauru rai netonai, rai Suujue tiha Cana Coaunerane, nainihaaun nii caohatera rijitiin, irihanu canu neta. Chaneeina nereeun canu, Cana Coaunera colaihaje cuaain, nii caohatera rijitiin irihanune”, naa Fedorone janate, 18ninauhene cuuraatoraain, cuu aonajeeure nii Jerosaleeun nenacaauru Jesocurisito coreniha cana nejeraauru.

Nitohaneein aonajeeuruhane baihate, Cana Coaunera coroaecure, “Caohacha quete, Jorioniheichuru netonai coroatajane Cana Coaunera, acaauru netonai suujua coreein ichaonaa chabana nitajenaa charaneein nenaa raauruhane coinara”, naain.

Antioquiha neseu Jesocurisito ranojoineein nenacaauru

19Eseteba sohin jaooruhane baiha neeoriinte, leeochaauru Jesocurisito esenetaerauru netonai ariin, rerohecaaure. Nii jaun jetaote tabaauru Jodea batane caje sorohin, Fenisiau, chaaen Chifereu, Antioquihau, naaonjoaihun cuhinchuru sorohacoaaure. Nii cuhin sorooruhane jaacuru turuhin jetaote, leeinjiin Jorioocuru raiicha Jesocurisito beebejeein, que relanajaaure. Coatiha jetao laen, leeocha cachaauru- Jorioniheichuru relaauruhi. 20Ne jetaote, nii baiha, Chifereu, Sireneu naaonjoaihun nenacaauru Jesocurisito esenetaerauru tabaauru, nii Antioquiha neseu turuure. Cuu turuhin jetaote, nii cuu nenacaauru Jorioniheichuru rai, Cana Curuaanaa Jesoso que Erenaa Caohati beebejeein, que acaauru relaaure. 21Nii aina, acaauru coroatajaniha Cana Coaunera Suujuane jaun jetaote, jauriaa acaauruacha esenetai jianeein, Jesocurisito esenetaaure arajiin cachaauru.

22Nii coitucuuriin jetaote, “Chatohaneeuruhachata”, naain Antioquihau Berenabeen letoaaure, Jerosaleeun nenacaauru Jesocurisito ranojoihunru. 23Inae Antioquihau turuhin, acaauru coaracuruhane jana jetaote, caohatiin acaauru coroatajaniha Cana Coaunerane coaraane jaun jetao, jataain coroaje Berenabeen. Nitohaneein coroajeeinte, esinae rauhijiriin Jesocurisito esenetaain, baaso coacuelanaala esinae rauhijiriin nere tonoraauruhane coina, suujuatenajae Berenabeen. 24Caohacha cachaneein, Cana Coaunera Suujue que suujuequiin, jataain Jesocurisito esenetaera nihana jaunte, nitohane Berenabeen. Nitohaneein jetaote suujua coreein Jesocurisito ranojoihunru aina neeure arajiin cachaauru.

25Nii baiha jetaote, Tarosoo cue Berenabeen, Saoro arihane coina. 26Nitohaneein cuhin jetaote, cuu eruhin, amae Antioquihau. Cuu jetaote neeurelu, itolereneein lejaanacaain, cuu nenacaauru Jesocurisito ranojoihunru aina cuu nenacaauru cachaauru relaa. Nii Antioquihau jetaote, jauriaanejeein, “Curisitianoneein”, Jesocurisito ranojoihunru curuaateeuruhane nunuheteeurelu.

27Nii bana jetaote, Jerosaleeun caje cuhin, Antioquihau turuha cuure profetacuru tabaauru. 28Niichuru taba Acaboneein curuajai jetaote, ita taojiaauruha Jesocurisito esenetaeraaurune jana, acaauru cataaun nichaauraain:

“Aonacuchena, inara rai caa bete, coitucuhichera. Nerinaain jetao carajaaojoaain quinacai, Jodea batane sacutaainta”, naain be nii Acabo, que beratiha Cana Coaunera Suujuane jaun.

Nii mijitena jetaote nelu, Romanocuru curuanaacuru curuaanaa niha enferadoro Culaodione bana. 29Nii niritoha Acabone jaun jetaote, naain Jodea nenacaauru Jesocurisito coreniha cana nejeraauru coroatajanena jerecure, nii Antioquihau nenacaauru Jesocurisito esenetaerauru. Nitohaneeinte, ita jeeonijianaain coriqui teein, taojiaaure, le cachaauru caje, tenaa nainecuruhane rijiinanaain. 30Nitohaneein taojiaain jetaote, nii Jodea nenacaauru Jesocurisito esenetaeraauru bichauhenaauru rai letoaaure, Berenabeen, Saoro, naaonjoaihunri aina.

Currently Selected:

Ichanohichuru 11: URA

Highlight

Copy