Marcos 15

1Ja cꞌa tok sakari quemol quiꞌ canojel ja jefe quixin sacerdote chi rchomarsaxic nak nqueban tre ja Jesús e cachbil ja principaliꞌ xin tinamit e cachbil chakajaꞌ ja maestro ja netijon quixin ja winak tre ja ley xin Dios in canojel ja juleꞌ chic kꞌetol tak tzij quixin ja tinamit Israel. Quebaqꞌuel ja Jesús, quecꞌamel, xequijachaꞌ pa rukꞌaꞌ ja Pilato ja gobernador. 2Ja Pilato tok paꞌl chic ja Jesús chwach arjaꞌ xcꞌaxaj tre:

—¿La atat ja rat rey quixin ja tinamit Israel? neꞌ tre.

—Queriꞌ nacꞌa caniꞌ nabij leꞌ, neꞌxi rmal ja Jesús. 3Ja cꞌa jefe quixin sacerdote qꞌuiy rwach ja ril ja Jesús quemaj rbixic tre ja Pilato. 4Cꞌacꞌariꞌ ja Pilato xcꞌaxaj chic tre ja Jesús:

—¿La matacꞌulbaꞌ ja nbix chawe leꞌ? Congana takaꞌan juleꞌ awil nquibij chawe, neꞌ chic tre. 5Pro ja Jesús nixtacꞌa cꞌo ta jun tzij xbij, ni ma xcꞌulbaꞌ ta wiꞌ. Ja cꞌa Pilato congana junwiꞌ xutzꞌat ja queriꞌ xuban.

6Ja cꞌa Pilato ni cꞌamonnak wiꞌ tre chi ni cꞌo wiꞌ jun preso nsokpij pa tak nmakꞌij pascua pro nuyaꞌ lugar tre ja tinamit chi ejeꞌeꞌ necꞌutuni nak chi presoꞌil ja nsokpixel. 7Ecꞌo cꞌa juleꞌ preso, ejeꞌeꞌ eꞌocnak pa cheꞌ rumac ja xeyictaj trij ja gobierno in ecꞌo juleꞌ winak equicamsan. Cꞌo cꞌa jun chique ja preso rbinaꞌan Barrabás. 8Cꞌacꞌariꞌ xeꞌekaji ja winak ruqꞌuin ja Pilato in quewaꞌ quibij tre riꞌ:

—Tasokpij jun preso como niquirwariꞌ abanonto chake pa tak nmakꞌij pascua, xecheꞌ tre.

9—¿Nak newajoꞌ, la cꞌol egana chi nsokpijel ja rey ewxin ja rix aj Israel? neꞌe ja Pilato chique. 10Queriꞌ xbij chique como arjaꞌ bien rotak chi ja jefe quixin sacerdote congana quiakirnak canma trij ja Jesús in xa rmal ja raquiakarem tok quijachon pa rukꞌaꞌ. 11Pro ja jefe quixin sacerdote ejeꞌeꞌ xa xequeyoj ja winak in quibij chique chi nquicꞌutuj ja Barrabás chi nsokpixel in ma ja ta ja Jesús. 12Ja cꞌa Pilato arjaꞌ xbij chic jutij chique:

—Ja wi queriꞌ newajoꞌ ¿nak cꞌa nban tre nechꞌob ixix ja rachi ja rey ewxin ja rix aj Israel nixcheꞌ tre? neꞌe ja Pilato chique. 13Ejeꞌeꞌ quemaj chic jutij rakic quechiꞌ:

—Tacamsaj chwach cruz, xecheꞌ tre.

14—¿Nak cꞌa tre, nak cꞌa ritzelal rbanon? neꞌ chic ja Pilato chique. Pro ja rejeꞌeꞌ más chi na quemaj rakic quechiꞌ:

—Tacamsaj chwach cruz, xecheꞌ chic jutij tre. 15Ja cꞌa Pilato como arjaꞌ matirajoꞌ chi neyojtaj más ja winak rmalariꞌ tok xuyaꞌ quigana, xsokpijel ja Barrabás in xuyaꞌ orden chi nrapaxi ja Jesús. Ja cꞌa tok raptaji xujach pa quekꞌaꞌ ja necꞌamoꞌel rxin chi necamsax chwach cruz.

16Cꞌacꞌariꞌ ja soldado ejeꞌeꞌ quecꞌamel ja Jesús chwa jay ja bar nqꞌuejeꞌ wiꞌ ja gobernador in xequemol canojel ja juleꞌ chic cach tak soldado. 17Cꞌo jun tziak morada quecoj tre in quichomij jun corona, qꞌuix quecoj in quecoj pa rwiꞌ. 18Cꞌacꞌariꞌ quemaj rbanic saludar ja caniꞌ nba̱n saludar jun rey pro xa nquiyokꞌbej rxin: —Atat at rey quixin ja tinamit Israel, xecheꞌ tre. 19Cꞌo jun aj quesoc rij tak rwiꞌ tre in quichubaj. Cꞌacꞌariꞌ xexuqueꞌ chwach caniꞌ rukꞌij nqueyaꞌ pro xa yokꞌbal rxin ja nqueban. 20Ja tok tzuri yokꞌonem cumal cꞌacꞌariꞌ quejal ja tziak morada tre in quecoj chic tre ja ni rtziak wiꞌ arjaꞌ. Cꞌacꞌariꞌ quecꞌamel chi nequiripaꞌ chwach cruz.

* * * * * * * * * *

21Ja tok xebe cꞌo jun achi quewil, Simón rubiꞌ, arjaꞌ cꞌa melojto pa tak kꞌayis in triꞌ kꞌax wiꞌ ja bar ecꞌo wiꞌ in puersa queban tre chi nrijkajel ja cruz rxin ja Jesús. Ja Simón arjaꞌ aj Cirene in ecꞌo caꞌiꞌ rcꞌajol, jun rbinaꞌan Alejandro in jun rbinaꞌan Rufo.

22Cꞌacꞌariꞌ xebe, quecꞌamel ja Jesús pa jun lugar rbinaꞌan Gólgota. Gólgota tibij tzij lugar xin rwiꞌ camnak. 23Ja tok xeꞌekaj chipan ja lugar Gólgota quitzujuj vino tre chi nutij. Ja vino cꞌoli mirra yujun ruqꞌuin pro ja Jesús ma xucꞌam ta chique. 24Ja cꞌa tok riptaj cumal chwach cruz quemaj rbanic suerte trij ja rtziak. Queriꞌ queban utzcꞌa chi nquetzꞌat nak chi tziakil xtiquecꞌam chiquijujunal. 25Ja hora ja querip wiꞌ chwach cruz a las nueve xin akꞌabil. 26Ja Jesús tzꞌibaxi ja ril ja nbix tre, quewaꞌ rbanic ja ril nbixi riꞌ: —Jawaꞌ rachi riꞌ arjaꞌ rey quixin ja tinamit Israel, neꞌxi.

27In ecꞌo cꞌa caꞌiꞌ alakꞌomaꞌ xeri̱p chwach cruz chakajaꞌ, jun pa riquikꞌaꞌ ja Jesús in jun pa rxcon. 28Triꞌ cꞌa bantaj wiꞌ cumplir ja tzꞌibtal can ojer chipan ja rtzobal Dios tre ja Cristo, quewaꞌ nbij riꞌ: —Arjaꞌ queriꞌ nba̱n na tre ja caniꞌ nba̱n chique ja ritzel tak winak, neꞌe.

29Ja cꞌa winak ja nekꞌaxi ja tok nquetzꞌat ja Jesús xa nquitzebej xa nqueyokꞌ in quewaꞌ nquibij tre riꞌ:

—Atat xatbini chi nayoj ja templo in xa oxiꞌ kꞌij nrajoꞌ chi nayic chi wiꞌ jutij, 30camic tatoꞌoꞌ cꞌa awiꞌ ayon, catkajpi cꞌa chwach ja cruz, necheꞌ tre. 31In ja jefe quixin sacerdote ejeꞌeꞌ xa nqueyokꞌ chakajaꞌ e cachbil ja maestro ja netijon quixin ja winak tre ja ley xin Dios:

—Arjaꞌ Toꞌonel quixin winak neꞌxi, pro ja camic xnaꞌ maticowini nutoꞌ riꞌ arjaꞌ. 32Ja wi katzij chi arjaꞌ ja Cristo ja Rey kaxin ja rok aj Israel tikajto cꞌa camic chwach ja cruz. Ja wi xtikatzꞌat chi xtikajto nyukeꞌ cꞌa kacꞌuꞌx ariꞌ ruqꞌuin, necheꞌe. In queriꞌ queban ja xeri̱p chwach cruz pa rxquin ja Jesús, ejeꞌeꞌ queyokꞌ chakajaꞌ.

33Ja pa ncꞌajkꞌij cꞌo jun nimlaj kꞌekuꞌm xoqui nojel rwachꞌulew, cꞌa a las tres xin takakꞌij sakar chic jutij. 34Ja cꞌa Jesús tok xuban a las tres xin takakꞌij arjaꞌ congana xurak ruchiꞌ, quewaꞌ xbij riꞌ:

—Eloi, Eloi ¿lama sabactani? neꞌe. Jariꞌ tzij xbij quewaꞌ nbij riꞌ: —Nataꞌ Dios, nataꞌ Dios ¿nak tre tok inayaꞌon can? neꞌe. 35Ecꞌo cꞌa juleꞌ chique ja winak ja recꞌo triꞌ, ejeꞌeꞌ tok quicꞌaxaj ja xbij quewaꞌ quibij riꞌ:

—Jalaꞌ rachi leꞌ camnak profeta Elías ja nsiqꞌuij, xecheꞌe. 36Cꞌo cꞌa jun chique xercꞌamlaꞌto jun esponja, xchꞌakbaꞌ tre juleꞌ vinagre, xuxim chutzaꞌm jun aj in xuyaꞌ nojoj tre ja Jesús chi nutij in xbij:

—Chꞌenchilaꞌ, katzꞌataꞌ na cꞌa ja wi xtipeti ja rElías chi nurkajsaj chwach cruz, neꞌe. 37Ja cꞌa Jesús arjaꞌ xurak chic jutij ruchiꞌ in ni cam kaj. 38In chaka jalal tok raktaji ja manta ja tasben rpan ja nimlaj templo xin Dios ja bar cꞌo wiꞌ ja santilaj lugar, chaka caꞌiꞌ xuban. Raktaji, xelto chicaj, kajto cꞌa pa tokꞌulew. 39Cꞌo cꞌa jun capitán paꞌl chwach ja Jesús arjaꞌ tok xutzꞌat nak xuban ja tok cam kaj quewaꞌ xbij riꞌ:

—Jalaꞌ rachi leꞌ ni katzij wiꞌ chi Ralcꞌwal Dios, neꞌe.

40Ecꞌo cꞌa juleꞌ ixokiꞌ ja recꞌo triꞌ chakajaꞌ nquetzuꞌ pon ja nbantaji. Jun chique ja rixokiꞌ María Magdalena, in jun chic María ja recꞌo caꞌiꞌ ral, jun José in jun chic Jacobo ja chꞌip neꞌxi. In jun chic chique ja rixokiꞌ Salomé. 41Jawaꞌ rixokiꞌ riꞌ tok qꞌuejeꞌe ja Jesús pa Galilea ejeꞌeꞌ nij etran wiꞌ trij in quetoꞌ chipan nak ja cꞌo rjawaxic tre. In cꞌa ecꞌo na más ja rixokiꞌ ja xetreꞌel trij ja Jesús ja tok be pa Jerusalén.

* * * * * * * * * *

42-43Cꞌo cꞌa jun achi José rubiꞌ aj Arimatea, arjaꞌ nim rukꞌij chipan ja kꞌetbaltzij quixin ja tinamit Israel in chakajaꞌ nojel rucꞌuꞌx rayben ja kꞌij ja tok xtoqui ja gobierno xin Dios. Ja cꞌa José como xuban hora in como jariꞌ kꞌij ja nchomix wiꞌ nakun rxin ja nmakꞌij in cꞌuluto pispra rxin ja xulaꞌnbal kꞌij chakajaꞌ chewiꞌ tok be ruqꞌuin ja Pilato xercꞌutuj tre ja cuerpo rxin ja Jesús, arjaꞌ ma xbej ta riꞌ. 44Ja cꞌa Pilato tok xcꞌaxaj chi camnak chic ja Jesús arjaꞌ quewaꞌ xbij kaj pa ranma riꞌ: —¿Nak moda cꞌariꞌ tok camnak chic? neꞌ kaj. In xsiqꞌuij pon ja capitán, xcꞌaxaj tre wi ni katzij wiꞌ chi camnak chic ja Jesús. 45Ja cꞌa tok bix tre rmal ja capitán chi ni katzij wiꞌ chi cami cꞌacꞌariꞌ xuyaꞌ orden chi njachi ja cuerpo tre ja José. 46Cꞌacꞌariꞌ ja José xulokꞌ jun tziak, be xerkajsaj ja cuerpo rxin ja Jesús chwach cruz in xubar pa jun utzlaj tziak. Ja cꞌa tok bartaj rmal xeryaꞌaꞌ chipan jun panteón ja cꞌoton chwach jun portales in xtzꞌapij ruchiꞌ tre jun nimlaj abaj. 47Ja cꞌa María Magdalena rachbil ja jun chic María ja ruteꞌ José ejeꞌeꞌ ecꞌo triꞌ in nquetzuꞌ pon ja bar qꞌuejeꞌ can wiꞌ ja cuerpo rxin ja Jesús.

Currently Selected:

Marcos 15: tzjW

Highlight

Copy