Marcos 16

1Ja cꞌa tok xocꞌowi ja xulaꞌnbal kꞌij ja María Magdalena rachbil ja jun chic María ja ruteꞌ Jacobo rachbil chakajaꞌ ja Salomé ejeꞌeꞌ quelokꞌ juleꞌ akꞌom ja quiꞌ rxulaꞌ utzcꞌa chi nebe nequiyaꞌaꞌ trij ja cuerpo rxin ja Jesús. 2Ja cꞌa xin domingo pa rsakaric xebe ja bar cꞌo wiꞌ ja panteón, kas nelto kꞌij ja tok xeꞌekaj chipan ja lugar: 3—¿Nak la cꞌa xtilasani ja rabaj ja tzꞌapben ruchiꞌ ja panteón utzcꞌa chi nokcowini nokoc chipan? necheꞌe chibil tak quiꞌ. 4Pro ja tok quetzꞌat pon lasan chic ja rabaj, bien xecowini quetzꞌat como ja rabaj congana nim. 5Ja cꞌa tok xeꞌococ chipan ja panteón cꞌo jun alaꞌ quetzꞌat, pa quiquikꞌaꞌ tzꞌubul wiꞌ, cꞌo jun nimlaj tziak sak rcojon. Ejeꞌeꞌ congana quixbej quiꞌ rmal. 6Pro ja cꞌa ángel xbij chique:

—Ma texbej ta ewiꞌ. Anin wotak chi Jesús ja raj Nazaret ja nixtajini necanoj, ja camsax chwach cruz. Pro arjaꞌ cꞌastaj waꞌan rwach ariꞌ, ma waweꞌ chi ta cꞌo wiꞌ. Quixajoꞌ, tetzꞌataꞌ mpeꞌ ja lugar ja bar qꞌuejeꞌ wiꞌ ja rcuerpo. 7Pro ja camic jix, jebij tre ja Pedro in chique ja juleꞌ chic discípulo chi: —Ja Jesús arjaꞌ nnabeyaj chewach, nbe pa Galilea in triꞌ netzꞌataꞌ wiꞌ ja caniꞌ bin can chewe rmal. Queriꞌ tebij chique, neꞌe ja ángel. 8Ja cꞌa rixokiꞌ alnak xeꞌelto chipan ja panteón, queriꞌ queban como congana nebirboti rumac ja xbeben riꞌil. In ni majun bar ta triꞌ quibij wiꞌ ja quetzꞌat rumac ja congana quixben quiꞌ.

* * * * * * * * * *

9Ja Jesús tok cꞌastaji chiquicojol camnakiꞌ pa jun domingo pa rsakaric. Ja cꞌa kas xucꞌut wiꞌ riꞌ nabey, chwach María Magdalena. Jariꞌ María ja recꞌo wukuꞌ itzel tak espíritu eꞌocnak tre nabey in xelasaxel tre rmal ja Jesús. 10Arjaꞌ be cuqꞌuin ja rachiꞌiꞌ ja nij etran wiꞌ trij ja Jesús tok majaꞌn ticami, nerbij chique chi cꞌastaji ja Jesús. Ja cꞌa tok xekaj cuqꞌuin congana bis okꞌej nqueban. 11In xbij chique: —Cꞌastajnak chic ja Jesús, xintzꞌat waꞌan rwach, neꞌ chique, pro ejeꞌeꞌ ma xquinimaj ta.

12Ja cꞌa Jesús ecꞌo chic caꞌiꞌ rdiscípulo, ejeꞌeꞌ quimajon binem ebenak pa jun aldea tok chaka jalal xucꞌut riꞌ chiquewach pro junwiꞌ na ncaꞌyi chewiꞌ tok ma xchꞌobtaj ta cumal chanim chi Jesús. 13Pro ja tok chꞌobtaj cumal xebe cuqꞌuin ja juleꞌ chic cachbil, xequibij chique: —Cꞌastajnak chic ja Jesús, xecheꞌ chique, pro ma xnimax ta ja quibij.

14Ja cꞌa tok be jutzꞌit tiempo tre xucꞌut chic jutij riꞌ ja Jesús chiquewach ja julajuj rdiscípulo, ejeꞌeꞌ kas eꞌocnak pa mesa. Ja Jesús arjaꞌ xumaj quichꞌolixic rmal ja ma kas ta yukul quecꞌuꞌx ruqꞌuin in rmal ja kas maril nquinimaj chi cꞌastaji. Queriꞌ xuban chique como ejeꞌeꞌ ma xquinimaj ta ja bix chique cumal ja xetzꞌato rxin chi cꞌastajnak chic. 15Cꞌacꞌariꞌ xbij chic chique:

—Jix nojel nat nakaj chwach ja rwachꞌulew, jeyaꞌaꞌ rbixic ja utzlaj tzij ja ncꞌamonto, jeyaꞌaꞌ rbixic chique ja winak pro ni canojelal. 16Canojel ja winak ja xtiyukeꞌ quecꞌuꞌx wqꞌuin in neba̱n bautizar ejeꞌeꞌ nquewil ja totajem xin Dios. Ja cꞌa ma xtiyukeꞌ ta quecꞌuꞌx wqꞌuin ejeꞌeꞌ nkꞌe̱t tzij chiquij in neta̱kel chipan ja nimlaj rpokonal. 17Ja xtiyukeꞌ quecꞌuꞌx wqꞌuin cꞌo jeꞌe ja xtiyataj na chique ja ncꞌutuwi ja poder xin Dios quewariꞌ, jun, pa nubiꞌ anin nequilasajel itzel tak espíritu chique winak, in jun chic, netzijon chipan juleꞌ chic tzobal ja ma cotakin ta, 18in jun chic, wi chaka jalal nequechap itzel tak cumatz pro mta nba̱n chique cumal in wi chaka jalal nquetij veneno mta nuban chique chakajaꞌ. In chakajaꞌ wi nqueyaꞌ quekꞌaꞌ pa quewiꞌ ja yawaꞌiꞌ netzuri. Queriꞌ xbij chique ja rdiscípulo.

* * * * * * * * * *

19Ja cꞌa kajaw Jesús tok tzuri tzij rmal cuqꞌuin ja rdiscípulo arjaꞌ cꞌamarel chilaꞌ chicaj, xetzꞌabeꞌ pa riquikꞌaꞌ ja Dios. 20Ja cꞌa rdiscípulo ejeꞌeꞌ xeꞌelel, quemaj rbixic ja Jesucristo nojel nat nakaj. Ja kajaw Jesús arjaꞌ cachbilaj chi rbanic ja samaj, xuyaꞌ chique chi cꞌo nimak tak milagro nqueban jariꞌ ncꞌutuwi chi ni katzij wiꞌ nojel ja quimajon rbixic chique ja winak. Amén.

Currently Selected:

Marcos 16: tzjW

Highlight

Copy